عمر دراز مانگ کے لائی تھی چار دن

دو آرزو میں کٹ گئے دو انتظار میں

دل کی بساط کیا تھی نگاہ جمال میں

اک آئینہ تھا ٹوٹ گیا دیکھ بھال میں

ماضیٔ مرحوم کی ناکامیوں کا ذکر چھوڑ

زندگی کی فرصت باقی سے کوئی کام لے

تجھے دانستہ محفل میں جو دیکھا ہو تو مجرم ہوں

نظر آخر نظر ہے بے ارادہ اٹھ گئی ہوگی

روز کہتا ہوں کہ اب ان کو نہ دیکھوں گا کبھی

روز اس کوچے میں اک کام نکل آتا ہے

تیرے جلووں نے مجھے گھیر لیا ہے اے دوست

اب تو تنہائی کے لمحے بھی حسیں لگتے ہیں

ہے حصول آرزو کا راز ترک آرزو

میں نے دنیا چھوڑ دی تو مل گئی دنیا مجھے

پریشاں ہونے والوں کو سکوں کچھ مل بھی جاتا ہے

پریشاں کرنے والوں کی پریشانی نہیں جاتی

مری خاموشیوں پر دنیا مجھ کو طعن دیتی ہے

یہ کیا جانے کہ چپ رہ کر بھی کی جاتی ہیں تقریریں

دنیا ہے خواب حاصل دنیا خیال ہے

انسان خواب دیکھ رہا ہے خیال میں

وہ دنیا تھی جہاں تم بند کرتے تھے زباں میری

یہ محشر ہے یہاں سننی پڑے گی داستاں میری

مرکز پہ اپنے دھوپ سمٹتی ہے جس طرح

یوں رفتہ رفتہ تیرے قریب آ رہا ہوں میں

خلوص دل سے سجدہ ہو تو اس سجدے کا کیا کہنا

وہیں کعبہ سرک آیا جبیں ہم نے جہاں رکھ دی

مری دیوانگی پر ہوش والے بحث فرمائیں

مگر پہلے انہیں دیوانہ بننے کی ضرورت ہے

کہانی میری روداد جہاں معلوم ہوتی ہے

جو سنتا ہے اسی کی داستاں معلوم ہوتی ہے

ہائے سیمابؔ اس کی مجبوری

جس نے کی ہو شباب میں توبہ

غم مجھے حسرت مجھے وحشت مجھے سودا مجھے

ایک دل دے کر خدا نے دے دیا کیا کیا مجھے

منزل ملی مراد ملی مدعا ملا

سب کچھ مجھے ملا جو ترا نقش پا ملا

دیکھتے ہی دیکھتے دنیا سے میں اٹھ جاؤں گا

دیکھتی کی دیکھتی رہ جائے گی دنیا مجھے

کیا ڈھونڈھنے جاؤں میں کسی کو

اپنا مجھے خود پتا نہیں ہے

محبت میں اک ایسا وقت بھی آتا ہے انساں پر

ستاروں کی چمک سے چوٹ لگتی ہے رگ جاں پر

حسن میں جب ناز شامل ہو گیا

ایک پیدا اور قاتل ہو گیا

کہانی ہے تو اتنی ہے فریب خواب ہستی کی

کہ آنکھیں بند ہوں اور آدمی افسانہ ہو جائے

خدا اور ناخدا مل کر ڈبو دیں یہ تو ممکن ہے

میری وجہ تباہی صرف طوفاں ہو نہیں سکتا

دل آفت زدہ کا مدعا کیا

شکستہ ساز کیا اس کی صدا کیا

وہ آئینہ ہو یا ہو پھول تارہ ہو کہ پیمانہ

کہیں جو کچھ بھی ٹوٹا میں یہی سمجھا مرا دل ہے

رنگ بھرتے ہیں وفا کا جو تصور میں ترے

تجھ سے اچھی تری تصویر بنا لیتے ہیں

قفس کی تیلیوں میں جانے کیا ترکیب رکھی ہے

کہ ہر بجلی قریب آشیاں معلوم ہوتی ہے

جب دل پہ چھا رہی ہوں گھٹائیں ملال کی

اس وقت اپنے دل کی طرف مسکرا کے دیکھ

لہو سے میں نے لکھا تھا جو کچھ دیوار زنداں پر

وہ بجلی بن کے چمکا دامن صبح گلستاں پر

میں دیکھتا ہوں آپ کو حد نگاہ تک

لیکن مری نگاہ کا کیا اعتبار ہے

تعجب کیا لگی جو آگ اے سیمابؔ سینے میں

ہزاروں دل میں انگارے بھرے تھے لگ گئی ہوگی

گناہوں پر وہی انسان کو مجبور کرتی ہے

جو اک بے نام سی فانی سی لذت ہے گناہوں میں

سارے چمن کو میں تو سمجھتا ہوں اپنا گھر

جیسے چمن میں میرا کوئی آشیاں بنا

بت کریں آرزو خدائی کی

شان تیری ہے کبریائی کی

صحرا سے بار بار وطن کون جائے گا

کیوں اے جنوں یہیں نہ اٹھا لاؤں گھر کو میں

یہ شراب عشق اے سیمابؔ ہے پینے کی چیز

تند بھی ہے بد مزہ بھی ہے مگر اکسیر ہے

چمک جگنو کی برق بے اماں معلوم ہوتی ہے

قفس میں رہ کے قدر آشیاں معلوم ہوتی ہے

کیوں جام شراب ناب مانگوں

ساقی کی نظر میں کیا نہیں ہے

دیکھتے رہتے ہیں چھپ چھپ کے مرقع تیرا

کبھی آتی ہے ہوا بھی تو چھپا لیتے ہیں

نشاط حسن ہو جوش وفا ہو یا غم عشق

ہمارے دل میں جو آئے وہ آرزو ہو جائے

سیمابؔ دل حوادث دنیا سے بجھ گیا

اب آرزو بھی ترک تمنا سے کم نہیں

برہمن کہتا تھا برہم شیخ بول اٹھا احد

حرف کے اک پھیر سے دونوں میں جھگڑا ہو گیا

اب وہاں دامن کشی کی فکر دامن گیر ہے

یہ مرے خواب محبت کی نئی تعبیر ہے

یہ میری تیرہ نصیبی یہ سادگی یہ فریب

گری جو برق میں سمجھا چراغ خانہ ملا

ہو گئے رخصت رئیسؔ و عالؔی و واصفؔ نثارؔ

رفتہ رفتہ آگرہ سیمابؔ سونا ہو گیا