gah tiir mārtā hai gah sañg pheñktā hai

vo shoḳh ham par aur ham misl-e-hadaf khaḌe haiñ

gah tir marta hai gah sang phenkta hai

wo shoKH hum par aur hum misl-e-hadaf khaDe hain

'mus.hafī' har ghaḌī jaayā na karo tum sāhib

ik to āshiq ho aur us kūche meñ badnām bhī ho

'mushafi' har ghaDi jaya na karo tum sahib

ek to aashiq ho aur us kuche mein badnam bhi ho

mujh se jo merī zohra miltī nahīñ hai ab tak

ai pīr-e-charḳh sab ye bad-zātiyāñ haiñ terī

mujh se jo meri zohra milti nahin hai ab tak

ai pir-e-charKH sab ye bad-zatiyan hain teri

mujh ko ye soch hai jiite haiñ ve kyūñ-kar yā-rab

apne māshūqoñ se jo shaḳhs judā rahte haiñ

mujh ko ye soch hai jite hain we kyun-kar ya-rab

apne mashuqon se jo shaKHs juda rahte hain

mehnat pe Tuk nazar kar sūrat gar azal ne

chālīs din meñ terā mīm-e-dahāñ banāyā

mehnat pe Tuk nazar kar surat gar azal ne

chaalis din mein tera mim-e-dahan banaya

tab jānūñ maiñ ki dīn-e-mohammad ke haiñ harīf

jab roz-e-hashr ho ruḳh-e-ahl-e-farañg surḳh

tab jaanun main ki din-e-mohammad ke hain harif

jab roz-e-hashr ho ruKH-e-ahl-e-farang surKH

kyā jāniye chaman meñ kyā taaza gul khilā ho

aa.e haiñ aag rakh kar ham apne āshiyāñ meñ

kya jaaniye chaman mein kya taza gul khila ho

aae hain aag rakh kar hum apne aashiyan mein

kis ke majrūh gulistāñ meñ haiñ madfūñ jo hanūz

ġhunche aate haiñ nazar sūrat-e-paikāñ mujh ko

kis ke majruh gulistan mein hain madfun jo hanuz

ghunche aate hain nazar surat-e-paikan mujh ko

samajh le āshiq o ma.ashūq kī ham-āġhoshī

azaab aur to kyā qabr ke fishār meñ thā

samajh le aashiq o mashuq ki ham-aghoshi

azab aur to kya qabr ke fishaar mein tha

kishvar-e-dil ab makān-e-dard-o-dāġh-o-yās hai

ishq ke hākim ne biThlā.e haiñ yaañ thāne ka.ī

kishwar-e-dil ab makan-e-dard-o-dagh-o-yas hai

ishq ke hakim ne biThlae hain yan thane kai

sarak ai mauj salāmat to rah-e-sāhil le

tujh ko kyā kaam jo kashtī mirī tūfān meñ hai

sarak ai mauj salamat to rah-e-sahil le

tujh ko kya kaam jo kashti meri tufan mein hai

maar nahiñ Dālte haiñ yuuñ us ko

aadmī se ḳhatā bhī hotī hai

mar nahin Dalte hain yun us ko

aadmi se KHata bhi hoti hai

maiñ kar ke chalā bāteñ aur us shoḳh ne vohīñ

pūchhā jo kisī ne to kahā rah-guzrī thā

main kar ke chala baaten aur us shoKH ne wohin

puchha jo kisi ne to kaha rah-guzri tha

reḳhta-goī kī buniyād 'valī' ne Daalī

ba.ad-azāñ ḳhalq ko 'mirzā' se hai aur 'mīr' se faiz

reKHta-goi ki buniyaad 'wali' ne Dali

baad-azan KHalq ko 'mirza' se hai aur 'mir' se faiz

vaañ laal phaḌaktā hai amīroñ ke qafas meñ

yaañ fāḳhta haq-go hai faqīroñ ke qafas meñ

wan lal phaDakta hai amiron ke qafas mein

yan faKHta haq-go hai faqiron ke qafas mein

shifā nasīb mire kyuuñ ke ho ki ai yaaro

rahīm dil hai tabīb aur maiñ huuñ bad-parhez

shifa nasib mere kyun ke ho ki ai yaro

rahim dil hai tabib aur main hun bad-parhez

allāh-re tere silsila-e-zulf kī kashish

jaatā hai jī udhar hī khiñchā kā.enāt kā

allah-re tere silsila-e-zulf ki kashish

jata hai ji udhar hi khincha kaenat ka

ushshāq kā kuchh maiñ ne aalam hī nayā dekhā

ik aan meñ jī uTTheñ ik aan meñ mar jāveñ

ushshaq ka kuchh main ne aalam hi naya dekha

ek aan mein ji uTThen ek aan mein mar jawen

shab tabaq meñ āsmāñ ke gir paḌe the mere ashk

kuchh savābit ban ga.e kuchh un se sayyāre hue

shab tabaq mein aasman ke gir paDe the mere ashk

kuchh sawabit ban gae kuchh un se sayyare hue

hai ye falak-e-sifla vo phīkā sā farañgī

rakhtā hai mah o ḳhur se jo paas apne do biscuit

hai ye falak-e-sifla wo phika sa farangi

rakhta hai mah o KHur se jo pas apne do biscuit

ik din to lipaT jaa.e tasavvur hī se tere

ye bhī dil-e-nāmard ko jur.at nahīñ miltī

ek din to lipaT jae tasawwur hi se tere

ye bhi dil-e-namard ko jurat nahin milti

apnā to tūl-e-umr se ghabrā gayā hai jī

ghar pahuñcheñ ham tamām bhī ho ye safar kahīñ

apna to tul-e-umr se ghabra gaya hai ji

ghar pahunchen hum tamam bhi ho ye safar kahin

kuchh sher-o-shā.erī se nahīñ mujh ko fā.eda

illā husūl-e-kāvish-e-be-jā-e-ḳhalq hai

kuchh sher-o-shaeri se nahin mujh ko faeda

illa husul-e-kawish-e-be-ja-e-KHalq hai

ashk se mere bache ham-sāya kyūñ-kar ghar samet

bah ga.ī haiñ kashtiyāñ is bahr meñ lañgar samet

ashk se mere bache ham-saya kyun-kar ghar samet

bah gai hain kashtiyan is bahr mein langar samet

kyā kaam kiyā tum ne thī ye bhī adā koī

parde se nikal aanā aur jī meñ samā jaanā

kya kaam kiya tum ne thi ye bhi ada koi

parde se nikal aana aur ji mein sama jaana

chheḌe hai us ko ġhair to kahtā hai us se yuuñ

koī khaḌā na ho pas-e-dīvār dekhnā

chheDe hai us ko ghair to kahta hai us se yun

koi khaDa na ho pas-e-diwar dekhna

rātoñ ko aañkh uThā ke zarā dekh to sahī

kyā shakleñ jalva-gar haiñ falak ke ravāq meñ

raaton ko aankh uTha ke zara dekh to sahi

kya shaklen jalwa-gar hain falak ke rawaq mein

bas tū ne apne muñh se jo parda uThā diyā

hasrat nikal ga.ī dil-e-ummīd-vār kī

bas tu ne apne munh se jo parda uTha diya

hasrat nikal gai dil-e-ummid-war ki

ek naale pe hai ma.āsh apnī

ham ġharīboñ kī hai yahī merāj

ek nale pe hai maash apni

hum gharibon ki hai yahi meraj

jaan jaanī hai mirī ai but-e-kam-sin tujh par

mar hī jā.ūñgā galā kaaT ke ik din tujh par

jaan jaani hai meri ai but-e-kam-sin tujh par

mar hi jaunga gala kaT ke ek din tujh par

dil aur siyah ho ga.e māh-e-ramazāñ meñ

ik hauz hai ā.īna-e-nairañg zamīñ par

dil aur siyah ho gae mah-e-ramazan mein

ek hauz hai aaina-e-nairang zamin par

aalam ko ik halāk kiyā us ne 'mus.hafī'

duniyā meñ is qadar bhī koī ḳhūb-rū na ho

aalam ko ek halak kiya us ne 'mushafi'

duniya mein is qadar bhi koi KHub-ru na ho

har dam pukārte ho kinā.e se kyā miyāñ

jaao jī baiTho o-be hamārā laqab nahīñ

har dam pukarte ho kinae se kya miyan

jao ji baiTho o-be hamara laqab nahin

jab dil kā jahāz apnā tabāhī meñ paḌe hai

le dauḌeñ haiñ aañsū vahīñ ā.ankhoñ kī ġharābeñ

jab dil ka jahaz apna tabahi mein paDe hai

le dauDen hain aansu wahin aaankhon ki gharaben

ai 'mus.hafī' use bhī rakhtā hai shaad jī meñ

har dam vo merā kahnā kyā chhātiyāñ haiñ terī

ai 'mushafi' use bhi rakhta hai shad ji mein

har dam wo mera kahna kya chhatiyan hain teri

tire kūche har bahāne mujhe din se raat karnā

kabhī is se baat karnā kabhī us se baat karnā

tere kuche har bahane mujhe din se raat karna

kabhi is se baat karna kabhi us se baat karna

'mus.hafī' fārsī ko taaq pe rakh

ab hai ash.ār-e-hindavī kā rivāj

'mushafi' farsi ko taq pe rakh

ab hai ashaar-e-hindawi ka riwaj

hotā hai musāfir ko do-rāhe meñ tavaqquf

rah ek hai uTh jaa.e jo shak dair-o-haram kā

hota hai musafir ko do-rahe mein tawaqquf

rah ek hai uTh jae jo shak dair-o-haram ka

yaañ tak kiyā maiñ girya ki ḳhūbāñ ke ishq meñ

saath aabrū ke apnī ga.ī ābrū-e-chashm

yan tak kiya main girya ki KHuban ke ishq mein

sath aabru ke apni gai aabru-e-chashm

ThaTh kī ThaTh itnī chalī aatī hai ye kaahe ko

log itne tirī majlis meñ samā sakte haiñ

ThaTh ki ThaTh itni chali aati hai ye kahe ko

log itne teri majlis mein sama sakte hain

us ke dar par maiñ gayā saañg banā.e to kahā

chal be chal duur ho kyā le ke faqīrī aayā

us ke dar par main gaya sang banae to kaha

chal be chal dur ho kya le ke faqiri aaya

hazrat-e-ishq ne donoñ ko kiyā ḳhāna-ḳharāb

barhaman but-kada aur shaiḳh haram bhuul ga.e

hazrat-e-ishq ne donon ko kiya KHana-KHarab

barhaman but-kada aur shaiKH haram bhul gae

pāya-e-taḳht-e-sulaimāñ kā hai shā.er 'mus.hafī'

hai usī ke ḳhātim-e-dast-e-sulaimāñ haath meñ

paya-e-taKHt-e-sulaiman ka hai shaer 'mushafi'

hai usi ke KHatim-e-dast-e-sulaiman hath mein

us ne gaalī mujhe dī ho ke itāb-ālūda

aur maiñ saada use lutf-e-zabānī samjhā

us ne gali mujhe di ho ke itab-aluda

aur main sada use lutf-e-zabani samjha

tiin hisse haiñ zamīñ ke ġharq-e-dariyā-e-muhīt

rub.a maskoñ meñ kuchh ābādī hai kuchh vīrāna hai

tin hisse hain zamin ke gharq-e-dariya-e-muhit

ruba maskon mein kuchh aabaadi hai kuchh virana hai

jī jis ko chāhtā thā usī se milā diyā

dil kī kashish ne kī ye karāmāt raah meñ

ji jis ko chahta tha usi se mila diya

dil ki kashish ne ki ye karamat rah mein

hasrat pe us musāfir-e-be-kas kī roiye

jo thak gayā ho baiTh ke manzil ke sāmne

hasrat pe us musafir-e-be-kas ki roiye

jo thak gaya ho baiTh ke manzil ke samne

aks se apne agar raah nahīñ tum ko to jaan

ye ishāre se phir ā.īne meñ kyā hote haiñ

aks se apne agar rah nahin tum ko to jaan

ye ishaare se phir aaine mein kya hote hain

kūcha-e-yār meñ rahne se nahīñ aur husūl

ishq hai mujh ko ik us ke dar-o-dīvār ke saath

kucha-e-yar mein rahne se nahin aur husul

ishq hai mujh ko ek us ke dar-o-diwar ke sath

tan to kahāñ hai shola-e-fānūs kī tarah

ik aag sī bharī hai mire pairahan ke biich

tan to kahan hai shola-e-fanus ki tarah

ek aag si bhari hai mere pairahan ke bich