Sher on Husn

dekhte haiñ to lahū jaise rageñ toḌtā hai

ham to mar jā.eñge siine se lagā kar us ko

dekhte hain to lahu jaise ragen toDta hai

hum to mar jaenge sine se laga kar us ko

allāh-rī jism-e-yār kī ḳhūbī ki ḳhud-ba-ḳhud

rañgīniyoñ meñ Duub gayā pairahan tamām

allah-ri jism-e-yar ki KHubi ki KHud-ba-KHud

ranginiyon mein Dub gaya pairahan tamam

pūchho na araq ruḳhsāroñ se rañgīnī-e-husn ko baḌhne do

sunte haiñ ki shabnam ke qatre phūloñ ko nikhārā karte haiñ

puchho na araq ruKHsaron se rangini-e-husn ko baDhne do

sunte hain ki shabnam ke qatre phulon ko nikhaara karte hain

zamāna husn nazākat balā jafā shoḳhī

simaT ke aa ga.e sab aap kī adāoñ meñ

zamana husn nazakat bala jafa shoKHi

simaT ke aa gae sab aap ki adaon mein

husn ke har jamāl meñ pinhāñ

merī rānā.i-e-ḳhayāl bhī hai

husn ke har jamal mein pinhan

meri ranai-e-KHayal bhi hai

ye dilbarī ye naaz ye andāz ye jamāl

insāñ kare agar na tirī chaah kyā kare

ye dilbari ye naz ye andaz ye jamal

insan kare agar na teri chah kya kare

husn ko duniyā kī āñkhoñ se na dekh

apnī ik tarz-e-nazar ījād kar

husn ko duniya ki aankhon se na dekh

apni ek tarz-e-nazar ijad kar

jitnā dekho use thaktī nahīñ āñkheñ varna

ḳhatm ho jaatā hai har husn kahānī kī tarah

jitna dekho use thakti nahin aankhen warna

KHatm ho jata hai har husn kahani ki tarah

tafrīq husn-o-ishq ke andāz meñ na ho

lafzoñ meñ farq ho magar āvāz meñ na ho

tafriq husn-o-ishq ke andaz mein na ho

lafzon mein farq ho magar aawaz mein na ho

allāh-re un ke husn kī mojiz-numā.iyāñ

jis baam par vo aa.eñ vahī koh-e-tūr ho

allah-re un ke husn ki mojiz-numaiyan

jis baam par wo aaen wahi koh-e-tur ho

phuul mahkeñge yūñhī chāñd yūñhī chamkegā

tere hote hue manzar ko hasīñ rahnā hai

phul mahkenge yunhi chand yunhi chamkega

tere hote hue manzar ko hasin rahna hai

agar aa jaa.e pahlū meñ 'qamar' vo māh-e-kāmil bhī

do aalam jagmagā uTTheñge dohrī chāñdnī hogī

agar aa jae pahlu mein 'qamar' wo mah-e-kaamil bhi

do aalam jagmaga uTThenge dohri chandni hogi

vo ḳhush-kalām hai aisā ki us ke paas hameñ

tavīl rahnā bhī lagtā hai muḳhtasar rahnā

wo KHush-kalam hai aisa ki us ke pas hamein

tawil rahna bhi lagta hai muKHtasar rahna

kyā husn ne samjhā hai kyā ishq ne jaanā hai

ham ḳhāk-nashīnoñ kī Thokar meñ zamānā hai

kya husn ne samjha hai kya ishq ne jaana hai

hum KHak-nashinon ki Thokar mein zamana hai

raushan jamāl-e-yār se hai anjuman tamām

dahkā huā hai ātish-e-gul se chaman tamām

raushan jamal-e-yar se hai anjuman tamam

dahka hua hai aatish-e-gul se chaman tamam

tere qurbān 'qamar' muñh sar-e-gulzār na khol

sadqe us chāñd sī sūrat pe na ho jaa.e bahār

tere qurban 'qamar' munh sar-e-gulzar na khol

sadqe us chand si surat pe na ho jae bahaar

nigāh barq nahīñ chehra āftāb nahīñ

vo aadmī hai magar dekhne kī taab nahīñ

nigah barq nahin chehra aaftab nahin

wo aadmi hai magar dekhne ki tab nahin

ek hī anjām hai ai dost husn o ishq kā

sham.a bhī bujhtī hai parvānoñ ke jal jaane ke ba.ad

ek hi anjam hai ai dost husn o ishq ka

shama bhi bujhti hai parwanon ke jal jaane ke baad

ik nau-bahār-e-nāz ko taake hai phir nigāh

chehra faroġh-e-mai se gulistāñ kiye hue

ek nau-bahaar-e-naz ko take hai phir nigah

chehra farogh-e-mai se gulistan kiye hue

husn ko sharmsār karnā hī

ishq kā intiqām hotā hai

husn ko sharmsar karna hi

ishq ka intiqam hota hai

koh sañgīn haqā.eq thā jahāñ

husn kā ḳhvāb tarāshā ham ne

koh sangin haqaeq tha jahan

husn ka KHwab tarasha hum ne

tumhārā husn ārā.ish tumhārī sādgī zevar

tumheñ koī zarūrat hī nahīñ banñe sañvarne kī

tumhaara husn aaraish tumhaari sadgi zewar

tumhein koi zarurat hi nahin banne sanwarne ki

abrū ne mizha ne nigah-e-yār ne yaaro

be-rutba kiyā teġh ko ḳhanjar ko sināñ ko

abru ne mizha ne nigah-e-yar ne yaro

be-rutba kiya tegh ko KHanjar ko sinan ko

hai saaya chāñdnī aur chāñd mukhḌā

dupaTTā āsmān-e-āsmāñ hai

hai saya chandni aur chand mukhDa

dupaTTa aasman-e-asman hai

kisī kā yuuñ to huā kaun umr bhar phir bhī

ye husn o ishq to dhokā hai sab magar phir bhī

kisi ka yun to hua kaun umr bhar phir bhi

ye husn o ishq to dhoka hai sab magar phir bhi

shaam bhī thī dhuāñ dhuāñ husn bhī thā udaas udaas

dil ko ka.ī kahāniyāñ yaad sī aa ke rah ga.iiñ

sham bhi thi dhuan dhuan husn bhi tha udas udas

dil ko kai kahaniyan yaad si aa ke rah gain

apne markaz kī taraf mā.il-e-parvāz thā husn

bhūltā hī nahīñ aalam tirī añgḌā.ī kā

apne markaz ki taraf mail-e-parwaz tha husn

bhulta hi nahin aalam teri angDai ka

vo lāla-badan jhiil meñ utrā nahīñ varna

sho.ale mutavātir isī paanī se nikalte

wo lala-badan jhil mein utra nahin warna

shoale mutawatir isi pani se nikalte

husn ke jalve nahīñ muhtāj-e-chashm-e-ārzū

sham.a jaltī hai ijāzat le ke parvāne se kyā

husn ke jalwe nahin muhtaj-e-chashm-e-arzu

shama jalti hai ijazat le ke parwane se kya

terā chehra kitnā suhānā lagtā hai

tere aage chāñd purānā lagtā hai

tera chehra kitna suhana lagta hai

tere aage chand purana lagta hai

chāñd mashriq se nikaltā nahīñ dekhā maiñ ne

tujh ko dekhā hai to tujh sā nahīñ dekhā maiñ ne

chand mashriq se nikalta nahin dekha main ne

tujh ko dekha hai to tujh sa nahin dekha main ne

sūrat to ibtidā se tirī lā-javāb thī

nāz-o-adā ne aur tarah-dār kar diyā

surat to ibtida se teri la-jawab thi

naz-o-ada ne aur tarah-dar kar diya

vaah kyā is gul-badan kā shoḳh hai rañg-e-badan

jāma-e-ābī agar pahnā gulābī ho gayā

wah kya is gul-badan ka shoKH hai rang-e-badan

jama-e-abi agar pahna gulabi ho gaya

hamesha aag ke dariyā meñ ishq kyuuñ utre

kabhī to husn ko ġharq-e-azāb honā thā

hamesha aag ke dariya mein ishq kyun utre

kabhi to husn ko gharq-e-azab hona tha

āstīñ us ne jo kuhnī tak chaḌhā.ī vaqt-e-sub.h

aa rahī saare badan kī be-hijābī haath meñ

aastin us ne jo kuhni tak chaDhai waqt-e-subh

aa rahi sare badan ki be-hijabi hath mein

husn aur ishq kā mazkūr na hove jab tak

mujh ko bhātā nahīñ sunñā kisī afsāne kā

husn aur ishq ka mazkur na howe jab tak

mujh ko bhata nahin sunna kisi afsane ka

charāg chāñd shafaq shaam phuul jhiil sabā

churā.īñ sab ne hī kuchh kuchh shabāhateñ terī

charag chand shafaq sham phul jhil saba

churain sab ne hi kuchh kuchh shabahaten teri

raushnī ke liye dil jalānā paḌā

kaisī zulmat baḌhī tere jaane ke ba.ad

raushni ke liye dil jalana paDa

kaisi zulmat baDhi tere jaane ke baad

achchhī sūrat bhī kyā burī shai hai

jis ne Daalī burī nazar Daalī

achchhi surat bhi kya buri shai hai

jis ne Dali buri nazar Dali

ḳhudā ke Dar se ham tum ko ḳhudā to kah nahīñ sakte

magar lutf-e-ḳhudā qahr-e-ḳhudā shān-e-ḳhudā tum ho

KHuda ke Dar se hum tum ko KHuda to kah nahin sakte

magar lutf-e-KHuda qahr-e-KHuda shan-e-KHuda tum ho

tujh ko shikva hai ki ushshāq ne badnām kiyā

sach to ye hai ki tirā husn hai dushman terā

tujh ko shikwa hai ki ushshaq ne badnam kiya

sach to ye hai ki tera husn hai dushman tera

dekhte haiñ to lahū jaise rageñ toḌtā hai

ham to mar jā.eñge siine se lagā kar us ko

dekhte hain to lahu jaise ragen toDta hai

hum to mar jaenge sine se laga kar us ko

ishq bhī ho hijāb meñ husn bhī ho hijāb meñ

yā to ḳhud āshkār ho yā mujhe āshkār kar

ishq bhi ho hijab mein husn bhi ho hijab mein

ya to KHud aashkar ho ya mujhe aashkar kar

vo nahā kar zulf-e-pechāñ ko jo bikhrāne lage

husn ke dariyā meñ pinhāñ saañp lahrāne lage

wo naha kar zulf-e-pechan ko jo bikhrane lage

husn ke dariya mein pinhan sanp lahrane lage

kaun saanī shahr meñ is mere mah-pāre kā hai

chāñd sī sūrat dupaTTa sar pe yak-tāre kā hai

kaun sani shahr mein is mere mah-pare ka hai

chand si surat dupaTTa sar pe yak-tare ka hai

jis taraf tū hai udhar hoñgī sabhī kī nazreñ

iid ke chāñd kā dīdār bahāna hī sahī

jis taraf tu hai udhar hongi sabhi ki nazren

id ke chand ka didar bahana hi sahi

kis ke chehre se uTh gayā parda

jhilmilā.e charāġh mahfil ke

kis ke chehre se uTh gaya parda

jhilmilae charagh mahfil ke

husn aisā ki zamāne meñ nahīñ jis kī misāl

aur jamāl aisā ki DhūñDā kare har ḳhvāb-o-ḳhayāl

husn aisa ki zamane mein nahin jis ki misal

aur jamal aisa ki DhunDa kare har KHwab-o-KHayal

sitam-navāzī-e-paiham hai ishq kī fitrat

fuzūl husn pe tohmat lagā.ī jaatī hai

sitam-nawazi-e-paiham hai ishq ki fitrat

fuzul husn pe tohmat lagai jati hai

chāñdnī rātoñ meñ chillātā phirā

chāñd sī jis ne vo sūrat dekh lī

chandni raaton mein chillata phira

chand si jis ne wo surat dekh li