ik chubhan hai ki jo bechain kiye rahtī hai

aisā lagtā hai ki kuchh TuuT gayā hai mujh meñ

ek chubhan hai ki jo bechain kiye rahti hai

aisa lagta hai ki kuchh TuT gaya hai mujh mein

ābād mujh meñ tere sivā aur kaun hai?

tujh se bichhaḌ rahā huuñ tujhe kho nahīñ rahā

aabaad mujh mein tere siwa aur kaun hai?

tujh se bichhaD raha hun tujhe kho nahin raha

maiñ tujh se saath bhī to umar bhar kā chāhtā thā

so ab tujh se gilā bhī umar bhar kā ho gayā hai

main tujh se sath bhi to umar bhar ka chahta tha

so ab tujh se gila bhi umar bhar ka ho gaya hai

nahīñ nahīñ maiñ bahut ḳhush rahā huuñ tere baġhair

yaqīn kar ki ye hālat abhī abhī huī hai

nahin nahin main bahut KHush raha hun tere baghair

yaqin kar ki ye haalat abhi abhi hui hai

tum aa ga.e ho to ab ā.īna bhī dekheñge

abhī abhī to nigāhoñ meñ raushnī huī hai

tum aa gae ho to ab aaina bhi dekhenge

abhi abhi to nigahon mein raushni hui hai

tumheñ fursat ho duniyā se to ham se aa ke milnā

hamāre paas fursat ke sivā kyā rah gayā hai

tumhein fursat ho duniya se to hum se aa ke milna

hamare pas fursat ke siwa kya rah gaya hai

maiñ jaag jaag ke kis kis kā intizār karūñ

jo log ghar nahīñ pahuñche vo mar ga.e hoñge

main jag jag ke kis kis ka intizar karun

jo log ghar nahin pahunche wo mar gae honge

aisī duniyā meñ kab tak guzārā kareñ tum hī kah do ki kaise gavārā kareñ

raat mujh se mirī bebasī ne kahā bebasī ke liye ek taaza ġhazal

aisi duniya mein kab tak guzara karen tum hi kah do ki kaise gawara karen

raat mujh se meri bebasi ne kaha bebasi ke liye ek taza ghazal

koī milā to kisī aur kī kamī huī hai

so dil ne be-talabī iḳhtiyār kī huī hai

koi mila to kisi aur ki kami hui hai

so dil ne be-talabi iKHtiyar ki hui hai

jo aql se badan ko milī thii, vo thī havas

jo ruuh ko junūñ se milā hai, ye ishq hai

jo aql se badan ko mili thi, wo thi hawas

jo ruh ko junun se mila hai, ye ishq hai

ye kaise malbe ke nīche dabā diyā gayā huuñ

mujhe badan se nikālo maiñ tañg aa gayā huuñ

ye kaise malbe ke niche daba diya gaya hun

mujhe badan se nikalo main tang aa gaya hun

vo jis ne mujh ko tire hijr meñ bahāl rakhā

tū aa gayā hai to kyā us se bevafā ho jā.ūñ

wo jis ne mujh ko tere hijr mein bahaal rakha

tu aa gaya hai to kya us se bewafa ho jaun

tāb-e-yak-lahza kahāñ husn-e-junūñ-ḳhez ke pesh

saañs lene se tavajjoh meñ ḳhalal paḌtā hai

tab-e-yak-lahza kahan husn-e-junun-KHez ke pesh

sans lene se tawajjoh mein KHalal paDta hai

kyā batā.ūñ ki jo hañgāma bapā hai mujh meñ

in dinoñ koī bahut saḳht ḳhafā hai mujh meñ

kya bataun ki jo hangama bapa hai mujh mein

in dinon koi bahut saKHt KHafa hai mujh mein

use batāyā nahīñ hijr meñ jo haal huā

jo baat sab se zarūrī thī vo chhupā gayā huuñ

use bataya nahin hijr mein jo haal hua

jo baat sab se zaruri thi wo chhupa gaya hun

kisī aahaT meñ aahaT ke sivā kuchh bhī nahīñ ab

kisī sūrat meñ sūrat ke sivā kyā rah gayā hai

kisi aahaT mein aahaT ke siwa kuchh bhi nahin ab

kisi surat mein surat ke siwa kya rah gaya hai

yūñhī rukā thā dam lene ko, tum ne kyā samjhā?

haar nahīñ maanī thī bas sustāne baiThā thā

yunhi ruka tha dam lene ko, tum ne kya samjha?

haar nahin mani thi bas sustane baiTha tha

kis ajab sā.at-e-nāyāb meñ aayā huā huuñ

tujh se milne maiñ tire ḳhvāb meñ aayā huā huuñ

kis ajab saat-e-nayab mein aaya hua hun

tujh se milne main tere KHwab mein aaya hua hun

haañ ḳhudā hai, is meñ koī shak kī gunjā.ish nahīñ

is se tum ye mat samajh lenā ḳhudā maujūd hai

han KHuda hai, is mein koi shak ki gunjaish nahin

is se tum ye mat samajh lena KHuda maujud hai

mujhe dukh hai ki zaḳhm o rañj ke is jamghaTe meñ

tumhārā aur merā vāqi.a gum ho gayā hai

mujhe dukh hai ki zaKHm o ranj ke is jamghaTe mein

tumhaara aur mera waqia gum ho gaya hai

tere maazī ke saath dafn kahīñ

merā ik vāqi.a nahīñ maiñ huuñ

tere mazi ke sath dafn kahin

mera ek waqia nahin main hun

har ek ranj usī baab meñ kiyā hai raqam

zarā sā ġham thā jise be-panāh maiñ ne kiyā

har ek ranj usi bab mein kiya hai raqam

zara sa gham tha jise be-panah main ne kiya

na pūchhiye ki vo kis karb se guzarte haiñ

jo āgahī ke sabab aish-e-bandagī se ga.e

na puchhiye ki wo kis karb se guzarte hain

jo aagahi ke sabab aish-e-bandagi se gae

raakh ke Dher pe kyā sho.ala-bayānī karte

ek qisse kī bhalā kitnī kahānī karte

rakh ke Dher pe kya shoala-bayani karte

ek qisse ki bhala kitni kahani karte

us kī ḳhvāhish pe tum ko bharosā bhī hai us ke hone na hone kā jhagḌā bhī hai

lutf aayā tumheñ gumrahī ne kahā gumrahī ke liye ek taaza ġhazal

us ki KHwahish pe tum ko bharosa bhi hai us ke hone na hone ka jhagDa bhi hai

lutf aaya tumhein gumrahi ne kaha gumrahi ke liye ek taza ghazal

terī sūrat meñ tujhe DhūñD rahā huuñ maiñ bhī

ġhāliban tū bhī mujhe DhūñD rahā hai mujh meñ

teri surat mein tujhe DhunD raha hun main bhi

ghaaliban tu bhi mujhe DhunD raha hai mujh mein

vo guftugū jo mirī sirf apne-āp se thī

tirī nigāh ko pahuñchī to shā.irī huī hai

wo guftugu jo meri sirf apne-ap se thi

teri nigah ko pahunchi to shairi hui hai

ye umr kī hai basar kuchh ajab tavāzun se

tirā huā na hī ḳhud se nibāh maiñ ne kiyā

ye umr ki hai basar kuchh ajab tawazun se

tera hua na hi KHud se nibah main ne kiya

manzaroñ se bahalnā zarūrī nahīñ ghar se bāhar nikalnā zarūrī nahīñ

dil ko raushan karo raushanī ne kahā raushnī ke liye ek taaza ġhazal

manzaron se bahalna zaruri nahin ghar se bahar nikalna zaruri nahin

dil ko raushan karo raushani ne kaha raushni ke liye ek taza ghazal

zarā ahl-e-junūñ aao hameñ rasta sujhāo

yahāñ ham aql vāloñ kā ḳhudā gum ho gayā hai

zara ahl-e-junun aao hamein rasta sujhao

yahan hum aql walon ka KHuda gum ho gaya hai

zaḳhm-e-furqat ko palkoñ se siite hue saañs lene kī aadat meñ jiite hue

ab bhī zinda ho tum zindagī ne kahā zindagī ke liye ek taaza ġhazal

zaKHm-e-furqat ko palkon se site hue sans lene ki aadat mein jite hue

ab bhi zinda ho tum zindagi ne kaha zindagi ke liye ek taza ghazal

ta.alluqāt ke barzaḳh meñ ain-mumkin hai

zarā sā dukh vo mujhe de to maiñ tirā ho jā.ūñ

talluqat ke barzaKH mein ain-mumkin hai

zara sa dukh wo mujhe de to main tera ho jaun

rok letā hai abad vaqt ke us paar kī raah

dūsrī samt se jā.ūñ to azal paḌtā hai

rok leta hai abad waqt ke us par ki rah

dusri samt se jaun to azal paDta hai

yahāñ jo hai kahāñ us kā nishāñ baaqī rahegā

magar jo kuchh nahīñ vo sab yahāñ baaqī rahegā

yahan jo hai kahan us ka nishan baqi rahega

magar jo kuchh nahin wo sab yahan baqi rahega

rāz-e-haq faash huā mujh pe bhī hote hote

ḳhud tak aa hī gayā 'irfān' bhaTaktā huā maiñ

raaz-e-haq fash hua mujh pe bhi hote hote

KHud tak aa hi gaya 'irfan' bhaTakta hua main

is meñ nahīñ hai daḳhl koī ḳhauf o hirs kā

is kī jazā, na is kī sazā hai, ye ishq hai

is mein nahin hai daKHl koi KHauf o hirs ka

is ki jaza, na is ki saza hai, ye ishq hai

barā.e ahl-e-jahāñ laakh kaj-kulāh the ham

ga.e harīm-e-suḳhan meñ to ājizī se ga.e

barae ahl-e-jahan lakh kaj-kulah the hum

gae harim-e-suKHan mein to aajizi se gae