maiñ bhī bahut ajiib huuñ itnā ajiib huuñ ki bas

ḳhud ko tabāh kar liyā aur malāl bhī nahīñ

main bhi bahut ajib hun itna ajib hun ki bas

KHud ko tabah kar liya aur malal bhi nahin

jo guzārī na jā sakī ham se

ham ne vo zindagī guzārī hai

jo guzari na ja saki hum se

hum ne wo zindagi guzari hai

ye mujhe chain kyuuñ nahīñ paḌtā

ek hī shaḳhs thā jahān meñ kyā

ye mujhe chain kyun nahin paDta

ek hi shaKHs tha jahan mein kya

maiñ jo huuñ 'jaun-elia' huuñ janāb

is kā behad lihāz kījiyegā

main jo hun 'jaun-elia' hun janab

is ka behad lihaz kijiyega

yuuñ jo taktā hai āsmān ko tū

koī rahtā hai āsmān meñ kyā

yun jo takta hai aasman ko tu

koi rahta hai aasman mein kya

kitnī dilkash ho tum kitnā dil-jū huuñ maiñ

kyā sitam hai ki ham log mar jā.eñge

kitni dilkash ho tum kitna dil-ju hun main

kya sitam hai ki hum log mar jaenge

zindagī kis tarah basar hogī

dil nahīñ lag rahā mohabbat meñ

zindagi kis tarah basar hogi

dil nahin lag raha mohabbat mein

saarī duniyā ke ġham hamāre haiñ

aur sitam ye ki ham tumhāre haiñ

sari duniya ke gham hamare hain

aur sitam ye ki hum tumhaare hain

kis liye dekhtī ho ā.īna

tum to ḳhud se bhī ḳhūbsūrat ho

kis liye dekhti ho aaina

tum to KHud se bhi KHubsurat ho

kaun is ghar kī dekh-bhāl kare

roz ik chiiz TuuT jaatī hai

kaun is ghar ki dekh-bhaal kare

roz ek chiz TuT jati hai

bahut nazdīk aatī jā rahī ho

bichhaḌne kā irāda kar liyā kyā

bahut nazdik aati ja rahi ho

bichhaDne ka irada kar liya kya

kyā sitam hai ki ab tirī sūrat

ġhaur karne pe yaad aatī hai

kya sitam hai ki ab teri surat

ghaur karne pe yaad aati hai

kaise kaheñ ki tujh ko bhī ham se hai vāsta koī

tū ne to ham se aaj tak koī gila nahīñ kiyā

kaise kahen ki tujh ko bhi hum se hai wasta koi

tu ne to hum se aaj tak koi gila nahin kiya

vo jo na aane vaalā hai nā us se mujh ko matlab thā

aane vāloñ se kyā matlab aate haiñ aate hoñge

wo jo na aane wala hai na us se mujh ko matlab tha

aane walon se kya matlab aate hain aate honge

kyā takalluf kareñ ye kahne meñ

jo bhī ḳhush hai ham us se jalte haiñ

kya takalluf karen ye kahne mein

jo bhi KHush hai hum us se jalte hain

kyā kahā ishq jāvedānī hai!

āḳhirī baar mil rahī ho kyā

kya kaha ishq jawedani hai!

aaKHiri bar mil rahi ho kya

mustaqil boltā hī rahtā huuñ

kitnā ḳhāmosh huuñ maiñ andar se

mustaqil bolta hi rahta hun

kitna KHamosh hun main andar se

ham ko yāroñ ne yaad bhī na rakhā

'jaun' yāroñ ke yaar the ham to

hum ko yaron ne yaad bhi na rakha

'jaun' yaron ke yar the hum to

mujhe ab tum se Dar lagne lagā hai

tumheñ mujh se mohabbat ho ga.ī kyā

mujhe ab tum se Dar lagne laga hai

tumhein mujh se mohabbat ho gai kya

sochtā huuñ ki us kī yaad āḳhir

ab kise raat bhar jagātī hai

sochta hun ki us ki yaad aaKHir

ab kise raat bhar jagati hai

yaaro kuchh to zikr karo tum us kī qayāmat bāñhoñ kā

vo jo simaTte hoñge un meñ vo to mar jaate hoñge

yaro kuchh to zikr karo tum us ki qayamat banhon ka

wo jo simaTte honge un mein wo to mar jate honge

ilaaj ye hai ki majbūr kar diyā jā.ūñ

vagarna yuuñ to kisī kī nahīñ sunī maiñ ne

ilaj ye hai ki majbur kar diya jaun

wagarna yun to kisi ki nahin suni main ne

ek hī hādsa to hai aur vo ye ki aaj tak

baat nahīñ kahī ga.ī baat nahīñ sunī ga.ī

ek hi hadsa to hai aur wo ye ki aaj tak

baat nahin kahi gai baat nahin suni gai

us galī ne ye sun ke sabr kiyā

jaane vaale yahāñ ke the hī nahīñ

us gali ne ye sun ke sabr kiya

jaane wale yahan ke the hi nahin

aur to kyā thā bechne ke liye

apnī āñkhoñ ke ḳhvāb beche haiñ

aur to kya tha bechne ke liye

apni aankhon ke KHwab beche hain

dil kī taklīf kam nahīñ karte

ab koī shikva ham nahīñ karte

dil ki taklif kam nahin karte

ab koi shikwa hum nahin karte

ab mirī koī zindagī hī nahīñ

ab bhī tum merī zindagī ho kyā

ab meri koi zindagi hi nahin

ab bhi tum meri zindagi ho kya

bin tumhāre kabhī nahīñ aa.ī

kyā mirī niiñd bhī tumhārī hai

bin tumhaare kabhi nahin aai

kya meri nind bhi tumhaari hai

zindagī ek fan hai lamhoñ ko

apne andāz se gañvāne kā

zindagi ek fan hai lamhon ko

apne andaz se ganwane ka

hāsil-e-kun hai ye jahān-e-ḳharāb

yahī mumkin thā itnī ujlat meñ

hasil-e-kun hai ye jahan-e-KHarab

yahi mumkin tha itni ujlat mein

merī bāñhoñ meñ bahakne kī sazā bhī sun le

ab bahut der meñ āzād karūñgā tujh ko

meri banhon mein bahakne ki saza bhi sun le

ab bahut der mein aazad karunga tujh ko

tumhārā hijr manā luuñ agar ijāzat ho

maiñ dil kisī se lagā luuñ agar ijāzat ho

tumhaara hijr mana lun agar ijazat ho

main dil kisi se laga lun agar ijazat ho

haañ Thiik hai maiñ apnī anā kā marīz huuñ

āḳhir mire mizāj meñ kyuuñ daḳhl de koī

han Thik hai main apni ana ka mariz hun

aaKHir mere mizaj mein kyun daKHl de koi

maiñ rahā umr bhar judā ḳhud se

yaad maiñ ḳhud ko umr bhar aayā

main raha umr bhar juda KHud se

yaad main KHud ko umr bhar aaya

merī har baat be-asar hī rahī

naqs hai kuchh mire bayān meñ kyā

meri har baat be-asar hi rahi

naqs hai kuchh mere bayan mein kya

ab nahīñ koī baat ḳhatre kī

ab sabhī ko sabhī se ḳhatra hai

ab nahin koi baat KHatre ki

ab sabhi ko sabhi se KHatra hai

koī mujh tak pahuñch nahīñ paatā

itnā āsān hai patā merā

koi mujh tak pahunch nahin pata

itna aasan hai pata mera

haiñ dalīleñ tire ḳhilāf magar

sochtā huuñ tirī himāyat meñ

hain dalilen tere KHilaf magar

sochta hun teri himayat mein

jān-levā thiiñ ḳhvāhisheñ varna

vasl se intizār achchhā thā

jaan-lewa thin KHwahishen warna

wasl se intizar achchha tha

ai shaḳhs maiñ terī justujū se

be-zār nahīñ huuñ thak gayā huuñ

ai shaKHs main teri justuju se

be-zar nahin hun thak gaya hun

kitne aish se rahte hoñge kitne itrāte hoñge

jaane kaise log vo hoñge jo us ko bhāte hoñge

kitne aish se rahte honge kitne itraate honge

jaane kaise log wo honge jo us ko bhate honge

mujh ko aadat hai ruuTh jaane kī

aap mujh ko manā liyā kiije

mujh ko aadat hai ruTh jaane ki

aap mujh ko mana liya kije

nahīñ duniyā ko jab parvā hamārī

to phir duniyā kī parvā kyuuñ kareñ ham

nahin duniya ko jab parwa hamari

to phir duniya ki parwa kyun karen hum

bolte kyuuñ nahīñ mire haq meñ

aable paḌ ga.e zabān meñ kyā

bolte kyun nahin mere haq mein

aable paD gae zaban mein kya

nayā ik rishta paidā kyuuñ kareñ ham

bichhaḌnā hai to jhagḌā kyuuñ kareñ ham

naya ek rishta paida kyun karen hum

bichhaDna hai to jhagDa kyun karen hum

yaad use intihā.ī karte haiñ

so ham us kī burā.ī karte haiñ

yaad use intihai karte hain

so hum us ki burai karte hain

ab to har baat yaad rahtī hai

ġhāliban maiñ kisī ko bhuul gayā

ab to har baat yaad rahti hai

ghaaliban main kisi ko bhul gaya

us ke hoñToñ pe rakh ke hoñT apne

baat hī ham tamām kar rahe haiñ

us ke honTon pe rakh ke honT apne

baat hi hum tamam kar rahe hain

ek hī to havas rahī hai hameñ

apnī hālat tabāh kī jaa.e

ek hi to hawas rahi hai hamein

apni haalat tabah ki jae

kaam kī baat maiñ ne kī hī nahīñ

ye mirā taur-e-zindagī hī nahīñ

kaam ki baat main ne ki hi nahin

ye mera taur-e-zindagi hi nahin