قسمت تو دیکھ ٹوٹی ہے جا کر کہاں کمند

کچھ دور اپنے ہاتھ سے جب بام رہ گیا

دنیا میں ہم رہے تو کئی دن پہ اس طرح

دشمن کے گھر میں جیسے کوئی میہماں رہے

کوئی دن آگے بھی زاہد عجب زمانہ تھا

ہر اک محلہ کی مسجد شراب خانہ تھا

دل پا کے اس کی زلف میں آرام رہ گیا

درویش جس جگہ کہ ہوئی شام رہ گیا

ظالم تو میری سادہ دلی پر تو رحم کر

روٹھا تھا تجھ سے آپ ہی اور آپ من گیا

غیر سے ملنا تمہارا سن کے گو ہم چپ رہے

پر سنا ہوگا کہ تم کو اک جہاں نے کیا کہا

میں کن آنکھوں سے یہ دیکھوں کہ سایہ ساتھ ہو تیرے

مجھے چلنے دے آگے یا ٹک اس کو پیشتر لے جا

دل سے بس ہاتھ اٹھا تو اب اے عشق

دہ ویران پر خراج نہیں

کس بات پر تری میں کروں اعتبار ہائے

اقرار یک طرف ہے تو انکار یک طرف

چاہیں ہیں یہ ہم بھی کہ رہے پاک محبت

پر جس میں یہ دوری ہو وہ کیا خاک محبت

کب میں کہتا ہوں کہ تیرا میں گنہ گار نہ تھا

لیکن اتنی تو عقوبت کا سزا وار نہ تھا

ٹوٹا جو کعبہ کون سی یہ جائے غم ہے شیخ

کچھ قصر دل نہیں کہ بنایا نہ جائے گا

جس مصلے پہ چھڑکئے نہ شراب

اپنے آئین میں وہ پاک نہیں

آگے مرے نہ غیر سے گو تم نے بات کی

سرکار کی نظر کو تو پہچانتا ہوں میں

قائمؔ میں اختیار کیا شاعری کا عیب

پہنچا نہ کوئی شخص جب اپنے ہنر تلک

میں ہوں کہ میرے دکھ پہ کوئی چشم تر نہ ہو

مر بھی اگر رہوں تو کسی کو خبر نہ ہوں

ٹکڑے کئی اک دل کے میں آپس میں سئے ہیں

پھر صبح تلک رونے کے اسباب کئے ہیں

مے کی توبہ کو تو مدت ہوئی قائمؔ لیکن

بے طلب اب بھی جو مل جائے تو انکار نہیں

اہل مسجد نے جو کافر مجھے سمجھا تو کیا

ساکن دیر تو جانے ہیں مسلماں مجھ کو

مے پی جو چاہے آتش دوزخ سے تو نجات

جلتا نہیں وہ عضو جو تر ہو شراب میں

شکوہ نہ بخت سے ہے نے آسماں سے مجھ کو

پہنچی جو کچھ اذیت اپنے گماں سے مجھ کو

یاں تلک خوش ہوں امارد سے کہ اے رب کریم

کاش دے حور کے بدلے بھی تو غلماں مجھ کو

گندمی رنگ جو ہے دنیا میں

میری چھاتی پہ مونگ دلتا ہے

میں دوانا ہوں صدا کا مجھے مت قید کرو

جی نکل جائے گا زنجیر کی جھنکار کے ساتھ

پہلے ہی اپنی کون تھی واں قدر و منزلت

پر شب کی منتوں نے ڈبو دی رہی سہی

پوچھو ہو مجھ سے تم کہ پیے گا بھی تو شراب

ایسا کہاں کا شیخ ہوں یا پارسا ہوں میں

سیر اس کوچہ کی کرتا ہوں کہ جبریل جہاں

جا کے بولا کہ بس اب آگے میں جل جاؤں گا

قائمؔ جو کہیں ہیں فارسی یار

اس سے تو یہ ریختہ ہے بہتر

سنگ کو آب کریں پل میں ہماری باتیں

لیکن افسوس یہی ہے کہ کہاں سنتے ہو

ہر عضو ہے دل فریب تیرا

کہئے کسے کون سا ہے بہتر

نہ جانے کون سی ساعت چمن سے بچھڑے تھے

کہ آنکھ بھر کے نہ پھر سوئے گلستاں دیکھا

صبح تک تھا وہیں یہ مخلص بھی

آپ رکھتے تھے شب جہاں تشریف

ہر دم آنے سے میں بھی ہوں نادم

کیا کروں پر رہا نہیں جاتا

گرم کر دے تو ٹک آغوش میں آ

مارے جاڑے کے ٹھرے بیٹھے ہیں

لگائی آگ پانی میں یہ کس کے عکس نے پیارے

کہ ہم دیگر چلی ہیں موج سے دریا میں شمشیریں

قاضی خبر لے مے کو بھی لکھا ہے واں مباح

رشوت کا ہے جواز تری جس کتاب میں

کہتا ہے آئنہ کہ ہے تجھ سا ہی ایک اور

باور نہیں تو لا میں ترے روبرو کروں

پہلے ہی گدھا ملے جہاں شیخ

اس کعبہ کو ہے سلام اپنا

بنا تھی عیش جہاں کی تمام غفلت پر

کھلی جو آنکھ تو گویا کہ احتلام ہوا

دختر رز تو ہے بیٹی سی ترے اوپر حرام

رند اس رشتہ سے سارے ترے داماد ہیں شیخ

پروانے کی شب کی شام ہوں میں

یا روز کی شمع کی سحر ہوں

شیخ جی کیونکہ معاصی سے بچیں ہم کہ گناہ

ارث ہے اپنی ہم آدم کے اگر پوتے ہیں

قائم میں غزل طور کیا ریختہ ورنہ

اک بات لچر سی بزبان دکنی تھی

شیخ جی مانا میں اس کو تم فرشتہ ہو تو ہو

لیک حضرت آدمی ہونا نہایت دور ہے

درد دل کیوں کہ کہوں میں اس سے

ہر طرف لوگ گھرے بیٹھے ہیں

ہونا تھا زندگی ہی میں منہ شیخ کا سیاہ

اس عمر میں ہے ورنہ مزا کیا خضاب کا

تھوڑی سی بات میں قائمؔ کی تو ہوتا ہے خفا

کچھ حرمزدگئیں اپنی بھی تجھے یاد ہیں شیخ

وحشت دل کوئی شہروں میں سما سکتی ہے

کاش لے جائے جنوں سوئے بیاباں مجھ کو

مجھ بے گنہ کے قتل کا آہنگ کب تلک

آ اب بنائے صلح رکھیں جنگ کب تلک

قائمؔ میں ریختہ کو دیا خلعت قبول

ورنہ یہ پیش اہل ہنر کیا کمال تھا