قسمت تو دیکھ ٹوٹی ہے جا کر کہاں کمند

کچھ دور اپنے ہاتھ سے جب بام رہ گیا

ٹوٹا جو کعبہ کون سی یہ جائے غم ہے شیخ

کچھ قصر دل نہیں کہ بنایا نہ جائے گا

ظالم تو میری سادہ دلی پر تو رحم کر

روٹھا تھا تجھ سے آپ ہی اور آپ من گیا

دنیا میں ہم رہے تو کئی دن پہ اس طرح

دشمن کے گھر میں جیسے کوئی میہماں رہے

کوئی دن آگے بھی زاہد عجب زمانہ تھا

ہر اک محلہ کی مسجد شراب خانہ تھا

کب میں کہتا ہوں کہ تیرا میں گنہ گار نہ تھا

لیکن اتنی تو عقوبت کا سزا وار نہ تھا

دل پا کے اس کی زلف میں آرام رہ گیا

درویش جس جگہ کہ ہوئی شام رہ گیا

غیر سے ملنا تمہارا سن کے گو ہم چپ رہے

پر سنا ہوگا کہ تم کو اک جہاں نے کیا کہا

چاہیں ہیں یہ ہم بھی کہ رہے پاک محبت

پر جس میں یہ دوری ہو وہ کیا خاک محبت

ٹکڑے کئی اک دل کے میں آپس میں سئے ہیں

پھر صبح تلک رونے کے اسباب کئے ہیں

کس بات پر تری میں کروں اعتبار ہائے

اقرار یک طرف ہے تو انکار یک طرف

جس مصلے پہ چھڑکئے نہ شراب

اپنے آئین میں وہ پاک نہیں

میں کن آنکھوں سے یہ دیکھوں کہ سایہ ساتھ ہو تیرے

مجھے چلنے دے آگے یا ٹک اس کو پیشتر لے جا

دل سے بس ہاتھ اٹھا تو اب اے عشق

دہ ویران پر خراج نہیں

آگے مرے نہ غیر سے گو تم نے بات کی

سرکار کی نظر کو تو پہچانتا ہوں میں

مے پی جو چاہے آتش دوزخ سے تو نجات

جلتا نہیں وہ عضو جو تر ہو شراب میں

قائمؔ میں اختیار کیا شاعری کا عیب

پہنچا نہ کوئی شخص جب اپنے ہنر تلک

گندمی رنگ جو ہے دنیا میں

میری چھاتی پہ مونگ دلتا ہے

میں ہوں کہ میرے دکھ پہ کوئی چشم تر نہ ہو

مر بھی اگر رہوں تو کسی کو خبر نہ ہوں

اہل مسجد نے جو کافر مجھے سمجھا تو کیا

ساکن دیر تو جانے ہیں مسلماں مجھ کو

پہلے ہی اپنی کون تھی واں قدر و منزلت

پر شب کی منتوں نے ڈبو دی رہی سہی

لگائی آگ پانی میں یہ کس کے عکس نے پیارے

کہ ہم دیگر چلی ہیں موج سے دریا میں شمشیریں

مے کی توبہ کو تو مدت ہوئی قائمؔ لیکن

بے طلب اب بھی جو مل جائے تو انکار نہیں

شکوہ نہ بخت سے ہے نے آسماں سے مجھ کو

پہنچی جو کچھ اذیت اپنے گماں سے مجھ کو

یاں تلک خوش ہوں امارد سے کہ اے رب کریم

کاش دے حور کے بدلے بھی تو غلماں مجھ کو

میں دوانا ہوں صدا کا مجھے مت قید کرو

جی نکل جائے گا زنجیر کی جھنکار کے ساتھ

نہ جانے کون سی ساعت چمن سے بچھڑے تھے

کہ آنکھ بھر کے نہ پھر سوئے گلستاں دیکھا

سیر اس کوچہ کی کرتا ہوں کہ جبریل جہاں

جا کے بولا کہ بس اب آگے میں جل جاؤں گا

تھوڑی سی بات میں قائمؔ کی تو ہوتا ہے خفا

کچھ حرمزدگئیں اپنی بھی تجھے یاد ہیں شیخ

پوچھو ہو مجھ سے تم کہ پیے گا بھی تو شراب

ایسا کہاں کا شیخ ہوں یا پارسا ہوں میں

شیخ جی مانا میں اس کو تم فرشتہ ہو تو ہو

لیک حضرت آدمی ہونا نہایت دور ہے

سنگ کو آب کریں پل میں ہماری باتیں

لیکن افسوس یہی ہے کہ کہاں سنتے ہو

دختر رز تو ہے بیٹی سی ترے اوپر حرام

رند اس رشتہ سے سارے ترے داماد ہیں شیخ

قائمؔ جو کہیں ہیں فارسی یار

اس سے تو یہ ریختہ ہے بہتر

صبح تک تھا وہیں یہ مخلص بھی

آپ رکھتے تھے شب جہاں تشریف

قائم میں غزل طور کیا ریختہ ورنہ

اک بات لچر سی بزبان دکنی تھی

ہر دم آنے سے میں بھی ہوں نادم

کیا کروں پر رہا نہیں جاتا

پہلے ہی گدھا ملے جہاں شیخ

اس کعبہ کو ہے سلام اپنا

گرم کر دے تو ٹک آغوش میں آ

مارے جاڑے کے ٹھرے بیٹھے ہیں

ہر عضو ہے دل فریب تیرا

کہئے کسے کون سا ہے بہتر

قاضی خبر لے مے کو بھی لکھا ہے واں مباح

رشوت کا ہے جواز تری جس کتاب میں

کہتا ہے آئنہ کہ ہے تجھ سا ہی ایک اور

باور نہیں تو لا میں ترے روبرو کروں

بنا تھی عیش جہاں کی تمام غفلت پر

کھلی جو آنکھ تو گویا کہ احتلام ہوا

شیخ جی آیا نہ مسجد میں وہ کافر ورنہ ہم

پوچھتے تم سے کہ اب وہ پارسائی کیا ہوئی

وحشت دل کوئی شہروں میں سما سکتی ہے

کاش لے جائے جنوں سوئے بیاباں مجھ کو

الٰہی واقعی اتنا ہی بد ہے فسق و فجور

پر اس مزہ کو سمجھتا جو تو بشر ہوتا

شیخ جی کیونکہ معاصی سے بچیں ہم کہ گناہ

ارث ہے اپنی ہم آدم کے اگر پوتے ہیں

جس چشم کو وہ میرا خوش چشم نظر آیا

نرگس کا اسے جلوہ اک پشم نظر آیا

ہونا تھا زندگی ہی میں منہ شیخ کا سیاہ

اس عمر میں ہے ورنہ مزا کیا خضاب کا

پروانے کی شب کی شام ہوں میں

یا روز کی شمع کی سحر ہوں