Top 20 Deedar Shayari

dekhne ke liye saarā aalam bhī kam

chāhne ke liye ek chehrā bahut

dekhne ke liye sara aalam bhi kam

chahne ke liye ek chehra bahut

bhāñp hī leñge ishāra sar-e-mahfil jo kiyā

tāḌne vaale qayāmat kī nazar rakhte haiñ

bhanp hi lenge ishaara sar-e-mahfil jo kiya

taDne wale qayamat ki nazar rakhte hain

ab vahī karne lage dīdār se aage kī baat

jo kabhī kahte the bas dīdār honā chāhiye

ab wahi karne lage didar se aage ki baat

jo kabhi kahte the bas didar hona chahiye

merī āñkheñ aur dīdār aap kā

yā qayāmat aa ga.ī yā ḳhvāb hai

meri aankhen aur didar aap ka

ya qayamat aa gai ya KHwab hai

janāb ke ruḳh-e-raushan kī diid ho jaatī

to ham siyāh-nasīboñ kī iid ho jaatī

janab ke ruKH-e-raushan ki did ho jati

to hum siyah-nasibon ki id ho jati

dekhā nahīñ vo chāñd sā chehrā ka.ī din se

tārīk nazar aatī hai duniyā ka.ī din se

dekha nahin wo chand sa chehra kai din se

tarik nazar aati hai duniya kai din se

tum apne chāñd taare kahkashāñ chāhe jise denā

mirī āñkhoñ pe apnī diid kī ik shaam likh denā

tum apne chand tare kahkashan chahe jise dena

meri aankhon pe apni did ki ek sham likh dena

zāhir kī aañkh se na tamāshā kare koī

ho dekhnā to dīda-e-dil vā kare koī

zahir ki aankh se na tamasha kare koi

ho dekhna to dida-e-dil wa kare koi

sunā hai hashr meñ har aañkh use be-parda dekhegī

mujhe Dar hai na tauhīn-e-jamāl-e-yār ho jaa.e

suna hai hashr mein har aankh use be-parda dekhegi

mujhe Dar hai na tauhin-e-jamal-e-yar ho jae

dīdār kī talab ke tarīqoñ se be-ḳhabar

dīdār kī talab hai to pahle nigāh maañg

didar ki talab ke tariqon se be-KHabar

didar ki talab hai to pahle nigah mang

āshiq ko dekhte haiñ dupaTTe ko taan kar

dete haiñ ham ko sharbat-e-dīdār chhān kar

aashiq ko dekhte hain dupaTTe ko tan kar

dete hain hum ko sharbat-e-didar chhan kar

kaisī ajiib shart hai dīdār ke liye

āñkheñ jo band hoñ to vo jalva dikhā.ī de

kaisi ajib shart hai didar ke liye

aankhen jo band hon to wo jalwa dikhai de

ab aur der na kar hashr barpā karne meñ

mirī nazar tire dīdār ko tarastī hai

ab aur der na kar hashr barpa karne mein

meri nazar tere didar ko tarasti hai

tirā dīdār ho hasrat bahut hai

chalo ki niiñd bhī aane lagī hai

tera didar ho hasrat bahut hai

chalo ki nind bhi aane lagi hai

mirā jī to āñkhoñ meñ aayā ye sunte

ki dīdār bhī ek din aam hogā

mera ji to aankhon mein aaya ye sunte

ki didar bhi ek din aam hoga

phir kisī ke sāmne chashm-e-tamannā jhuk ga.ī

shauq kī shoḳhī meñ rañg-e-ehtarām aa hī gayā

phir kisi ke samne chashm-e-tamanna jhuk gai

shauq ki shoKHi mein rang-e-ehtaram aa hi gaya

mujhe ko mahrūmi-e-nazāra qubūl

aap jalve na apne aam kareñ

mujhe ko mahrumi-e-nazara qubul

aap jalwe na apne aam karen

kāsa-e-chashm le ke juuñ nargis

ham ne dīdār kī gadā.ī kī

kasa-e-chashm le ke jun nargis

hum ne didar ki gadai ki

fareb-e-jalva kahāñ tak ba-rū-e-kār rahe

naqāb uThāo ki kuchh din zarā bahār rahe

fareb-e-jalwa kahan tak ba-ru-e-kar rahe

naqab uThao ki kuchh din zara bahaar rahe

tirā dīdār ho āñkheñ kisī bhī samt dekheñ

so har chehre meñ ab terī shabāhat chāhiye hai

tera didar ho aankhen kisi bhi samt dekhen

so har chehre mein ab teri shabahat chahiye hai