kyuuñ aaj us kā zikr mujhe ḳhush na kar sakā

kyuuñ aaj us kā naam mirā dil dukhā gayā

kyun aaj us ka zikr mujhe KHush na kar saka

kyun aaj us ka nam mera dil dukha gaya

hai aaj ye gila ki akelā hai 'shahryār'

tarsoge kal hujūm meñ tanhā.ī ke liye

hai aaj ye gila ki akela hai 'shahryar'

tarsoge kal hujum mein tanhai ke liye

log sar phoḌ kar bhī dekh chuke

ġham kī dīvār TūTtī hī nahīñ

log sar phoD kar bhi dekh chuke

gham ki diwar TuTti hi nahin

tū kahāñ hai tujh se ik nisbat thī merī zaat ko

kab se palkoñ par uThā.e phir rahā huuñ raat ko

tu kahan hai tujh se ek nisbat thi meri zat ko

kab se palkon par uThae phir raha hun raat ko

be-nām se ik ḳhauf se dil kyuuñ hai pareshāñ

jab tai hai ki kuchh vaqt se pahle nahīñ hogā

be-nam se ek KHauf se dil kyun hai pareshan

jab tai hai ki kuchh waqt se pahle nahin hoga

zaḳhmoñ ko rafū kar leñ dil shaad kareñ phir se

ḳhvāboñ kī koī duniyā ābād kareñ phir se

zaKHmon ko rafu kar len dil shad karen phir se

KHwabon ki koi duniya aabaad karen phir se

hai koī jo batā.e shab ke musāfiroñ ko

kitnā safar huā hai kitnā safar rahā hai

hai koi jo batae shab ke musafiron ko

kitna safar hua hai kitna safar raha hai

nazrāna tere husn ko kyā deñ ki apne paas

le de ke ek dil hai so TuuTā huā sā hai

nazrana tere husn ko kya den ki apne pas

le de ke ek dil hai so TuTa hua sa hai

shahr-e-ummīd haqīqat meñ nahīñ ban saktā

to chalo us ko tasavvur hī meñ ta.amīr kareñ

shahr-e-ummid haqiqat mein nahin ban sakta

to chalo us ko tasawwur hi mein tamir karen

ḳhajil charāġhoñ se ahl-e-vafā ko honā hai

ki sarfarāz yahāñ phir havā ko honā hai

KHajil charaghon se ahl-e-wafa ko hona hai

ki sarfaraaz yahan phir hawa ko hona hai

ummīd se kam chashm-e-ḳharīdār meñ aa.e

ham log zarā der se bāzār meñ aa.e

ummid se kam chashm-e-KHaridar mein aae

hum log zara der se bazar mein aae

dil meñ rakhtā hai na palkoñ pe biThātā hai mujhe

phir bhī ik shaḳhs meñ kyā kyā nazar aatā hai mujhe

dil mein rakhta hai na palkon pe biThata hai mujhe

phir bhi ek shaKHs mein kya kya nazar aata hai mujhe

pahle nahā.ī os meñ phir āñsuoñ meñ raat

yuuñ buuñd buuñd utrī hamāre gharoñ meñ raat

pahle nahai os mein phir aansuon mein raat

yun bund bund utri hamare gharon mein raat

jāgtā huuñ maiñ ek akelā duniyā sotī hai

kitnī vahshat hijr kī lambī raat meñ hotī hai

jagta hun main ek akela duniya soti hai

kitni wahshat hijr ki lambi raat mein hoti hai

umr kā baaqī safar karnā hai is shart ke saath

dhuup dekheñ to use saa.e se ta.abīr kareñ

umr ka baqi safar karna hai is shart ke sath

dhup dekhen to use sae se tabir karen

gulāb Tahnī se TuuTā zamīn par na girā

karishme tez havā ke samajh se bāhar haiñ

gulab Tahni se TuTa zamin par na gira

karishme tez hawa ke samajh se bahar hain

ham paḌh rahe the ḳhvāb ke purzoñ ko joḌ ke

āñdhī ne ye tilism bhī rakh Daalā toḌ ke

hum paDh rahe the KHwab ke purzon ko joD ke

aandhi ne ye tilism bhi rakh Dala toD ke

ham judā ho ga.e āġhāz-e-safar se pahle

jaane kis samt hameñ rāh-e-vafā le jaatī

hum juda ho gae aaghaz-e-safar se pahle

jaane kis samt hamein rah-e-wafa le jati

har taraf apne ko bikhrā pāoge

ā.inoñ ko toḌ ke pachhtāoge

har taraf apne ko bikhra paoge

aainon ko toD ke pachhtaoge

ab to le de ke yahī kaam hai in ā.ankhoñ kā

jin ko dekhā nahīñ un ḳhvāboñ kī ta.abīr kareñ

ab to le de ke yahi kaam hai in aaankhon ka

jin ko dekha nahin un KHwabon ki tabir karen

justujū jis kī thī us ko to na paayā ham ne

is bahāne se magar dekh lī duniyā ham ne

justuju jis ki thi us ko to na paya hum ne

is bahane se magar dekh li duniya hum ne

ek hī miTTī se ham donoñ bane haiñ lekin

tujh meñ aur mujh meñ magar fāsla yuuñ kitnā hai

ek hi miTTi se hum donon bane hain lekin

tujh mein aur mujh mein magar fasla yun kitna hai

jahāñ meñ hone ko ai dost yuuñ to sab hogā

tire laboñ pe mire lab hoñ aisā kab hogā

jahan mein hone ko ai dost yun to sab hoga

tere labon pe mere lab hon aisa kab hoga

kaun sī baat hai jo us meñ nahīñ

us ko dekhe mirī nazar se koī

kaun si baat hai jo us mein nahin

us ko dekhe meri nazar se koi

husain-ibn-e-alī karbalā ko jaate haiñ

magar ye log abhī tak gharoñ ke andar haiñ

husain-ibn-e-ali karbala ko jate hain

magar ye log abhi tak gharon ke andar hain

shadīd pyaas thī phir bhī chhuā na paanī ko

maiñ dekhtā rahā dariyā tirī ravānī ko

shadid pyas thi phir bhi chhua na pani ko

main dekhta raha dariya teri rawani ko

aañkh kī ye ek hasrat thī ki bas puurī huī

āñsuoñ meñ bhiig jaane kī havas puurī huī

aankh ki ye ek hasrat thi ki bas puri hui

aansuon mein bhig jaane ki hawas puri hui

yā tere alāva bhī kisī shai kī talab hai

yā apnī mohabbat pe bharosā nahīñ ham ko

ya tere alawa bhi kisi shai ki talab hai

ya apni mohabbat pe bharosa nahin hum ko

āñdhiyāñ aatī thiiñ lekin kabhī aisā na huā

ḳhauf ke maare judā shāḳh se pattā na huā

aandhiyan aati thin lekin kabhi aisa na hua

KHauf ke mare juda shaKH se patta na hua

ye ik shajar ki jis pe na kāñTā na phuul hai

saa.e meñ us ke baiTh ke ronā fuzūl hai

ye ek shajar ki jis pe na kanTa na phul hai

sae mein us ke baiTh ke rona fuzul hai

pal bhar meñ kaise log badal jaate haiñ yahāñ

dekho ki ye mufīd hai bīnā.ī ke liye

pal bhar mein kaise log badal jate hain yahan

dekho ki ye mufid hai binai ke liye

maiñ akelā sahī magar kab tak

nañgī parchhā.iyoñ ke biich rahūñ

main akela sahi magar kab tak

nangi parchhaiyon ke bich rahun

ġham kī daulat baḌī mushkil se milā kartī hai

sauñp do ham ko agar tum se nigahbānī na ho

gham ki daulat baDi mushkil se mila karti hai

saunp do hum ko agar tum se nigahbani na ho

raat ko din se milāne kī havas thī ham ko

kaam achchhā na thā anjām bhī achchhā na huā

raat ko din se milane ki hawas thi hum ko

kaam achchha na tha anjam bhi achchha na hua

jam.a karte rahe jo apne ko zarra zarra

vo ye kyā jāneñ bikharne meñ sukūñ kitnā hai

jama karte rahe jo apne ko zarra zarra

wo ye kya jaanen bikharne mein sukun kitna hai

yā maiñ sochūñ kuchh bhī na us ke baare meñ

yā aisā ho duniyā aur badal jaa.e

ya main sochun kuchh bhi na us ke bare mein

ya aisa ho duniya aur badal jae

ik sirf hamīñ mai ko ā.ankhoñ se pilāte haiñ

kahne ko to duniyā meñ mai-ḳhāne hazāroñ haiñ

ek sirf hamin mai ko aaankhon se pilate hain

kahne ko to duniya mein mai-KHane hazaron hain

mire sūraj aa! mire jism pe apnā saaya kar

baḌī tez havā hai sardī aaj ġhazab kī hai

mere suraj aa! mere jism pe apna saya kar

baDi tez hawa hai sardi aaj ghazab ki hai

ab raat kī dīvār ko Dhānā hai zarūrī

ye kaam magar mujh se akele nahīñ hogā

ab raat ki diwar ko Dhana hai zaruri

ye kaam magar mujh se akele nahin hoga

har mulāqāt kā anjām judā.ī kyuuñ hai

ab to har vaqt yahī baat satātī hai hameñ

har mulaqat ka anjam judai kyun hai

ab to har waqt yahi baat satati hai hamein

in dinoñ maiñ bhī huuñ kuchh kār-e-jahāñ meñ masrūf

baat tujh meñ bhī nahīñ rah ga.ī pahle vaalī

in dinon main bhi hun kuchh kar-e-jahan mein masruf

baat tujh mein bhi nahin rah gai pahle wali

siine meñ jalan āñkhoñ meñ tūfān sā kyuuñ hai

is shahr meñ har shaḳhs pareshān sā kyuuñ hai

sine mein jalan aankhon mein tufan sa kyun hai

is shahr mein har shaKHs pareshan sa kyun hai

ajiib sāneha mujh par guzar gayā yaaro

maiñ apne saa.e se kal raat Dar gayā yaaro

ajib saneha mujh par guzar gaya yaro

main apne sae se kal raat Dar gaya yaro

bichhḌe logoñ se mulāqāt kabhī phir hogī

dil meñ ummīd to kaafī hai yaqīñ kuchh kam hai

bichhDe logon se mulaqat kabhi phir hogi

dil mein ummid to kafi hai yaqin kuchh kam hai

na ḳhush-gumān ho is par tū ai dil-e-sāda

sabhī ko dekh ke vo shaḳhs muskurātā hai

na KHush-guman ho is par tu ai dil-e-sada

sabhi ko dekh ke wo shaKHs muskuraata hai

ye kyā hai mohabbat meñ to aisā nahīñ hotā

maiñ tujh se judā ho ke bhī tanhā nahīñ hotā

ye kya hai mohabbat mein to aisa nahin hota

main tujh se juda ho ke bhi tanha nahin hota

āñkhoñ ko sab kī niiñd bhī dī ḳhvāb bhī diye

ham ko shumār kartī rahī dushmanoñ meñ raat

aankhon ko sab ki nind bhi di KHwab bhi diye

hum ko shumar karti rahi dushmanon mein raat

kahāñ tak vaqt ke dariyā ko ham Thahrā huā dekheñ

ye hasrat hai ki in ā.ankhoñ se kuchh hotā huā dekheñ

kahan tak waqt ke dariya ko hum Thahra hua dekhen

ye hasrat hai ki in aaankhon se kuchh hota hua dekhen

jo hone vaalā hai ab us kī fikr kyā kiije

jo ho chukā hai usī par yaqīñ nahīñ aatā

jo hone wala hai ab us ki fikr kya kije

jo ho chuka hai usi par yaqin nahin aata

umr kā lambā hissa kar ke dānā.ī ke naam

ham bhī ab ye soch rahe haiñ pāgal ho jaa.eñ

umr ka lamba hissa kar ke danai ke nam

hum bhi ab ye soch rahe hain pagal ho jaen