Search result for "kham-ba-kham" | Category - Nazm, Page

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "kham-ba-kham"

Nazm MATCHES FOR "kham-ba-kham"

Nazm

nind

niil-guu.n javaa.n siina
kahkashaa.n kii peshaanii
niim chaa.nd kaa jo.Daa
maKHmalii.n a.ndhere kaa
pairahan laraztaa hai
vaqt kii siyah zulfe.n
KHaamushii ke shaano.n par
KHam-ba-KHam mahaktii hai.n
aur zamii.n ke ho.nTo.n par

Ali Sardar Jafri

Nazm

bajte hain duhal

qaafile vaalo zaraa tez chalo tez chalo
kitne dildaar hai.n aaGaaz-e-safar ke lamhaat
baam-e-garduu.n se utartii hai sitaaro.n kii baraat
apne sho.alo.n se ulajhne lagii taariiKH kii lau
nuur-afgan hai.n jabiino.n pe dilo.n ke partav
zindagii sajtii hai kis shoKH adaa kaa mahmil
KHam-ba-KHam raah-guzaaro.n ke dha.Dakne lage dil
vus.at-e-najd me.n bedaar hu.aa zauq-e-junuu.n
ishq kii nabzo.n me.n bha.Dkii na.e andaaz se aag
dil ke har taar pe lahraate hai.n dahke hu.e raag
kitnaa hai shoKH-zabaa.n kaakul-o-ruKH kaa afsuu.n
husn ne bhejaa hai diivaano.n ko paiGaam nayaa
ba.Dh ga.ii kah ke sabaa tez chalo tez chalo
qaafile vaalo zaraa tez chalo tez chalo

Hurmatul Ikaram

Nazm

targhib

dhu.ndle dhu.ndle naqsh laa-haasil tamannaa.o.n kii raakh
raushnii ke daa.ere se duur yaado.n kaa KHumaar
ik taraf jaltii fasiilo.n se dhu.aa.n uThtaa hu.aa
ik taraf aasuudgii-e-aarzuu ke narm KHvaab
KHam-ba-KHam raahe.n safar kii gard me.n kho.ii hu.ii
jaltii aa.nkho.n me.n sunahre KHvaab-zaaro.n ke saraab
roz-o-shab ke jalte-bujhte daa.ero.n ko to.D kar
aarzuu kii vus.ate.n sahraa-ba-sahraa be-kanaar
naa-taraashiida chaTaane.n raasta roke hu.e
ik sadaa-e-baa-gasht apnii navaa.o.n kaa javaab
ashk-haa-e-sub.h-gaahii se sahar khiltii hu.ii
raat kii taariikiyaa.n dil ke lahuu se laala-zaar
ek soz-e-aarzuu anfaas me.n rachtaa hu.aa
ek mub.ham dard dil kii KHalvato.n me.n be-qaraar

Mahmood Ayaz

Nazm

ahd-e-mazi

yaad hai aaGaaz-e-ulfat kaa zamaana yaad hai
Daal kar baa.nho.n me.n baa.nhe.n muskuraanaa yaad hai
KHam-ba-KHam zulfo.n kaa vo chehre pe mere loTnaa
bhiinii bhiinii nik.hato.n me.n Duub jaanaa yaad hai
surKHiyo.n se vo jhalak uThnaa ruKH-e-zau-rez se
lete lete naam meraa jhe.np jaanaa yaad hai
aage ba.Dh ba.Dh kar palaTnaa aur phir ruknaa miraa
is tarah dil kaa machalnaa tilmilaanaa yaad hai
vo mirii betaabii-e-dil se tirii be-taabiyaa.n
vo mire shikvo.n pe teraa sar jhukaanaa yaad hai
vo mirii pazhmurdanii se teraa ho jaanaa udaas
vo mujhe bholii adaa.o.n se ha.nsaanaa yaad hai
gar kabhii KHalvat me.n chhe.Daa qissa-e-shaam-e-firaaq
muskuraanaa muskuraa kar Taal jaanaa yaad hai
be-jhijak milte the mujh se paas aate the mire
vo gha.Dii vo vaqt vo dilkash zamaana yaad hai
soch kar anjaam-e-ulfat kuchh jhijaknaa KHud-baKHud
dam-ba-dam ghabraa ke mujh ko aazmaanaa yaad hai
vo miraa jazbaat se ghabraa ke tujh se ruuThnaa
aabdiida ho ke vo teraa manaanaa yaad hai
yaad jis kii KHuun ke aa.nsuu rulaa.egii 'habiib'
vo hikaayat yaad hai aur vo fasaana yaad hai

Habeeb Jaunpuri

Nazm

main kab se be-Khaal-o-KHat paDa hun

mai.n kab se be-KHaal-o-KHat pa.Daa huu.n
miraa ko.ii saaya hii nahii.n hai
sab aa.iine jhuuT bolte hai.n
kisii ke chehre ko meraa chehra dikhaa rahe hai.n

Qasim Yaqub

Nazm

honT khulte nahin

un ko mujh se gila mujh ko un se gila vo bhii KHaamosh hai.n mai.n bhii KHaamosh huu.n
KHaamushii ban ga.ii haasil-e-mudda.aa vo bhii KHaamosh hai.n mai.n bhii KHaamosh huu.n
kashmakash me.n hai.n maGruur ra.anaa.iyaa.n be-amaa.n phirtii hai.n kitnii parchhaa.iyaa.n
biite lamho.n kaa aa.iina dhu.ndlaa gayaa vo bhii KHaamosh hai.n mai.n bhii KHaamosh huu.n
ko.ii afsaana kahtii nahii.n zindagii dha.Dkane.n dil kii hai.n ajnabii ajnabii
barbat-e-aarzuu ho gayaa be-sadaa vo bhii KHaamosh hai.n mai.n bhii KHaamosh huu.n
sard hai aatishii.n valvalo.n kii jabii.n dil dha.Dakte hai.n aur aa.nkh uThtii nahii.n
kaun batlaa.e kis se hu.ii hai KHataa vo bhii KHaamosh hai.n mai.n bhii KHaamosh huu.n
hosh kis ko ki dohraa.e ruudaad-e-Gam ruuThii ruuThii sii hai lazzat-e-kaif-o-kam
khoyaa khoyaa saa hai e'timaad-e-vafaa vo bhii KHaamosh hai.n mai.n bhii KHaamosh huu.n
talKHii-e-shauq ke daaG dhulte nahii.n jii machaltaa hai aur ho.nT khulte nahii.n
kitnii bebas hai ehsaas kii har adaa vo bhii KHaamosh hai.n mai.n bhii KHaamosh huu.n
kaise ye pech-o-KHam aa pa.De naa-gahaa.n ham-safar ham-safar se hu.aa bad-gumaa.n
gum a.ndhero.n me.n hone lagaa raasta vo bhii KHaamosh hai.n mai.n bhii KHaamosh huu.n
vajah-e-aazurdagii taa-ba-lab aa.e kyaa ek pindaar hai kitnaa sabr-aazmaa
pyaar ko mil gayaa ik nayaa mashGala vo bhii KHaamosh hai.n mai.n bhii KHaamosh huu.n
hurmat ik dard kii KHam-ba-KHam rahguzar kar rahii hai ishaare ki aa.o idhar
kaun manzil kaa kis ko bataa.e pata vo bhii KHaamosh hai.n mai.n bhii KHaamosh huu.n

Hurmatul Ikaram

Nazm

bewa ki KHud-kushi

ye a.ndherii raat ye saarii fazaa so.ii hu.ii
pattii pattii manzar-e-KHaamosh me.n kho.ii hu.ii
maujzan hai bahr-e-zulmat tiirgii kaa josh hai
shaam hii se aaj qindiil-e-falak KHaamosh hai
chand taare hai.n bhii to be-nuur pathraa.e hu.e
jaise baasii haar me.n ho.n phuul kumhlaa.e hu.e
khap gayaa hai yuu.n ghaTaa me.n chaa.ndnii kaa saaf ra.ng
jis tarah maayuusiyo.n me.n dab ke rah jaa.e uma.ng
umDii hai kaalii ghaTaa duniyaa Dubone ke liye
yaa chalii hai baal khole raa.nD rone ke liye
jitnii hai gunjaan bastii utnii hii viiraan hai
har galii KHaamosh hai har raasta sunsaan hai
ik makaa.n se bhii makii.n kii kuchh KHabar miltii nahii.n
chilmane.n uThtii nahii.n zanjiir-e-dar hiltii nahii.n
so rahe hai.n mast-o-be-KHud ghar ke kul piir-o-javaa.n
ho ga.ii hai.n band husn-o-ishq me.n sargoshiyaa.n
haa.n magar ik samt ik goshe me.n ko.ii nauhagar
le rahii hai karvaTo.n par karvaTe.n dil thaam kar
dil sambhaltaa hii nahi.n hai siina-e-sad-chaak me.n
phuul saa chehra aTaa hai bevgii kii KHaak me.n
u.D chalii hai ra.ng-e-ruKH ban kar hayaat-e-musta.aar
ho rahaa hai qalb-e-murda me.n javaanii kaa fishaar
hasrate.n dam to.Dtii hai.n yaas kii aaGosh me.n
saik.Do.n shikve machalte hai.n lab-e-KHaamosh me.n
umr aamaada nahii.n murda-parastii ke liye
baar hai ye zinda mayyat dosh-e-hastii ke liye
chaahtii hai laakh qaabuu dil pe paatii hii nahii.n
haa.e-re zaalim javaanii bas me.n aatii hii nahii.n
thartharaa kar girtii hai jab suune bistar par nazar
le ke ik karvaT paTak detii hai vo takiya pe sir
jab khanak uThtii hai.n sotii la.Dkiyo.n kii chuu.Diyaa.n
aah ban kar uThne lagtaa hai kaleja se dhu.aa.n
ho ga.ii beva kii KHaatir nii.nd bhii jaise haraam
muKHtasar saa ahd-e-vaslat de gayaa soz-e-davaam
dopahar kii chhaa.nv daur-e-shaadmaanii ho gayaa
pyaas bhii bujhne na paa.ii KHatm paanii ho gayaa
le rahii hai karvaTo.n par karvaTe.n baa-iztiraar
aag me.n paara hai yaa bistar pe jism-e-be-qaraar
pa.D ga.ii ik aah kar ke ro ke uTh baiThii kabhii
u.ngliyo.n me.n le ke zulf-e-KHam-ba-KHam ai.nThii kabhii
aa ke ho.nTo.n par kabhii maayuus aahe.n tham ga.ii.n
aur kabhii suunii kalaa.ii par nigaahe.n jam ga.ii.n
itnii duniyaa me.n kahii.n apnii jagah paatii nahii.n
yaas is had kii ki shauhar kii bhii yaad aatii nahii.n
aa rahe hai.n yaad paiham saas nando.n ke suluuk
phaT rahaa hai Gam se siina uTh rahii hai dil me.n huuk
apnii maa.n bahno.n kaa bhii aa.nkhe.n churaanaa yaad hai
aisii duniyaa me.n kisii kaa chho.D jaanaa yaad hai
baaGbaa.n to qabr me.n hai kaun ab dekhe bahaar
KHud usii ko tiir us ke karne vaale hai.n shikaar
jab nazar aataa nahii.n detaa ko.ii bekas kaa saath
zahr kii shiishii kii jaanib KHud-ba-KHud ba.Dhtaa hai haath
dil ta.Dap kar kah rahaa hai jald is duniyaa ko chho.D
chuu.Diyaa.n to.Dii.n to phir zanjiir-e-hastii ko bhii to.D
dam agar niklaa to kho.ii zindagii mil jaa.egii
ye nahi.n to KHair tanhaa qabr hii mil jaa.egii
vaa.n tujhe zillat kii nazro.n se na dekhegaa ko.ii
chaahe ha.nsnaa chaahe ronaa phir na rokegaa ko.ii
vaa.n sab ahl-e-dard hai.n sab saahab-e-insaaf hai.n
rahbar aage jaa chukaa raahe.n bhii terii saaf hai.n
dil inhii.n baato.n me.n uljhaa thaa ki dam ghabraa gayaa
haath le kar zahr kii shiishii labo.n tak aa gayaa
tilmilaatii aa.nkh jhapkaatii jhijaktii haa.nptii
pii ga.ii kul zahr aaKHir thartharaatii kaa.nptii
maut ne jhaTkaa diyaa kul uzv Dhiile ho ga.e
saa.ns ukh.Dii, nabz Duubii, ho.nT niile ho ga.e
aa.nkh jhapkii ashk Tapkaa hichkii aa.ii kho ga.ii
maut kii aaGosh me.n ik aah bhar kar so ga.ii
aur kar ik aah sulge hind kii rasmo.n kaa daam
ai javaanaa-marg beva tujh pe 'kaifii' kaa salaam

Kaifi Azmi

Nazm

gul ba-nok-e-Khaar

mirii zulfe.n nahii.n kaalii ghaTaa hai.n
mirii peshaanii hai mahtaab jaisii
mirii aa.nkhe.n ka.nval kii pa.nkhu.Dii hai.n
mire lab hai.n gulaabo.n se mushaabah
mire gaalo.n me.n hai laalii shafaq kii
mirii gardan suraahii-daar dekho
mirii baahe.n hai.n misl-e-shaaKH-e-sandal
badan meraa hai laala-zaar dekho
adaa.o.n me.n mirii jaaduugarii hai
mirii hastii mukammal shaa.irii hai
havas ke maaro me.n baazaar me.n huu.n
gul-e-tar huu.n pa nok-e-KHaar me.n huu.n
mire husn-o-javaanii ke munaasib
lagaav daam aur mujh ko KHariido
ki har suurat adaa karnaa hai mujh ko
kisii biivii kii laachaarii kaa qarza
kisii shauhar kii biimaarii kaa qarza

Qaisar Ziya Qaisar

Nazm

sham-e-ayaadat

ye kaun muskuraahaTo.n kaa kaarvaa.n liye hu.e
shabaab-e-sher-o-ra.ng-o-nuur kaa dhu.aa.n liye hu.e
dhu.aa.n ki barq-e-husn kaa mahaktaa sho.ala hai ko.ii
chaTiilii zindagii kii shaadmaaniyaa.n liye hu.e
labo.n se pa.nkhu.Dii gulaab kii hayaat maa.nge hai
ka.nval sii aa.nkh sau nigaah-e-mehrbaa.n liye hu.e
qadam qadam pe de uThii hai lau zamiin-e-rah-guzar
adaa adaa me.n be-shumaar bijliyaa.n liye hu.e
nikalte baiThte dino.n kii aahaTe.n nigaah me.n
rasiile ho.nT fasl-e-gul kii daastaa.n liye hu.e
KHutuut-e-ruKH me.n jalva-gar vafaa ke naqsh sar-ba-sar
dil-e-Ganii me.n kul hisaab-e-dostaa.n liye hu.e
vo muskuraatii aa.nkhe.n jin me.n raqs kartii hai bahaar
shafaq kii gul kii bijliyo.n kii shoKHiyaa.n liye hu.e
adaa-e-husn barq-paash shola-zan nazaara-soz
fazaa-e-husn uudii uudii bijliyaa.n liye hu.e
jagaane vaale naGma-e-sahar labo.n pe maujzan
nigaahe.n nii.nd laane vaalii loriyaa.n liye hu.e
vo nargis-e-siyaah-e-niim-baaz, mai-kada-ba-dosh
hazaar mast raato.n kii javaaniyaa.n liye hu.e
taGaaful-o-KHumaar aur be-KHudii kii oT me.n
nigaahe.n ik jahaa.n kii hoshiyaariyaa.n liye hu.e
harii-bharii rago.n me.n vo chahaktaa boltaa lahuu
vo sochtaa hu.aa badan KHud ik jahaa.n liye hu.e
za-farq taa-qadam tamaam chehra jism-e-naaznii.n
latiif jagmagaahaTo.n kaa kaarvaa.n liye hu.e
tabassumash takallume takallumash tarannume
nafas nafas me.n thartharaataa saaz-e-jaa.n liye hu.e
jabiin-e-nuur jis pe pa.D rahii hai narm chhuuT sii
KHud apnii jagmagaahTo.n kii kahkashaa.n liye hu.e
''sitaara-baar o mah-chakaa.n o KHuur-fishaa.n'' jamaal-e-yaar
jahaan-e-nuur kaarvaa.n-ba-kaarvaa.n liye hu.e
vo zulf-e-KHam-ba-KHam shamiim-e-mast se dhu.aa.n dhu.aa.n
vo ruKH chaman chaman bahaar-e-jaavedaa.n liye hu.e
ba-mastii-e-jamaal-e-kaa.enaat, KHvaab-e-kaa.enaat
ba-gardish-e-nigaah daur-e-aasmaa.n liye hu.e
ye kaun aa gayaa mire qariib uzv uzv me.n
javaaniyaa.n, javaaniyo.n kii aa.ndhiyaa.n liye hu.e
ye kaun aa.nkh pa.D rahii hai mujh par itne pyaar se
vo bhuulii sii vo yaad sii kahaaniyaa.n liye hu.e
ye kis kii mahkii mahkii saa.nse.n taaza kar ga.ii.n dimaaG
shabo.n ke raaz nuur-e-mah kii narmiyaa.n liye hu.e
ye kin nigaaho.n ne mire gale me.n baahe.n Daal dii.n
jahaan bhar ke dukh se dard se amaa.n liye hu.e
nigaah-e-yaar de ga.ii mujhe sukuun-e-be-karaa.n
vo be-kahii vafaa.o.n kii gavaahiyaa.n liye hu.e
mujhe jagaa rahaa hai maut kii Gunuudgii se kaun
nigaaho.n me.n suhaag-raat kaa samaa.n liye hu.e
mirii fasurda aur bujhii hu.ii jabii.n ko chhuu liyaa
ye kis nigaah kii kiran ne saaz-e-jaa.n liye hu.e
sute se chehre par hayaat rasmasaatii muskuraatii
na jaane kab ke aa.nsu.o.n kii daastaa.n liye hu.e
tabassum-e-sahar hai aspataal kii udaas shaam
ye kaun aa gayaa nashaat-e-be-karaa.n liye hu.e
tire na aane tak agarche mehrbaa.n thaa ik jahaa.n
mai.n ro ke rah gayaa huu.n sau Gam-e-nihaa.n liye hu.e
zamiin muskuraa uThii ye shaam jagmagaa uThii
bahaar lahlhaa uThii shamiim-e-jaa.n liye hu.e
fazaa-e-aspataal hai ki ra.ng-o-buu kii karvaTe.n
tire jamaal-e-laala-guu.n kii daastaa.n liye hu.e
'firaaq' aaj pichhlii raat kyuu.n na mar rahuu.n ki ab
hayaat aisii shaame.n hogii phir kahaa.n liye hu.e
(2)
magar nahii.n kuchh aur maslahat thii us ke aane me.n
jamaal-o-diid-e-yaar the nayaa jahaa.n liye hu.e
isii na.e jahaa.n me.n aadmii bane.nge aadmii
jabii.n pe shaahkaar-e-dahr kaa nishaa.n liye hu.e
isii na.e jahaa.n me.n aadmii bane.nge devtaa
tahaarato.n kaa farq-e-paak par nishaa.n liye hu.e
KHudaa.ii aadmii kii hogii is na.e jahaan par
sitaaro.n ke hai.n dil ye pesh-go.iiya.n liye hu.e
sulagte dil sharar-fishaa.n o sho.ala-baar barq-paash
guzarte din hayaat-e-nau kii surKHiyaa.n liye hu.e
tamaam qaul aur qasam nigaah-e-naaz-e-yaar thii
tuluu-e-zindagii-e-nau kii daastaa.n liye hu.e
nayaa janam hu.aa miraa ki zindagii na.ii milii
jiyuu.ngaa shaam-e-diid kii nishaaniyaa.n liye hu.e
na dekhaa aa.nkh uThaa ke ahd-e-nau ke parda-daaro.n ne
guzar gayaa zamaana yaad-e-raftagaa.n liye hu.e
ham inqilaabiyo.n ne ye jahaa.n bachaa liyaa magar
abhii hai ik jahaa.n vo bad-gumaaniyaa.n liye hu.e

Firaq Gorakhpuri

Nazm

shikast-e-tauba

saaqii kii har nigaah pe bal khaa ke pii gayaa
lahro.n se kheltaa hu.aa lahraa ke pii gayaa
be-kaifiyo.n ke kaif se ghabraa ke pii gayaa
tauba ko to.D-taa.D ke tharraa ke pii gayaa
zaahid! ye terii shoKHii-e-rindaana dekhnaa
rahmat ko baato.n baato.n me.n bahlaa ke pii gayaa
sar-mastii-e-azal mujhe jab yaad aa ga.ii
duniyaa-e-e'tibaar ko Thukraa ke pii gayaa
aazurdagii-e-KHaatir-e-saaqii ko dekh kar
mujh ko ye sharm aa.ii ki sharmaa ke pii gayaa
ai rahmat-e-tamaam mirii har KHataa mu.aaf
mai.n intihaa-e-shauq me.n ghabraa ke pii gayaa
piitaa baGair izn ye kab thii mirii majaal
dar-parda chashm-e-yaar kii shah paa ke pii gayaa
us jaan-e-mai-kada kii qasam baarhaa 'jigar'
kul aalam-e-basiit pe mai.n chhaa ke pii gayaa

Jigar Moradabadi

Nazm

allah allah

ye taqdiir ke pech-o-KHam allaah allaah
ye tahriir-e-lauh-o-qalam allaah allaah

Masoom Sharqi

Nazm

pareshani-e-did

zer-o-bam zer-o-bam pech-o-KHam pech-o-KHam
saaq zaanuu jabii.n pusht sar-taa-qadam
merii laser shu.aa.o.n ke is jaal me.n
zulf siina kamar puuraa akvariom
pairahan jild aur gosht ke paar kaa saaraa ahvaal bhii
jaantaa huu.n use bhii ye maaluum hai
jaantii hai ki ham hai.n baham tak mile phir bhii vo kyuu.n pareshaan hai

Ameeq Hanafi

Nazm

ham-zad

qariib aa kar
nazar milaa kar
vo khilkhilaa kar ha.nsii
aur apne shariir poro.n se
mere collar kii saKHtiyaa.n paa.emaal kar dii.n
safed baalo.n ke pech-o-KHam me.n
siyaahiyo.n kii lakiir khii.nchii
nigaah se sab KHushuunate.n
aur jabii.n se sab silvaTe.n miTaa dii.n
mujhe dariiche se le ke niklii

Khursheed Rizvi

Nazm

yaKH-zada ungliyan

yaKH-zada u.ngliyaa.n
tah-ba-tah barf kii chaadaro.n se ubhartii hu.ii
barf is saal itnii pa.Dii hai
ki raste ke sab pech-o-KHam chhup ga.e hai.n
aur la.Dkiyaa.n
duur pur-nuur laambe dariicho.n se jab barf me.n yaKH-zada u.ngliyaa.n
dekhtii hai.n to ye puuchhtii hai.n
ki is barf se phuul kaise khilaa
ko.nple.n kaise phuuTii.n
zamii.n baa.njh thii kis tarah yak-ba-yak haamila ho ga.ii

Mohammad Anvar Khalid

Nazm

dam nikle

likhaane naam sachche aashiqo.n me.n jab bhii ham nikle
iraado.n me.n hamaare jaane kitne pech-o-KHam nikle

Ghaus Khah makhah Hyderabadi

Nazm

qaht-e-bangal

iflaas kii maarii hu.ii maKHluuq sar-e-raah
be-gor-o-kafan KHaak-ba-sar dekh rahaa huu.n

Jigar Moradabadi

Nazm

naghma-e-mujassam

mahtaab-badan gulaab-suurat
sar-taa-ba-qadam jamaal-e-fitrat
ho.nTo.n par mogre kii kyaarii
raftaar lachaktii Gam-gusaarii
chehre pe niagara barastaa
aavaaz me.n jal-tarang bajtaa
naGmo.n se bharaa hu.aa piano
hai saamne us ke jo do zaanuu
us kii maKHruut u.ngliyo.n me.n
vo loch hai vo gudaaz-o-KHam hai
chhuunaa nahii.n pa.Dtaa taar ko.ii
bas lams kii baat sochte hai.n
rag rag taar-e-jaa.n kii maanind
bajne lagtii hai sarKHushii me.n
KHuu.n naGmagiyo.n ke zer-o-bam kaa
baaje ke badan me.n dau.Dtaa hai
jii uThte hai.n jin ke sun.ne vaale
iisaa-nafasii kii daad dete

Saeed-ul-Zafar Chughtai

Nazm

wo

vo kitaab-e-husn vo ilm o adab kii taaliba
vo mohazzab vo mu.addab vo muqaddas raahiba
kis qadar pairaaya parvar aur kitnii saada-kaar
kis qadar sanjiida o KHaamosh kitnii baa-vaqaar
gesu-e-pur-KHam savaad-e-dosh tak pahu.nche hu.e
aur kuchh bikhre hu.e uljhe hu.e simTe hu.e
ra.ng me.n us ke azaab-e-KHiirgii shaamil nahii.n
kaif-e-ehsaasaat kii afsurdagii shaamil nahii.n
vo mire aate hii us kii nukta-parvar KHaamushii
jaise ko.ii huur ban jaa.e yakaayak falsafii
mujh pe kyaa KHud apnii fitrat par bhii vo khultii nahii.n
aisii pur-asraar la.Dkii mai.n ne dekhii hii nahii.n
duKHtaraan-e-shahr kii hotii hai jab mahfil kahii.n
vo ta.aaruf ke liye aage kabhii ba.Dhtii nahii.n

Jaun Eliya

Nazm

ba-yaad-e-aKHtar shirani

payaam-e-diida-e-afsaana-kaar chho.D gayaa
hikaayat-e-KHam-e-gesuu-e-yaar chho.D gayaa

Nayyar Wasti

Nazm

harjai

aashaa
ang-ang me.n
bal khaa.e lahraa.e

Krishna Mohan

Load More

Search

ENG

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

Speak Now