tum mire paas hote ho goyā

jab koī dūsrā nahīñ hotā

tum mere pas hote ho goya

jab koi dusra nahin hota

umr to saarī kaTī ishq-e-butāñ meñ 'momin'

āḳhirī vaqt meñ kyā ḳhaak musalmāñ hoñge

umr to sari kaTi ishq-e-butan mein 'momin'

aaKHiri waqt mein kya KHak musalman honge

vo jo ham meñ tum meñ qarār thā tumheñ yaad ho ki na yaad ho

vahī yaanī va.ada nibāh kā tumheñ yaad ho ki na yaad ho

wo jo hum mein tum mein qarar tha tumhein yaad ho ki na yaad ho

wahi yani wada nibah ka tumhein yaad ho ki na yaad ho

thī vasl meñ bhī fikr-e-judā.ī tamām shab

vo aa.e to bhī niiñd na aa.ī tamām shab

thi wasl mein bhi fikr-e-judai tamam shab

wo aae to bhi nind na aai tamam shab

tum hamāre kisī tarah na hue

varna duniyā meñ kyā nahīñ hotā

tum hamare kisi tarah na hue

warna duniya mein kya nahin hota

maiñ bhī kuchh ḳhush nahīñ vafā kar ke

tum ne achchhā kiyā nibāh na kī

main bhi kuchh KHush nahin wafa kar ke

tum ne achchha kiya nibah na ki

kyā jaane kyā likhā thā use iztirāb meñ

qāsid kī laash aa.ī hai ḳhat ke javāb meñ

kya jaane kya likha tha use iztirab mein

qasid ki lash aai hai KHat ke jawab mein

royā kareñge aap bhī pahroñ isī tarah

aTkā kahīñ jo aap kā dil bhī mirī tarah

roya karenge aap bhi pahron isi tarah

aTka kahin jo aap ka dil bhi meri tarah

māñgā kareñge ab se duā hijr-e-yār kī

āḳhir to dushmanī hai asar ko duā ke saath

manga karenge ab se dua hijr-e-yar ki

aaKHir to dushmani hai asar ko dua ke sath

haath TūTeñ maiñ ne gar chheḌī hoñ zulfeñ aap kī

aap ke sar kī qasam bād-e-sabā thī maiñ na thā

hath TuTen main ne gar chheDi hon zulfen aap ki

aap ke sar ki qasam baad-e-saba thi main na tha

kis pe marte ho aap pūchhte haiñ

mujh ko fikr-e-javāb ne maarā

kis pe marte ho aap puchhte hain

mujh ko fikr-e-jawab ne mara

shab jo masjid meñ jā phañse 'momin'

raat kaaTī ḳhudā ḳhudā kar ke

shab jo masjid mein ja phanse 'momin'

raat kaTi KHuda KHuda kar ke

aap kī kaun sī baḌhī izzat

maiñ agar bazm meñ zalīl huā

aap ki kaun si baDhi izzat

main agar bazm mein zalil hua

kisī kā huā aaj kal thā kisī kā

na hai tū kisī kā na hogā kisī kā

kisi ka hua aaj kal tha kisi ka

na hai tu kisi ka na hoga kisi ka

chal diye sū-e-haram kū-e-butāñ se 'momin'

jab diyā ranj butoñ ne to ḳhudā yaad aayā

chal diye su-e-haram ku-e-butan se 'momin'

jab diya ranj buton ne to KHuda yaad aaya

Thānī thī dil meñ ab na mileñge kisī se ham

par kyā kareñ ki ho ga.e nā-chār jī se ham

Thani thi dil mein ab na milenge kisi se hum

par kya karen ki ho gae na-chaar ji se hum

vo aa.e haiñ pashemāñ laash par ab

tujhe ai zindagī lā.ūñ kahāñ se

wo aae hain pasheman lash par ab

tujhe ai zindagi laun kahan se

hai kuchh to baat 'momin' jo chhā ga.ī ḳhamoshī

kis but ko de diyā dil kyuuñ but se ban ga.e ho

hai kuchh to baat 'momin' jo chha gai KHamoshi

kis but ko de diya dil kyun but se ban gae ho

us naqsh-e-pā ke sajde ne kyā kyā kiyā zalīl

maiñ kūcha-e-raqīb meñ bhī sar ke bal gayā

us naqsh-e-pa ke sajde ne kya kya kiya zalil

main kucha-e-raqib mein bhi sar ke bal gaya

na karo ab nibāh kī bāteñ

tum ko ai mehrbān dekh liyā

na karo ab nibah ki baaten

tum ko ai mehrban dekh liya

hāl-e-dil yaar ko likhūñ kyūñkar

haath dil se judā nahīñ hotā

haal-e-dil yar ko likhun kyunkar

hath dil se juda nahin hota

hañs hañs ke vo mujh se hī mire qatl kī bāteñ

is tarah se karte haiñ ki goyā na kareñge

hans hans ke wo mujh se hi mere qatl ki baaten

is tarah se karte hain ki goya na karenge

uljhā hai paañv yaar kā zulf-e-darāz meñ

lo aap apne daam meñ sayyād aa gayā

uljha hai panw yar ka zulf-e-daraaz mein

lo aap apne dam mein sayyaad aa gaya

Dartā huuñ āsmān se bijlī na gir paḌe

sayyād kī nigāh sū-e-āshiyāñ nahīñ

Darta hun aasman se bijli na gir paDe

sayyaad ki nigah su-e-ashiyan nahin

us ġhairat-e-nāhīd kī har taan hai dīpak

sho.ala sā lapak jaa.e hai āvāz to dekho

us ghairat-e-nahid ki har tan hai dipak

shoala sa lapak jae hai aawaz to dekho

'momin' ḳhudā ke vāste aisā makāñ na chhoḌ

dozaḳh meñ Daal ḳhuld ko kū-e-butāñ na chhoḌ

'momin' KHuda ke waste aisa makan na chhoD

dozaKH mein Dal KHuld ko ku-e-butan na chhoD

bahr-e-ayādat aa.e vo lekin qazā ke saath

dam hī nikal gayā mirā āvāz-e-pā ke saath

bahr-e-ayaadat aae wo lekin qaza ke sath

dam hi nikal gaya mera aawaz-e-pa ke sath

ma.ashūq se bhī ham ne nibhā.ī barābarī

vaañ lutf kam huā to yahāñ pyaar kam huā

mashuq se bhi hum ne nibhai barabari

wan lutf kam hua to yahan pyar kam hua

kal tum jo bazm-e-ġhair meñ āñkheñ churā ga.e

kho.e ga.e ham aise ki aġhyār pā ga.e

kal tum jo bazm-e-ghair mein aankhen chura gae

khoe gae hum aise ki aghyar pa gae

chāra-e-dil sivā.e sabr nahīñ

so tumhāre sivā nahīñ hotā

chaara-e-dil siwae sabr nahin

so tumhaare siwa nahin hota

majlis meñ mire zikr ke aate hī uThe vo

badnāmi-e-ushshāq kā e.azāz to dekho

majlis mein mere zikr ke aate hi uThe wo

badnami-e-ushshaq ka eazaz to dekho

ho gayā rāz-e-ishq be-parda

us ne parde se jo nikālā muñh

ho gaya raaz-e-ishq be-parda

us ne parde se jo nikala munh

kyā milā arz-e-mudda.ā kar ke

baat bhī khoī iltijā kar ke

kya mila arz-e-muddaa kar ke

baat bhi khoi iltija kar ke

ham samajhte haiñ āzmāne ko

uzr kuchh chāhiye satāne ko

hum samajhte hain aazmane ko

uzr kuchh chahiye satane ko

ġhairoñ pe khul na jaa.e kahīñ raaz dekhnā

merī taraf bhī ġhamza-e-ġhammāz dekhnā

ghairon pe khul na jae kahin raaz dekhna

meri taraf bhi ghamza-e-ghammaz dekhna

na mānūñgā nasīhat par na suntā maiñ to kyā kartā

ki har har baat meñ nāseh tumhārā naam letā thā

na manunga nasihat par na sunta main to kya karta

ki har har baat mein naseh tumhaara nam leta tha

soz-e-ġham se ashk kā ek ek qatra jal gayā

aag paanī meñ lagī aisī ki dariyā jal gayā

soz-e-gham se ashk ka ek ek qatra jal gaya

aag pani mein lagi aisi ki dariya jal gaya

itnī kudūrat ashk meñ hairāñ huuñ kyā kahūñ

dariyā meñ hai sarāb ki dariyā sarāb meñ

itni kudurat ashk mein hairan hun kya kahun

dariya mein hai sarab ki dariya sarab mein

rah ke masjid meñ kyā hī ghabrāyā

raat kaaTī ḳhudā ḳhudā kar ke

rah ke masjid mein kya hi ghabraya

raat kaTi KHuda KHuda kar ke

kar ilāj-e-josh-e-vahshat chāragar

lā de ik jañgal mujhe bāzār se

kar ilaj-e-josh-e-wahshat chaaragar

la de ek jangal mujhe bazar se

hai kis kā intizār ki ḳhvāb-e-adam se bhī

har baar chauñk paḌte haiñ āvāz-e-pā ke saath

hai kis ka intizar ki KHwab-e-adam se bhi

har bar chaunk paDte hain aawaz-e-pa ke sath

ho ga.e nām-e-butāñ sunte hī 'momin' be-qarār

ham na kahte the ki hazrat pārsā kahne ko haiñ

ho gae nam-e-butan sunte hi 'momin' be-qarar

hum na kahte the ki hazrat parsa kahne ko hain

kuchh qafas meñ in dinoñ lagtā hai jī

āshiyāñ apnā huā barbād kyā

kuchh qafas mein in dinon lagta hai ji

aashiyan apna hua barbaad kya

tū kahāñ jā.egī kuchh apnā Thikāna kar le

ham to kal ḳhvāb-e-adam meñ shab-e-hijrāñ hoñge

tu kahan jaegi kuchh apna Thikana kar le

hum to kal KHwab-e-adam mein shab-e-hijran honge

rāz-e-nihāñ zabān-e-aġhyār tak na pahuñchā

kyā ek bhī hamārā ḳhat yaar tak na pahuñchā

raaz-e-nihan zaban-e-aghyar tak na pahuncha

kya ek bhi hamara KHat yar tak na pahuncha

be-ḳhud the ġhash the mahv the duniyā kā ġham na thā

jiinā visāl meñ bhī to hijrāñ se kam na thā

be-KHud the ghash the mahw the duniya ka gham na tha

jina visal mein bhi to hijran se kam na tha

sāhab ne is ġhulām ko āzād kar diyā

lo bandagī ki chhūT ga.e bandagī se ham

sahab ne is ghulam ko aazad kar diya

lo bandagi ki chhuT gae bandagi se hum

le shab-e-vasl-e-ġhair bhī kaaTī

tū mujhe āzmā.egā kab tak

le shab-e-wasl-e-ghair bhi kaTi

tu mujhe aazmaega kab tak

mahshar meñ paas kyuuñ dam-e-fariyād aa gayā

rahm us ne kab kiyā thā ki ab yaad aa gayā

mahshar mein pas kyun dam-e-fariyaad aa gaya

rahm us ne kab kiya tha ki ab yaad aa gaya

momin maiñ apne nāloñ ke sadqe ki kahte haiñ

us ko bhī aaj niiñd na aa.ī tamām shab

momin main apne nalon ke sadqe ki kahte hain

us ko bhi aaj nind na aai tamam shab