بس اک جھجک ہے یہی حال دل سنانے میں

کہ تیرا ذکر بھی آئے گا اس فسانے میں

انساں کی خواہشوں کی کوئی انتہا نہیں

دو گز زمیں بھی چاہیئے دو گز کفن کے بعد

رہنے کو سدا دہر میں آتا نہیں کوئی

تم جیسے گئے ایسے بھی جاتا نہیں کوئی

جھکی جھکی سی نظر بے قرار ہے کہ نہیں

دبا دبا سا سہی دل میں پیار ہے کہ نہیں

بستی میں اپنی ہندو مسلماں جو بس گئے

انساں کی شکل دیکھنے کو ہم ترس گئے

تم اتنا جو مسکرا رہے ہو

کیا غم ہے جس کو چھپا رہے ہو

اب جس طرف سے چاہے گزر جائے کارواں

ویرانیاں تو سب مرے دل میں اتر گئیں

مدت کے بعد اس نے جو کی لطف کی نگاہ

جی خوش تو ہو گیا مگر آنسو نکل پڑے

کوئی تو سود چکائے کوئی تو ذمہ لے

اس انقلاب کا جو آج تک ادھار سا ہے

میرا بچپن بھی ساتھ لے آیا

گاؤں سے جب بھی آ گیا کوئی

پیڑ کے کاٹنے والوں کو یہ معلوم تو تھا

جسم جل جائیں گے جب سر پہ نہ سایہ ہوگا

گر ڈوبنا ہی اپنا مقدر ہے تو سنو

ڈوبیں گے ہم ضرور مگر ناخدا کے ساتھ

جس طرح ہنس رہا ہوں میں پی پی کے گرم اشک

یوں دوسرا ہنسے تو کلیجہ نکل پڑے

بیلچے لاؤ کھولو زمیں کی تہیں

میں کہاں دفن ہوں کچھ پتا تو چلے

کوئی کہتا تھا سمندر ہوں میں

اور مری جیب میں قطرہ بھی نہیں

روز بڑھتا ہوں جہاں سے آگے

پھر وہیں لوٹ کے آ جاتا ہوں

بہار آئے تو میرا سلام کہہ دینا

مجھے تو آج طلب کر لیا ہے صحرا نے

غربت کی ٹھنڈی چھاؤں میں یاد آئی اس کی دھوپ

قدر وطن ہوئی ہمیں ترک وطن کے بعد

اتنا تو زندگی میں کسی کے خلل پڑے

ہنسنے سے ہو سکون نہ رونے سے کل پڑے

جو اک خدا نہیں ملتا تو اتنا ماتم کیوں

یہاں تو کوئی مرا ہم زباں نہیں ملتا

کی ہے کوئی حسین خطا ہر خطا کے ساتھ

تھوڑا سا پیار بھی مجھے دے دو سزا کے ساتھ

روز بستے ہیں کئی شہر نئے

روز دھرتی میں سما جاتے ہیں

شب انتظار آخر کبھی ہوگی مختصر بھی

یہ چراغ بجھ رہے ہیں مرے ساتھ جلتے جلتے

دل کی نازک رگیں ٹوٹتی ہیں

یاد اتنا بھی کوئی نہ آئے

رہ گئی زندگی درد بن کے

درد دل میں چھپائے چھپائے

جب اس نے ہار کے خنجر زمیں پہ پھینک دیا

تمام زخم جگر مسکرائے ہیں کیا کیا

نظر ملی بھی نہ تھی اور ان کو دیکھ لیا

زباں کھلی بھی نہ تھی اور بات بھی کر لی

جو کہی گئی نہ مجھ سے وہ زمانہ کہہ رہا ہے

کہ فسانہ بن گئی ہے مری بات ٹلتے ٹلتے

نشیب ہستی سے افسوس ہم ابھر نہ سکے

فراز دار سے پیغام آئے ہیں کیا کیا

جو وہ مرے نہ رہے میں بھی کب کسی کا رہا

بچھڑ کے ان سے سلیقہ نہ زندگی کا رہا

آج پھر ٹوٹیں گی تیرے گھر کی نازک کھڑکیاں

آج پھر دیکھا گیا دیوانہ تیرے شہر میں

اٹھا کے سر مجھے اتنا تو دیکھ لینے دے

کہ قتل گاہ میں دیوانے آئے ہیں کیا کیا

لبوں سے اڑ گیا جگنو کی طرح نام اس کا

سہارا اب مرے گھر میں نہ روشنی کا رہا

نہ جانے کس کا سایہ دل سے گزرا

ذرا آواز دینا رازدارو

شاہ نامے لکھے ہیں کھنڈرات کی ہر اینٹ پر

ہر جگہ ہے دفن اک افسانہ تیرے شہر میں

اب آگے جو بھی ہو انجام دیکھا جائے گا

خدا تلاش لیا اور بندگی کر لی

دیواریں تو ہر طرف کھڑی ہیں

کیا ہو گئے مہربان سائے

کیا درد کسی کا لے گا کوئی اتنا تو کسی میں درد نہیں

بہتے ہوئے آنسو اور بہیں اب ایسی تسلی رہنے دو

جنگل کی ہوائیں آ رہی ہیں

کاغذ کا یہ شہر اڑ نہ جائے

اک خواب خوشی کا دیکھا نہیں دیکھا جو کبھی تو بھول گئے

مانگا ہوا تم کچھ دے نہ سکے جو تم نے دیا وہ سہنے دو