Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "malak-ul-maut"

Nazm MATCHES FOR "malak-ul-maut"

Nazm

maut ka git

zulmat-e-kufr ko iimaan nahii.n kahte hai.n
sag-e-KHuu.n-KHaar ko insaan nahii.n kahte hai.n
dushman-e-jaa.n ko nigahbaan nahii.n kahte hai.n
jaag uThne ko hai ab KHuu.n kaa talaatum dekho
malak-ul-maut ke chehre kaa tabassum dekho

Makhdoom Mohiuddin
Nazm

maut se maut tak

mujhe apnii maut se bahut mohabbat hai
maut zindagii kaa sab se ba.Daa sach hai
mohabbato.n me.n judaa.ii
vasl ke baad kaa ko.ii marhala hotii hai
magar ye mohabbat rivaayatii nahii.n
yahaa.n to vasl ke intizaar me.n
puurii zindagii judaa.ii ko daan karnaa pa.Dtii hai
mohabbat aur tashviish ke ta'alluq se kis ko inkaar hogaa
aur maut se ziyaada tashviish-naak shai aur kyaa hogii
mujhe apnii maut se ishq hargiz nahii.n
ye meraa junuun bhii nahii.n
sirf mohabbat hai
vasl kaa lutf isii suurat me.n aataa hai
jab vo apne muqarrara vaqt par ho
mai.n vaqt se pahle nahii.n marnaa chaahtaa
mujhe har us maut se shadiid nafrat hai
jo vaqt se pahle
kisii ko gale lagaa letii hai
vo maut jo golii ke baaruud me.n chhup kar
hafto.n apne shikaar kaa piichhaa kartii hai
mujhe ek nazar nahii.n bhaatii
mai.n har din us maut kaa galaa dabochnaa chaahtaa huu.n
jo log KHud apne halq par
aur apnii nabzo.n par tahriir karte hai.n
mujhe vo u.Dtii hu.ii maut hafto.n khultii hai
jo kisii chhat par girne se pahle
barbaad hone vaale gharo.n kii gintii
bhuul jaatii hai
mujhe ghin aatii hai jacket me.n qaid us maut se
jis ko bachche aur buu.Dhe kaa farq nazar nahii.n aataa
jo aazaad ho kar
sai.nka.Do.n siino.n par taqsiim ho jaatii hai
nitrogen ke nucleus me.n rakh kar
shahro.n par giraa.ii jaane vaalii maut jo aane vaalii zinda naslo.n ke a.azaa aur KHadd-o-KHaal se jhaa.nktii hai
saalo.n tak meraa KHuun chuustii hai
mujhe apnii maut se mohabbat ke alaava
har us maut se nafrat hai
jo malak-ul-maut ke Time Table me.n nahii.n likhii hu.ii

Bilal Aswad
Nazm

bambai raat samundar

pa.De hai.n gate-way-of-india ke farsh par be-ghar bhikaarii
udhar hai.n kuchh ju.aarii
idhar ik happy la.Dkii apne happy dost ke pahluu me.n simTii
chilam kaa dam lagaatii hai
suraaG-e-jannat-ul-maut ke taalib hai.n dono.n ek saadhuu se
hashiishii nashshe ke dariyaa me.n Gote khaa rahe hai.n
hashiishii nashshe hii kii mauj hai goyaa samundar kii sadaa bhii
samundar kii siyaahii par vo piilii raushnii ke phuul
jahaazo.n ne bikhere hai.n
a.ndhere me.n nazar aataa nahii.n jin kaa ko.ii mastuul
jahaaz aaraam karte hai.n
jahaazii shahr ke ishrat-kado.n me.n Gota-zan ho.nge
hujuum-e-hashr-saamaa.n ke samundar me.n
jahaazii chand qatro.n kii tarah ghul-mil ga.e ho.nge
yahaa.n to naarsii-sas bhii kahii.n bhii KHud-girafta rah nahii.n saktaa

Ameeq Hanafi
Nazm

visal

suno
merii mohabbat ko.ii maut nahii.n
jis kaa zaa.iqa chakhnaa tum par laazim ho
merii mohabbat to aashiqo.n ke shamshaan ghaaT par
ugaa vo saaya-daar pe.D hai
jis kii Daalo.n par ajnabii parinde apnaa ghar banaate hai.n
aur jis kii ja.Do.n me.n mere ham-nafas
apnii vahshato.n kii jhulastii raakh Daalte hai.n
tum jo mere ham-zaad ho
tumhaare liye to merii mohabbat zindagii hai
jis me.n maanind-e-gulzaar taKHliiq kaa har pahluu
tumhaaraa intizaarii rahtaa hai
tum jo mere ham-raqs ho
tum kyo.n apne mehvar se dast-bardaar hote ho
ki tumhaare aisaa karne se
mere nizaam-e-shaKHsii kaa tavaazun biga.Dne lagtaa hai
aur biga.Dte zaaviyo.n se jo manzar
merii aa.nkhe.n dekhtii hai.n
us me.n israafiil apne narsinghe kii samt durust kartaa hai
aur izraa.iil ek azm-e-aziim se apne par tolne lagtaa hai
be-shak kullu nafsin zaa.iqat-ul-maut
kullu nafsin zaa.iqat-ul-maut
magar merii mohabbat ko.ii maut nahii.n
jis kaa zaa.iqa chakhnaa tum par laazim ho

Komal Raja
Nazm

tum to bachche nahin

tum maro
tum to bachche nahii.n
tum to masjid ke qaidii ho qur.aan pa.Dte raho
sajde karte raho
ye jo paikar tumhaaraa hai is me.n lahuu kii jagah zahr hai
ye jo mandir me.n bachche humakte hai.n bachche nahii.n
ye kaliisaa me.n be-daaG bachche bhii bachche nahii.n
ye jo maslak kii khetii me.n khulte hai.n bachche ye bachche nahii.n
apne pomii ko dekh aa.uu.n mai.n
call aa.ii hai school se
nannhii bachchii se la.Dte hu.e gir pa.Daa hai vahaa.n
aur ab kuchh KHaraasho.n se behosh hai
ghar me.n laa kar use
ek taqriib me.n bhii pahu.nchnaa hai jaldii mujhe
aur pa.Dhnaa hai mazmuun jis kaa hai unvaa.n hamaarii na.ii nasl ke KHvaab parvaan kaise cha.Dhe.n

nawed malik
Nazm

samundar

miraa dil uchhaltaa samundar
miraa jazba-e-be-amaa.n
meraa ek ek armaa.n
uchhalte samundar kii sadiyo.n puraanii chaTTaano.n se Takraa ke yuu.n reza reza hu.aa hai
ki ghaayal samundar ke siine me.n mahshar bapaa hai
har ik mauj dard-aashnaa hai
har ik qatra-e-aab anmol hai gauhar-e-be-bahaa hai

Jameel Malik
Nazm

palaT aao

palaT aa.o
ki ye lamhe hamaaraa maa.ns khaane par tule hai.n
zindagii baaruud ban kar jism-o-jaa.n me.n dau.Dtii hai
aa.nkh pathraa.ii hu.ii hai
haath shal hai.n
aur ham pe maut sii chhaa.ii hu.ii hai

Arshad Malik
Nazm

shitab

jab raat bhiig jaatii hai
to us kaa nam
kor-basar KHvaabo.n ke suukhe labo.n tak pahu.nchtaa hai
aur tishna-kaam KHvaabo.n kaa dam TuuTne se zaraa pahle
un ko zindagii kii naved sunaataa hai
KHvaab jab maut ke dahaane se palaT kar aate hai.n
to zindagii un ke rag-o-pai me.n sur.at se dau.Dtii hai
mahmez-e-shauq me.n vo apnii be-basarii ko faraamosh kiye
tez-raftaarii kii aaKHirii mumkina had ko chhuute hu.e
ta.abiir kii manzil tak pahu.nchnaa chaahte hai.n
maut kaa saham un ke a.asaab shal kiye detaa hai
be-basarii unhe.n nazar nazar bhaTkaatii hai
zindagii kii be-sabaatii kaa KHauf
dev-haikal jallaad kii suurat mujassam ho kar
un kii shaah-rag dabochne ke darpe hotaa hai
vo jaante hai.n
ki chaah kar bhii is giraft se
der tak aur duur tak aazaad nahii.n rah sakte
usii KHauf ke zer-e-asar
mayassar vaqt me.n
vo sadiyo.n ko lamho.n me.n jii lenaa chaahte hai.n
aur lamho.n se sadiyaa.n kashiid karnaa chaahte hai.n

Neelam Malik
Nazm

intizar

sunsaan guzargaaho.n par
ab maut kaa Damruu bajtaa hai

Rabia Barni
Nazm

chand sawalat

ai KHudaa-e-do-jahaa.n ai maalik-e-har-do-saraa

Sahar Alig
Nazm

jhuTi nafrat

hamaare dil me.n tumhaarii KHaatir
mohabbate.n thii.n azal se zinda abad se qaa.em
tumhaaraa haatho.n me.n haath le kar vo chuum lenaa sabt karnaa vo lab mulaa.em
tumhaare 'ishq kii hii maanind
tumhaaraa dukh bhii hamaare dil par rahaa thaa daa.em
aah yak-dam be-ruKHii se
vo haath chho.De tumhaaraa jaanaa
aur rasto.n me.n dhuul ban kar miraa bikharnaa
tumhe.n bulaanaa
vo dhuul honaa vo dhuul u.Daanaa
vo tapte sahraa kii ret par yuu.n
paTaKH ke sar ko maluul honaa
vo rote rote sadaa lagaanaa tumhe.n bataanaa
ki ab talak be-amaan rasto.n
pe sard raato.n kii dhund me.n lipTii
ik sisaktii sii yaad le kar
tumhaare vaa'do.n ke aasare par
vo saare vaa'de jo jhuuT nikle
mujhe abhii tak gumaan kyo.n hai ki sach the shaayad kabhii bataa.o vo jhuuT the naa.n
vahii.n kha.Dii hai 'ka.nval' tumhaarii
jahaa.n se tum ne badal ke rasta
palaT ke ik baar bhii na dekhaa
jahaa.n sulagtii sii ret par mai.n
dhuup aa.nchal ko sar pe o.Dhe
july kii jhulsaatii luu me.n
KHushk suukhe hu.e labo.n par
karbalaa sii vo pyaas le kar mai.n tiin din se vahii.n kha.Dii thii
ye puuchhne ko ki us shaam aisaa kyaa hu.aa thaa KHilaaf-e-vaa’da jo tum na aa.e
tumhe.n pataa thaa KHabar thii tum ko
tumhe.n gavaaraa nahii.n thaa lekin
ki paas aate mujhe bataate ki aise jaane kaa kyaa sabab thaa binaa bataa.e
laal rang kaa pahan ke jo.Daa
lagaa ke meh.ndii sajaa ke KHud ko
mai.n kitne ghanTo.n se muntazir thii magar vo garmii kii shaam haa.e
KHilaaf-e-vaa’da jo tum na aa.e
ki mai.n to us shaam hii mar ga.ii thii
kabhii to aate mujhe bataate ki kyo.n ga.e ho
faqat ye kahte ki mu'aaf kar do
ko.ii bhii sikka vafaa kaa chaahe hamaare kaase me.n tum na bharte faqat bataate ki un darindo.n ke biich mujh sii vo narm-o-naazuk akelii la.Dkii ki jo parindo.n ke pha.Dpha.Daane se KHauf khaatii jo uu.nchii aavaazo.n se Dar kar saham sii jaatii
jo jaantii hii nahii.n thii duniyaa tumhaare jaise bhe.Diyo.n se bharii hu.ii hai
to aaj sun lo
hamaare dil me.n tumhaarii KHaatir
mohabbato.n kaa vo baab jo thaa azal se zinda abad se qaa.em
tamaam nafrat me.n Dhal chukaa hai
jahaa.n khile the gulaab saare
vo baaG chaahat kaa jal chukaa hai
vo raah taktii 'ka.nval' kii aa.nkhe.n bhii bujh chukii hai.n
aur us kaa dil bhii badal chukaa hai
ab us ke dil me.n tumhaarii KHaatir
tamaam nafrat tamaam nafrat tamaam nafrat
aur nafrat ke 'alaava to kuchh nahii.n hai
nahii.n hai kuchh bhii
use bataanaa
use jalaanaa use rulaanaa
nahii.n nahii.n ye nahii.n hai mumkin haa.n phir bhii lekin
vo aa.nkhe.n miiche malaal ho kar
'ajiib Gam se niDhaal ho kar
to mat bataanaa ki nazm kaa 'unvaan kyaa thaa
jhuuTii nafrat

Kanval Malik
Nazm

parda aur ismat

nigaaho.n kii daavat ko paamaal karnaa
mazaaq-e-lataafat ko paamaal karnaa

Asrarul Haq Majaz
Nazm

hai meri soch mein raqsan sabhi jazbaat ka rang

kaasnii dard kaa aur maut kii sakraat kaa rang
aas kii qaus-o-quzah harf-e-munaajaat kaa rang

Ain Seen
Nazm

tanha

raa.nda-e-mauj bhii hai.n mujrim-e-zarraat bhii hai.n

Mustafa Zaidi
Nazm

hamd

ai KHudaa hai tuu hii maalik-e-do-jahaa.n
terii qudrat ke jalve hai.n har suu ayaa.n

Ahmad Wasi
Nazm

bhagwan-kirshn

hai vahii maalik-e-fanaa-o-baqaa
vaalii-e-do-jahaa.n hai meraa kirshn

Charkh Chinioti
Nazm

KHala

dost kahte hai.n sair kar aa.e.n
mauj kar aa.e.n dil ko bahlaa.e.n

Daud Ghazi
Nazm

yaad

mazaaq-e-dil-barii hai ishq ke paiGaam se vaaqif
tasavvur hai miraa khoyaa hu.aa saa terii aa.nkho.n me.n

Zia Fatehabadi
Nazm

jang

KHud apnii zindagii pe pashiimaa.n hai zindagii
qurbaan-gaah-e-maut pe raqsaa.n hai zindagii

Makhdoom Mohiuddin
Nazm

jawan-marg ka nauha

hame.n javaanii me.n maut aa.egii
bhiigte takiye ke sard siine pe
apnii saa.nso.n me.n garm baa.nho.n kii pyaas le kar sulagne vaalii
har ek doshiiza jaantii hai
ki aa.nkh jab KHvaab ke sahiife ko chaaT le gii
to nuuh capsule se pukaaregaa
pyaare beTe' amaa.n me.n aa.o
lo, mai.n ne jo qabr umr ke belche se apne liye banaa.ii hai
us kii raano.n me.n
tum bhii apnaa badan sameTo
tumhaare ek haath chaa.nd aur duusre pe suuraj
ki maslahat kii craze qaa.em rahe
glamour tumhaare collar me.n phuul ban kar khile
ai beTe, ye shahr uryaaniyo.n me.n nuch.De-gaa
aur is par azaab daa.im hai

Rahat Naseem Malik
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now