Search result for "chhal-kapaT" | Category - Nazm, Page

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "chhal-kapaT"

Nazm MATCHES FOR "chhal-kapaT"

Nazm

tezab, aakar KHushbu ka

merii maa.n seb ki tarah surKH aur miiThii thii
gulaab ki tarah komal aur mo.attar
vo KHushbuu kaa aakaar thii
lagii lipTii chhal-kapaT jhuuT
ye lafz us ne sune to the
aazmaa.e nahii.n the
dohraa.e nahii.n the

Farooq Nazki

Nazm

dasht hi kafi hai

saa.ns lene ke liye
qasr-o-kaashaana zaruurii to nahii.n
ko.ii viiraana ko.ii dasht hii kaafii hai
jahaa.n
aasmaa.n aur zamii.n roz gale milte hai.n
sub.h-dam baad-e-sabaa
shaaKH-dar-shaaKH luTaatii hai namii
KHushbuu phailaatii hai aa.nchal apnaa
khilkhilaatii hu.ii doshiiza kalii ke ruKHsaar
shoKH bha.nvre kii nigaaho.n se shafaq hote hai.n
maKHmalii.n paa.nv tale
sabza-e-baaliida ko.ii
chhamchhamaatii hu.ii baarish me.n nahaa jaataa hai
shaam
darmaa.nda parindo.n kii panah-gaaho.n me.n
qumqume kirmak-e-shab-taab ke raushan kar ke
shab kii aaGosh me.n so jaatii hai
an-ginat hiiro.n kii nannhii kaniyaa.n
jagmagaa uThtii hai.n taaro.n ke hasii.n maatho.n par
chaa.nd duudh kaToraa le kar
buu.Dhii naanii kii kahaanii me.n samaa jaatii hai
ko.ii aavaaz na saaz
ko.ii naGma na alaap
na ko.ii bahas na tamhiis na takraar ko.ii
na siyaasat na KHabaasat na shamaatat ko.ii
iKHtilaafaat se duur
saare mafaadaat se duur
sab KHuraafaat se duur
chhal kapaT jhuuT na dhokaa na fareb
ko.ii uljhan ko.ii fitna na ko.ii jhu.njhlaahaT
ko.ii shikva na gila
fikr-e-fardaa na hii andesha-e-imroz ko.ii
ek anjaan masarrat kii kiran
an-chhu.e KHvaabo.n kii ThanDii bauchhaar
ajnabii sii kisii KHvaahish kaa KHumaar
kisii be-naam se ehsaas kaa lams
arsa-e-jaa.n me.n utar jaataa hai
zinda rahne kaa amal
kitnaa jaa.n-baKHsh nazar aataa hai
saa.ns lene ke liye
qasr-o-kaashaana zaruurii to nahii.n
ko.ii viiraana
ko.ii dasht hii kaafii hai
magar
dasht
vo dasht
jise dekh ke ghar yaad na aa.e

Rafia Shabnam Abidi

Nazm

aaj aur kal

bhuukii aa.nkhe.n kal ko dekhii.n
jhuuTii aas lagaa.e
aane vaalii kal kab aa kar aaj kii bhuuk miTaa.e
aane vaalii kal pe bharosa
kab aa.e kyaa laa.e
biitii kal
biitii kal ke diip kii lau kab aaj kii jot jagaa.e
maayaa chhal ke
chhaayaa Dhal ke
lauT ke phir nahii.n aa.e

Abdul Majeed Bhatti

Nazm

jap

aa mere andar aa
pavitra mahraan ke paanii
ThanDe miiThe maTyaale paanii
maTiyaale jiivan rang jal
dho de saaraa krodh kapaT
shahro.n kii dishaa.o.n kaa sab chhal
yuu.n sii.nch mujhe kar de merii miTTii jal-thal
tire tal kii kaalii chiknii miTTii se
maathe par tilak lagaa.uu.n
haath jo.D Da.nDvat karuu.n
o man ke bhed se gahre
haule haule saa.ns khii.nchte
om samaan amar
o mahaan saagar
mai.n utrii tere ThanDe jal me.n kamar kamar
tere ThanDe miiThe mehrbaan paanii se mu.nh dho luu.n
aur dho luu.n aa.nsuu
khaare aa.nsuu
tere miiThe paanii se dho luu.n
o mahaan maTiyaale saagar aa
sun mirii kathaa
mai.n ba.Dii abhaagan bhaag meraa
bedard haath me.n rahaa sadaa
TuuTaa meraa miTTii se naata
kaise TuuTaa
ik aa.ndhii ba.Dii bhayaanak laal chu.Dail
mujhe le u.Dii
uThaa kar paTkaa us ne kahaa.n se kahaa.n
tere charno.n me.n siis jhukaatii ek akelii jaan
mere saath meraa ko.ii miit nahii.n
ko.ii rang ruup ko.ii priit nahii.n
mirii an-ga.Dh phiikii murjhaatii bolii me.n ko.ii sa.ngiit nahii.n
mirii pii.Dhiyo.n ke biite yug mere saath nahii.n
bas ik nirda.ii dharam hai
jis kaa bharam nahii.n
vo dharam jo kahtaa hai miTTii mirii bairan hai
jo mujhe sikhaataa hai saagar meraa dushman hai
haa.n duur kahii.n
aakaash kii uu.nchaa.ii se pare
rahtaa hai KHudaa
itnaa ruukhaa
miTTii se jo.D nahii.n jis kaa
sab naate priit aur bair ke us kii kaaran mai.n kaise jo.Duu.n
mai.n miTTii meraa janam miTTii
mai.n miTTii ko kaise chho.Duu.n
o maTiyaale balvaan mahaa-saagar
mai.n ukh.Dii dhartii se
bhagvaan miraa ras suukh gayaa
phir bhii suntii huu.n apne lahuu me.n biite samay kii narm dhamak
vo samay jo mere janam se pahle biit gayaa
mere kaano.n me.n
ik shor hai jhar-jhar bahte naddii naalo.n kaa
aur ko.ii mahak ba.Dii be-kal hai
jo guu.nj banii mirii chhaatii se Takraatii hai
o mahaan saagar
jiivan-ras de
apne tal me.n jal-paudaa ban kar ja.D lene de
sadaa jiye
o mahaan saagar sindhuu
tuu sadaa jiye
aur ji.e.n tire paanii me.n phisaltii machhliyaa.n
shaant sukhii yuu.nhii
tire paanii me.n naav khete
tire baalak sadaa ji.e.n
o paalan-haar hamaare
dhartii ke rakhvaale
ann-daataa
tirii dhartii
narm retiilii mehrbaan sindh kii dhartii
sadaa jiye

Fahmida Riaz

Nazm

qurbani ke bakre

phir aa gayaa hai mulk me.n qurbaaniyo.n kaa maal
kii iKHtiyaar qiimato.n ne raakiTo.n kii chaal
qaamat me.n bakraa uu.nT kii qiimat kaa ham-KHayaal
dil baiThtaa hai uThte hii qurbaanii kaa savaal
qiimat ne aadmii hii ko bakraa banaa diyaa
bakre ko misl-e-naaqa-e-lailaa banaa diyaa

Syed Mohammad Jafri

Nazm

night walk (shab-nawardi)

january kii sardii me.n
yaar shab-navardii me.n
mere ghar chale aa.e
mai.n ne bhii kamiino.n kii
muKHtalif namuuno.n kii
aisii mezbaanii kii
kursii-vursii lagvaa.ii
chaa-e-shaa.e ma.ngvaa.ii
aag tho.Dii dahkaa.ii
aag ke dahakne se
guftuguu bhii garmaa.ii
guftuguu bhii chaa.e kii
guftuguu alaav kii
aur phir alaav se
ik badan kii yaad aa.ii
mai.n ne zikr chhe.Daa phir
hashr kaa qayaamat kaa
us badan kii qaamat kaa
us badan kii rangat kaa
yaaro kaise batlaa.uu.n
us badan ke zer-o-bam
jism pe ugaa resham
naaf me.n rukii shabnam
yaar vo badan jis dam
baazuu.o.n me.n aataa thaa
kyaa sitam na Dhaataa thaa
aag hii lagaataa thaa
haa.e vo rahaa jab tak
ham ne hijr vaalo.n kii
raagnii nahii.n gaa.ii
sardiyaa.n nahii.n aa.ii.n
sardiyo.n se yaad aayaa
lak.Diyo.n ke sho'le sab
maa.nd pa.D ga.e lekin
yaar mere jal uTThe
sab ke sab machal uThe

Salman Saeed

Nazm

khichDi

zamaana tez dhaar hai
jo chal gayaa so paar hai
usii se ko.ii siikh le
aur apnaa kund tiikh le
nahii.n to kaT
vo ishq kyaa hai dostaa
jo Gam nahii.n parostaa
ye zaa.iqa to chakh zaraa
zabaa.n pe is ko rakh zaraa
maza to le
badan pe jo libaas hai
dhunii hu.ii kapaas hai
to ye fanaa me.n hai baqaa
ki is kaa naam hai qazaa

Neelam Malik

Nazm

hadisa

shaKHsiyat
haatho.n me.n kaa.npii
ho.nT naarii ban ga.e
aasmaa.n TuuTaa
zamii.n pighlii
badan kii chaa.ndnii
sofe pe au.ndhii gir pa.Dii
ik kiran jaane kahaa.n se
raushnii kii nahr me.n aa kar girii
devtaa qaamat badan
tahliil ho kar jaam me.n
an-ginat ratiile KHvaabo.n kaa KHudaa ban hii gayaa
aur shahr-e-sang me.n
phir mom kaa jaaduu chalaa
chaaquu chalaa

Salahuddin Parvez

Nazm

KHud ko KHud mein tahlil karo

chup-chaap raho
varna KHaamoshii kii chaadar
chaak ho jaa.egii
mumkin hai is kii ye paakii bhii
paakii na rah jaa.e
aur yahii.n phir din ke Dhalne par
ehsaas-e-gunah ba.Dh jaa.e
paakii, paakii na rah jaa.e
aur yahii.n ye KHaamoshii kii chaadar
o.Dh na paa.e
ko.Dh man kaa vo ban jaa.e
behtar hai chup-chaap raho
is KHaamoshii kii chaadar ko
gard-e-anaa se duur rakho
KHud ko duniyaa se duur rakho
duniyaa KHud ban jaa.o
apne andar tah-dar-tah baatin me.n
ek jahaa.n aabaad karo
aKHlaaq o sadaaqat
sabr-o-qanaa.at
abd o riyaazat
samte.n ban jaa.e.n
arz o samaa ban jaa.e.n
KHud ko KHud me.n tahliil karo
apnii phir takmiil karo

Sahil Ahmad

Nazm

aaina-KHane ke qaidi se

zaat kaa aa.iina-KHaana
jis me.n raushan ik charaaG-e-aarzuu
chaar-suu
za.afraanii raushnii ke daa.ere

Ameeq Hanafi

Nazm

kiran se ek mukalima

a.ndheraa Daa.nT kar bolaa
suno suuraj kii ai nannhii kiran
ab ghar chalii jaa.o
tumhaarii raajdhaanii par
hukuumat ab mirii hogii
kiran ne muskuraa kar
dev-qaamat aur pur-haibat
a.ndhere par nazar Daalii
tahammul se yaqii.n aur hausle ko
bhar ke apne narm lahje me.n kahaa
dekho chalii to jaa.uu.ngii lekin
har ik dil me.n rahuu.ngii
ik na.ii ummiid kii suurat
har ik ghar me.n miluu.ngii
tum se la.Dtaa ik diyaa ban kar
sitaaro.n se kabhii chhalkuu.ngii
un kii raushnii ban kar
kabhii mai.n chaa.nd se nikluu.ngii
us kii chaa.ndnii ban kar
suno
mai.n jaa ke bhii maujuud huu.ngii
aur tum
maujuud ho kar bhii nahii.n hoge

Humaira Rahat

Nazm

basant

aalii aa.ii basant bahaar
rang rang ke phuul khile hai.n
muskaate kaliyo.n se mile hai.n
prem kii madiraa pii paagal ho
bha.nvar kare.n ganjaar
aalii aa.ii basant bahaar

Shree Amar Amritsari

Nazm

sang-e-mil pahron chalta hai

aasmaan ke siine me.n Gam charKHaa kaat rahaa hai
sang-e-miil
pahro.n chaltaa hai aur saakit hai
raat mujh se pahle jaag ga.ii hai
libaas par pa.De hu.e dhabbe
mere bachcho.n ke dukh the

Sara Shagufta

Nazm

farsh-e-naumidi-e-didar

dekhne kii to kise taab hai lekin ab tak
jab bhii us raah se guzro to kisii dukh kii kasak
Toktii hai ki vo darvaaza khulaa hai ab bhii
aur us sehn me.n harsuu yuu.nhii pahle kii tarah
farsh-e-naumiidii-e-diidaar bichhaa hai ab bhii
aur kahii.n yaad kisii dil-zada bachche kii tarah
haath phailaa.e hu.e baiThii hai fariyaad-kunaa.n

Faiz Ahmad Faiz

Nazm

ai chand

ai chaa.nd mujhe itnaa to bataa
tuu ne bhii prem kiyaa thaa kyaa
in suunii lambii raato.n me.n kis kii raah taktaa rahtaa hai
man teraa ghaayal hai is kii pii.Daa chup-chaap tuu sahtaa hai
kyaa kaaran hai nahii.n kahtaa hai
taaro.n ne ishaaro.n se jo kahaa
tuu ne bhii prem kiyaa thaa kyaa
ai chaa.nd mujhe itnaa to bataa
dil kii dha.Dkan kii gaathaa me.n man kii ta.Dpan ke afsaane
ye paapii duniyaa kyaa samjhe ye jag hatyaaraa kyaa jaane
mai.n tuu dono.n hai.n diivaane
kuchh merii sun kuchh apnii sunaa
tuu ne bhii prem kiyaa thaa kyaa
ai chaa.nd mujhe itnaa to bataa
jab terii ru-pahlii nagrii me.n khiltii hai sunahrii phulvaarii
aise kisii duudh kii gangaa me.n jyuu.n diip tarange.n ho.n jaarii
aakaash kamal baarii baarii
kahte hai.n kis kii birah kathaa
tuu ne bhii prem kiyaa thaa kyaa
ai chaa.nd mujhe itnaa to bataa
sun kisii devgii hirdai kii jvaalaa aise bujh saktii hai
naino.n ke jal se aaho.n se ye aur bha.Dakne lagtii hai
vo kaun hai kis me.n shaktii hai
jal sake na de jo use jalaa
tuu ne bhii prem kiyaa thaa kyaa
ai chaa.nd mujhe itnaa to bataa
terii ujlii sii bastii me.n bhii shaayad aisaa hotaa hai
tab kapaT bhare man ha.nste hai.n jab premii chupke rotaa hai
kis liye nahii.n tuu sotaa hai
sab jaan liyaa tuu laakh chhupaa
tuu ne bhii prem kiyaa thaa kyaa
ai chaa.nd mujhe itnaa to bataa

Shree Amar Amritsari

Nazm

is chehre par sham zara si gahri hai

ye aa.nkhe.n bilkul vaisii hai.n
jaisii mire KHvaab me.n aatii thii.n
peshaanii tho.Dii haT kar hai
par ho.nTo.n par muskaan kii bantii miTtii lahre.n vaisii hai.n
aavaaz kaa zer-o-bam bhii bilkul vaisaa hai
aur haath jinhe.n me.n KHvaab me.n bhii
chhuunaa chaahuu.n to kaa.np uThuu.n
ye haath bhii bilkul vaise hai.n
ye chehra bilkul vaisaa hai
par is par chhaa.ii KHaamoshii kuchh an-dekhii
aur us chehre par shaam zaraa sii gahrii hai
in shaano.n kaa phailaa.o tho.Daa kam hai
lekin qaamat bilkul vaisii hai
aur tum se mil kar mere dil kii haalat bilkul vaisii hai

Sameena Raja

Nazm

nanha shahsawar

shahsavaar
nanhaa-munnaa shahsavaar
iistaada hai
KHamiida pusht par merii
juu.n-hii jhuktaa huu.n
vo tarGiib detaa hai
mujhe chalne kii
aavaazo.n kii sargam se
mai.n chaltaa huu.n
mai.n vaamaa.nda qadam chaltaa huu.n
vo mahmez kii jumbish se kahtaa hai ki dau.Do
aur dau.Do, tez-tar, sarpaT chalo
baad-e-naGma-kaar se baate.n karo
us kaa mai.n raKHsh-e-razaa
tez-tar kartaa huu.n raftaar-e-KHiraam
mujh ko pahu.nchaanaa hai aaj
us ko ra.ngo.n titliyo.n ke des me.n
jaaduu-nagar me.n
mere saa.e kaa bhii ab shaayad jahaa.n
muntazir ko.ii nahii.n
muntazir hai.n us ke lekin, mere nanhe dost ke
dev-qaamat sabz vaarafta-vaqaar
duur tak sargoshiyaa.n karte hu.e ashjaar
raqs-e-barg-o-baar
jaa rahaa hai KHvaab kii raftaar se
diivaana-vaar
meraa nanhaa shahsavaar

Balraj Komal

Nazm

bil-jabr

har taraf katrane.n hai.n
vo gu.Diyaa yahii.n thii magar ab dikhaa.ii nahii.n de rahii
aur ye dhaage, yaqiinan vo gesuu hai.n jin ke liye merii raate.n kaTii.n
ruu.ii dhunkii hu.ii hai
kahii.n KHuun kaa ko.ii dhabba nahii.n
ik taraf us kii poshaak udh.Dii pa.Dii hai
udhar us kii aa.nkhe.n, kaTe abruu.o.n se alag,
KHauf-o-dahshat me.n luth.Dii hu.ii
har taraf katrane.n hai.n
badan resha resha hai
niiche kaa dha.D chiil kavve uThaa le ga.e
labo.n kaa lahuu jam gayaa hai
(lahuu jo yaqiinan kisii aur kaa hai)
gale par kisii gurg ke daa.nt khii.nche hu.e hai.n
vo gu.Diyaa nahii.n hai magar har taraf katrane.n hai.n
mai.n aa.inda gu.Diyaa kii KHaatir kapaas aur dhaage nahii.n laa.uu.ngaa
katrane.n le ke apnii kisii aur jaanib nikal jaa.uu.ngaa

Tabish Kamal

Nazm

kuza-gar ki maut

ik muddat se ik kuuza-gar
ghuumte chaak par
KHvaahisho.n aarzuu.o.n kii ik
muurtii sii banaataa rahaa
us kaa fan
us kii shohrat kaa baa'is banaa
us ko 'izzat milii aur daulat milii
chain se ho rahii thii basar zindagii
phir achaanak 'ajab sii ik aavaaz dil me.n uThii
aur iThlaa ke bolii
suno ai kuuza-gar
KHuub-suurat bahut hai.n tumhaare sanam
par ye qaamat me.n tum se hai.n kamtar bahut
apne fan kii anaa ke takabbur ko o.Dhe hu.e
kuuza-gar ne ye KHud se kahaa
ek aisii bhii muurat kii taKHliiq ho
jo ujaagar kare qadr-o-qiimat mirii
jis kaa qad aur aakaar mere baraabar kaa ho
tab ga.Dhii us ne muurat pe muurat na.ii
un kaa aakaar ba.Dhtaa gayaa
phir yahaa.n tak ba.Dhaa
us kii sab muurate.n
us ke qad se ba.Dii ho ga.ii.n
chaak chhoTaa thaa aur haath bhii us ke apne puraane hii the
phir hu.aa ye ki vo aaKHirii muurtii
ek tuude se yuu.n TuuT kar gir pa.Dii
chaak aur kuuza-gar
Dher me.n dab ga.e

Dr. Abdullah

Nazm

ashk tara karo

vaqt kii aastiino.n me.n palte hu.e qahqahe
jhaa.D do
apne lab gaa.D do
aa.ino.n me.n bikhartii hu.ii
apnii be-chehragii ke Tahalte hu.e saa.e par
muskuraahaT ujaalo na.ii sub.h ta.amiir karne kaa chaara karo
istiKHaara karo
saarii afsurdagii aur saraasiimgii
sansanaate hu.e
apnii qaamat se ghaT kar ka.ii
munhadim daa.ero.n me.n badal jaa.egii
ye jo haalaat kii dasht-aa.nkho.n se ham par lapaktii hu.ii
luu hai kaT jaa.egii
pyaas chhaT jaa.egii
be-amaa.n mausamo.n ke badan par chahakte hu.e silsile
karb-aaluud lahje bhii khul jaa.e.nge
hausle gaa.e.nge
vaqt ke zard maathe pe bal aa.egaa
naa-umiidii kaa har ek imkaan jal jaa.egaa
raushnii kaa shajar
apnii shaaKHo.n ko phailaa.egaa
aasmaa.n apne daaman se pinhaa.n guhar
sab pe barsaa.egaa
ziist ko nuurii KHushbuu se mahkaa.egaa
muskuraahaT ujaalo na.ii sub.h ta.amiir karne kaa chaara karo
ashk taaraa karo

nawed malik

Load More

Search

ENG

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

Speak Now