Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "zaaviye"

Nazm MATCHES FOR "zaaviye"

Nazm

hasan kuza-gar(3)

jahaa.n-zaad
vo halab kii kaarvaa.n-saraaa kaa hauz, raat vo sukuut
jis me.n ek duusre se ham-kinaar tairte rahe
muhiit jis tarah ho daa.ere ke gird halqaa-zan
tamaam raat tairte rahe the ham
ham ek duusre ke jism o jaa.n se lag ke
tairte rahe the ek shaad-kaam KHauf se
ki jaise paanii aa.nsu.o.n me.n tairtaa rahe
ham ek duusre se mutma.in zavaal-e-umr ke KHilaaf
tairte rahe
tuu kah uThii 'hasan yahaa.n bhii khii.nch laa.ii
jaa.n kii tishnagii tujhe!'
(lo apnii jaa.n kii tishnagii ko yaad kar rahaa thaa mai.n
ki meraa halq aa.nsu.o.n kii be-bahaa saKHaavato.n
se shaad-kaam ho gayaa!)
magar ye vahm dil me.n tairne lagaa ki ho na ho
miraa badan kahii.n halab ke hauz hii me.n rah gayaa
nahii.n, mujhe du.ii kaa vaahima nahii.n
ki ab bhii rabt-e-jism-o-jaa.n kaa e'tibaar hai mujhe
yahii vo e'tibaar thaa
ki jis ne mujh ko aap me.n samo diyaa
mai.n sab se pahle 'aap' huu.n
agar hamii.n ho.n tuu ho aur mai.n huu.n phir bhii mai.n
har ek shai se pahle aap ho.n!
agar mai.n zinda huu.n to kaise aap se daGaa karuu.n?
ki tere jaisii aurte.n, jahaa.n-zaad,
aisii uljhane.n hai.n
jin ko aaj tak ko.ii nahii.n 'sulajh' sakaa
jo mai.n kahuu.n ke mai.n 'sulajh' sakaa to sar-ba-sar
fareb apne aap se!
ki aurato.n kii saaKHt hai vo tanz apne-aap par
javaab jis kaa ham nahii.n
(labiib kaun hai? tamaam raat jis kaa zikr
tere lab pe thaa
vo kaun tere gesu.o.n ko khii.nchtaa rahaa
labo.n ko nochtaa rahaa
jo mai.n kabhii na kar sakaa
nahii.n ye sach hai mai.n huu.n yaa labiib ho
raqiib ho to kis liye tirii KHud-aagahii kii be-riyaa nashaat-e-naab kaa
jo sad-navaa o yak-navaa KHiraam-e-sub.h kii tarah
labiib har navaa-e-saaz-gaar kii nafii sahii!)
magar hamaaraa raabta visaal-e-aab-o-gil nahii.n, na thaa kabhii
vajuud-e-aadmii se aab-o-gil sadaa baruu.n rahe
na har visaal-e-aab-o-gil se ko.ii jaam yaa subuu hii ban sakaa
jo in kaa ek vaahima hii ban sake to ban sake!

Noon Meem Rashid
Nazm

mere pyare watan

mere vatan, pyaare vatan
raahat ke gahvaare vatan
har dil ke ujyaare vatan
har aa.nkh ke taare vatan
gul-posh terii vaadiyaa.n
farhat-nishaa.n raahat-rasaa.n
tere chaman-zaaro.n pe hai
gulzaar-e-jannat kaa gumaa.n
har shaaKH phuulo.n kii chha.Dii
har naKHl-e-tuubaa hai yahaa.n
kausar ke chashme jaa-ba-jaa
tasniim har aab-e-ravaa.n
har barg ruuh-e-taazgii
har phuul jaan-e-gulsitaa.n
har baaG baaG-e-dil-kashii
har baaG baaG-e-be-KHizaa.n
dilkash charaagaahe.n tirii
Dhoro.n ke jin me.n kaarvaa.n
anjum-sifat gulhaa-e-nau
har taKHta-e-gul aasmaa.n
naqsh-e-surayyaa jaa-ba-jaa
har har ravish ik kahkashaa.n
terii bahaare.n daa.imii
terii bahaare.n jaavedaa.n
tujh me.n hai ruuh-e-zindagii
paiham ravaa.n paiham davaa.n
dariyaa vo tere tund-KHuu
jhiile.n vo terii be-karaa.n
shaam-e-avadh ke lab pe hai
husn-e-azal kii daastaa.n
kahtii hai raaz-e-sarmadii
sub.h-e-banaras kii zabaa.n
u.Dtaa hai haft-aflaak par
un kaar-KHaano.n kaa dhu.aa.n
jin me.n hai.n laakho.n mehnatii
san.at-garii ke paasbaa.n
terii banaras kii zarii
rashk-e-hariir-o-parniyaa.n
biidar kii fankaarii me.n hai.n
san.at kii sab baariikiyaa.n
azmat tire iqbaal kii
tere pahaa.Do.n se ayaa.n
dariyaa.o.n kaa paanii, tarii
taqdiis kaa andaaza-daa.n
kyaa 'bhaarte.ndu' ne kiyaa
ga.ngaa kii lahro.n kaa bayaa.n
'iqbaal' aur chakbast hai.n
azmat ke terii naGma-KHvaa.n
'josh' o 'firaaq' o 'pant' hai.n
tere adab ke tarjumaa.n
'tulsii' o 'KHusrav' hai.n terii
taariif me.n ratb-ul-lisaa.n
gaate hai.n naGma mil ke sab
uu.nchaa rahe teraa nishaa.n
mere vatan, pyaare vatan
raahat ke gahvaare vatan
har dil ke ujiyaare vatan
har aa.nkh ke taare vatan
tere nazaaro.n ke nagii.n
duniyaa kii KHaatam me.n nahii.n
saare jahaa.n me.n muntaKHab
kashmiir kii arz-e-hasii.n
fitrat kaa ra.ngii.n mo.ajaza
firdaus bar-ruu-e-zamii.n
firdaus bar-ruu-e-zamii.n
haa.n haa.n hamii.n ast o hamii.n
sarsabz jis ke dasht hai.n
jis ke jabal hai.n surmagii.n
meve ba-kasrat hai.n jahaa.n
shiirii.n misaal-e-a.ngbii.n
har za.afaraa.n ke phuul me.n
aks-e-jamaal-e-huura.ii.n
vo maalve kii chaa.ndnii
gum jis me.n ho.n duniyaa-o-dii.n
is KHitta-e-naira.ng me.n
har ik fazaa husn-aafrii.n
har shai me.n husn-e-zindagii
dilkash makaa.n dilkash zamii.n
har mard mard-e-KHuub-ruu
har ek aurat naaznii.n
vo taaj kii KHush-paikarii
har zaaviye se dil-nashii.n
san.at-garo.n ke daur kii
ik yaadgaar-e-marmarii.n
hotii hai jo har shaam ko
faiz-e-shafaq se ahmarii.n
dariyaa kii maujo.n se alag
yaa ik bat-e-nazzaara-bii.n
yaa taa.er-e-nuurii ko.ii
parvaaz karne ke qarii.n
yaa ahl-e-duniyaa se alag
ik aabid-e-uzlat-guzii.n
naqsh-e-ajantaa kii qasam
jachtaa nahii.n arzha.ng-e-chii۔n
shaan-e-ellora dekh kar
jhuktii hai aazar kii jabii.n
chittau.D ho yaa aagara
aise nahii.n qil.e kahii.n
but-gar ho yaa naqqaash ho
tuu sab kii azmat kaa amii.n
mere vatan, pyaare vatan
raahat ke gahvaare vatan
har dil ke ujiyaare vatan
har aa.nkh ke taare vatan
dilkash tire dasht o chaman
ra.ngii.n tire shahr o chaman
tere javaa.n raa.anaa javaa.n
tere hasii.n gul pairahan
ik anjuman duniyaa hai ye
tuu is me.n sadr-e-anjuman
tere muGannii KHush-navaa
shaa.er tire shiirii.n-suKHan
har zarra ik maah-e-mubii.n
har KHaar rashk-e-nastarii.n
Guncha tire sahraa kaa hai
ik naafa-e-mushk-e-KHutan
ka.nkar hai.n tere be-bahaa
patthar tire laal-e-yaman
bastii se jangal KHuub-tar
baaGo.n se husn afroz ban
vo mor vo kabk-e-darii
vo chauk.Dii bharte hiran
ra.ngii.n-adaa vo titliyaa.n
baa.nbnii me.n vo naago.n ke phan
vo sher jin ke naam se
larze me.n aa.e ahrman
kheto.n kii barkat se ayaa.n
faizaan-e-rabb-e-zul-minan
chashmo.n ke shiirii.n aab se
lazzat-kashaa.n kaam-o-dahan
taabinda teraa ahd-e-nau
raushan tiraa ahd-e-kuhan
kitno.n ne tujh par kar diyaa
qurbaan apnaa maal dhan
kitne shahiido.n ko mile
tere liye daar-o-rasan
kitno.n ko teraa ishq thaa
kitno.n ko thii terii lagan
tere jafaa-kash mehnatii
rakhte hai.n azm-e-kohkan
tere sipaahii suurmaa
be-misl yaktaa-e-zaman
'bhisham' saa jin me.n hausla
'arjun' saa jin me.n baa.nkpan
aalim jo faKHr-e-ilm hai.n
fankaar naazaa.n jin pe fan
'raa.e' o 'bos' o 'shergil'
'dinkar,' 'jigar' 'maithli-sharan'
'vallathol' 'maahir', bhaartii
'bachchan', 'mahaadevii' 'suman'
'krishnan', 'niraalaa', 'prem-chand'
'tagore' o 'aazaad' o 'raman'
mere vatan, pyaare vatan
raahat ke gahvaare vatan
har dil ke ujiyaare vatan
har aa.nkh ke taare vatan
khetii tirii har ik harii
dilkash tirii KHush-manzarii
terii bisaat-e-KHaak ke
zarre hai.n mahr-o-mushtarii
jhelum kaveri naag vo
ga.ngaa kii vo ga.ngotarii
vo narbadaa kii tamkanat
vo shaukat-e-godaavarii
paakiizgii sarjuu kii vo
jamunaa kii vo KHush-gauharii
dullarba aab-e-niil-guu.n
kashmiir kii niilam-parii
dilkash papiihe kii sadaa
koyal kii taane.n mad-bharii
tiitar kaa vo haq sirrahu
tuutii kaa vo vird-e-harii
suufii tire har daur me.n
karte rahe paiGambarii
'chishtii' o 'nanak' se milii
faqr-o-Ginaa ko bartarii
adl-e-jahaa.ngiirii me.n thii
muzmar re.aayaa-parvarii
vo nau-ratan jin se hu.ii
tahziib-e-daur-e-akbarii
rakhte the afGaan-o-muGal
ik saulat-e-askandarii
raanaa.on ke iqbaal kii
hotii hai kis se ham-sarii
saava.nt vo yodhdhaa tire
tere jiyaale vo jarii
niiatii vidur kii aaj tak
kartii hai terii rahbarii
ab tak hai mash.huur-e-zamaa.n
'chanakya' kii daanish-varii
vayaas aur vishvamitr se
muniyo.n kii shaan-e-qaisarii
paatanjalii o saa.nkh se
rishiyo.n kii hikmat-parvarii
baKHshe tujhe in.aam-e-nau
har daur charKH-e-chambarii
KHush-gauharii de aab ko
aur KHaak ko KHush-jauharii
zarro.n ko mahr-afshaaniyaa.n
qatro.n ko dariyaa-gustarii
mere vatan, pyaare vatan
raahat ke gahvaare vatan
har dil ke ujiyaare vatan
har aa.nkh ke taare vatan
tuu rahbar-e-nau-e-bashar
tuu amn kaa paiGaam-bar
paale hai.n tuu ne god me.n
saahib-KHirad saahib-e-nazar
afzal-tarii.n in sab me.n hai
baapuu kaa naam-e-mo'tabar
har lafz jis kaa dil-nashii.n
har baat jis kii pur-asar
jis ne lagaayaa dahr me.n
na.ara ye be-KHauf-o-KHatar
be-kaar hai.n tiir-o-sinaa.n
be-suud hai.n teG-o-tabar
hinsaa kaa rasta jhuuT hai
haq hai ahinsaa kii Dagar
darmaa.n hai ye har dard kaa
ye har maraz kaa chaara-gar
ja.ngaah-e-aalam me.n ko.ii
is se nahii.n behtar sipar
kartaa huu.n mai.n tere liye
ab ye du.aa-e-muKHtasar
raunaq pe ho.n tere chaman
sarsabz ho.n tere shajar
naKHl-e-umiid-e-behtarii
har fasl me.n ho baarvar
koshish ho duniyaa me.n ko.ii
KHitta na ho zer-o-zabar
teraa har ik baasii rahe
neko-sifat neko-siyar
har zan saliiqa-ma.nd ho
har mard ho saahib-hunar
jab tak hai.n ye arz o falak
jab tak hai.n ye shams o qamar
mere vatan, pyaare vatan
raahat ke gahvaare vatan
har dil ke ujyaare vatan
har aa.nkh ke taare vatan

Arsh Malsiyani
Nazm

kaun si uljhan ko suljhate hain ham?

lab bayaabaa.n, bose be-jaa.n
kaun sii uljhan ko suljhaate hai.n ham?
jism kii ye kaar-gaahe.n
jin kaa haizam aap ban jaate hai.n ham!
niim-shab aur shahr-e-KHvaab-aaluudaa, ham-saa.e
ki jaise duzd-e-shab-gardaa.n ko.ii!
shaam se the hasrato.n ke banda-e-be-daam ham
pii rahe the jaam par har jaam ham
ye samajh kar jur.a-e-pinhaa.n ko.ii
shaayad aaKHir ibtidaa-e-raaz kaa iimaa bane!
matlab aasaa.n harf be-ma.anii
tabassum ke hisaabii zaaviye
matn ke sab haashiye
jin se aish-KHaam ke naqsh-e-riyaa bante rahe!
aur aaKHir bu.ad jismo.n me.n sar-e-muu bhii na thaa
jab dilo.n ke darmiyaa.n haa.il the sa.ngii.n faasle
qurb-e-chashm-o-gosh se ham kaun sii uljhan ko suljhaate rahe!
kaun sii uljhan ko suljhaate hai.n ham?
shaam ko jab apnii Gam-gaaho.n se duzdaanaa nikal aate hai.n ham?
yaa zavaal-e-umr kaa dev-e-subuk-paa ruu-ba-ruu
yaa anaa ke dast o paa ko vus.ato.n kii aarzuu
kaun sii uljhan ko suljhaate hai.n ham?

Noon Meem Rashid
Nazm

ek nazm

chhuTpuTe ke Gurfe me.n
lamhe ab bhii milte hai.n
sub.h ke dhundalke me.n
phuul ab bhii khilte hai.n
ab bhii kohsaaro.n par
sar-kashiida hariyaalii
pattharo.n kii diivaare.n
to.D kar nikaltii hai
ab bhii aab-zaaro.n par
kashtiyo.n kii suurat me.n
ziist kii tavaanaa.ii
zaaviye badaltii hai
ab bhii ghaas ke maidaa.n
shabnamii sitaaro.n se
mere KHaak-daa.n par bhii
aasmaa.n sajaate hai.n
ab bhii khet gandum ke
tez dhuup me.n tap kar
is Gariib dhartii ko
zar-fishaa.n banaate hai.n
saaye ab bhii chalte hai.n
suuraj ab bhii Dhaltaa hai
sub.he.n ab bhii raushan hai.n
raate.n ab bhii kaalii hai.n
zehn ab bhii chaTyal hai.n
ruuhe.n ab bhii banjar hai.n
jism ab bhii na.nge hai.n
haath ab bhii KHaalii hai.n
ab bhii sabz faslo.n me.n
zindagii ke rakhvaale
zard zard chehro.n par
KHaak o.Dhe rahte hai.n
ab bhii un kii taqdiire.n
munqalib nahii.n hotii.n
munqalib nahii.n ho.ngii
kahne vaale kahte hai.n
gardisho.n kii raanaa.ii
aam hii nahii.n hotii
apne roz-e-avval kii
shaam hii nahii.n hotii

Ahmad Nadeem Qasmi
Nazm

parindon bhara aasman

hujuum-e-nuquush-e-faraavaa.n kaa ha.ngaam
mai.n yaad kartaa huu.n
aavaaz chehra hasii.n jism
sab zaaviye daa.ere aur qause.n
shab-o-roz
raftaar kii aag me.n
mauj-dar-mauj bahtii hu.ii raagnii
daur kii vaadiyo.n me.n
sar-e-shaam
dam to.Dtii raushnii
naGmagii raushnii naGmagii
tiirgii bebasii KHaamushii
ra.ng-o-KHushbuu se sarshaar
sadiyo.n puraanii zamii.n
duur jaataa hu.aa kaarvaa.n
jism-e-aavaaz kaa vahshii be-zabaa.n
ik junuu.n ek ma.akuus barham sakuu.n
zer-o-bam zer-o-bam
iztiraab iztiraab
ajnabii mausamo.n kaa jahaa.n
faaslo.n sarhado.n se pare
vus.ato.n me.n pur-afshaa.n
parindo.n bharaa niilguu.n be-karaa.n niilguu.n aasmaa.n

Balraj Komal
Nazm

dusra tajraba

kal shab ajiib adaa se thaa ik husn mehrbaa.n
vo shabnamii gulaab sii ra.ngat dhulii dhulii
shaano.n pe be-qaraar vo zulfe.n khulii khulii
har KHat-e-jism pairahan-e-chust se ayaa.n
Thahre bhii gar nigaah to Thahre kahaa.n kahaa.n
har zaaviye me.n husn kaa ik taaza baa.nkpan
har daa.ere me.n khilte hu.e phuul kii phaban
aa.nkho.n me.n Dolte hu.e nashshe kii kaifiyat
ruu-e-hasii.n pe ek shikasta sii tamkanat
ho.nTo.n pe an-kahii sii tamannaa kii larzishe.n
baa.nho.n me.n lamha lamha simaTne kii kaavishe.n
siine ke jazr-o-mad me.n samundar saa iztiraab
umDaa hu.aa saa jazba-e-bedaar kaa azaab
KHushbuu tavaaf-e-qaamat-e-zebaa kiye hu.e
shiisha badan kaa azm-e-zuleKHaa liye hu.e
phir yuu.n hu.aa ki chhi.D ga.ii yuusuf kii daastaa.n
phir mai.n thaa aur paakii-e-daaman kaa imtihaa.n
ik saa.np bhii thaa aadam o havvaa ke darmiyaa.n

Himayat Ali Shayar
Nazm

jaane kya hai

jaane kyaa hai maut, kyaa hai zindagii
chalte chalte kaise tham jaatii hai.n tasviire.n tamaam
KHaak ho jaatii hai phir se musht-e-KHaak
gaahe gaahe sang ho jaate hai.n chehro.n ke nuquush
apne apne zaaviye par munjamid
dam-ba-KHud rahte hai.n mahv-e-intizaar

Khursheed Rizvi
Nazm

aaina-KHane ke qaidi se

muKHtalif hai.n aa.iino.n ke zaaviye
ek lekin aks-e-zaat;
ik ikaa.ii par usii kii zarb se
kasrat-e-vahdat kaa paidaa hai tilism
KHalvat-e-aa.iina-KHaana me.n kahii.n ko.ii nahii.n
sirf mai.n!
mai.n hii but
aur mai.n hii but-parast!
mai.n hii bazm-e-zaat me.n raunaq-afroz
jalva-haa-e-zaat ko detaa huu.n daad!

Ameeq Hanafi
Nazm

paris

inhii galiyo.n se thii vaabasta na.ii fikr kii rah
unhii.n galiyo.n me.n ma.aanii ke sabaq milte the
vahshat-e-daur-e-siyaasat pe hu.aa kartii thii bahas
aur qalam ha.nste hu.e zaaviye ban jaate the

Atif tauqeer
Nazm

mulaqat

an-ginat zaaviye afkaar ke le aate hai.n
in khilauno.n se vo az.haan ko bahlaate hai.n
apne kartab pe vo iThlaate hai.n itraate hai.n
aur mauhuum sii taskiin yuu.nhii paate hai.n

Daud Ghazi
Nazm

KHuda ke fazl se huron ke shauhar

ba-zom-e-KHvesh apne daur ke suqraat-e-saanii hai.n
muqaddas log hai.n 'ahmad-razaa-KHaa.n’ kii nishaanii hai.n
Gulaamaan-e-rasuulullaah kii takfiir karte hai.n
hamesha inshiraah-e-sadr se taqriir karte hai.n
zabaan-aavar hai.n lekin zaahida parviin kii lai hai.n
ka.ii naadir kitaabo.n ke musannif hai.n ba.Dii shai hai.n
ra.uunat se jabii.n me.n zohd ke asraar ghulte hai.n
nigaaho.n ke Gazab se sai.nka.Do.n alfaaz khulte hai.n
takabbur zaaviye bantaa hu.aa guftaar kii lau me.n
hazaaro.n KHusruo.n kaa dabdaba raftaar kii ro me.n
zabaan-e-shusta-o-rafta pe nastaaliiq bolii hai
musalle par muraadaabaad ke paano.n kii Dholii hai
ba-zom-e-KHvesh zohd-o-ittiqaa ke biij bote hai.n
KHudaa ke fazl se huuro.n ke shauhar aise hote hai.n

Shorish kashmiri
Nazm

wo bakra phir akela paD gaya hai

vo bakraa phir akelaa pa.D gayaa hai
ki miraa haath bhii Do.nge me.n achchhii boTiyo.n ko Dhuu.nDtaa hai
vahii bakraa
kha.Daa rakkhaa gayaa hai jis ko kone me.n nigaaho.n se chhupaa kar
vo jis kii zindagii hai munhasir is baat par
ki ham khaa.e.nge kitnaa
aur kitnaa chho.D de.nge bas yuu.n hii apnii paleTo.n me.n
abhii kuchh der pahle mai.n kha.Daa thaa paas jis ke
aur jis ke zaaviye se dekh kar mahfil ko
aa.nkhe.n DabDabaa aa.ii thii.n merii
magar vo pal kabhii kaa jaa chukaa thaa
ki ab huu.n mez par mai.n
aur meraa haath bhii Do.nge me.n achchhii boTiyo.n ko Dhuu.nDtaa hai
vo bakraa phir akelaa pa.D gayaa hai

Shariq Kaifi
Nazm

shaffafiyan(2)

tumhaare har amal ko ham
ba.Dii iimaan-daarii se, ba.De insaaf se radd-e-amal de.nge
tumhe.n ye ilm honaa chaahiye
ki aa.nkh ke badle me.n aa.nkh
aur dil ke badle dil hamaaraa zaabta hai
tumhaaraa husn-e-zan hai
soch ke har zaaviye se sochnaa
ki ham jo paanii par kha.De hai.n
kis paziiraa.ii ke qaabil hai.n
magar kuchh bhii karo

Waheed Ahmad
Nazm

ek zanjir-e-girya mere sath thi

mai.n gayaa us taraf
jis taraf nii.nd thii
jis taraf raat thii
band mujh par hu.e saare dar
saare ghar
mai.n gayaa us taraf
jis taraf tiir the
jis taraf ghaat thii
mujh pe markuuz thii ik nigaah-e-siyah
aur ajab zaaviye se
banaa.e hu.e thii mujhe
sar se paa tak hadaf
mai.n gayaa us taraf
jis taraf ret kii lahr thii
mauj-e-zarraat thii
mai.n nahii.n jaantaa
us gha.Dii
tiirgii ke tilismaat me.n
jo ishaara hu.aa
kis kii u.nglii kaa thaa
aur jo kholii ga.ii thii mire qalb par
kaun sii baat thii
sirf itnaa mujhe yaad hai
jab mai.n aage ba.Dhaa
ek zanjiir-e-girya mire saath thii

Rafiq Sandelvi
Nazm

shahr mein

baa.ns kii ko.npalo.n kii tarah raat kii raat ba.Dhtii hu.ii la.Dkiyo
aa.ine ke har ik zaaviye se ulajhtii hu.ii la.Dkiyo
tasht-e-siimaab jhalkaatii jhuktii hu.ii la.Dkiyo
nit-na.e mausamo.n kii tarah mujh pe biitii hu.ii la.Dkiyo
mere hone ko tasliim kar lo to aage ba.Dhii.n
KHvaab-dar-KHvaab bas ek hii KHvaab hai
mere hone kaa KHvaab
bhaagte raasto.n me.n ko.ii sang raftaar-paimaa bataa de
ki mai.n chal rahaa thaa
bhii.D me.n chalte chalte achaanak ko.ii mujh ko kahnii se aage ba.Dhaa de
ki mai.n rahnumaa thaa
ko.ii fan kii devii
surayyaa se utre
mujhe apne andar samo le
ko.ii merii aa.nkho.n me.n chubhte hu.e zarra-e-reg ke vaaste
apne aa.nchal kaa konaa bhigo le
mujhe rishta-e-jism-o-jaa.n me.n piro le
ko.ii bas gha.Dii-do-gha.Dii saath ho le
yaa mujhe qulzum-e-KHud-faraamoshii-e-maavaraa me.n Dubo le
KHvaab-dar-KHvaab bas ek hii KHvaab hai
mere hone kaa KHvaab
saa.nvlii la.Dkiyo champa.ii la.Dkiyo nit-na.ii la.Dkiyo
mere hone ko tasliim kar lo to aage ba.Dhe.n
kaun jaane daraKHto.n ke piichhe na.ii KHushbu.e.n
raaste bhar hamaaraa svaagat kare.n
kaun jaane ki aahaT se Dartii hu.ii fa.Dfa.Daatii hu.ii faaKHtaa.e.n
hamaare suro.n par sipar taan de.n
aur ham sarsaraate hu.e aa.nchalo.n kii hu.aa o.Dh kar so rahe.n
yaa mirii jaan-e-jaa.n
kaun jaane ki aate dino.n me.n kisii roz andhii sa.Dak par
kisii chiiKHte bhuu.nkte kaale kutte se Darte hu.e
ham achaanak kahii.n aa mile.n
ajnabii raasto.n kii taraf chal pa.De.n
zehn me.n KHvaab kaa silsila phailtaa ho
aa.nkh me.n nii.nd kaa zaa.iqa tairtaa ho

Mohammad Anvar Khalid
Nazm

main insan hun

har rang me.n KHuubsuurat
har Dhang me.n be-misaal
tum mujhe rang zaaviye
qad kaaTh se mat maapo
mere dimaaG ke ruu-ba-ruu aa.o
mai.n tumhaare baraabar nahii.n
tum se behtar huu.n
mai.n aurat huu.n

Sania Shaikh
Nazm

ain-ul-yaqin

mai.n ne dukh nahii.n dekhaa
mai.n ne kuchh nahii.n dekhaa
mai.n ne sukh nahii.n dekhaa
mai.n ne kuchh nahii.n dekhaa
duniyaa merii hathelii se baahar kyaa rahii hogii mai.n ne dekhaa
zamiin par shaayad sailaab aayaa thaa
mai.n ne dekhaa ki dhuup chau.nkii
aur bhaag kar daraKHto.n kii choTiyo.n par cha.Dh ga.ii us kaa rang faq thaa
aur us kii umr terah baras se ziyaada na thii
sailaab ne us ke paa.nv chhuu liye use phir bhii yaqiin nahii.n aayaa
jaise kah rahii ho
jaa.o mujhe apne yaqiinii par kabhii yaqiin nahii.n aayaa
be-iimaan aadmii kii tarah
mai.n be-yaqiin huu.n
ye log kahaanii sunaate sunaate ruk jaate hai.n
aur KHaamoshii ko sunaate sunaate ruk jaate hai.n
jaise tiir-e-aarzuu havaa aur parinda chhide hu.e tirchhe zaaviye banaa kar
zan se guzar ga.e ho.n
aur jaise un sab ko ek nazar me.n sab ne dekh liyaa ho
jin samundaro.n par ye parinde gire.nge
vahaa.n bahut shor hogaa
aur log kahaaniyo.n ko amaanat kar ke dariyaa me.n bahaa dete ho.nge
ye log tambaakuu ke patto.n me.n apne dil lapeT kar bo dete ho.nge

Nasreen Anjum Sethi
Nazm

mutazad zawiye

aur bisaat-e-KHayaal be-paayaa.n
aur mu.ayyan huduud-e-sharh-o-bayya.n
tez-raftaar gardish-e-haalaat
aur aahistagii-e-umr ravaa.n
ajnabiyyat kaa mustaqil ik bojh
aur shanaasaa.iyo.n kaa baar-e-giraa.n
aql kii KHaamii naarasii dil kii
aur tasavvur-shikan haqiiqat-e-jaa.n
muKHtalif har vajuud pesh-e-nazar
aur imkaan-e-vahdat-e-imkaa.n
fikr uqdaa-kushaa.iyo.n pe musir
aur sar-rishte hii kaa KHud fuqdaan.n
intihaa silsilo.n kii naa-maaluum
aur har lamha silsila-e-jumbaa.n
mutavaatir maraahil-e-taaliim
aur musalsal madaarij-e-nisyaa.n
shoba-haa-e-KHayaal be-tam.iiz
aur bahr-e-shanaaKHt mohr-o-nishaa.n
chaar jaanib saraahto.n kaa hujuum
aur bahr-e-rumuuz be-paayaa.n
sail-e-bairuu.n ravaa.n ba-tarz-e-digar
aur juu-e-andaruu.n alag sii ravaa.n
ek kho.ii hu.ii fazaa.e-hayaat
aur ehsaas-o-fikr sab Galtaa.n
aur saa.nso.n kii rahguzar pe hujuum
aur aa.nkho.n kii rahguzar viiraa.n

Abdul Ahad Saaz
Nazm

tumhaare baad kya hua

tumhaare baa'd kyaa hu.aa
tumhe.n to kuchh KHabar nahii.n
Gamo.n ne zindagii ke saare zaaviye badal diye
mirii tamaam KHvaahisho.n ke hausle kuchal diye
mirii to saarii 'umr hii isii me.n kaT ke rah ga.ii
udaasiyo.n kii bhii.D me.n
safar kii tez dhuup me.n
KHushii kii ko.ii bazm ho ki Gam kaa silsila kahii.n
mai.n har jagah tumhe.n faqat tumhe.n talaashtaa rahaa
magar na jaane kyaa hu.aa
mai.n thak gayaa
mai.n thak gayaa tumhaare naqsh-e-paa talaashte hu.e
mai.n thak gayaa huu.n is badan me.n jaan Daalte hu.e
ye sochtaa huu.n
zindagii ke bojh ko mai.n ab nahii.n uThaa.uu.ngaa
bhale tumhe.n KHabar na ho
mai.n tum ko bhuul jaa.u.ngaa

Sarmad Khan
Nazm

basarat

tere haatho.n me.n paivast
meKHo.n se bahtaa lahuu
kor aa.nkho.n pe chhi.Dkaa
to palko.n kii chilman se
taa-hadd-e-imkaa.n
basaarat ke har zaaviye par
ajab nuur kii dhaariyaa.n
tah-ba-tah tiirgii kii ravaa chiirtii
an-ginat mish.ale.n
aagahii ke dariicho.n me.n
irfaan ke aa.iino.n me.n
damakne lagii.n

Parveen Fana Syed
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now