Search result for "kham-ruu.ii" | Category - Nazm, Page

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "kham-ruu.ii"

Nazm MATCHES FOR "kham-ruu.ii"

Nazm

hisab-e-kam-o-besh

mai.n kitaab-e-Gam-e-hastii kii huu.n tahriir ko.ii
uljhii uljhii sii ho pechiida sii tafsiir ko.ii
mai.n ki ik jabr-e-musalsal me.n pisaa jaataa huu.n
dhu.ndlii dhu.ndlii sii ibaarat mai.n banaa jaataa huu.n
jabr aisaa hai ki lamho.n kii KHataa.e.n jaise
ban ga.ii.n sadiyo.n kii vo saarii sazaa.e.n jaise
jabr kii had bhii muqarrar nahii.n merii KHaatir
ya.anii mai.n saada-mizaaj aur vo zaalim shaatir
puuchhtaa bhii nahii.n mujh se ki tiraa sabr hai kyo.n
aur vazaahat bhii nahii.n is kii ki ye jabr hai kyo.n
pahle KHushbuu mirii gum-gashta sii raaho.n kii mile
phir sazaa jo bhii mile karda gunaaho.n kii mile
mai.n vo tahriir huu.n pa.Dhtaa nahii.n jis ko ko.ii
aur pa.Dh le to samajhtaa nahii.n jis ko ko.ii
rasm-e-KHat ajnabii jis kaa vo ibaarat huu.n mai.n
jis kii buniyaad hai KHasta vo imaarat huu.n mai.n
mak.Diyo.n ne mire atraaf bune hai.n jaale
ye hai.n jaale mire samjhe hu.e dekhe-bhaale
chaa.ndnii merii hai aur na hii sitaare mere
merii kashtii hai na dhaare na kinaare mere
mere maathe pe tabassum kii shikan bhii hogii
us ke piichhe ka.ii rishto.n kii thakan bhii hogii
mai.n pahu.nch jaa.uu.ngaa ik roz zamii.n ke niiche
KHaak hii hogii phir is KHaak-nashii.n ke niiche
gard jam jaa.egii ik roz mirii turbat par
phir to mai.n ro bhii na paa.uu.ngaa tirii harakat par
zehn maa.uuf hai aur dil abhii shaq hai meraa
tujh pe ai umr-e-ravaa.n tho.Daa to haq hai meraa
ai mirii ruuh ke maalik ye muqaddar kar de
mai.n Gam-e-ziist kaa maaraa mujhe patthar kar de
yaa hisaab-e-kam-o-besh aaj baraabar kar de
yaa mirii ruuh mire jism se baahar kar de

Khan Hasnain Aqib

Nazm

kiDe

mire kap.Do.n ko kii.De khaa ga.e to mai.n ne ye sochaa
mire na.nge badan kaa bhii yahii anjaam honaa hai
magar ye jaan kar mai.n kitnaa KHush huu.n kitnaa aasuuda
ki merii ruuh meraa zehn
aur afkaar-o-ehsaasaat hai.n
mahfuuz kii.Do.n se
mujhe un kaa KHayaal aataa hai
jin kii ruuh ko aur zehn ko
chaaTaa hai kii.Do.n ne
chhupaanaa chaahte hai.n jo libaas-e-faaKHira me.n an-ginat kii.De
dabaanaa chaahte hai.n itr kii KHushbuu se jo baatin kii badbuu me.n
jinhe.n kii.Do.n ne kii.Daa kar diyaa hai
lekin
nazar aate hai.n jo ab bhii hame.n insaan kii suurat
ki hai.n kuchh aur din
un ke libaas un ke badan
mahfuuz kii.Do.n se
vo din nazdiik hai jab un par zahriilii davaa chhi.Dke.nge
nasl-e-nau ke daanish-var

Ehsan Ali Khan

Nazm

rag-yug ki nazmen

bachche khel rahe hai.n apnaa
shoriikaar kaa khel puraanaa
raag-yug kahe dhuup jahaa.n
piilii hai to kabhii dhaanii
bahtaa paanii
ro.iida uljhaa.o
KHas-o-KHaashaak dhatuuraa naag-phanii
aur vahii.n champaa kii shaaKH bhii
sar-taabii se phuule-phale
aahan tez ka.Dii dhuupo.n kaa
aur bhii kuchh pighle
taptaa KHuun hai pii jaa.egaa
som amrit kaa ye ghuu.nT
luu chaltii rahii
qatra qatra pasiina kab kaa suukh chukaa
taaza-dilii ke halkore aa.nkho.n me.n magar
ab bhii baaqii
dhuul bharii pagDanDii balkhaatii mu.Dtii hai
raqs-kunaa.n hai baguule me.n ik barg-e-surKH
kohistaanii silo.n ke beach chamaktaa paanii
ik jhaa.Dii se u.Daane.n bhartii
baalaa baalaa paro.n kii jhilmil
duusrii jhaa.Dii me.n ruu-posh
itnii sii ik baat usii se
sonaa sonaa dil kaa ufuq
ra.ng bharaa naira.ng bharaa
jal me.n Duube aks u.De
titlii ke paro.n se
vo jal thaa
nar-muuhii
halchal se jo baaz rahaa
dil to na thaa
kab us kii thaah me.n jhalkaa hu.aa
damkii damkii hun barsaatii dhu.nd kaa ik puurab
titlii ke paro.n se u.D paayaa

Shafiq Fatima Shera

Nazm

dasahra

hai dasahraa yaadgaar-e-azmat-e-hindostaa.n
hindu.o.n kii ik qadiimii fat.h-o-nusrat kaa nishaa.n
ik miTii sii ye nishaanii daulat-o-iqbaal kii
yaad dilvaatii hai un ayyaam-e-farruKH-faal kii
jab ki thii ham me.n bhii aise zor-o-taaqat kii numuud
hech thii diivaan ro.e.n tan kii jis se hast-o-buud
jab akele uTh kha.De hote the ham bahar-e-nabard
aur kar dete the apne dushmano.n ko gard gard
dil me.n himmat haath me.n apne faqat shor-e-al-amaa.n
baa.ndh kar vo pul samundar ko kiyaa ham ne ubuur
jis ko hairaa.n dekh kar hai.n aaj bhii ahl-e-shu.uur
fauj-e-raavan laa-ta.ad thii reg-e-sahraa kii tarah
aur uma.nD aa.ii thii vaqt-e-jang dariyaa kii tarah
raavan-e-KHu.nKHaar aur vo koh-paikar is ke dev
jin kii KHuu.n-KHvaarii kaa thaa saare zamaane me.n Gariiv
qila vo lanka kaa jo naa-qaabiluttasKHiir thaa
jis pe naazaa.n apne dil me.n raavan-e-be-piir thaa
the tilaa.ii burj jis ke aur murassaa baam-o-dar
jin kii choTii par na pahu.nche ko.ii murG-e-tez-par
sauda-e-laal-o-zamurrad thii vahaa.n kii KHaak bhii
ik tilism aisaa ki qaasir thaa jahaa.n aur ik bhii
ham ne aise dushmano.n par fat.h paa.ii thii kabhii
apne hisse me.n bhii ye mojiz-numaa.ii thii kabhii
aaj vo din hai ki ham us yaad ko taaza kare.n
ruu-e-zebaa-e-uruus-e-fat.h pur Gaaza kare.n
mil ke gaa.e.n raam ke gun dil me.n ho josh-e-suruur
qalb-e-saafii maKHzan-e-vahdat ho siina rashk-e-tuur
ye dasahraa ashra-e-ishrat hai apne vaaste
KHaaliq-e-kaunain kii ne.amat hai apne vaaste

Munshi Naubat Rai Nazar Lakhnavi

Nazm

diwar

samundar KHaan ik pashtuu kaa shaa.ir
jaa rahaa thaa gaa.nv se duur ek viiraane me.n
yak dam ik jhapaakaa saa hu.aa
aur zehn ke parde pe ik dhu.ndlaa hayuulaa ban.ne aur miTne lagaa
par shuumii-e-qismat qalam hii jeb me.n thaa aur na kaaGaz kaa ko.ii purza
samundar KHaan ruk kar aur ik patthar pe Tik kar miich kar aa.nkho.n ko
duniyaa aur maa-fiihaa se begaana hu.aa

Zafar Sayyad

Nazm

judai

shajar hajar pe hai.n Gam kii ghaTaa.e.n chhaa.ii hu.ii
subuk-KHiraam havaa.o.n ko nii.nd aa.ii hu.ii
rage.n zamii.n ke manaazir kii pa.D chalii.n Dhiilii
ye KHasta-haalii ye darmaandagii ye sannaaTaa
fazaa-e-niim-shabii bhii hai sansanaaii hu.ii
dhu.aa.n dhu.aa.n se manaazir hai.n shabnamistaa.n ke
sayyaara raat kii zulfe.n hai.n rasmasaa.ii hu.ii
ye rang taaro.n bharii raat ke tanaffus kaa
ki buu-e-dard me.n har saa.ns hai basaa.ii hu.ii
KHunuk udaas fazaa.o.n kii aa.nkho.n me.n aa.nsuu
tire firaaq kii ye Tiis hai uThaa.ii hu.ii
sukuut-e-niim-shabii gahraa hotaa jaataa hai
rage.n hai.n siina-e-hastii kii tilmilaa.ii hu.ii
hai aaj saaz-e-navaa-haa-e-KHuu.n-chakaa.n ai dost
hayaat terii judaa.ii kii choT khaa.ii hu.ii
mirii in aa.nkho.n se ab nii.nd parda kartii hai
jo tere panja-e-ra.ngii.n kii thii.n jagaa.ii hu.ii
sarishk paale hu.e tere narm daaman ke
nashaat tere tabassum se jagmagaa.ii hu.ii
laTak vo gesu.o.n kii jaise pech-o-taab-e-kamand
lachak bhavo.n kii vo jaise kamaa.n jhukaa.ii hu.ii
sahar kaa jaise tabassum damak vo maathe kii
kiran suhaag kii bi.ndii kii lahlahaa.ii hu.ii
vo a.nkh.Diyo.n kaa fusuu.n ruup kii vo deviyyat
vo siina ruuh-e-numuu jis me.n kanmanaa.ii hu.ii
vo sej saa.ns kii KHushbuu ko jis pe nii.nd aa.e
vo qad gulaab kii ik shaaKH lahlahaa.ii hu.ii
vo jhilmilaate sitaare tire pasiine ke
jabiin-e-shaam-e-javaanii thii jagmagaa.ii hu.ii
ho jaise but-kada aazar kaa bol uThne ko
vo ko.ii baat sii goyaa labo.n tak aa.ii hu.ii
vo dhaj vo dilbarii vo kaam-ruup aa.nkho.n kaa
sajal adaa.o.n me.n vo raagnii rachaa.ii hu.ii
ho KHvaab-gaah me.n sho.alo.n kii karvaTe.n dam-e-sub.h
vo bhairvii.n tirii bedaariyo.n kii gaa.ii hu.ii
vo muskuraatii hu.ii lutf-e-diid kii sub.he.n
tirii nazar kii shu.aa.o.n kii gudgudaa.ii hu.ii
lagii jo tere tasavvur ke narm sho.alo.n se
hayaat-e-ishq se us aa.nch kii tipaa.ii hu.ii
hanuuz vaqt ke kaano.n me.n chahchahaahaT hai
vo chaap tere qadam kii sunii-sunaa.ii hu.ii
hanuuz siina-e-maazii me.n jagmagaahaT hai
damakte ruup kii diipaavlii jalaa.ii hu.ii
lahuu me.n Duubii uma.ngo.n kii maut rok zaraa
hariim-e-dil me.n chalii aatii hai DhiTaa.ii hu.ii
rahegii yaad javaa.n-bevgii mohabbat kii
suhaag raat kii vo chuu.Diyaa.n ba.Dhaa.ii hu.ii
ye merii pahlii mohabbat na thii magar ai dost
ubhar ga.ii hai.n vo choTe.n dabii-dabaa.ii hu.ii
supurdagii o KHuluus-e-nihaa.n ke parde me.n
jo terii narm-nigaahii kii thii.n bi.Thaa.ii hu.ii
uThaa chukaa huu.n mai.n pahle bhii hijr ke sadme
vo saa.ns dukhtii hu.ii aa.nkh DabDabaa.ii hu.ii
ye haadsa hai ajab tujh ko paa ke kho denaa
ye saaneha hai Gazab terii yaad aa.ii hu.ii
ajiib dard se ko.ii pukaartaa hai tujhe
galaa rundhaa hu.aa aavaaz thar tharraa.ii hu.ii
kahaa.n hai aaj tuu ai ra.ng-o-nuur kii devii
a.ndherii hai mirii duniyaa luTii-luTaa.ii hu.ii
pahu.nch sakegii bhii tujh tak mirii navaa-e-firaaq
jo kaa.enaat ke ashko.n me.n hai nahaa.ii hu.ii

Firaq Gorakhpuri

Nazm

aadhi raat

1
siyaah pe.D hai.n ab aap apnii parchhaa.ii.n
zamii.n se taa-mah-o-anjum sukuut ke miinaar
jidhar nigaah kare.n ik athaah gum-shudgii
ik ek kar ke fasurda charaaGo.n kii palke.n
jhapak ga.ii.n jo khulii hai.n jhapakne vaalii hai.n
jhalak rahaa hai pa.Daa chaa.ndnii ke darpan me.n
rasiile kaif bhare manzaro.n kaa jaagtaa KHvaab
falak pe taaro.n ko pahlii jamaahiyaa.n aa.ii.n
2
tamoliyo.n kii dokaane.n kahii.n kahii.n hai.n khulii
kuchh uu.nghtii hu.ii ba.Dhtii hai.n shaah-raaho.n par
savaariyo.n ke ba.De ghu.ngruu.o.n kii jhankaare.n
kha.Daa hai os me.n chup-chaap har si.ngaar kaa pe.D
dulhan ho jaise hayaa kii sugandh se bojhal
ye mauj-e-nuur ye bharpuur ye khilii hu.ii raat
ki jaise khiltaa chalaa jaa.e ik safed ka.nval
sipaah-e-ruus hai ab kitnii duur berlin se
jagaa rahaa hai ko.ii aadhii raat kaa jaaduu
chhalak rahii hai KHum-e-Gaib se sharaab-e-vajuud
fazaa-e-niim-shabii nargis-e-KHumaar-aaluud
ka.nval kii chuTkiyo.n me.n band hai nadii kaa suhaag
3
ye ras kaa sej ye sukumaar ye sukomal gaat
nayan kamal kii jhapak kaam-ruup kaa jaaduu
ye rasmasaa.ii palak kii ghanii ghanii parchhaa.ii.n
falak pe bikhre hu.e chaa.nd aur sitaaro.n kii
chamaktii u.ngliyo.n se chhi.D ke saaz fitrat ke
taraane jaagne vaale hai.n tum bhii jaag uTho
4
shu.aa-e-mahr ne yuu.n un ko chuum chuum liyaa
nadii ke biich kumudnii ke phuul khil uTThe
na muflisii ho to kitnii hasiin hai duniyaa
ye jhaa.e.n jhaa.e.n sii rah rah ke ek jhii.ngur kii
hinaa kii Tattiyo.n me.n narm sarsaraahaT sii
fazaa ke siine me.n KHaamosh sansanaahaT sii
ye kaa.enaat ab ik nii.nd le chukii hogii
5
ye mahv-e-KHvaab hai.n ra.ngiin machhliyaa.n tah-e-aab
ki hauz-e-sehn me.n ab in kii chashmake.n bhii nahii.n
ye sar-niguu.n hai.n sar-e-shaaKH phuul gu.Dhal ke
ki jaise be-bujhe a.ngaare ThanDe pa.D jaa.e.n
ye chaa.ndnii hai ki umDaa hu.aa hai ras-saagar
ik aadmii hai ki itnaa dukhii hai duniyaa me.n
6
qariib chaa.nd ke ma.nDlaa rahii hai ik chi.Diyaa
bha.nvar me.n nuur ke karvaT se jaise naav chale
ki jaise siina-e-shaa.ir me.n ko.ii KHvaab pale
vo KHvaab saa.nche me.n jis ke na.ii hayaat Dhale
vo KHvaab jis se puraanaa nizaam-e-Gam badle
kahaa.n se aatii hai madmaaltii lataa kii lipaT
ki jaise saik.Do.n pariyaa.n gulaabiyaa.n chhi.Dkaa.e.n
ki jaise saik.Do.n ban-deviyo.n ne jhuule par
adaa-e-KHaas se ik saath baal khol diye
lage hai.n kaan sitaaro.n ke jis kii aahaT par
is inqalaab kii ko.ii KHabar nahii.n aatii
dil-e-nujuum dha.Dakte hai.n kaan bajte hai.n
7
ye saa.ns letii hu.ii kaa.enaat ye shab-e-maah
ye pur-sukuu.n ye pur-asraar ye udaas samaa.n
ye narm narm havaa.o.n ke niil-guu.n jho.nke
fazaa kii oT me.n mardo.n kii gungunaahaT hai
ye raat maut kii be-ra.ng muskuraahaT hai
dhu.aa.n dhu.aa.n se manaazir tamaam nam-diida
KHunuk dhundalke kii aa.nkhe.n bhii niim KHvaabiida
sitaare hai.n ki jahaa.n par hai aa.nsu.o.n kaa kafan
hayaat parda-e-shab me.n badaltii hai pahluu
kuchh aur jaag uThaa aadhii raat kaa jaaduu
zamaana kitnaa la.Daa.ii ko rah gayaa hogaa
mire KHayaal me.n ab ek baj rahaa hogaa
8
gulo.n ne chaadar-e-shabnam me.n mu.nh lapeT liyaa
labo.n pe so ga.ii kaliyo.n kii muskuraahaT bhii
zaraa bhii sumbul-e-turkii laTe.n nahii.n hiltii.n
sukuut-e-niim-shabii kii hade.n nahii.n miltii.n
ab inqalaab me.n shaayad ziyaada der nahii.n
guzar rahe hai.n ka.ii kaarvaa.n dhundalke me.n
sukuut-e-niim-shabii hai unhii.n ke paa.nv kii chaap
kuchh aur jaag uThaa aadhii raat kaa jaaduu
9
na.ii zamiin nayaa aasmaa.n na.ii duniyaa
na.e sitaare na.ii gardishe.n na.e din raat
zamii.n se taa-ba-falak intizaar kaa aalam
fazaa-e-zard me.n dhu.ndle Gubaar kaa aalam
hayaat maut-numaa intishaar kaa aalam
hai mauj-e-duud ki dhundlii fazaa kii nabze.n hai.n
tamaam KHastagii-o-maa.ndgii ye daur-e-hayaat
thake thake se ye taare thakii thakii sii ye raat
ye sard sard ye be-jaan phiikii phiikii chamak
nizaam-e-saaniya kii maut kaa pasiinaa hai
KHud apne aap me.n ye kaa.enaat Duub ga.ii
KHud apnii kokh se phir jagmagaa ke ubhregii
badal ke kechulii jis tarah naag lahraa.e
10
KHunuk fazaa.o.n me.n raqsaa.n hai.n chaa.nd kii kirne.n
ki aabgiino.n pe pa.Dtii hai narm narm phuvaar
ye mauj-e-Gaflat-e-ma.asuum ye KHumaar-e-badan
ye saa.ns nii.nd me.n Duubii ye aa.nkh madmaatii
ab aa.o mere kaleje se lag ke so jaa.o
ye palke.n band karo aur mujh me.n kho jaa.o

Firaq Gorakhpuri

Nazm

goristan-e-shahi

aasmaa.n baadal kaa pahne KHirqa-e-deriina hai
kuchh mukaddar saa jabiin-e-maah kaa aa.iina hai
chaa.ndnii phiikii hai is nazzaara-e-KHaamosh me.n
sub.h-e-saadiq so rahii hai raat kii aaGosh me.n
kis qadar ashjaar kii hairat-fazaa hai KHaamushii
barbat-e-qudrat kii dhiimii sii navaa hai KHaamushii
baatin-e-har-zarra-e-aalim saraapaa dard hai
aur KHaamoshii lab-e-hastii pe aah-e-sard hai
aah jaulaa.n-gaah-e-aalam-giir yaanii vo hisaar
dosh par apne uThaa.e saik.Do.n sadiyo.n kaa baar
zindagii se thaa kabhii ma.amuur ab sunsaan hai
ye KHamoshii us ke ha.ngaamo.n kaa goristaan hai
apne sukkaan-e-kuhan kii KHaak kaa dil-daada hai
koh ke sar par misaal-e-paasbaa.n istaada hai
abr ke rauzan se vo baalaa-e-baam-e-aasmaa.n
naazir-e-aalam hai najm-e-sabz-faam-e-aasmaa.n
KHaak-baazii vus.at-e-duniyaa kaa hai manzar use
daastaa.n naakaami-e-insaa.n kii hai azbar use
hai azal se ye musaafir suu-e-manzil jaa rahaa
aasmaa.n se inqilaabo.n kaa tamaashaa dekhtaa
go sukuu.n mumkin nahii.n aalam me.n aKHtar ke liye
faatiha-KHvaanii ko ye Thahraa hai dam bhar ke liye
ra.ng-o-aab-e-zinagii se gul-ba-daaman hai zamii.n
saik.Do.n KHuu.n-gashta tahziibo.n kaa madfan hai zamii.n
KHvaab-gah shaaho.n kii hai ye manzil-e-hasrat-fazaa
diida-e-ibrat KHiraaj-e-ashk-e-gul-guu.n kar adaa
hai to goristaa.n magar ye KHaak-e-garduu.n-paaya hai
aah ik bargashta qismat qaum kaa sarmaaya hai
maqbaro.n kii shaan hairat-aafrii.n hai is qadar
jumbish-e-mizhgaa.n se hai chashm-e-tamaashaa ko hazar
kaifiyat aisii hai naakaamii kii is tasviir me.n
jo utar saktii nahii.n aa.iina-e-tahriir me.n
sote hai.n KHaamosh aabaadii ke ha.ngaamo.n se duur
muztarib rakhtii thii jin ko aarzuu-e-naa-subuur
qabr kii zulmat me.n hai in aaftaabo.n kii chamak
jin ke darvaazo.n pe rahtaa hai jabii.n-gustaar falak
kyaa yahii hai in shahanshaaho.n kii azmat kaa ma.aal
jin kii tadbiir-e-jahaa.nbaanii se Dartaa thaa zavaal
rob-e-faGfuurii ho duniyaa me.n ki shaan-e-qaisarii
Tal nahii.n saktii Ganiim-e-maut kii yuurish kabhii
baadshaaho.n kii bhii kisht-e-umr kaa haasil hai gor
jaada-e-azmat kii goyaa aaKHirii manzil hai gor
shorish-e-bazm-e-tarab kyaa uud kii taqriir kyaa
dardmandaan-e-jahaa.n kaa naala-e-shab-giir kyaa
arsa-e-paikaar me.n ha.ngaama-e-shamshiir kyaa
KHuun ko garmaane vaalaa naara-e-takbiir kyaa
ab ko.ii aavaaz soto.n ko jagaa saktii nahii.n
siina-e-viiraa.n me.n jaan-e-rafta aa saktii nahii.n
ruuh-e-musht-e-KHaak me.n zahmat-kash-e-bedaad hai
kuucha gard-e-nai hu.aa jis dam nafas fariyaad hai
zindagii insaa.n kii hai maanind-e-murG-e-KHush-navaa
shaaKH par baiThaa ko.ii dam chahchahaayaa u.D gayaa
aah kyaa aa.e riyaaz-e-dahr me.n ham kyaa ga.e
zindagii kii shaaKH se phuuTe khile murjhaa ga.e
maut har shaah o gadaa ke KHvaab kii taabiir hai
is sitamgar kaa sitam insaaf kii tasviir hai
silsila hastii kaa hai ik bahr-e-naa-paidaa-kanaar
aur is dariyaa-e-be-paayaa.n kii mauje.n hai.n mazaar
ai havas KHuu.n ro ki hai ye zindagii be-e'tibaar
ye sharaare kaa tabassum ye KHas-e-aatish-savaar
chaa.nd jo suurat-gar-e-hastii kaa ik ejaaz hai
pahne siimaabii qabaa mahv-e-KHiraam-e-naaz hai
charKH-e-be-anjum kii dahshatnaak vus.at me.n magar
bekasii is kii ko.ii dekhe zaraa vaqt-e-sahar
ik zaraa saa abr kaa Tuk.Daa hai jo mahtaab thaa
aaKHirii aa.nsuu Tapak jaane me.n ho jis kii fanaa
zindagii aqvaam kii bhii hai yuu.nhii be-e'tibaar
ra.ng-haa-e-rafta kii tasviir hai un kii bahaar
is ziyaa.n-KHaane me.n ko.ii millat-e-garduu.n-vaqaar
rah nahii.n saktii abad tak baar-e-dosh-e-rozgaar
is qadar qaumo.n kii barbaadii se hai KHuugar jahaa.n
dekhtaa be-e'tinaa.ii se hai ye manzar jahaa.n
ek suurat par nahii.n rahtaa kisii shai ko qaraar
zauq-e-jiddat se hai tarkiib-e-mizaaj-e-rozgaar
hai nagiin-e-dahr kii ziinat hamesha naam-e-nau
maadar-e-giitii rahii aabastan-e-aqvaam-e-nau
hai hazaaro.n qaafilo.n se aashnaa ye rahguzar
chashm-e-koh-e-nuur ne dekhe hai.n kitne taajvar
misr o baabul miT ga.e baaqii nishaa.n tak bhii nahii.n
daftar-e-hastii me.n un kii daastaa.n tak bhii nahii.n
aa dabaayaa mehr-e-iiraa.n ko ajal kii shaam ne
azmat-e-yuunaan-o-ruumaa luuT lii ayyaam ne
aah muslim bhii zamaane se yuu.nhii ruKHsat hu.aa
aasmaa.n se abr-e-aazaarii uThaa barsaa gayaa
hai rag-e-gul sub.h ke ashko.n se motii kii la.Dii
ko.ii suuraj kii kiran shabnam me.n hai uljhii hu.ii
siina-e-dariyaa shu.aa.o.n ke liye gahvaara hai
kis qadar pyaaraa lab-e-juu mehr kaa nazzaara hai
mahv-e-ziinat hai sanobar juu.ebaar-e-aa.iina hai
Guncha-e-gul ke liye baad-e-bahaar-e-aa.iina hai
na.ara-zan rahtii hai koyal baaG ke kaashaane me.n
chashm-e-insaa.n se nihaa.n patto.n ke uzlat-KHaane me.n
aur bulbul mutrib-e-ra.ngii.n navaa-e-gulsitaa.n
jis ke dam se zinda hai goyaa havaa-e-gulsitaa.n
ishq ke ha.ngaamo.n kii u.Dtii hu.ii tasviir hai
KHaama-e-qudrat kii kaisii shoKH ye tahriir hai
baaG me.n KHaamosh jalse gulsitaa.n-zaado.n ke hai.n
vaadi-e-kohsaar me.n na.are shabaa.n-zaado.n ke hai.n
zindagii se ye puraanaa KHaak-daa.n ma.amuur hai
maut me.n bhii zindagaanii kii ta.Dap mastuur hai
pattiyaa.n phuulo.n kii girtii hai.n KHizaa.n me.n is tarah
dast-e-tifl-e-KHufta se ra.ngii.n khilaune jis tarah
is nashaat-aabaad me.n go aish be-andaaza hai
ek Gam yaanii Gam-e-millat hamesha taaza hai
dil hamaare yaad-e-ahd-e-rafta se KHaalii nahii.n
apne shaaho.n ko ye ummat bhuulne vaalii nahii.n
ashk-baarii ke bahaane hai.n ye uj.De baam o dar
girya-e-paiham se biinaa hai hamaarii chashm-e-tar
dahr ko dete hai.n motii diida-e-giryaa.n ke ham
aaKHirii baadal hai.n ik guzre hu.e tuufaa.n ke ham
hai.n abhii sad-haa guhar is abr kii aaGosh me.n
barq abhii baaqii hai is ke siina-e-KHaamosh me.n
vaadi-e-gul KHaak-e-sahraa ko banaa saktaa hai ye
KHvaab se ummiid-e-dahqaa.n ko jagaa saktaa hai ye
ho chukaa go qaum kii shaan-e-jalaalii kaa zuhuur
hai magar baaqii abhii shaan-e-jamaalii kaa zuhuur

Allama Iqbal

Nazm

asasa

tere mere
dukh-sukh me.n
rut kaa jaaduu baaqii hai
chho.D ke puKHta ra.ngo.n ko
aur nahii.n kuchh KHaam
raat adhuure jaa.De kii
saavan kii ik shaam

Khumar Mirzada

Nazm

dhuniya

phindak phindak phindak phak
dhunak dhunak dhun dhunak dhunak
taa.nt bajii aur niklaa raag
ru.ii banii saabun kaa jhaag
kaisii chhantii jaatii hai
baadal bantii jaatii hai
kitnaa Dher hu.aa aahaa
mai.n is Dher pe kuudu.ngaa
ko.ii choT na aa.egii
ruu.ii magar dab jaa.egii
ittii ruu.ii itnaa Dher
ho ga.ii baarah terah ser
le ab ruu.ii ho ga.ii saaf
bhar le takiye aur lihaaf
in se sab sukh paate hai.n
o.Dhte aur bichhaate hai.n
miltaa hai sab ko aaraam
vaah re dhuniye teraa kaam
vaah rii dhunkii dhunak dhunak
phindak phindak phak phak phak

Hafeez Jalandhari

Nazm

sanp wali

baa.nho.n me.n saa.np lapeTe
jab tuu mujh se miltii hai
terii saa.ns me.n
ek na ek
zahr kii lahr
kam hotii hai

Rais Farogh

Nazm

main

terii guftuguu me.n
ek justujuu hai
jo mere ruu-ba-ruu hai
meraa huu-ba-huu hai
meraa mai.n
aur teraa mai.n
dar-asl yahii to
dono.n kaa aduu hai
chalo is mai.n kaa
faasla miTaa de.n
magar
mai.n kii is anaa me.n qaid
hamaare vajuud ko
ye faisla
manzuur kab hai

Khadija Khan

Nazm

mazi

bahut KHuub-suurat
KHushnumaa
ha.nste muskuraate
gaate gungunaate
vo dha.Dakte lamhe
jiite jaagte lamhe
yak-ba-yak
ek din
ho ga.e ruu-ba-ruu
puraanii kitaab ke
panne me.n dabe hu.e
lekin ye kyaa
taaza gulaabo.n se bhii ziyaada
mahak rahe the ye
in suukhe hu.e phuulo.n se
aa rahii thii
guzre hu.e palo.n kii
taaza KHushbuu

Khadija Khan

Nazm

aa ja ri chiDiya

aa jaa rii chi.Diyaa
aa jaa rii chi.Diyaa
mu.nDer par kyo.n
kartii hai chuu.n chuu.n
aa jaa tujhe mai.n
daana KHilaa.u.n
roTii ke bhuure
chhat par bikheruu.n
le apnaa khaajaa
khaa jaa rii chi.Diyaa
sun le rii chi.Diyaa
sun le rii chi.Diyaa
kyaa nanhe nanhe
bachche hai.n tere
karte hai.n chii.n chii.n
itne savere
le mai.n ne gehuu.n
chhat par bikhere
ye daane dunke
chun le rii chi.Diyaa
sun le rii chi.Diyaa
sun le rii chi.Diyaa
aa pyaarii chi.Diyaa
aa pyaarii chi.Diyaa
u.D-u.D ke aanaa
mu.D mu.D ke jaanaa
bachcho.n ko apne
daana khilaanaa
lagtaa hai jii ko
kaisaa suhaanaa
kyaa pyaaraa pyaaraa
hai teraa gaanaa
gaa KHuub din bhar
gaa pyaarii chi.Diyaa
aa pyaarii chi.Diyaa
aa pyaarii chi.Diyaa
u.D jaa rii chi.Diyaa
u.D jaa rii chi.Diyaa
vo maano billii
baiThii hai dubkii
tujh ko paka.D kar
bas khaa hii legii
miTTii ke uupar
jaa baiTh uu.nchii
niiche na aanaa
mu.D jaa rii chi.Diyaa
u.D jaa rii chi.Diyaa
u.D jaa rii chi.Diyaa

Hafeez Jalandhari

Nazm

sharmili KHamoshi

shaam kii sharmiilii chup ko
ruuh me.n mahsuus karte
kaam me.n masruuf hai.n ham dopahar se
dil kii aa.nkhe.n dekhtii hai.n gahrii gahrii sabz shaaKHo.n ko
jo baiThii hai.n KHamoshii se
kiye KHam gardane.n apnii
kisii dulhan kii suurat
sar pe o.Dhe aasmaa.n kii surma.ii chunarii
sitaare jis me.n Taa.nke jaa rahe hai.n
ham apne is tasavvur par KHud hii muskaa rahe hai.n

Tarannum Riyaz

Nazm

nazm

vo darjan-bhar mahiino.n se
sadaa mumtaaz lagtaa hai
december kis liye aaKHir
hamesha KHaas lagtaa hai
bahut sahmii hu.ii sub.he.n
udaasii se bharii shaame.n
do-pahre.n ro.ii ro.ii sii
vo raate.n kho.ii kho.ii sii
garm dabiiz sho.alo.n kaa
vo kam raushan ujaalo.n kaa
kabhii guzre havaalo.n kaa
kabhii mushkil savaalo.n kaa
bichha.D jaane kii maayuusii
milan kii aas lagtaa hai
december kis liye aaKHir
hamesha KHaas lagtaa hai

Shaziya Akbar

Nazm

ek kahani

tum ne
shaayad kisii risaale me.n
ko.ii afsaana pa.Dh liyaa hogaa
kho ga.ii hogii ruup kii raanii
ishq ne zahr khaa liyaa hogaa

Nida Fazli

Nazm

hadsa

raat hii raat me.n
raaste shahr se ja.ngalo.n ko mu.De
nii.nd gum ho ga.ii
KHuubsuurat hasii.n KHuub-ruu la.Dkiyaa.n
aurte.n ban ga.ii.n
bahte paanii me.n un ko bahaayaa gayaa
KHvaab-zaade hu.e daastaano.n me.n gum
raat hii raat me.n
azdahe nau-javaano.n kaa dil khaa ga.e
neTii-jeTii pe sab laapata ho ga.e
aan kii aan me.n
shahr kaise miTaa
KHvaab kaise jilaa

Faheem Shanas Kazmi

Nazm

mushahida

ruu-e-mahtaab kii zau-fishaanii liye
sach kii parchhaa.iyaa.n raqs me.n hai.n magan
soz-e-pinhaa.n liye jaan-e-uryaa.n liye
kahkashaa.n kahkashaa.n raushnii ke diye
maujzan zau-fagan arsh se farsh tak
azm kaa haath me.n apne parcham liye
chashm-e-biinaa agar hai to tum dekh lo
yaa kisii banda-e-haq se tum puuchh lo
qalb-e-raushan agar hai to ai ham-nashii.n
shab kii taariikiyaa.n zulf ke pech-o-KHam
taar-e-resham kii suurat nikhar jaa.e.nge
jitne naasuur hai.n dil ke bhar jaa.e.nge
jhuuT KHud aag me.n apnii jal jaa.egaa
suurat-e-KHaak har-suu bikhar jaa.egaa

Jameel Azimabadi

Nazm

soch ki sham

jism kaa jas ruup kaa ras kaam kaa kas
zindagii kii ye suhaanii dhuup bahlaatii rahii hai mere man ko
KHuub garmaati rahii hai aarzuu.o.n kii pavan ko
aur chamkaatii rahii hai apne-pan ko
de ke ik nashsha nayan ko

Krishna Mohan

Load More

Search

ENG

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

Speak Now