Sher on Tasawwur

jī DhūñDtā hai phir vahī fursat ki raat din

baiThe raheñ tasavvur-e-jānāñ kiye hue

ji DhunDta hai phir wahi fursat ki raat din

baiThe rahen tasawwur-e-jaanan kiye hue

duniyā-e-tasavvur ham ābād nahīñ karte

yaad aate ho tum ḳhud hī ham yaad nahīñ karte

duniya-e-tasawwur hum aabaad nahin karte

yaad aate ho tum KHud hi hum yaad nahin karte

un kā ġham un kā tasavvur un kī yaad

kaT rahī hai zindagī ārām se

un ka gham un ka tasawwur un ki yaad

kaT rahi hai zindagi aaram se

ghar kī ta.amīr tasavvur hī meñ ho saktī hai

apne naqshe ke mutābiq ye zamīñ kuchh kam hai

ghar ki tamir tasawwur hi mein ho sakti hai

apne naqshe ke mutabiq ye zamin kuchh kam hai

yuuñ barastī haiñ tasavvur meñ purānī yādeñ

jaise barsāt kī rim-jhim meñ samāñ hotā hai

yun barasti hain tasawwur mein purani yaaden

jaise barsat ki rim-jhim mein saman hota hai

jaane kyuuñ ik ḳhayāl sā aayā

maiñ na hūñgā to kyā kamī hogī

jaane kyun ek KHayal sa aaya

main na hunga to kya kami hogi

un kā ġham un kā tasavvur un ke shikve ab kahāñ

ab to ye bāteñ bhī ai dil ho ga.iiñ aa.ī ga.ī

un ka gham un ka tasawwur un ke shikwe ab kahan

ab to ye baaten bhi ai dil ho gain aai gai

yuuñ tirī yaad meñ din raat magan rahtā huuñ

dil dhḌaknā tire qadmoñ kī sadā lagtā hai

yun teri yaad mein din raat magan rahta hun

dil dhDakna tere qadmon ki sada lagta hai

tasavvur meñ bhī ab vo be-naqāb aate nahīñ mujh tak

qayāmat aa chukī hai log kahte haiñ shabāb aayā

tasawwur mein bhi ab wo be-naqab aate nahin mujh tak

qayamat aa chuki hai log kahte hain shabab aaya

tere ḳhayāl ke dīvār-o-dar banāte haiñ

ham apne ghar meñ bhī terā hī ghar banāte haiñ

tere KHayal ke diwar-o-dar banate hain

hum apne ghar mein bhi tera hi ghar banate hain

phir nazar meñ phuul mahke dil meñ phir sham.eñ jalīñ

phir tasavvur ne liyā us bazm meñ jaane kā naam

phir nazar mein phul mahke dil mein phir shamen jalin

phir tasawwur ne liya us bazm mein jaane ka nam

maiñ jab bhī us ke ḳhayāloñ meñ kho sā jaatā huuñ

vo ḳhud bhī baat kare to burā lage hai mujhe

main jab bhi us ke KHayalon mein kho sa jata hun

wo KHud bhi baat kare to bura lage hai mujhe

tasavvur zulf kā hai aur maiñ huuñ

balā kā sāmnā hai aur maiñ huuñ

tasawwur zulf ka hai aur main hun

bala ka samna hai aur main hun

ḳhafā haiñ phir bhī aa kar chheḌ jaate haiñ tasavvur meñ

hamāre haal par kuchh mehrbānī ab bhī hotī hai

KHafa hain phir bhi aa kar chheD jate hain tasawwur mein

hamare haal par kuchh mehrbani ab bhi hoti hai

haañ dikhā de ai tasavvur phir vo sub.h o shaam tū

dauḌ pīchhe kī taraf ai gardish-e-ayyām tū

han dikha de ai tasawwur phir wo subh o sham tu

dauD pichhe ki taraf ai gardish-e-ayyam tu

chāhiye us kā tasavvur hī se naqsha khīñchnā

dekh kar tasvīr ko tasvīr phir khīñchī to kyā

chahiye us ka tasawwur hi se naqsha khinchna

dekh kar taswir ko taswir phir khinchi to kya

ik tirī yaad se ik tere tasavvur se hameñ

aa ga.e yaad ka.ī naam hasīnāoñ ke

ek teri yaad se ek tere tasawwur se hamein

aa gae yaad kai nam hasinaon ke

ham haiñ us ke ḳhayāl kī tasvīr

jis kī tasvīr hai ḳhayāl apnā

hum hain us ke KHayal ki taswir

jis ki taswir hai KHayal apna

mere pahlū meñ tum aao ye kahāñ mere nasīb

ye bhī kyā kam hai tasavvur meñ to aa jaate ho

mere pahlu mein tum aao ye kahan mere nasib

ye bhi kya kam hai tasawwur mein to aa jate ho

khul nahīñ saktī haiñ ab āñkheñ mirī

jī meñ ye kis kā tasavvur aa gayā

khul nahin sakti hain ab aankhen meri

ji mein ye kis ka tasawwur aa gaya

lamha lamha mujhe vīrān kiye detā hai

bas gayā mere tasavvur meñ ye chehra kis kā

lamha lamha mujhe viran kiye deta hai

bas gaya mere tasawwur mein ye chehra kis ka

puurī hotī haiñ tasavvur meñ umīdeñ kyā kyā

dil meñ sab kuchh hai magar pesh-e-nazar kuchh bhī nahīñ

puri hoti hain tasawwur mein umiden kya kya

dil mein sab kuchh hai magar pesh-e-nazar kuchh bhi nahin

lab-e-ḳhayāl se us lab kā jo liyā bosa

to muñh hī muñh meñ ajab tarah kā mazā aayā

lab-e-KHayal se us lab ka jo liya bosa

to munh hi munh mein ajab tarah ka maza aaya

raat bhar un kā tasavvur dil ko taḌpātā rahā

ek naqsha sāmne aatā rahā jaatā rahā

raat bhar un ka tasawwur dil ko taDpata raha

ek naqsha samne aata raha jata raha

yaad meñ ḳhvāb meñ tasavvur meñ

aa ki aane ke haiñ hazār tarīq

yaad mein KHwab mein tasawwur mein

aa ki aane ke hain hazar tariq

mahv huuñ is qadar tasavvur meñ

shak ye hotā hai maiñ huuñ yā tū hai

mahw hun is qadar tasawwur mein

shak ye hota hai main hun ya tu hai

haiñ tasavvur meñ us ke āñkheñ band

log jāneñ haiñ ḳhvāb kartā huuñ

hain tasawwur mein us ke aankhen band

log jaanen hain KHwab karta hun

bichhaḌ kar us se sīkhā hai tasavvur ko badan karnā

akele meñ use chhūnā akele meñ suḳhan karnā

bichhaD kar us se sikha hai tasawwur ko badan karna

akele mein use chhuna akele mein suKHan karna

is qadar mahv-e-tasavvur huuñ ki shak hotā hai

ā.īne meñ mirī sūrat hai ki sūrat terī

is qadar mahw-e-tasawwur hun ki shak hota hai

aaine mein meri surat hai ki surat teri

banātā huuñ maiñ tasavvur meñ us kā chehra magar

har ek baar na.ī kā.enāt bantī hai

banata hun main tasawwur mein us ka chehra magar

har ek bar nai kaenat banti hai

hai ābād mere tasavvur kī duniyā

hasīñ aa rahe haiñ hasīñ jā rahe haiñ

hai aabaad mere tasawwur ki duniya

hasin aa rahe hain hasin ja rahe hain

na hogā koī mujh sā mahv-e-tasavvur

jise dekhtā huuñ samajhtā huuñ tū hai

na hoga koi mujh sa mahw-e-tasawwur

jise dekhta hun samajhta hun tu hai

josh-e-junūñ meñ lutf-e-tasavvur na pūchhiye

phirte haiñ saath saath unheñ ham liye hue

josh-e-junun mein lutf-e-tasawwur na puchhiye

phirte hain sath sath unhen hum liye hue

maiñ ik thakā huā insān aur kyā kartā

tarah tarah ke tasavvur ḳhudā se bāñdh liye

main ek thaka hua insan aur kya karta

tarah tarah ke tasawwur KHuda se bandh liye

maiñ ki tere dhyān meñ gum thā

duniyā mujh ko DhūñDh rahī thī

main ki tere dhyan mein gum tha

duniya mujh ko DhunDh rahi thi

dekhūñ huuñ tujh ko duur se baiThā hazār kos

ainak na chāhiye na yahāñ dūrbīñ mujhe

dekhun hun tujh ko dur se baiTha hazar kos

ainak na chahiye na yahan durbin mujhe

kuchh to miltā hai maza sā shab-e-tanhā.ī meñ

par ye ma.alūm nahīñ kis se ham-āġhosh huuñ maiñ

kuchh to milta hai maza sa shab-e-tanhai mein

par ye malum nahin kis se ham-aghosh hun main

maiñ ne to tasavvur meñ aur aks dekhā thā

fikr muḳhtalif kyuuñ hai shā.erī ke paikar meñ

main ne to tasawwur mein aur aks dekha tha

fikr muKHtalif kyun hai shaeri ke paikar mein

jo tasavvur se māvarā na huā

vo to banda huā ḳhudā na huā

jo tasawwur se mawara na hua

wo to banda hua KHuda na hua

yahāñ to paik-e-tasavvur se kaam chaltā hai

sabā nahīñ na sahī nāma-bar nahīñ na sahī

yahan to paik-e-tasawwur se kaam chalta hai

saba nahin na sahi nama-bar nahin na sahi