kal mire qatl ko is Dhab se vo bāñkā niklā

muñh se jallād-e-falak ke bhī ahāhā niklā

kal mere qatl ko is Dhab se wo banka nikla

munh se jallad-e-falak ke bhi ahaha nikla

sar-chashma-e-baqā se hargiz na aab laao

hazrat ḳhizar kahīñ se jā kar sharāb laao

sar-chashma-e-baqa se hargiz na aab lao

hazrat KHizar kahin se ja kar sharab lao

jo ḳhushāmad kare ḳhalq us se sadā raazī hai

sach to ye hai ki ḳhushāmad se ḳhudā raazī hai

jo KHushamad kare KHalq us se sada raazi hai

sach to ye hai ki KHushamad se KHuda raazi hai

Thaharnā ishq ke āfāt ke sadmoñ meñ 'nazīr'

kaam mushkil thā par allāh ne āsān kiyā

Thaharna ishq ke aafat ke sadmon mein 'nazir'

kaam mushkil tha par allah ne aasan kiya

dekhe na mujhe kyūñkar az-chashm-e-hiqārat-ū

vo sarv-e-javāñ yaaro man-fāḳhta-e-pīram

dekhe na mujhe kyunkar az-chashm-e-hiqarat-u

wo sarw-e-jawan yaro man-faKHta-e-piram

tūfāñ uThā rahā hai mire dil meñ sail-e-ashk

vo din ḳhudā na laa.e jo maiñ āb-dīda huuñ

tufan uTha raha hai mere dil mein sail-e-ashk

wo din KHuda na lae jo main aab-dida hun

mazmūn-e-sard-mehrī-e-jānāñ raqam karūñ

gar haath aa.e kāġhaz-e-kashmīr kā varaq

mazmun-e-sard-mehri-e-jaanan raqam karun

gar hath aae kaghaz-e-kashmir ka waraq

maiñ dast-o-garebāñ huuñ dam-e-bāz-pusīñ se

hamdam use laatā hai to lā jald kahīñ se

main dast-o-gareban hun dam-e-baz-pusin se

hamdam use lata hai to la jald kahin se

bande ke qalam haath meñ hotā to ġhazab thā

sad shukr ki hai kātib-e-taqdīr koī aur

bande ke qalam hath mein hota to ghazab tha

sad shukr ki hai katib-e-taqdir koi aur

tū hai vo gul ai jaañ ki tire baaġh meñ hai shauq

jibrīl ko bulbul kī tarah nāra-zanī kā

tu hai wo gul ai jaan ki tere bagh mein hai shauq

jibril ko bulbul ki tarah nara-zani ka

ham vo daraḳht haiñ ki jise dam-ba-dam ajal

arra idhar dikhātī hai ūdhar tabar qazā

hum wo daraKHt hain ki jise dam-ba-dam ajal

arra idhar dikhati hai udhar tabar qaza

kuchh ham ko imtiyāz nahīñ saaf o durd kā

ai sāqiyān-e-bazm bayārīd harche hast

kuchh hum ko imtiyaz nahin saf o durd ka

ai saqiyan-e-bazm bayarid harche hast

dekh use rañg-e-bahār o sarv o gul aur jūebār

ik uḌā ik gir gayā ik jal gayā ik bah gayā

dekh use rang-e-bahaar o sarw o gul aur juebar

ek uDa ek gir gaya ek jal gaya ek bah gaya

likh likh ke 'nazīr' is ġhazal-e-tāza ko ḳhūbāñ

rakh leñge kitāboñ meñ ye rañg-e-par-e-tā.er

likh likh ke 'nazir' is ghazal-e-taza ko KHuban

rakh lenge kitabon mein ye rang-e-par-e-taer

kal shab-e-vasl meñ kyā jald bajī thiiñ ghaḌiyāñ

aaj kyā mar ga.e ghaḌiyāl bajāne vaale

kal shab-e-wasl mein kya jald baji thin ghaDiyan

aaj kya mar gae ghaDiyal bajaane wale

jism kyā ruuh kī hai jaulāñ-gāh

ruuh kyā ik savār-e-pā-ba-rakāb

jism kya ruh ki hai jaulan-gah

ruh kya ek sawar-e-pa-ba-rakab

dil kī betābī nahīñ Thaharne detī hai mujhe

din kahīñ raat kahīñ sub.h kahīñ shaam kahīñ

dil ki betabi nahin Thaharne deti hai mujhe

din kahin raat kahin subh kahin sham kahin

pukārā qāsid-e-ashk aaj fauj-e-ġham ke hāthoñ se

huā tārāj pahle shahr-e-jāñ dil kā nagar pīchhe

pukara qasid-e-ashk aaj fauj-e-gham ke hathon se

hua taraj pahle shahr-e-jaan dil ka nagar pichhe

dil kī be-tābī Thaharne nahīñ detī mujh ko

din kahīñ raat kahīñ sub.h kahīñ shaam kahīñ

dil ki be-tabi Thaharne nahin deti mujh ko

din kahin raat kahin subh kahin sham kahin

martā hai jo mahbūb kī Thokar pe 'nazīr' aah

phir us ko kabhī aur koī lat nahīñ lagtī

marta hai jo mahbub ki Thokar pe 'nazir' aah

phir us ko kabhi aur koi lat nahin lagti

kitnā tanik safā hai ki pā-e-nigāh kā

halkā sā ik ġhubār hai chehre ke rañg par

kitna tanik safa hai ki pa-e-nigah ka

halka sa ek ghubar hai chehre ke rang par

zamāne ke hāthoñ se chāra nahīñ hai

zamāna hamārā tumhārā nahīñ hai

zamane ke hathon se chaara nahin hai

zamana hamara tumhaara nahin hai

abas mehnat hai kuchh hāsil nahīñ patthar-tarāshī se

yahī mazmūn thā farhād ke teshe kī khaT-khaT kā

abas mehnat hai kuchh hasil nahin patthar-tarashi se

yahi mazmun tha farhad ke teshe ki khaT-khaT ka

'nazīr' ab is nadāmat se kahūñ kyā

fa-āhā summa-āhā summa-āhā

'nazir' ab is nadamat se kahun kya

fa-aha summa-aha summa-aha

chamak hai dard hai kauñdan paḌī hai huuk uThtī hai

mire pahlū meñ kyuuñ yaaro ye dil hai yā ki phoḌā hai

chamak hai dard hai kaundan paDi hai huk uThti hai

mere pahlu mein kyun yaro ye dil hai ya ki phoDa hai

koī to pagḌī badaltā hai auroñ se lekin

miyāñ 'nazīr' ham ab tum se tan badalte haiñ

koi to pagDi badalta hai auron se lekin

miyan 'nazir' hum ab tum se tan badalte hain

yuuñ to ham the yūñhī kuchh misl-e-anār-o-mahtāb

jab hameñ aag dikhā.e to tamāshā niklā

yun to hum the yunhi kuchh misl-e-anar-o-mahtab

jab hamein aag dikhae to tamasha nikla

sarsabz rakhiyo kisht ko ai chashm tū mirī

terī hī aab se hai bas ab aabrū mirī

sarsabz rakhiyo kisht ko ai chashm tu meri

teri hi aab se hai bas ab aabru meri

ai chashm jo ye ashk tū bhar laa.ī hai kam-baḳht

is meñ to sarāsar mirī rusvā.ī hai kam-baḳht

ai chashm jo ye ashk tu bhar lai hai kam-baKHt

is mein to sarasar meri ruswai hai kam-baKHt

mirī is chashm-e-tar se abr-e-bārāñ ko hai kyā nisbat

ki vo dariyā kā paanī aur ye ḳhūn-e-dil hai barsātī

meri is chashm-e-tar se abr-e-baran ko hai kya nisbat

ki wo dariya ka pani aur ye KHun-e-dil hai barsati

kal 'nazīr' us ne jo pūchhā ba-zabān-e-punjab

neh vich meñDī a kī hāl-e-tusādā ve miyāñ

kal 'nazir' us ne jo puchha ba-zaban-e-punjab

neh wich meinDi a ki haal-e-tusada we miyan

dil kī betābī Thaharne nahīñ detī hai mujhe

din kahīñ raat kahīñ sub.h kahīñ shaam kahīñ

dil ki betabi Thaharne nahin deti hai mujhe

din kahin raat kahin subh kahin sham kahin

vāmāñdgān-e-rāh to manzil pe jā paḌe

ab tū bhī ai 'nazīr' yahāñ se qadam tarāsh

wamandgan-e-rah to manzil pe ja paDe

ab tu bhi ai 'nazir' yahan se qadam tarash

ham haal to kah sakte haiñ apnā pa kaheñ kyā

jab vo idhar aate haiñ to tanhā nahīñ aate

hum haal to kah sakte hain apna pa kahen kya

jab wo idhar aate hain to tanha nahin aate

ab to zarā sā gaañv bhī beTī na de use

lagtā thā varna chiin kā dāmād āgara

ab to zara sa ganw bhi beTi na de use

lagta tha warna chin ka damad aagara

vo aap se rūThā nahīñ manñe kā 'nazīr' aah

kyā dekhe hai chal paañv paḌ aur us ko manā lā

wo aap se ruTha nahin manne ka 'nazir' aah

kya dekhe hai chal panw paD aur us ko mana la

thā irāda tirī fariyād kareñ hākim se

vo bhī ai shoḳh tirā chāhne vaalā niklā

tha irada teri fariyaad karen hakim se

wo bhi ai shoKH tera chahne wala nikla

kis ko kahiye nek aur Thahrā.iye kis ko burā

ġhaur se dekhā to sab apne hī bhā.ī-band haiñ

kis ko kahiye nek aur Thahraiye kis ko bura

ghaur se dekha to sab apne hi bhai-band hain

hastiyāñ nīstiyāñ yaañ bhī haiñ aisī jaise

vo kamar aur vo dahāñ kuchh nahīñ aur sab kuchh hai

hastiyan nistiyan yan bhi hain aisi jaise

wo kamar aur wo dahan kuchh nahin aur sab kuchh hai

kūche meñ us ke baiThnā husn ko us ke dekhnā

ham to usī ko samjhe haiñ baaġh bhī aur bahār bhī

kuche mein us ke baiThna husn ko us ke dekhna

hum to usi ko samjhe hain bagh bhi aur bahaar bhi

ye javāhir-ḳhāna-e-duniyā jo hai bā-āb-o-tāb

ahl-e-sūrat kā hai dariyā ahl-e-ma.anī kā sarāb

ye jawahir-KHana-e-duniya jo hai ba-ab-o-tab

ahl-e-surat ka hai dariya ahl-e-mani ka sarab

mai pī ke jo girtā hai to lete haiñ use thaam

nazroñ se girā jo use phir kis ne sambhālā

mai pi ke jo girta hai to lete hain use tham

nazron se gira jo use phir kis ne sambhaala

suno maiñ ḳhuuñ ko apne saath le aayā huuñ aur baaqī

chale aate haiñ uThte baiThte laḳht-e-jigar pīchhe

suno main KHun ko apne sath le aaya hun aur baqi

chale aate hain uThte baiThte laKHt-e-jigar pichhe

dekheñge ham ik nigāh us ko

kuchh hosh agar bajā rahegā

dekhenge hum ek nigah us ko

kuchh hosh agar baja rahega

baḌī ehtiyāt talab hai ye jo sharāb sāgar dil meñ hai

jo chhalak ga.ī to chhalak ga.ī jo bharī rahī to bharī rahī

baDi ehtiyat talab hai ye jo sharab sagar dil mein hai

jo chhalak gai to chhalak gai jo bhari rahi to bhari rahi

rañj-e-dil yuuñ gayā ruḳh us kā dekh

jaise uTh jaa.e ā.īñe se zañg

ranj-e-dil yun gaya ruKH us ka dekh

jaise uTh jae aaine se zang

aarzū ḳhuub hai mauqa.a se agar ho varna

apne maqsūd ko kam pahuñche haiñ bisyār-talab

aarzu KHub hai mauqa se agar ho warna

apne maqsud ko kam pahunche hain bisyar-talab

badan gul chehra gul ruḳhsār gul lab gul dahan hai gul

sarāpā ab to vo rashk-e-chaman hai Dher phūloñ kā

badan gul chehra gul ruKHsar gul lab gul dahan hai gul

sarapa ab to wo rashk-e-chaman hai Dher phulon ka

ga.e the milne ko shāyad jhiḌak diyā us ne

miyāñ 'nazīr' to kuchh sharmsār aate haiñ

gae the milne ko shayad jhiDak diya us ne

miyan 'nazir' to kuchh sharmsar aate hain

ġharaz na sar kī ḳhabar thī na pā kā hosh 'nazīr'

sirhānā pā.entī aur pā.entī sirhānā thā

gharaz na sar ki KHabar thi na pa ka hosh 'nazir'

sirhana paenti aur paenti sirhana tha