Search result for "maujzanii" | Category - Nazm, Page

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "maujzanii"

Nazm MATCHES FOR "maujzanii"

Nazm

to behtar hai yahi

vo jo is Gam se ziyaada jaa.n-gusil qaatil rahaa
vo jo ik sail-e-balaa-a.ngez thaa apne liye
jis ke pal pal me.n the sadiyo.n ke samundar maujzan
chiiKHtii yaade.n liye uj.De hu.e sapne liye

Ahmad Faraz

Nazm

sham-e-ayaadat

ye kaun muskuraahaTo.n kaa kaarvaa.n liye hu.e
shabaab-e-sher-o-ra.ng-o-nuur kaa dhu.aa.n liye hu.e
dhu.aa.n ki barq-e-husn kaa mahaktaa sho.ala hai ko.ii
chaTiilii zindagii kii shaadmaaniyaa.n liye hu.e
labo.n se pa.nkhu.Dii gulaab kii hayaat maa.nge hai
ka.nval sii aa.nkh sau nigaah-e-mehrbaa.n liye hu.e
qadam qadam pe de uThii hai lau zamiin-e-rah-guzar
adaa adaa me.n be-shumaar bijliyaa.n liye hu.e
nikalte baiThte dino.n kii aahaTe.n nigaah me.n
rasiile ho.nT fasl-e-gul kii daastaa.n liye hu.e
KHutuut-e-ruKH me.n jalva-gar vafaa ke naqsh sar-ba-sar
dil-e-Ganii me.n kul hisaab-e-dostaa.n liye hu.e
vo muskuraatii aa.nkhe.n jin me.n raqs kartii hai bahaar
shafaq kii gul kii bijliyo.n kii shoKHiyaa.n liye hu.e
adaa-e-husn barq-paash shola-zan nazaara-soz
fazaa-e-husn uudii uudii bijliyaa.n liye hu.e
jagaane vaale naGma-e-sahar labo.n pe maujzan
nigaahe.n nii.nd laane vaalii loriyaa.n liye hu.e
vo nargis-e-siyaah-e-niim-baaz, mai-kada-ba-dosh
hazaar mast raato.n kii javaaniyaa.n liye hu.e
taGaaful-o-KHumaar aur be-KHudii kii oT me.n
nigaahe.n ik jahaa.n kii hoshiyaariyaa.n liye hu.e
harii-bharii rago.n me.n vo chahaktaa boltaa lahuu
vo sochtaa hu.aa badan KHud ik jahaa.n liye hu.e
za-farq taa-qadam tamaam chehra jism-e-naaznii.n
latiif jagmagaahaTo.n kaa kaarvaa.n liye hu.e
tabassumash takallume takallumash tarannume
nafas nafas me.n thartharaataa saaz-e-jaa.n liye hu.e
jabiin-e-nuur jis pe pa.D rahii hai narm chhuuT sii
KHud apnii jagmagaahTo.n kii kahkashaa.n liye hu.e
''sitaara-baar o mah-chakaa.n o KHuur-fishaa.n'' jamaal-e-yaar
jahaan-e-nuur kaarvaa.n-ba-kaarvaa.n liye hu.e
vo zulf-e-KHam-ba-KHam shamiim-e-mast se dhu.aa.n dhu.aa.n
vo ruKH chaman chaman bahaar-e-jaavedaa.n liye hu.e
ba-mastii-e-jamaal-e-kaa.enaat, KHvaab-e-kaa.enaat
ba-gardish-e-nigaah daur-e-aasmaa.n liye hu.e
ye kaun aa gayaa mire qariib uzv uzv me.n
javaaniyaa.n, javaaniyo.n kii aa.ndhiyaa.n liye hu.e
ye kaun aa.nkh pa.D rahii hai mujh par itne pyaar se
vo bhuulii sii vo yaad sii kahaaniyaa.n liye hu.e
ye kis kii mahkii mahkii saa.nse.n taaza kar ga.ii.n dimaaG
shabo.n ke raaz nuur-e-mah kii narmiyaa.n liye hu.e
ye kin nigaaho.n ne mire gale me.n baahe.n Daal dii.n
jahaan bhar ke dukh se dard se amaa.n liye hu.e
nigaah-e-yaar de ga.ii mujhe sukuun-e-be-karaa.n
vo be-kahii vafaa.o.n kii gavaahiyaa.n liye hu.e
mujhe jagaa rahaa hai maut kii Gunuudgii se kaun
nigaaho.n me.n suhaag-raat kaa samaa.n liye hu.e
mirii fasurda aur bujhii hu.ii jabii.n ko chhuu liyaa
ye kis nigaah kii kiran ne saaz-e-jaa.n liye hu.e
sute se chehre par hayaat rasmasaatii muskuraatii
na jaane kab ke aa.nsu.o.n kii daastaa.n liye hu.e
tabassum-e-sahar hai aspataal kii udaas shaam
ye kaun aa gayaa nashaat-e-be-karaa.n liye hu.e
tire na aane tak agarche mehrbaa.n thaa ik jahaa.n
mai.n ro ke rah gayaa huu.n sau Gam-e-nihaa.n liye hu.e
zamiin muskuraa uThii ye shaam jagmagaa uThii
bahaar lahlhaa uThii shamiim-e-jaa.n liye hu.e
fazaa-e-aspataal hai ki ra.ng-o-buu kii karvaTe.n
tire jamaal-e-laala-guu.n kii daastaa.n liye hu.e
'firaaq' aaj pichhlii raat kyuu.n na mar rahuu.n ki ab
hayaat aisii shaame.n hogii phir kahaa.n liye hu.e
(2)
magar nahii.n kuchh aur maslahat thii us ke aane me.n
jamaal-o-diid-e-yaar the nayaa jahaa.n liye hu.e
isii na.e jahaa.n me.n aadmii bane.nge aadmii
jabii.n pe shaahkaar-e-dahr kaa nishaa.n liye hu.e
isii na.e jahaa.n me.n aadmii bane.nge devtaa
tahaarato.n kaa farq-e-paak par nishaa.n liye hu.e
KHudaa.ii aadmii kii hogii is na.e jahaan par
sitaaro.n ke hai.n dil ye pesh-go.iiya.n liye hu.e
sulagte dil sharar-fishaa.n o sho.ala-baar barq-paash
guzarte din hayaat-e-nau kii surKHiyaa.n liye hu.e
tamaam qaul aur qasam nigaah-e-naaz-e-yaar thii
tuluu-e-zindagii-e-nau kii daastaa.n liye hu.e
nayaa janam hu.aa miraa ki zindagii na.ii milii
jiyuu.ngaa shaam-e-diid kii nishaaniyaa.n liye hu.e
na dekhaa aa.nkh uThaa ke ahd-e-nau ke parda-daaro.n ne
guzar gayaa zamaana yaad-e-raftagaa.n liye hu.e
ham inqilaabiyo.n ne ye jahaa.n bachaa liyaa magar
abhii hai ik jahaa.n vo bad-gumaaniyaa.n liye hu.e

Firaq Gorakhpuri

Nazm

gae janam ki sada

vo ek la.Dkii
ki jis se shaayad mai.n ek pal bhii nahii.n milii huu.n
mai.n us ke chehre ko jaantii huu.n
ki us kaa chehra
tumhaarii nazmo.n tumhaarii giito.n kii chilmano.n se ubhar rahaa hai
yaqiin jaano
mujhe ye chehra tumhaare apne vajuud se bhii aziiz-tar hai
ki us kii aa.ankho.n me.n
chaahato.n ke vahii samundar chhupe hai.n
jo merii apnii aa.ankho.n me.n maujzan hai.n
vo tum ko ik devtaa banaa kar mirii tarah puujtii rahii hai
us ek la.Dkii kaa jism
KHud meraa hii badan hai
vo ek la.Dkii
jo mere apne ga.e janam kii madhur sadaa hai

Parveen Shakir

Nazm

bewa ki KHud-kushi

ye a.ndherii raat ye saarii fazaa so.ii hu.ii
pattii pattii manzar-e-KHaamosh me.n kho.ii hu.ii
maujzan hai bahr-e-zulmat tiirgii kaa josh hai
shaam hii se aaj qindiil-e-falak KHaamosh hai
chand taare hai.n bhii to be-nuur pathraa.e hu.e
jaise baasii haar me.n ho.n phuul kumhlaa.e hu.e
khap gayaa hai yuu.n ghaTaa me.n chaa.ndnii kaa saaf ra.ng
jis tarah maayuusiyo.n me.n dab ke rah jaa.e uma.ng
umDii hai kaalii ghaTaa duniyaa Dubone ke liye
yaa chalii hai baal khole raa.nD rone ke liye
jitnii hai gunjaan bastii utnii hii viiraan hai
har galii KHaamosh hai har raasta sunsaan hai
ik makaa.n se bhii makii.n kii kuchh KHabar miltii nahii.n
chilmane.n uThtii nahii.n zanjiir-e-dar hiltii nahii.n
so rahe hai.n mast-o-be-KHud ghar ke kul piir-o-javaa.n
ho ga.ii hai.n band husn-o-ishq me.n sargoshiyaa.n
haa.n magar ik samt ik goshe me.n ko.ii nauhagar
le rahii hai karvaTo.n par karvaTe.n dil thaam kar
dil sambhaltaa hii nahi.n hai siina-e-sad-chaak me.n
phuul saa chehra aTaa hai bevgii kii KHaak me.n
u.D chalii hai ra.ng-e-ruKH ban kar hayaat-e-musta.aar
ho rahaa hai qalb-e-murda me.n javaanii kaa fishaar
hasrate.n dam to.Dtii hai.n yaas kii aaGosh me.n
saik.Do.n shikve machalte hai.n lab-e-KHaamosh me.n
umr aamaada nahii.n murda-parastii ke liye
baar hai ye zinda mayyat dosh-e-hastii ke liye
chaahtii hai laakh qaabuu dil pe paatii hii nahii.n
haa.e-re zaalim javaanii bas me.n aatii hii nahii.n
thartharaa kar girtii hai jab suune bistar par nazar
le ke ik karvaT paTak detii hai vo takiya pe sir
jab khanak uThtii hai.n sotii la.Dkiyo.n kii chuu.Diyaa.n
aah ban kar uThne lagtaa hai kaleja se dhu.aa.n
ho ga.ii beva kii KHaatir nii.nd bhii jaise haraam
muKHtasar saa ahd-e-vaslat de gayaa soz-e-davaam
dopahar kii chhaa.nv daur-e-shaadmaanii ho gayaa
pyaas bhii bujhne na paa.ii KHatm paanii ho gayaa
le rahii hai karvaTo.n par karvaTe.n baa-iztiraar
aag me.n paara hai yaa bistar pe jism-e-be-qaraar
pa.D ga.ii ik aah kar ke ro ke uTh baiThii kabhii
u.ngliyo.n me.n le ke zulf-e-KHam-ba-KHam ai.nThii kabhii
aa ke ho.nTo.n par kabhii maayuus aahe.n tham ga.ii.n
aur kabhii suunii kalaa.ii par nigaahe.n jam ga.ii.n
itnii duniyaa me.n kahii.n apnii jagah paatii nahii.n
yaas is had kii ki shauhar kii bhii yaad aatii nahii.n
aa rahe hai.n yaad paiham saas nando.n ke suluuk
phaT rahaa hai Gam se siina uTh rahii hai dil me.n huuk
apnii maa.n bahno.n kaa bhii aa.nkhe.n churaanaa yaad hai
aisii duniyaa me.n kisii kaa chho.D jaanaa yaad hai
baaGbaa.n to qabr me.n hai kaun ab dekhe bahaar
KHud usii ko tiir us ke karne vaale hai.n shikaar
jab nazar aataa nahii.n detaa ko.ii bekas kaa saath
zahr kii shiishii kii jaanib KHud-ba-KHud ba.Dhtaa hai haath
dil ta.Dap kar kah rahaa hai jald is duniyaa ko chho.D
chuu.Diyaa.n to.Dii.n to phir zanjiir-e-hastii ko bhii to.D
dam agar niklaa to kho.ii zindagii mil jaa.egii
ye nahi.n to KHair tanhaa qabr hii mil jaa.egii
vaa.n tujhe zillat kii nazro.n se na dekhegaa ko.ii
chaahe ha.nsnaa chaahe ronaa phir na rokegaa ko.ii
vaa.n sab ahl-e-dard hai.n sab saahab-e-insaaf hai.n
rahbar aage jaa chukaa raahe.n bhii terii saaf hai.n
dil inhii.n baato.n me.n uljhaa thaa ki dam ghabraa gayaa
haath le kar zahr kii shiishii labo.n tak aa gayaa
tilmilaatii aa.nkh jhapkaatii jhijaktii haa.nptii
pii ga.ii kul zahr aaKHir thartharaatii kaa.nptii
maut ne jhaTkaa diyaa kul uzv Dhiile ho ga.e
saa.ns ukh.Dii, nabz Duubii, ho.nT niile ho ga.e
aa.nkh jhapkii ashk Tapkaa hichkii aa.ii kho ga.ii
maut kii aaGosh me.n ik aah bhar kar so ga.ii
aur kar ik aah sulge hind kii rasmo.n kaa daam
ai javaanaa-marg beva tujh pe 'kaifii' kaa salaam

Kaifi Azmi

Nazm

sab jaante hain ilm se hai zindagi ki ruh

sab jaante hai.n ilm se hai zindagii kii ruuh
be-ilm hai agar to vo insaa.n hai naa tamaam
be-ilm-o-be-hunar hai jo duniyaa me.n ko.ii qaum
nature kaa iqtizaa hai rahe ban ke vo Gulaam
ta.aliim agar nahii.n hai zamaane ke hasb-o-haal
phir kyaa umiid-e-daulat-o-aaraam-o-ihteraam
sayyad ke dil me.n naqsh ho is KHayaal kaa
Daalii binaa-e-madrasa le kar KHudaa kaa naam
sadme uThaa.e ranj sahe gaaliyaa.n sunii.n
lekin na chho.Daa qaum ke KHaadim ne ye kaam
dikhlaa diyaa zamaane ko zor-e-dil-o-dimaaG
batlaa diyaa vo karte hai.n karne vaale kaam
niyyat jo thii ba-KHair to barkat KHudaa ne dii
collage hu.aa durust ba-sad shaan-o-ehtishaam
sarmaa.e me.n kamii thii sahaaraa ko.ii na thaa
sayyad kaa dil thaa darpai takmiil-e-intizaam
aaKHir uThaa safar ko vo mard KHasta paye
ahbaab chand saath the zii-ilm-o-KHush-kalaam
qismat ki rahbarii se milii manzil-e-muraad
farmaa.n-ravaa-e-mulk-e-dakan ko kiyaa salaam
haalat dikhaa.ii aur zaruurat bayaan kii
KHuubii se iltimaas kiyaa qaum kaa payaam
rahm aa gayaa huzuur ko haalat pe qaum kii
phir kyaa thaa maujzan hu.aa dariyaa-e-faiz-e-aam
maahaana do hazaar kiyaa ik hazaar se
ummiid se ziyaada ataa thii ye laa-kalaam
'akbar' kii ye du.aa hai KHudaa kii janaab me.n
taa-hashr is ra.iis-o-riyaasat ko ho qayaam
kyaa vaqt par hu.ii hai ki be-ehtijjaj-e-fikr
taariik apnii aap hai fayyazii-e-nizaam

Akbar Allahabadi

Nazm

hum

jahaa.n pahaa.Do.n ke aasmaa.n-bos silsile hai.n
vahaa.n kabhii bahr maujzan the
jahaa.n bayaabaa.n me.n ret u.Dtii hai
baad-e-masmuum guu.njtii hai
vahaa.n kabhii sabza-zaar-o-gul-gasht kaa samaa.n thaa
buland-o-baalaa haqiir-o-hech
is shikast-o-ta.amiir ke tasalsul me.n bah rahe hai.n
shikast-o-ta.amiir ke tasalsul me.n tuu hai mai.n huu.n

Zia Jalandhari

Nazm

ishrat-e-tanhai

maujzan hai mai-e-ishrat mire paimaano.n me.n
yaas kaa dard hai kam-tar mire afsaano.n me.n
kaamraanii hai par-afshaa.n mire ruumaano.n me.n
yaas kii sa.i-e-junuu.n-KHez pe KHandaa.n huu.n mai.n

Asrarul Haq Majaz

Nazm

ek dost ki KHush-mazaqi par

ho nahii.n saktaa tirii is ''KHush-mazaaqii'' kaa javaab
shaam kaa dilkash samaa.n aur tere haatho.n me.n kitaab
rakh bhii de ab is kitaab-e-KHushk ko baalaa-e-taaq
u.D rahaa hai ra.ng-o-buu kii bazm me.n teraa mazaaq
chhup rahaa hai parda-e-maGrib me.n mahr-e-zar-fishaa.n
diid ke qaabil hai.n baadal me.n shafaq kii surKHiyaa.n
maujzan juu-e-shafaq hai is tarah zer-e-sahaab
jis tarah ra.ngiin shiisho.n me.n jhalaktii hai sharaab
ik nigaarish-e-aatishii.n har shai pe hai chhaayaa hu.aa
jaise aariz par uruus-e-nau ke ho ra.ng-e-hayaa
shaana-e-giitii pe lahraane ko hai.n gesuu-e-shab
aasmaa.n me.n mun.aqid hone ko hai bazm-e-tarab
u.D rahe hai.n justujuu me.n aashiyaano.n ke tuyuur
aa chalaa hai aa.ine me.n chaa.nd ke halkaa saa nuur
dekh kar ye shaam ke nazzaara-haa-e-dil-nashii.n
kyaa tire dil me.n zaraa bhii gudgudii hotii nahii.n
kyaa tirii nazro.n me.n ye ra.ngiiniyaa.n bhaatii nahii.n
kyaa havaa-e-sard tere dil ko ta.Dpaatii nahii.n
kyaa nahii.n hotii tujhe mahsuus mujh ko sach bataa
tez jho.nko.n me.n havaa ke gungunaane kii sadaa
sabza-o-gul dekh kar tujh ko KHushii hotii nahii.n
uf tire ehsaas me.n itnii bhii ra.ngiinii nahii.n
husn-e-fitrat kii lataafat kaa jo tuu qaa.el nahii.n
mai.n ye kahtaa huu.n tujhe jiine kaa haq haasil nahii.n

Asrarul Haq Majaz

Nazm

mujhe le chal

hukuumat hai jahaa.n sidq-o-safaa o mehr-o-ulfat kii
nashaat-o-aish-o-ishrat kii suruur-o-lutf-o-raahat kii
nasiim o anjum o gul kii navaa o nuur o nik.hat kii!
mohabbat maujzan hai jin ke doshiiza nazaaro.n me.n
mirii 'salmaa'! mujhe le chal tuu un ra.ngii.n nazaaro.n me.n!

Akhtar Shirani

Nazm

marsiya-e-dehli 4

tazkira dehlii-e-marhuum kaa ai dost na chhe.D
na sunaa jaa.egaa ham se ye fasaana hargiz
daastaa.n gul kii KHizaa.n me.n na sunaa ai bulbul
ha.nste ha.nste hame.n zaalim na rulaanaa hargiz
Dhuu.nDhtaa hai dil-e-shoriida bahaane mutrib
dard-a.ngez Gazal ko.ii na gaanaa hargiz
sohbate.n aglii musavvir hame.n yaad aa.e.ngii
ko.ii dilchasp muraqqa.a na dikhaanaa hargiz
maujzan dil me.n hai.n yaa.n KHuun ke dariyaa ai chashm
dekhnaa abr se aa.nkhe.n na churaanaa hargiz
le ke daaG aa.egaa siine pe bahut ai sayyaah
dekh is shahr ke kha.nDaro.n me.n na jaanaa hargiz
chappe chappe pe hai.n yaa.n gauhar-e-yaktaa tah-e-KHaak
dafn hogaa na kahii.n itnaa KHazaana hargiz
miT ga.e tere miTaane ke nishaa.n bhii ab to
ai falak is se ziyaada na miTaanaa hargiz
ham ko gar tuu ne rulaayaa to rulaayaa ai charKH
ham pe Gairo.n ko to zaalim na ha.nsaanaa hargiz
kabhii ai ilm-o-hunar ghar thaa tumhaaraa dillii
ham ko bhuule ho to ghar bhuul na jaanaa hargiz
shaa.irii mar chukii ab zinda na hogii hargiz
yaad kar kar ke use jii na ku.Dhaanaa hargiz
'Gaalib'-o-'shaifta'-o-'nayyar'-o-'aaruzda'-o-'zauq'
ab dikhaa.egaa ye shakle.n na zamaanaa hargiz

Altaf Hussain Hali

Nazm

KHabar hai ki nahin

ab sabaa kuucha-e-jaanaa.n me.n guzre hai ki nahii.n
tujh ko is fitna-e-aalam kii KHabar hai ki nahii.n
bujh gayaa mehr kaa faanuus ki raushan hai abhii
ab un aa.nkho.n me.n lagaavaT kaa asar hai ki nahii.n
ab mere naam kaa pa.Dhtaa hai vaziifa ko.ii
ab miraa zikr-e-vafaa dard-e-sahar hai ki nahii.n
ab bhii taktii hai.n mirii raah vo kaafir aa.nkhe.n
ab bhii duzdiida nazar jaanib-e-dar hai ki nahii.n
chhup ke raato.n ko mirii yaad me.n rotaa hai ko.ii
maujzan aa.nkh me.n ab KHuun-e-jigar hai ki nahii.n
husn ko pursish-e-biimaar kaa hai ab bhii KHayaal
mehr kii zarra KHaakii pe nazar hai ki nahii.n
be-KHabar mujh ko zamaane se kiyaa hai jis ne
kuchh use merii tabaahii kii KHabar hai ki nahii.n
khaa.e jaataa hai mujhe dard-e-Gariib-ul-vatanii
dil par is jaan-e-vatan ke bhii asar hai ki nahii.n
'josh' KHaamosh bhii ho puuchh rahaa hai kyaa kyaa
kuchh tujhe taa.Dne vaalo.n kii KHabar hai ki nahii.n

Josh Malihabadi

Nazm

kisan

lahuu kii lahr sii hai maujzan pasiine me.n
baqaa-e-dahr kaa hai raaz us ko jiine me.n

Maikash Akbarabadi

Nazm

jashn-e-azadi

apnii miTTii hai muqaddas
jaise mamtaa kaa taqaddus
KHuun kaa ik ek qatra de ke bhii
is kii rakhvaalii muqaddam
shaan-e-momin
azm-e-paiham
maujzan ho ruuh ruuh
josh-e-iimaan-e-husain

Asghar Ali Tabassum

Nazm

dagh

chhalaktii thii.n tire dil kii adaa.e.n bhii nigaaho.n se
balaa kaa dard hotaa thaa tirii KHaamosh aaho.n me.n
tuu banda thaa mohabbat kaa mohabbat thii tire dil me.n
samundar maujzan rahtaa thaa is chhoTe se saahil me.n

Maikash Akbarabadi

Nazm

insan ki fariyaad

haa.n ai masaaf-e-hastii! mat puuchh mujh se kyaa huu.n
ik arsa-e-balaa huu.n ik luqma-e-fanaa huu.n
majbuuriyo.n ne Daalaa gardan me.n merii phandaa
KHud-karda-e-vafaa huu.n jaa.n-daada-e-razaa huu.n
sayyaad haadse kaa kartaa hai meraa piichhaa
murG-e-buriida-par huu.n said-e-shikasta-paa huu.n
hai zaat merii majma.a saarii buraa.iyo.n kaa
kahne ko mai.n ba.Daa huu.n lekin bahut buraa huu.n
aazaadiyo.n kii mujh par tohmat hii hai saraasar
mai.n qaidii-e-havas huu.n mai.n banda-e-havaa huu.n
ik baat ho bataa.uu.n ik dard ho sunaa.uu.n
ro.uu.n bhalaa kahaa.n tak kab tak pa.Daa karaahuu.n
kam-baKHt dil kuchh aisaa mai.n saath le ke aayaa
ik lamha jis ke haatho.n duniyaa me.n sukh na paayaa
jo josh is me.n uTThaa haalaat ne dabaayaa
jo sho.ala is me.n bha.Dkaa taqdiir ne bujhaayaa
ummiid kaa ye Guncha khilte kabhii na dekhaa
ye aarzuu kaa paudaa phaltaa nazar na aayaa
go is me.n maujzan thii qaum o vatan kii ulfat
lekin Garaz ne is ko kuchh aur hii sikhaayaa
hotii nahii.n rasaa.ii ummiid ke ufuq tak
tuul-e-amal ne is ko ik jaal me.n pha.nsaayaa
kii rahbarii KHirad ne har-chand rahnumaa.ii
is juhd par bhii lekin khultii nahii.n sachchaa.ii
paayaa na mai.n ne ab tak maqsad kaa apne saahil
kii bahr-e-ma.arfat me.n din raat aashnaa.ii
is justujuu me.n mai.n ne kii sair-e-tuur-o-aiman
parbat ko ghar banaayaa jangal se lau lagaa.ii
mandir ko jaa ke dekhaa girjaa me.n jaa ke Dhuu.nDaa
masjid ko chhaan maaraa us kii na diid paa.ii
jogii kaa ruup dhaaraa ban me.n kiyaa guzaaraa
tan par bhabhuut mal kar dhuunii bahut ramaa.ii
jap tap me.n umr apnii mai.n ne basar kii aksar
ban ban ke piir-e-raahib jaa KHaanqaah basaa.ii
suufii bhii ban ke dekhaa aur rind-e-be-riyaa bhii
kar naara-e-anaa-al-haq ik khalbalii machaa.ii
phirtii hai.n maarii maarii mushtaaq-e-jalva aa.nkhe.n
par ik jhalak se ba.Dh kar detaa nahii.n dikhaa.ii
uTh jaa nazar se merii haa.n ai hijaab-e-hastii
husn-e-azal nihaa.n hai zer-e-naqaab-e-hastii
ye zindagii-e-insaa.n ik KHvaab hai pareshaa.n
bedaarii-e-adam hai ta.abiir-e-KHvaab-e-hastii
dekhe.n agar to kyuu.n-kar ham jalva-e-ma.aarif
tuu zulmat-e-nazar hai ai aaftaab-e-hastii
taskii.n ko zahr-e-qaatil aab-o-havaa-e-aalam
raahat kaa dushman-e-jaa.n har inqalaab-e-hastii
ai tishna-e-haqiiqat dhoke me.n tuu na aanaa
ik daam-e-pur-KHatar hai mauj-e-saraab-e-hastii
chaahe agar rihaa.ii pesh-az-fanaa fanaa ho
paadaash-e-jurm-e-hastii hai ye azaab-e-hastii

Ghulam Bhik Nairang

Nazm

rishta gunge safar ka

tumhaarii rago.n me.n bhii
merii rago.n kii tarah
kitnii sadiyo.n kaa KHuu.n
kitnii naslo.n kaa KHuu.n
maujzan hai
aur ye saarii nasle.n
shikasta magar uu.nchii diivaar kii tarah istaada hai.n
yuu.nhii kab talak phone par baat karte rahe.nge
yuu.nhii faasla jism kaa lams kaa
ek rishta faqat saut-o-avaaz kaa
ye rishta bhii hissa hai guu.nge safar kaa
jo kab TuuT jaa.e
kise ye pata hai
kaash ye rishta-e-saut-o-aavaaz hii daa.imii ho
ki guu.nge safar ke sabhii silsile aarzii hai.n

Mazhar Imam

Nazm

nazr-e-tagore

mirii kalaa merii shaa.irii mere fan kaa us ko salaam pahu.nche
ki jis ne mashriq kii azmato.n ko ataa kiye zindagii ke paikar
jo satvate.n KHvaab ho chukii thii.n jo rif.ate.n past ho chukii thii.n
unhe.n jagaa kar unhe.n sajaa kar banaa diyaa aasmaa.n kaa ham-sar
bhaTak rahii thii vatan kii hastii Gulaam ruuho.n ke kaarvaa.n me.n
shu.uur-e-aazaadii us ko de kar banaa diyaa asr-e-nau kaa rahbar
mirii navaa.o.n me.n shoKH tarz-e-suKHan kaa us ko salaam paho.nche
ki jis ne mashriq kii sarzamii.n ko na.e jahaa.n kaa ufuq banaayaa
nizaam-e-tahsiil-e-ilm badlaa nayaa tasavvur adab ko baKHshaa
lalit-kalaa.o.n ko shaa.ntii ke hasiin unvaan se sajaayaa
shafaq kii meh.ndii dhanak ke ka.ngan churaa.e aur kahkashaa.n kii afshaa.n
ba.De jatan se hasiina-e-shaa.irii ko jis ne dulhan banaayaa
'sarosh' mere shu.uur ke baa.nkpan kaa us ko salaam pahu.nche
sharaab-e-mashriq ke jaam chhalkaa.e jis ne maGrib ke mai-kado.n me.n
musavvir-e-tal.at-e-nigaaraa.n muGannii-e-shaukat-e-bahaaraa.n
hai.n maujzan kaa.enaat ke dil kii dha.Dkane.n jis ke chahchaho.n me.n
sukuut-e-shab raqs-e-maah-o-anjum fazaa ke shaane sabaa kii zulfe.n
nigaar-e-fitrat kii har adaa kaa jamaal hai jis ke zamzamo.n me.n

Rifat Sarosh

Nazm

yas o umid

ummiid
hai Galat nauha-e-Gam-gauhar shahvaar hai tuu
fil-haqiiqat ba.Dii izzat kaa sazaa-vaar hai tuu
maujzan hai tirii rag rag me.n shahiido.n kaa lahuu
badr o ahzaab kii ja.ngo.n kaa alam-daar hai tuu
jur.at-e-KHaalid-e-jaa.n-baaz milii hai tujh ko
vaaris-e-zor-e-shah-e-haidar-e-karraar hai tuu
kaun kahtaa hai tujhe jins danii hech-mabarz
tuu bahut kuchh hai agar muslim-e-bedaar hai tuu
tuu agar chaahe nikal saktii hai sahraa me.n bhii raah
sa.i-e-paiham ke liye koh-e-giraa.n ik par-e-kaah
kaun kahtaa hai ki saamaan se vaabasta hai
terii izzat tire iimaan se vaabasta hai
sab se avval tujhe laazim hai KHudaa kii pahchaan
aadmiyat isii irfaan se vaabasta hai
KHud giraa pa.Dtaa hai laazim hai KHudaa kii pahchaan
terii vaq.at bhii tirii aan se vaabasta hai
is se kaT jaa.e to kau.Dii bhii nahii.n mol tiraa
qadr o qiimat tirii qur.aan se vaabasta hai
tuu hai shaakii ki zamaana ne tujhe khoyaa hai
aur zamaane ko shikaayat hai ki tuu soyaa hai

Urooj Qadri

Nazm

dakan

jahaa.n saadgii me.n bhii ik baa.nkpan hai
jahaa.n raqs-farmaa havaa maujzan hai

Kunwar Mahendra Singh Bedi Sahar

Nazm

fasle

qurbato.n ke faasle
jo the vo kam nahii.n hu.e
dilo.n me.n hai.n jo ranjishe.n
vo baras-haa-baras se hai.n usii tarah se maujzan
mohabbato.n kii Daaliyaa.n
kabhii kii KHushk ho chukii.n
munaafiqat kii chaadare.n
dilo.n pe hai.n cha.Dhii hu.ii.n
ye ulfato.n kii rahguzar
hai suunii aaj kis qadar
hai.n saath sab ba-zaahir ab
magar vo pyaar kii sham.a
jo raushnii kaa thii sabab
vo bujh chukii vo gul hu.ii
hai rab se merii ye du.aa
ai mere rab mire KHudaa
mohabbato.n kii Daaliyaa.n
ho.n phir se sab harii-bharii
vo ulfato.n kii rahguzar bane sabhii kii rahguzar
jale vo pyaar kii sham.a
ho chaar suu chamak-damak
ai mere rab
ye chaahato.n kii duuriyaa.n
munaafiqat kii chaadare.n
ye qurbato.n ke faasle
sameT le mire KHudaa
sameT le mire KHudaa

Saeed Saadi

Load More

Search

ENG

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

Speak Now