Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "دہک"

Nazm MATCHES FOR "دہک"

Nazm

mere hamdam mere dost!

gar mujhe is kaa yaqii.n ho mire hamdam mire dost
gar mujhe is kaa yaqii.n ho ki tire dil kii thakan
tirii aa.nkho.n kii udaasii tere siine kii jalan
merii dil-juu.ii mire pyaar se miT jaa.egii
gar miraa harf-e-tasallii vo davaa ho jis se
jii uThe phir tiraa uj.Daa hu.aa be-nuur dimaaG
terii peshaanii se Dhal jaa.e.n ye tazliil ke daaG
terii biimaar javaanii ko shifaa ho jaa.e
gar mujhe is kaa yaqii.n ho mire hamdam mare dost
roz o shab shaam o sahar mai.n tujhe bahlaataa rahuu.n
mai.n tujhe giit sunaataa rahuu.n halke shiirii.n
aabshaaro.n ke bahaaro.n ke chaman-zaaro.n ke giit
aamad-e-sub.h ke, mahtaab ke, sayyaaro.n ke giit
tujh se mai.n husn-o-mohabbat kii hikaayaat kahuu.n
kaise maGruur hasiinaa.o.n ke barfaab se jism
garm haatho.n kii haraarat me.n pighal jaate hai.n
kaise ik chehre ke Thahre hu.e maanuus nuquush
dekhte dekhte yak-laKHt badal jaate hai.n
kis tarah aariz-e-mahbuub kaa shaffaaf bilor
yak-ba-yak baada-e-ahmar se dahak jaataa hai
kaise gulchii.n ke liye jhuktii hai KHud shaaKH-e-gulaab
kis tarah raat kaa aivaan mahak jaataa hai
yuu.nhii gaataa rahuu.n gaataa rahuu.n terii KHaatir
giit buntaa rahuu.n baiThaa rahuu.n terii KHaatir
par mire giit tire dukh kaa mudaavaa hii nahii.n
naGma jarraah nahii.n muunis-o-Gam KHvaar sahii
giit nashtar to nahii.n marham-e-aazaar sahii
tere aazaar kaa chaara nahii.n nashtar ke sivaa
aur ye saffaak masiihaa mire qabze me.n nahii.n
is jahaa.n ke kisii zii-ruuh ke qabze me.n nahii.n
haa.n magar tere sivaa tere sivaa tere sivaa

Faiz Ahmad Faiz
Nazm

kangan

kaash mai.n tere hasii.n haath kaa ka.ngan hotaa
tuu ba.De pyaar se chaav se ba.De maan ke saath
apnii naazuk sii kalaa.ii me.n cha.Dhaatii mujh ko
aur betaabii se furqat ke KHizaa.n lamho.n me.n
tuu kisii soch me.n Duubii jo ghumaatii mujh ko
mai.n tire haath kii KHushbuu se mahak saa jaataa
jab kabhii mood me.n aa kar mujhe chuumaa kartii
tere ho.nTo.n kii me.n hiddat se dahak saa jaataa
raat ko jab bhii tuu nii.ndo.n ke safar par jaatii
marmarii.n haath kaa ik takiya banaayaa kartii
mai.n tire kaan se lag kar ka.ii baate.n kartaa
terii zulfo.n ko tire gaal ko chuumaa kartaa
jab bhii tuu band-e-qabaa kholne lagtii jaanaa.n
apnii aa.nkho.n ko tire husn se KHiira kartaa
mujh ko betaab saa rakhtaa tirii chaahat kaa nasha
mai.n tirii ruuh ke gulshan me.n mahaktaa rahtaa
mai.n tire jism ke aa.ngan me.n khanaktaa hotaa
kuchh nahii.n to yahii be-naam saa bandhan hotaa
kaash mai.n tere hasii.n haath kaa ka.ngan hotaa

Wasi Shah
Nazm

jugnu

ye mast mast ghaTaa, ye bharii bharii barsaat
tamaam hadd-e-nazar tak ghulaavaTo.n kaa samaa.n
fazaa-e-shaam me.n Dore se pa.Dte jaate hai.n
jidhar nigaah kare.n kuchh dhu.aa.n saa uThtaa hai
dahak uThaa hai taraavat kii aa.nch se aakaash
ze-farsh taa-falak a.ng.Daa.iyo.n kaa aalam hai
ye mad-bharii hu.ii purvaa.iyaa.n sanaktii hu.ii
jhinjho.Dtii hai harii Daaliyo.n ko sard havaa

Firaq Gorakhpuri
Nazm

sal-girah ki raat

aaj darvaaze khule rahne do
yaad kii aag dahak uTThii hai
shaayad is raat hamaare shohdaa aa jaa.e.n
aaj darvaaze khule rahne do
jaante ho kabhii tanhaa nahii.n chalte hai.n shahiid?
mai.n ne dariyaa ke kinaare jo pare dekhe hai.n
jo charaaGo.n kii lave.n dekhii.n hai.n
vo lave.n boltii thii.n zinda zabaano.n kii tarah
mai.n ne sarhad pe vo naGmaat sune hai.n ki jinhe.n
kaun gaa.egaa shahiido.n ke sivaa?
mai.n ne ho.nTo.n pe tabassum kii na.ii tez chamak dekhii hai
nuur jis kaa thaa halaavat se sharaabor
azaano.n kii tarah!
abhii sarhad se mai.n lauTaa huu.n abhii,
mai.n abhii haa.np rahaa huu.n mujhe dam lene do
raaz vo un kii nigaaho.n me.n nazar aayaa hai
jo hama-giir thaa naadiida zamaano.n kii tarah!
yaad kii aag dahak uTThii hai
sab tamannaa.o.n ke shahro.n me.n dahak uTThii hai
aaj darvaaze khule rahne do
shaayad is raat hamaare shohdaa aa jaa.e.n!
vaqt ke paa.nv ulajh jaate hai.n aavaaz kii zanjiiro.n se
un kii jhankaar se KHud vaqt jhanak uThtaa hai
naGma martaa hai kabhii, naala bhii martaa hai kabhii?
sansanaahaT kabhii jaatii hai mohabbat ke bujhe tiiro.n se?
mai.n ne dariyaa ke kinaare unhe.n yuu.n dekhaa hai
mai.n ne jis aan me.n dekhaa hai unhe.n
shaayad is raat,
is shaam hii,
darvaazo.n pe dastak de.nge!
shohdaa itne subuk-paa hai.n ki jab aa.e.nge
na kisii so.e parinde ko KHabar tak hogii
na daraKHto.n se kisii shaaKH ke girne kii sadaa guu.njegii
pha.Dpha.DaahaT kisii zambuur kii bhii kam hii sunaa.ii degii
aaj darvaaze khule rahne do!
abhii sarhad se mai.n lauTaa huu.n abhii
paar jo guzregii us kaa hame.n Gam hii kyuu.n ho?
paar kyaa guzregii ma.aluum nahii.n
ek shab jis me.n
pareshaanii-e-aalaam se ruuho.n pe giraanii taarii
ruuhe.n sunsaan yatiim
un pe hamesha kii jafaa.e.n bhaarii
buu-e-kaafuur agar baste gharo.n se jaarii
be-panaah KHauf me.n ruuyaa-e-shikasta kii fuGaa.n uTThegii
bujhtii sham.o.n kaa dhu.aa.n uTThegaa
paar jo guzregii ma.aluum nahii.n
apne darvaaze khule rahne do

Noon Meem Rashid
Nazm

guzargah par tamasha

saare badan par machaa hu.aa thaa
ra.ngo.n kaa kohraam
laal ho.nT yuu.n dahak rahe the
jaise lahuu kaa jaam
aisaa husn thaa us la.Dkii me.n
ThiThak ga.e sab log
kaise KHush KHush chale the ghar ko
lag gayaa kaisaa rog

Muneer Niyazi
Nazm

zaifa

to va.iid-e-qahr hai arbaab-e-ishrat ke liye
bars kaa ik daaG hai ruu-e-hukuumat ke liye

Josh Malihabadi
Nazm

garmi ka zamana

garmii kaa hai zamaana
sardii hu.ii ravaana
aa.nkhe.n dikhaa.e suuraj
tan-man jalaa.e suuraj
paanii havaa hu.aa hai
ja.ngal jalaa hu.aa hai
hotii hai saa.e.n saa.e.n
Gusse me.n hai.n havaa.e.n
uThte hai.n yuu.n baguule
jaise gagan ko chhuu le
tiitar baTer tote
khaa.e.n havaa me.n Gote
dhartii dahak rahii hai
miTTii sulag rahii hai
gir jaa.e jo zamii.n par
bhun jaa.e hai vo daana
garmii kaa hai zamaana
sardii hu.ii ravaana
mausam badal rahaa hai
insaa.n pighal rahaa hai
utraa gale se muflar
mu.nh tak rahii hai chaadar
tah ho ga.ii razaa.ii
KHaalii hai chaarpaa.ii
kambal sahj rakhii hai
malmal gale lagii hai
pa.nkho.n ko jhal rahe hai.n
ab fan chal rahe hai.n
heater se KHauf khaa.e.n
coolar chalaa.e jaa.e.n
har shai badal rahii hai
kyaa mard kyaa zanaanaa
garmii kaa hai zamaana
sardii hu.ii ravaana
aatii hai yaad naanii
karte hai.n paanii paanii
sharbat kaa daur aa.e
qulfii dilo.n ko bhaa.e
tarbuuz bik rahe hai.n
KHarbuuz bik rahe hai.n
duukaan ko.ii khole
beche hai.n barf-gole
ghar ghar me.n ham ne dekhaa
piite hai.n ruuh-afzaa
lassii kaa bol-baalaa
kaafii kaa mu.nh hai kaalaa
jis se mile hai ThanDak
us kaa jahaa.n divaana
garmii kaa hai zamaana
sardii hu.ii ravaana

Haidar Bayabani
Nazm

barsat aa gai hai

garmii ke zulm se ye
duniyaa dahak rahii thii
pyaasii zamiin kab se
aakaash tak rahii thii
mausam ko kyaa hu.aa hai
pal me.n badal gayaa hai
luu ban ke chal rahii thii
ye to vahii havaa hai
dekho chalii havaa.e.n
chillaa.ii.n saa.e.n saa.e.n
baadal ko saath apne
har samt le ke jaa.e.n
tham tham chale hai.n baadal
Dam Dam baje hai.n baadal
kholii hai aasmaa.n ne
baadal kii apnii chhaagal
paanii baras rahaa hai
mausam ye ha.ns rahaa hai
baarish me.n bhiigtaa hai
kiicha.D me.n pha.ns rahaa hai
baste uThaa.e bachche
school ko chale hai.n
kheto.n kii samt apne
dahqaa.n nikal pa.De hai.n
har samt paanii paanii
nadiyo.n me.n hai ravaanii
panchhii chahak rahe hai.n
KHushiyo.n kii hai nishaanii
garmii ko khaa ga.ii hai
har samt chhaa ga.ii hai
dil ko lubhaa ga.ii hai
barsaat aa ga.ii hai

Mohammad Asadullah
Nazm

kuchh agar hai to mile

KHvaab me.n aa.e mujhe mujh se milaa.e
mujhe sairaabii-e-diidaar se gulzaar kare
KHvaab vo KHvaab ki ho jis tamaazat kaa fusuu.n-zaad
KHvaab vo KHvaab ki ban jaa.e shikast-e-be-daad
kattha.ii rang ghule surma.ii shaam me.n aise ki shafaq
KHuun kii aa.ncho.n se dahak kar phaile
aate-jaate hu.e logo.n kii tag-o-taaz bhii
andesho.n se anjaan lage
jaage KHadshe bhii KHadd-o-KHaal tamannaa se huu.n mab.huut
har ik uzlat-e-jaa.n shauq kii shamshiir liye
phail ke saahil-e-paayaab ko Gaarat kar de
marqad-e-hiila-e-be-suud miTe
kuchh agar hai to mile
ko.ii gar hai to chalaa aa.e mujhe mujh se milaa.e
mujhe sairaabii-e-diidaar se gulzaar kare

Kishwar Naheed
Nazm

gar TuT gae to haar gae

jab mere vatan kii galiyo.n me.n
zulmat ne pa.nkh pasaare the
aur raat ke kaale baadal ne
har shahr me.n Deraa Daalaa thaa
jab bastii bastii dahak uThii
yuu.n lagtaa thaa sab raakh hu.aa
yuu.n lagtaa thaa mahshar hai bapaa
aur raat ke zaalim saa.e se
bachne kaa ko.ii yaaraa bhii na thaa
sadiyo.n me.n taraashaa thaa jis ko
insaan ke anthak haatho.n ne
tahziib ke is gahvaare me.n
har phuul dahaktaa sho.ala thaa

Gauhar Raza
Nazm

suraj

suuraj ke dam se bachcho duniyaa me.n hai ujaalaa
suuraj na ho to chehra duniyaa kaa hogaa kaalaa
suuraj me.n maadde kii haalat plasma hai
puuchho ye aaj ham se kaisii hai aur kyaa hai
haa.n gas se ziyaada halkii plasma hai
bachcho ye tez garmii kii KHud hii rahnumaa hai
suuraj kii raushnii se bantaa hai bhaap paanii
letii hai janm bachcho baadal kii phir kahaanii
ik surKH sho.ala ban kar suuraj dahak rahaa hai
suuraj kii raushnii se chandaa chamak rahaa hai
solar heatero.n ko suuraj ne dii haraarat
suuraj kii pe.D paudo.n pe hotii hai inaayat
'haafiz' ye shaam ko jo chehra hai KHud hii faq hai
suuraj ke Duubne se aakaash par shafaq hai

Hafiz Karnataki
Nazm

aape ranjha hoi

maGribii sahraa ke kinaare kundan ke phuul khilnaa shuruu.a ho ga.e hai.n
mashriqii sahraa ke biicho.n-biich kha.Dii sundarii kii naak kaa lau.ng murjhaa gayaa hai
ye kis taariiKH ke aKHbaar kii KHabar hai
ko.ii ishtihaar hai kyaa
diivaaro.n pe lakiire.n na Daalo miTaa.oge to tumhaare hii haath kaale ho.nge
haa.n khel khel me.n hii dallaalii siikh jaa.oge ko.elo.n kaa to bahaana hai
ko.ele chaar-din aur dahak rahe hai.n
pa.nkhe mere dil me.n lage hai.n mujhe ab bhii sardii lagtii hai
barf kii vo Dalii pighaltii kyuu.n nahii.n jis kii aa.iine jaisii sat.h par
meraa chehra bhii mujhe dikhaa.ii kyuu.n nahii.n detaa darmiyaan kaun haa.il hai
garm larazte hu.e aa.nsuu aur milne kii taa-ha.ng
aa.nsu.o.n ke jhakole me.n hamaare chehre Dislocate ho ga.e hai.n
aur phir saa.ns se saa.ns na milii
dam me.n dam na aayaa
raa.njhaa raa.njhaa kuukdii mai.n aape raa.njhan ho.ii

Nasreen Anjum Bhatti
Nazm

shair

kaun hai jis kii sisaktii hu.ii fariyaado.n ne
mere ehsaas ke har taar me.n larzish bhar dii
kis kii aavaaz se larzaa.n hai har ik taar-e-hayaat
kis kii aaho.n ne mire KHuun me.n sozish bhar dii
haa.n vahii jis ne kabhii raat ke sannaaTe me.n
apne armaano.n kaa ik KHvaab sajaa rakkhaa thaa
jis ne aa.ndhii ke sanakte hu.e jho.nko.n me.n nadiim
ik charaaG-e-shab-e-ummiid jalaa rakhaa thaa
us kii duniyaa me.n garajte rahe haalaat ke abr
us ke aakaash pe chhaayaa kiye kaale baadal
sar uThaa.e hu.e ha.nstaa hu.aa tuufaano.n par
us ke sapno.n kaa banaayaa hu.aa vo rang-mahal
ab bhii us ke rag-o-pai me.n vahii jaulaa.n hai lahuu
jis ke sho.alo.n se dahak uThte hai.n shaahii aivaa.n
us ke sulge hu.e jazbo.n me.n vo garmii hai ki aaj
aamriyat ke kaleje se nikaltaa hai dhu.aa.n

Sabir Aarwi
Nazm

rut badli re

mausam baahe.n khol rahaa hai
gadraa.ii hai shaam basantii
din chupke se dekh rahaa hai
lamho.n kaa ik thaal sunahraa
dil ne kaise thaam rakhaa hai
aa.nchal me.n hai ek sitaara
jhilmil jhilmil bol rahaa hai
dhak dhak dhak dhak ek hii bolii
dil kaa pi.njra khol rahii hai
bechainii kaa raqs anokhaa
ik ik sar kii taal ajab hai
KHushbuu kii bhii aa.nch Gazab hai
saaraa aa.ngan dahak rahaa hai

Arifa Shahzad
Nazm

farigh

(Gabriel Garciamarcuez ke andaaz me.n)
jab vo paidaa hu.aa
to us kii dono.n aa.nkhe.n dahak rahii thii.n
dono.n papoTe phaTe hu.e the
putlii kii diivaar se laTke
aa.nkho.n ke parde aage se haTe hu.e the
jab us kii aa.nkhe.n hiltii.n
to diivaaro.n pe un kii lau hilne lagtii thii
vo paidaa hone se pahle
saare dhone dho aayaa thaa
apne janm kaa saaraa ronaa ro aayaa thaa

Waheed Ahmad
Nazm

maqam-e-aKHir-e-shab

mirii hayaat hai KHud ek be-karaa.n sahraa
na jis me.n saaya-e-gul hai na jis me.n raqs-e-sabaa
na tere jism kii KHushbuu na pairahan kii damak
na chuu.Diyo.n ke chhanaake na qahqaho.n kii khanak
na aa.nchalo.n kii bahaare.n na aarizo.n ke sharaar
na tere siina-e-nauras ke zer-o-bam kaa KHumaar
na zikr-e-surKHii-e-lab aur na terii chashm kii baat
tirii jabii.n kaa ujaalaa na terii zulf kii raat

Riyaz Anwar
Nazm

habil

avvalii.n zaa.iqa-e-KHuu.n se thii lab-talKH vo KHaak
jis pe mai.n TuuTii hu.ii shaaKH ke maanind giraa
kin sharaaro.n kii dahak diida-e-qaabiil me.n thii
vo hasad thaa ki havas taish ki nafrat kyaa thaa
aur phir mere badan mere lahuu me.n utraa
avvalii.n be-basi-e-karb-e-fanaa kaa idraak

Zia Jalandhari
Nazm

after shocks

ab ke baras chaumukh me.n
ek aziim firaaq kii barf pa.Dii hai
kohsaaro.n ne
kafuurii qabre.n o.Dhii hai.n
kisii qadam kaa naqsh
ko.ii dha.nstaa hu.aa paa.nv
ko.ii phisaltaa KHanda
ko.ii kilkaarii
kuchh bhii nahii.n
kuchh bhii to nahii.n
saare me.n
ik marmar aisii
behis yaKH kii shok
dahak rahii dhartii ke siine uupar
marham aisii
manfii das kii marii pa.Dii KHaamoshii
ek shahiid chiinaar ke pahluu se baahar ko niklaa
ik KHush-KHaslat
nanhaa munnaa haat
jo aate jaate
nauhe pa.Dhte jho.nko.n me.n
duur-daraaz ke ha.nste baste shahro.n kii
aa.nkho.n kii jaanib
jo kabhii us ko dekh nahii.n paa.e.ngii
ek vidaa-e-daa.im ke andaaz me.n larzaa.n hai

Anwar Fitrat
Nazm

hal TeDha hai

shiishe ke badan me.n rahtaa huu.n
mai.n aaj huu.n mere aage piichhe kal hai.n
phir bhii tan-e-tanhaa huu.n
haamila miTTii ke uupar siine ke bal leTaa huu.n
sar aur pair tasaadum me.n hai.n
taariikii ke piichhe bhaag rahaa huu.n
kachchii maut ke baad juu.nhii zinda hotaa huu.n
mere sirhaane na.ii navelii dulhan dhuup dahak uThtii hai
sar aur pair tasaadum me.n haq-e-zaujiyat maathe par
sub.h savere kalima pa.Dh ke nahaanaa
fasl ke pak jaane tak khet ko paanii dete jaanaa
mai.n ne yahii sunaa hai
haamila miTTii ke uupar siine ke bal leTaa huu.n
bail huu.n pathriilii khetii me.n
haa.np gayaa huu.n hal Te.Dhaa hai
KHassii bailo.n kii sab jo.Diyaa.n
pathriile kheto.n me.n haa.np chukii hai.n
biij bikherne ke aasan bhii badal chuke hai.n
jaane paidaa.ish kaa lamha kab aa.egaa
majbuurii ke piichhe sarpaT bhaag rahaa huu.n
phiike mausamo.n aur vaqto.n kii
umr ba.Dii hai haa.np gayaa huu.n

Abbas Athar
Nazm

abul-haul

jahaan-e-reg ke KHvaab-e-giraa.n se aaj to jaag
hazaaro.n qaafile aate rahe guzarte rahe
ko.ii jagaa na sakaa tujh ko tujh se kaun kahe
vo ziist maut hai jis me.n ko.ii lagan ho na laag
ta.Dap uThe tire ho.nTo.n pe kaash ab ko.ii raag
jo tere diida-e-sa.ngii.n se dard ban ke bahe
ye terii tiira-shabii bijliyo.n ke naaz sahe
yuu.nhii sulagtii rahe tere dil me.n ziist kii aag
magar nahii.n, tuu agar meraa raaz-daa.n hotaa
tire labo.n pe dahak uThtii ko.ii pyaar kii baat
to aaj dahr ke siine pe tuu kahaa.n hotaa
tire sukuu.n ko kabhii chhuu sakaa na vaqt kaa haat
KHud apnii aag hii me.n jal-bujhii hai merii hayaat
vagarna terii tarah mai.n bhii jaavedaa.n hotaa

Zia Jalandhari
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now