pal bhar meñ kaise log badal jaate haiñ yahāñ

dekho ki ye mufīd hai bīnā.ī ke liye

pal bhar mein kaise log badal jate hain yahan

dekho ki ye mufid hai binai ke liye

har mulāqāt kā anjām judā.ī kyuuñ hai

ab to har vaqt yahī baat satātī hai hameñ

har mulaqat ka anjam judai kyun hai

ab to har waqt yahi baat satati hai hamein

shadīd pyaas thī phir bhī chhuā na paanī ko

maiñ dekhtā rahā dariyā tirī ravānī ko

shadid pyas thi phir bhi chhua na pani ko

main dekhta raha dariya teri rawani ko

bichhḌe logoñ se mulāqāt kabhī phir hogī

dil meñ ummīd to kaafī hai yaqīñ kuchh kam hai

bichhDe logon se mulaqat kabhi phir hogi

dil mein ummid to kafi hai yaqin kuchh kam hai

ghar kī ta.amīr tasavvur hī meñ ho saktī hai

apne naqshe ke mutābiq ye zamīñ kuchh kam hai

ghar ki tamir tasawwur hi mein ho sakti hai

apne naqshe ke mutabiq ye zamin kuchh kam hai

siine meñ jalan āñkhoñ meñ tūfān sā kyuuñ hai

is shahr meñ har shaḳhs pareshān sā kyuuñ hai

sine mein jalan aankhon mein tufan sa kyun hai

is shahr mein har shaKHs pareshan sa kyun hai

kyā koī na.ī baat nazar aatī hai ham meñ

ā.īna hameñ dekh ke hairān sā kyuuñ hai

kya koi nai baat nazar aati hai hum mein

aaina hamein dekh ke hairan sa kyun hai

hai koī jo batā.e shab ke musāfiroñ ko

kitnā safar huā hai kitnā safar rahā hai

hai koi jo batae shab ke musafiron ko

kitna safar hua hai kitna safar raha hai

ik sirf hamīñ mai ko ā.ankhoñ se pilāte haiñ

kahne ko to duniyā meñ mai-ḳhāne hazāroñ haiñ

ek sirf hamin mai ko aaankhon se pilate hain

kahne ko to duniya mein mai-KHane hazaron hain

justujū jis kī thī us ko to na paayā ham ne

is bahāne se magar dekh lī duniyā ham ne

justuju jis ki thi us ko to na paya hum ne

is bahane se magar dekh li duniya hum ne

kahiye to āsmāñ ko zamīñ par utaar laa.eñ

mushkil nahīñ hai kuchh bhī agar Thaan lījiye

kahiye to aasman ko zamin par utar laen

mushkil nahin hai kuchh bhi agar Than lijiye

jahāñ meñ hone ko ai dost yuuñ to sab hogā

tire laboñ pe mire lab hoñ aisā kab hogā

jahan mein hone ko ai dost yun to sab hoga

tere labon pe mere lab hon aisa kab hoga

na ḳhush-gumān ho is par tū ai dil-e-sāda

sabhī ko dekh ke vo shaḳhs muskurātā hai

na KHush-guman ho is par tu ai dil-e-sada

sabhi ko dekh ke wo shaKHs muskuraata hai

jam.a karte rahe jo apne ko zarra zarra

vo ye kyā jāneñ bikharne meñ sukūñ kitnā hai

jama karte rahe jo apne ko zarra zarra

wo ye kya jaanen bikharne mein sukun kitna hai

siyāh raat nahīñ letī naam Dhalne kā

yahī to vaqt hai sūraj tire nikalne kā

siyah raat nahin leti nam Dhalne ka

yahi to waqt hai suraj tere nikalne ka

jān-būjh kar samajh kar maiñ ne bhulā diyā

har vo qissa jo dil ko bahlāne vaalā thā

jaan-bujh kar samajh kar main ne bhula diya

har wo qissa jo dil ko bahlane wala tha

kaun sī baat hai jo us meñ nahīñ

us ko dekhe mirī nazar se koī

kaun si baat hai jo us mein nahin

us ko dekhe meri nazar se koi

ham ḳhush haiñ hameñ dhuup virāsat meñ milī hai

ajdād kahīñ peḌ bhī kuchh bo ga.e hote

hum KHush hain hamein dhup wirasat mein mili hai

ajdad kahin peD bhi kuchh bo gae hote

tanhā.ī kī ye kaun sī manzil hai rafīqo

tā-hadd-e-nazar ek bayābān sā kyuuñ hai

tanhai ki ye kaun si manzil hai rafiqo

ta-hadd-e-nazar ek bayaban sa kyun hai

shaam hote hī khulī saḌkoñ kī yaad aatī hai

sochtā roz huuñ maiñ ghar se nahīñ niklūñgā

sham hote hi khuli saDkon ki yaad aati hai

sochta roz hun main ghar se nahin niklunga

gardish-e-vaqt kā kitnā baḌā ehsāñ hai ki aaj

ye zamīñ chāñd se behtar nazar aatī hai hameñ

gardish-e-waqt ka kitna baDa ehsan hai ki aaj

ye zamin chand se behtar nazar aati hai hamein

jo hone vaalā hai ab us kī fikr kyā kiije

jo ho chukā hai usī par yaqīñ nahīñ aatā

jo hone wala hai ab us ki fikr kya kije

jo ho chuka hai usi par yaqin nahin aata

umr kā lambā hissa kar ke dānā.ī ke naam

ham bhī ab ye soch rahe haiñ pāgal ho jaa.eñ

umr ka lamba hissa kar ke danai ke nam

hum bhi ab ye soch rahe hain pagal ho jaen

be-nām se ik ḳhauf se dil kyuuñ hai pareshāñ

jab tai hai ki kuchh vaqt se pahle nahīñ hogā

be-nam se ek KHauf se dil kyun hai pareshan

jab tai hai ki kuchh waqt se pahle nahin hoga

shikva koī dariyā kī ravānī se nahīñ hai

rishta hī mirī pyaas kā paanī se nahīñ hai

shikwa koi dariya ki rawani se nahin hai

rishta hi meri pyas ka pani se nahin hai

nazrāna tere husn ko kyā deñ ki apne paas

le de ke ek dil hai so TuuTā huā sā hai

nazrana tere husn ko kya den ki apne pas

le de ke ek dil hai so TuTa hua sa hai

ye kyā jagah hai dosto ye kaun sā dayār hai

hadd-e-nigāh tak jahāñ ġhubār hī ġhubār hai

ye kya jagah hai dosto ye kaun sa dayar hai

hadd-e-nigah tak jahan ghubar hi ghubar hai

mire sūraj aa! mire jism pe apnā saaya kar

baḌī tez havā hai sardī aaj ġhazab kī hai

mere suraj aa! mere jism pe apna saya kar

baDi tez hawa hai sardi aaj ghazab ki hai

vo kaun thā vo kahāñ kā thā kyā huā thā use

sunā hai aaj koī shaḳhs mar gayā yaaro

wo kaun tha wo kahan ka tha kya hua tha use

suna hai aaj koi shaKHs mar gaya yaro

husain-ibn-e-alī karbalā ko jaate haiñ

magar ye log abhī tak gharoñ ke andar haiñ

husain-ibn-e-ali karbala ko jate hain

magar ye log abhi tak gharon ke andar hain

ab raat kī dīvār ko Dhānā hai zarūrī

ye kaam magar mujh se akele nahīñ hogā

ab raat ki diwar ko Dhana hai zaruri

ye kaam magar mujh se akele nahin hoga

tujhe bhuul gayā kabhī yaad nahīñ kartā tujh ko

jo baat bahut pahle karnī thī ab kī hai

tujhe bhul gaya kabhi yaad nahin karta tujh ko

jo baat bahut pahle karni thi ab ki hai

jab bhī miltī hai mujhe ajnabī lagtī kyuuñ hai

zindagī roz na.e rañg badaltī kyuuñ hai

jab bhi milti hai mujhe ajnabi lagti kyun hai

zindagi roz nae rang badalti kyun hai

sabhī ko ġham hai samundar ke ḳhushk hone kā

ki khel ḳhatm huā kashtiyāñ Dubone kā

sabhi ko gham hai samundar ke KHushk hone ka

ki khel KHatm hua kashtiyan Dubone ka

tere vaade ko kabhī jhuuT nahīñ samjhūñgā

aaj kī raat bhī darvāza khulā rakkhūñgā

tere wade ko kabhi jhuT nahin samjhunga

aaj ki raat bhi darwaza khula rakkhunga

yā tere alāva bhī kisī shai kī talab hai

yā apnī mohabbat pe bharosā nahīñ ham ko

ya tere alawa bhi kisi shai ki talab hai

ya apni mohabbat pe bharosa nahin hum ko

ye ik shajar ki jis pe na kāñTā na phuul hai

saa.e meñ us ke baiTh ke ronā fuzūl hai

ye ek shajar ki jis pe na kanTa na phul hai

sae mein us ke baiTh ke rona fuzul hai

hai aaj ye gila ki akelā hai 'shahryār'

tarsoge kal hujūm meñ tanhā.ī ke liye

hai aaj ye gila ki akela hai 'shahryar'

tarsoge kal hujum mein tanhai ke liye

ye kyā hai mohabbat meñ to aisā nahīñ hotā

maiñ tujh se judā ho ke bhī tanhā nahīñ hotā

ye kya hai mohabbat mein to aisa nahin hota

main tujh se juda ho ke bhi tanha nahin hota

in dinoñ maiñ bhī huuñ kuchh kār-e-jahāñ meñ masrūf

baat tujh meñ bhī nahīñ rah ga.ī pahle vaalī

in dinon main bhi hun kuchh kar-e-jahan mein masruf

baat tujh mein bhi nahin rah gai pahle wali

raat ko din se milāne kī havas thī ham ko

kaam achchhā na thā anjām bhī achchhā na huā

raat ko din se milane ki hawas thi hum ko

kaam achchha na tha anjam bhi achchha na hua

zabāñ milī bhī to kis vaqt be-zabānoñ ko

sunāne ke liye jab koī dāstāñ na rahī

zaban mili bhi to kis waqt be-zabanon ko

sunane ke liye jab koi dastan na rahi

kāġhaz kī kashtiyāñ bhī bahut kaam ā.eñgī

jis din hamāre shahr meñ sailāb aa.egā

kaghaz ki kashtiyan bhi bahut kaam aaengi

jis din hamare shahr mein sailab aaega

mujh ko le Duubā tirā shahr meñ yaktā honā

dil bahal jaatā agar koī bhī tujh sā hotā

mujh ko le Duba tera shahr mein yakta hona

dil bahal jata agar koi bhi tujh sa hota

maiñ sochtā huuñ magar yaad kuchh nahīñ aatā

ki iḳhtitām kahāñ ḳhvāb ke safar kā huā

main sochta hun magar yaad kuchh nahin aata

ki iKHtitam kahan KHwab ke safar ka hua

zindagī jaisī tavaqqo thī nahīñ kuchh kam hai

har ghaḌī hotā hai ehsās kahīñ kuchh kam hai

zindagi jaisi tawaqqo thi nahin kuchh kam hai

har ghaDi hota hai ehsas kahin kuchh kam hai

ajiib sāneha mujh par guzar gayā yaaro

maiñ apne saa.e se kal raat Dar gayā yaaro

ajib saneha mujh par guzar gaya yaro

main apne sae se kal raat Dar gaya yaro

ek hī miTTī se ham donoñ bane haiñ lekin

tujh meñ aur mujh meñ magar fāsla yuuñ kitnā hai

ek hi miTTi se hum donon bane hain lekin

tujh mein aur mujh mein magar fasla yun kitna hai

ajiib chiiz hai ye vaqt jis ko kahte haiñ

ki aane paatā nahīñ aur biit jaatā hai

ajib chiz hai ye waqt jis ko kahte hain

ki aane pata nahin aur bit jata hai

pahle nahā.ī os meñ phir āñsuoñ meñ raat

yuuñ buuñd buuñd utrī hamāre gharoñ meñ raat

pahle nahai os mein phir aansuon mein raat

yun bund bund utri hamare gharon mein raat