Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for ",275"

Nazm MATCHES FOR ",275"

Nazm

aawazen

aflaak ke taaro.n me.n jaltii bujhtii hu.ii kuchh aavaaze.n hai.n
kohsaar ke phuulo.n me.n bikhrii bahkii hu.ii kuchh aavaaze.n hai.n
hai mausam-e-gul kii aamad se ashkaal-e-chaman me.n tabdiilii
yaa murG-e-sahar kii gulshan me.n badlii hu.ii kuchh aavaaze.n hai.n
zardaar kii har aavaaz me.n hai biphrii hu.ii suurat kaa naqsha
mazduur nahiif-o-bechaare sahmii hu.ii kuchh aavaaze.n hai.n
aavaaz jise ham kahte hai.n tahriik hai ye kuchh shaklo.n kii
ham jin ko samajhte hai.n shakle.n Thahrii hu.ii kuchh aavaaze.n hai.n
vo giit hame.n jo yaad rahe dekhii hu.ii suurat hai ko.ii
maanuus hai.n jo shakle.n ham se jaanii hu.ii kuchh aavaaze.n hai.n
ilhaad ke kuchh mai-KHvaaro.n ne pii lii hai ziyaada hii shaayad
atraaf-e-dayaar-e-maGrib se bahkii hu.ii kuchh aavaaze.n hai.n
ai 'zeb' khavayyaa hii apne hai.n un kii luGat se naa-vaaqif
har bahr se maujo.n kii suurat uThtii hu.ii kuchh aavaaze.n

Zeb Usmania
Nazm

nadamat

ham jo ik jaa.n ke safar par hai.n ravaa.n barso.n se
ham ko maaluum nahii.n kab aur kahaa.n KHatm ho ye
ham to bas tishna-dahan lab-ba-du.aa kushta-e-Gam
apne hone hii me.n gum pa.Dh na sake hai.n ab tak
vaqt ke baab-e-nadaamat me.n nihaa.n tahriire.n
un ko pa.Dh lete to shaayad na yuu.n hairaa.n hote
ik tamaashe kii tarah vaqt pe uryaa.n hote
apnii KHvaahish ko sar-e-bazm na rusvaa karte
apne lamho.n ko kisii taur na zindaa.n karte

Mohammad Afsar Sajid
Nazm

gautam-budh

ik janaaze ko uThaa.e jaa rahe the chand log
tum ne puuchhaa kyaa hu.aa kyuu.n jaa rahe ho tum maluul

Maikash Akbarabadi
Nazm

wasl-e-shirin ke liye

duur takziib kaa farhaad huu.n merii KHaatir
haq kii aavaaz sadaaqat kii aur shiirii.n hai
meraa mansab hai husuul-e-shiirii.n
vasl-e-shiirii.n ke liye tesha uThaataa huu.n mai.n
tesha-e-azm-o-yaqii.n jo abhii kund nahii.n
siina-e-sa.ng abhii KHushk nahii.n
har rag sang me.n ik juu.e ravaa.n pinhaa.n hai
mai.n ki farhaad huu.n rag rag me.n mirii
sho.ala-e-qatra-e-KHuu.n jaulaa.n hai
merii gardan pe hai sarbaar amaanat kii tarah
mere hii teshe se kaT saktaa hai lekin ye kabhii
jhuk to saktaa hii nahii.n
juT ga.e haath uThe aur bane ek kamaa.n
TuuT saktii nahii.n haatho.n kii kamaa.n
chhuuT saktaa nahii.n tesha meraa
is kii har zarb-e-javaa.n se jab tak
reza reza nahii.n ho
zulm-o-takziib kaa ye koh-e-giraa.n

Zaheer Siddiqui
Nazm

aur kya chahiye jine ke liye

kaun sii shai se hai duniyaa tirii mahruum bataa
aur kyaa chaahiye jiine ke liye bol zaraa

Sada Ambalvi
Nazm

ye kaisa raegan sa

intizaar sau.npaa hai tum ne
na ko.ii harf-e-dildaarii
ki jis ko dohraate hu.e
sabhii phiike se din
kaasnii belo.n se
Dhak jaa.e.n
na ko.ii lams kii utran
ki
jis ko o.Dh ke
mai.n shaam ke pahluu me.n
baiThii tumhaare vasl
ke kuchh KHvaab hii
kaa.Dhuu.n
na ko.ii bosa-e-ummiid
mere maathe pe mahkaa
ki jis kii lau me.n
merii nazme.n
raat bhar raqs kartii ho.n
tumhe.n yaad kartii ho.n
mire mahbuub
kaisaa raa.egaa.n saa
intizaar sau.npaa hai

Sania Shaikh
Nazm

ghar

pyaare beTe tuu ne ii.nT gaare cement aur sariye vaalaa makaan to banaa liyaa hai
merii du.aa hai ki ye mohabbat amn KHushii aur KHush-haal se bharaa ghar ban jaa.e
is ke darvaaze se ko.ii badii aur buraa.ii daaKHil hii na hone paa.e
khi.Dkiyo.n se zindagii-baKHsh havaa to zaruur andar aa.e lekin har tuufaan baahar hii rah jaa.e
teraa ye ghar vo kashtii ban jaa.e jo tujhe har bha.nvar se ba-KHair nikaal le jaa.e
garmiyaa.n aa.e.n to ghar qurbato.n kii garmii se damak uTThe
KHizaa.n aa.e to diivaaro.n par saje fan-paaro.n se bahaar sharmaa jaa.e
bahaar aa.e to mahsuus ho ki teraa ghar hii is kaa mamba.a hai
baahar kitnaa hii shor-o-GauGaa ho tere ghar me.n sukuun-o-raahat ho
baahar kitnaa hii a.ndheraa ho tere ghar me.n na.e hauslo.n ke charaaG raushan ho.n
tere ghar kii chaar-diivaarii is qile kii fasiil ban jaa.e
jis me.n nafrat naqb na lagaa sake
mohabbat jis ke andar mahfuuz ho
ek duusre kii mohabbat
insaan kii mohabbat
KHudaa kii mohabbat
ghar kar jaa.e
ghar

Mohammad Haneef Rame
Nazm

mauj-e-dariya

ai hasii.n saahil magar sotaa hai tuu
tere husn-e-be-KHabar par merii bedaarii nisaar
mere qatro.n kii jabii.n
muztarib sajdo.n kii duniyaa-e-niyaaz
aastaa.n naaz par zauq-e-ibaadat kaa hujuum
dekh larzaa.n saa.ns
terii diid ko aatii huu.n mai.n
gaatii hu.ii rotii hu.ii
aur tuu
iztiraar-e-fitrat-e-siimaab kaa ra.ng-e-adaa
terii is shaan-e-taGaaful par fidaa
sotaa hai tuu
dard-e-ulfat kii asiir
terii reto.n ko agar mai.n bosa duu.n
hai yahii ik aarzuu
ek jumbish ik nigaah
ik sarsaraahaT ek aah
ai mere dil kii devtaa
mere aa.iine se mas.huur-e-jamaal
tamtamaa uThte hai.n taare
Gam se ho jaate hai.n dam-bhar ke liye
mun.akis hai mere daaman me.n faroG-e-maahtaab
KHosha-e-parvii.n ki hai shaadaab-e-KHuun-e-aaftaab
paaniyo.n me.n lahlahaataa hai ajab andaaz se
husn-e-aiman kii bahaar
yaad hai chashm-e-kaliim
mere dil ke devtaa
sone ko huu.n
ek jumbish ik nigaah
ik sarsaraahaT ek aah
ai mere dil ke devtaa

Tasadduq Husain Khalid
Nazm

anar-kali

tere Gam me.n kitnaa naazuk ho gayaa hai dil ki ab
is bhare baazaar me.n
har sadaa ik ajnabii ehsaas kaa aa.iina hai
aaj tere Gam se faariG ho ke mai.n
bah rahaa huu.n lazzat-e-iz.haar ke sailaab me.n
la.Dkha.Daate re.ngte la.ng.Daate ha.nste bolte
lafz aur un kaa dhu.aa.n KHushbuu chamak
chal rahe hai.n mil ke be-aaha.ng aavaazo.n ke ra.ng
ajnabii ho.nTo.n ke lafz
aarzu.o.n ke Gubaare hasrato.n kii titliyaa.n
chaar-suu u.Dtii hai.n mai.n KHaamosh huu.n
guftuguu ke daa.ero.n me.n phail kar
ra.ng bhartaa jaa rahaa hai un tamannaa.o.n kaa KHuu.n
jin ke lafzo.n ne zabaa.n dii sun.ne vaalo.n kaa KHayaal
un me.n Duubaa jaa rahaa hai bolte lafzo.n kaa sahar
us ko apne daam me.n laataa hu.aa
phail kar aataa hai mujh tak pech-o-KHam khaataa hu.aa
aur mai.n
us kii kaifiyat kaa Gaaza apne chehre par lagaa.e
ik na.ii aavaaz ke saa.e me.n huu.n
chaahtaa huu.n band aa.nkho.n se mai.n us sailaab me.n
kuud jaa.uu.n aur nazzaara karuu.n
apne kaano.n se dilo.n ke tarjumaa.n alfaaz kaa
suurat goyaa se ba.Dh kar hai suKHan-andaaz kaa

Yusuf Zafar
Nazm

mere pas bahut si baaten hain

mere paas
bahut sii baate.n hai.n
jo mai.n ne zindagii se kashiid kii.n
chaahe achchhii ho yaa burii
baat sunaane ke liye hotii hai
aur mai.n ne aisaa nahii.n kiyaa
baat
zindagii kii amaanat hai
jise lauTaana pa.Dtaa hai
mai.n baato.n ko paTTe baa.ndh kar
jam.a kartaa rahaa
baato.n kaa baa.Daa
vasii.a hotaa chalaa gayaa
aur meraa suruur bhii
ek rose
ek baat mujh par bhau.nktii hai
meraa KHumaar TuuTtaa hai
mai.n
chau.nk kar dekhtaa huu.n
ek ke baa'd duusrii
aur duusrii ke baa'd tiisrii
vo sab
mujh par bhau.nkne lagtii hai.n
mai.n
unhe.n chumkaartaa huu.n
magar be-suud
shor se meraa dimaaG bhar jaataa hai
mujhe
kuchh bhii nahii.n suujhtaa
aur mai.n bhii
bhau.nknaa shuruu.a kar detaa huu.n

Mustafa Arbab
Nazm

zawal ka din

jis din mere des kii miTTii
komal miTTii
patthar ban kar
mahlo.n aur qil.o.n ke ruup me.n Dhal jaa.egii
us din gandum jal jaa.egii

Zahid Dar
Nazm

abhi barf-bari thami hai

bahut duur kyo.n bhii.D se mai.n kha.Daa huu.n
mujhe log kyo.n der se tak rahe hai.n
mujhe kyaa
dhanak-rang holii kaa u.Dtaa gulaal
machaltaa hu.aa ruup rang

Kailash Mahir
Nazm

mohabbat

mohabbat jis me.n laGzish bhii husuul-e-kaamraanii hai
mohabbat jis kii har kaavish suruur-e-jaavedaanii hai
mohabbat jis me.n Gam bhii intihaa-e-shaadmaanii hai
mohabbat jis kii tafsiir-o-vazaahat be-zabaanii hai

Rishi Patialvi
Nazm

purane coat

haathii kaan galaa hai jis kaa
astar udh.Daa daaman khiskaa
aaKHir tum kyaa doge us kaa
itne kam silvaa.ii de do
paa.nch nahii.n to Dhaa.ii de do
fii silvaT nau paa.ii de do
ye lo ghunDii kaise vaalaa
aage piichhe ga.Dba.D-jhaalaa
jaahil hai naa hindii kaalaa
buDDhaa tuu kyaa soch rahaa hai
mo.nchho.n ko kyuu.n noch rahaa hai
shaayad jaa.Daa kuuch rahaa hai
aa sardii se pinD kaTaa le
ko.ii uunii coat chukaa le
us din ko bhagvaan uThaa le
jis din ye pahnaavaa chho.Duu.n
janm ke saathii se mu.nh mo.Duu.n
naa-samjho.n se kyaa sar pho.Duu.n
rassii jis tahziib kii Dhiilii
botal ho jis chaak me.n giilii
sab jaltii hai suukhii giilii
ye jis kii bhii utran hogii
yaa bha.ngan yaa kanchan hogii
beva baa.njh girahstan hogii
german aurat kaa har daaman
jab jhaTkaa khaa.e kaa kundan
bilke.nge be-gintii jiivan
merii ye khaddar kii pinDii
uun se uu.nchii ruu.ii kii manDii
un coato.n ko kaalii jhan.Dii

Shaad Aarfi
Nazm

be-niyazi

KHayaal-o-fikr-e-KHuubaa.n se nahii.n ab mujh ko dilchaspii
ki un se zehn-o-dil ke saare naate to.D aaya huu.n
jamaal-e-zaahirii kii manzilo.n kaa zikr hii kyaa hai
manaazil husn-e-baatin kii bhii piichhe chho.D aaya huu.n
kisii bad-suuratii se ab nahii.n nafrat nigaaho.n ko
ko.ii bhii aib ab kulfat nahii.n ehsaas ko detaa
mahaasin aur ma.aa.ib dono.n be-ma.anii se lagte hai.n
asar un se mai.n ab achchhaa buraa kuchh bhii nahii.n letaa

Akhtar Bastavi
Nazm

ai kash

mujh se ab dekhii nahii.n jaatii.n
terii namnaak aa.nkhe.n
tere ye betaab aa.nsuu
mujh ko kar dete hai.n bekal
dil meraa kahtaa hai mujh se
ye tere ashko.n ke motii
Dhal kar girne se pahle
inhe.n apnii palko.n pe sajaa luu.n
muskuraa kar tum ko dekhuu.n
aur tumhe.n bhii
ha.nsne kii ek vaj.h duu.n
yuu.n saare Gam tumhaare
pal bhar me.n bhulaa duu.n
aur zindagii me.n
mai.n KHushii ke rang bhar duu.n
kaash
aisaa kar sakuu.n mai.n
ai kaash

Zakira Shabnam
Nazm

kashf

mai.n apnii khoj me.n gum thii
ki mai.n kyaa huu.n
azal ke haadse kaa silsila huu.n
yaa faqat miTTii kii muurat huu.n
musaKHKHar karne vaalaa zehn huu.n
ehsaas kii dhiimii sajal aavaaz huu.n
yaa apne KHaaliq kii
ko.ii aisii adaa huu.n
jo use KHud bhaa ga.ii hai
tumhe.n paayaa to ye jaanaa
ki meraa bhii ko.ii mafhuum hogaa
tumhe.n kho kar
mire mafhuum kii suurat nikhar aa.ii
fishaar-e-be-yaqiinii ne
vafaa ke baa'd gumbad me.n
azal ke karb kii suurat me.n
apnii ibtidaa dekhii
abad ke aa.ine me.n
intihaa kaa naqsh bhii dekhaa
KHudaa kaa aks bhii dekhaa

Yasmeen Hameed
Nazm

sayyah

use safar naame
aur sayyaaho.n kii zindagii kii kahaaniyaa.n bahut pasand thii.n
us ne muKHtalif mulko.n
aur vahaa.n ke logo.n ke baare me.n bahut kuchh ma.aluum kyaa thaa
vo ka.ii zabaane.n
aur safar karne ke tamaam tariiqe jaantaa thaa
aur vo ye bhii jaantaa thaa
ki jab ko.ii shaKHs kahii.n na jaa sake
to use kyaa karnaa chaahiye
vo KHvaab dekhtaa thaa
aur har raat KHud ko kisii na.ii sar-zamiin pe paataa
vo KHvaab dekhtaa thaa
jo inhe.n chiizo.n ke baare me.n hote
log us ke KHvaab dilchaspii se sunte the
phir ek raat us ne dekhaa
ki vo raasta bhuul gayaa hai
aur us ne KHud ko kabhii garm ret
aur kabhii duur tak phailii barf me.n dha.nsaa hu.aa paayaa
aglii sub.h us ne kisii se kuchh nahii.n kahaa
aur un riyaasato.n kii taraf nikal gayaa
jin par kahii.n na jaane vaale log chale hii jaate hai.n
na.e yaa puraane naqsho.n me.n
aise bahut se raaste dikhaa.e jaate hai.n
jo kahii.n nahii.n jaate

Zeeshan Sahil
Nazm

der aamad

aaTh hii billion umr zamii.n kii hogii shaayad
aisaa hii andaaza hai kuchh science kaa
chaar eshaariya billion saalo.n kii umr to biit chukii hai
kitnii der lagaa dii tum ne aane me.n
aur ab mil kar
kis duniyaa kii duniyaa-daarii soch rahii ho
kis maz.hab aur zaat aur paat kii fikr lagii hai
aa.o chale.n ab
tiin hii billion saal bache hai.n

Gulzar
Nazm

inqalab-e-fitrat

badal de baada-e-kohna badal de saaGar-e-gil ko
badal de tarz-e-mai-noshii badal de rang-e-mahfil ko
badal de qissa-e-majnuun-e-paaband-e-salaasil ko
badal de daastaan-e-kohna-e-lailaa-e-mahmil ko
badal de gulshan-e-hastii ke KHuunii.n laala-zaaro.n ko
badal de mahfil-e-ishrat ke kohna baada-KHvaaro.n ko
badal de kahkashaa.n ko chaa.nd ko suuraj ko taaro.n ko
badal de in sabhii furqat ke jhuuTe Gam-gusaaro.n ko
badal de ik na.e andaaz me.n raftaar-e-fitrat ko
badal de ik na.ii tanziim me.n paikaar-e-fitrat ko
badal de kaif-aagii.n lutf me.n aazaar-e-fitrat ko
badal de barbat-e-hastii ke har ik taar-e-fitrat ko
ye raaz-e-kaamraanii hai isii me.n kaamyaabii hai
yahaa.n har dam taGayyur hai ye fitrat inqilaabii hai

Barq Aashiyanvi
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now