Sher on Dhoka

vo zahr detā to sab kī nigah meñ aa jaatā

so ye kiyā ki mujhe vaqt pe davā.eñ na diiñ

wo zahr deta to sab ki nigah mein aa jata

so ye kiya ki mujhe waqt pe dawaen na din

tire va.adoñ pe kahāñ tak mirā dil fareb khaa.e

koī aisā kar bahāna mirī aas TuuT jaa.e

tere wadon pe kahan tak mera dil fareb khae

koi aisa kar bahana meri aas TuT jae

tū bhī saada hai kabhī chaal badaltā hī nahīñ

ham bhī saada haiñ isī chaal meñ aa jaate haiñ

tu bhi sada hai kabhi chaal badalta hi nahin

hum bhi sada hain isi chaal mein aa jate hain

zaḳhm lagā kar us kā bhī kuchh haath khulā

maiñ bhī dhokā khā kar kuchh chālāk huā

zaKHm laga kar us ka bhi kuchh hath khula

main bhi dhoka kha kar kuchh chaalak hua

muddat huī ik shaḳhs ne dil toḌ diyā thā

is vāste apnoñ se mohabbat nahīñ karte

muddat hui ek shaKHs ne dil toD diya tha

is waste apnon se mohabbat nahin karte

jo un ma.asūm āñkhoñ ne diye the

vo dhoke aaj tak maiñ khā rahā huuñ

jo un masum aankhon ne diye the

wo dhoke aaj tak main kha raha hun

kisī kā yuuñ to huā kaun umr bhar phir bhī

ye husn o ishq to dhokā hai sab magar phir bhī

kisi ka yun to hua kaun umr bhar phir bhi

ye husn o ishq to dhoka hai sab magar phir bhi

āshiqī meñ bahut zarūrī hai

bevafā.ī kabhī kabhī karnā

aashiqi mein bahut zaruri hai

bewafai kabhi kabhi karna

ham use yaad bahut ā.eñge

jab use bhī koī Thukrā.egā

hum use yaad bahut aaenge

jab use bhi koi Thukraega

fāsla nazroñ kā dhoka bhī to ho saktā hai

vo mile yā na mile haath baḌhā kar dekho

fasla nazron ka dhoka bhi to ho sakta hai

wo mile ya na mile hath baDha kar dekho

aadmī jaan ke khātā hai mohabbat meñ fareb

ḳhud-farebī hī mohabbat kā sila ho jaise

aadmi jaan ke khata hai mohabbat mein fareb

KHud-farebi hi mohabbat ka sila ho jaise

aql kahtī hai dobāra āzmānā jahl hai

dil ye kahtā hai fareb-e-dost khāte jā.iye

aql kahti hai dobara aazmana jahl hai

dil ye kahta hai fareb-e-dost khate jaiye

dhokā thā nigāhoñ kā magar ḳhuub thā dhokā

mujh ko tirī nazroñ meñ mohabbat nazar aa.ī

dhoka tha nigahon ka magar KHub tha dhoka

mujh ko teri nazron mein mohabbat nazar aai

bāġhbāñ ne aag dī jab āshiyāne ko mire

jin pe takiya thā vahī patte havā dene lage

baghban ne aag di jab aashiyane ko mere

jin pe takiya tha wahi patte hawa dene lage

ahbāb ko de rahā huuñ dhokā

chehre pe ḳhushī sajā rahā huuñ

ahbab ko de raha hun dhoka

chehre pe KHushi saja raha hun

ik baras bhī abhī nahīñ guzrā

kitnī jaldī badal ga.e chehre

ek baras bhi abhi nahin guzra

kitni jaldi badal gae chehre

mere ba.ad vafā kā dhokā aur kisī se mat karnā

gaalī degī duniyā tujh ko sar merā jhuk jā.egā

mere baad wafa ka dhoka aur kisi se mat karna

gali degi duniya tujh ko sar mera jhuk jaega

samjhā liyā fareb se mujh ko to aap ne

dil se to pūchh lījiye kyuuñ be-qarār hai

samjha liya fareb se mujh ko to aap ne

dil se to puchh lijiye kyun be-qarar hai

vafāoñ ke badle jafā kar rahe haiñ

maiñ kyā kar rahā huuñ vo kyā kar rahe haiñ

wafaon ke badle jafa kar rahe hain

main kya kar raha hun wo kya kar rahe hain

yaar maiñ itnā bhūkā huuñ

dhokā bhī khā letā huuñ

yar main itna bhuka hun

dhoka bhi kha leta hun

ik safar meñ koī do baar nahīñ luT saktā

ab dobāra tirī chāhat nahīñ kī jā saktī

ek safar mein koi do bar nahin luT sakta

ab dobara teri chahat nahin ki ja sakti

ai mujh ko fareb dene vaale

maiñ tujh pe yaqīn kar chukā huuñ

ai mujh ko fareb dene wale

main tujh pe yaqin kar chuka hun

har-chand e'tibār meñ dhoke bhī haiñ magar

ye to nahīñ kisī pe bharosā kiyā na jaa.e

har-chand e'tibar mein dhoke bhi hain magar

ye to nahin kisi pe bharosa kiya na jae

jin kī ḳhātir shahr bhī chhoḌā jin ke liye badnām hue

aaj vahī ham se begāne begāne se rahte haiñ

jin ki KHatir shahr bhi chhoDa jin ke liye badnam hue

aaj wahi hum se begane begane se rahte hain

kis ne vafā ke naam pe dhokā diyā mujhe

kis se kahūñ ki merā gunahgār kaun hai

kis ne wafa ke nam pe dhoka diya mujhe

kis se kahun ki mera gunahgar kaun hai

aise milā hai ham se shanāsā kabhī na thā

vo yuuñ badal hī jā.egā sochā kabhī na thā

aise mila hai hum se shanasa kabhi na tha

wo yun badal hi jaega socha kabhi na tha

haath chhuḌā kar jaane vaale

maiñ tujh ko apnā samjhā thā

hath chhuDa kar jaane wale

main tujh ko apna samjha tha

dikhā.ī detā hai jo kuchh kahīñ vo ḳhvāb na ho

jo sun rahī huuñ vo dhokā na ho samā.at kā

dikhai deta hai jo kuchh kahin wo KHwab na ho

jo sun rahi hun wo dhoka na ho samaat ka

gin rahā huuñ harf un ke ahd ke

mujh ko dhokā de rahī hai yaad kyā

gin raha hun harf un ke ahd ke

mujh ko dhoka de rahi hai yaad kya

'ḳhālid' maiñ baat baat pe kahtā thā jis ko jaan

vo shaḳhs āḳhirash mujhe be-jān kar gayā

'KHalid' main baat baat pe kahta tha jis ko jaan

wo shaKHs aaKHirash mujhe be-jaan kar gaya

jo baat dil meñ thī us se nahīñ kahī ham ne

vafā ke naam se vo bhī fareb khā jaatā

jo baat dil mein thi us se nahin kahi hum ne

wafa ke nam se wo bhi fareb kha jata

aksar aisā bhī mohabbat meñ huā kartā hai

ki samajh-būjh ke khā jaatā hai dhokā koī

aksar aisa bhi mohabbat mein hua karta hai

ki samajh-bujh ke kha jata hai dhoka koi

chaman ke rañg-o-bū ne is qadar dhokā diyā mujh ko

ki maiñ ne shauq-e-gul-bosī meñ kāñToñ par zabāñ rakh dī

chaman ke rang-o-bu ne is qadar dhoka diya mujh ko

ki main ne shauq-e-gul-bosi mein kanTon par zaban rakh di

mujhī ko parda-e-hastī meñ de rahā hai fareb

vo husn jis ko kiyā jalva-āfrīñ maiñ ne

mujhi ko parda-e-hasti mein de raha hai fareb

wo husn jis ko kiya jalwa-afrin main ne

mirā vajūd haqīqat mirā adam dhokā

fanā kī shakl meñ sar-chashma-e-baqā huuñ maiñ

mera wajud haqiqat mera adam dhoka

fana ki shakl mein sar-chashma-e-baqa hun main

mujhe ab aap ne chhoḌā ki maiñ ne

idhar to dekhiye kis ne daġhā kī

mujhe ab aap ne chhoDa ki main ne

idhar to dekhiye kis ne dagha ki

ajab nahīñ ki ye dariyā nazar kā dhokā ho

ajab nahīñ ki koī rāsta nikal aa.e

ajab nahin ki ye dariya nazar ka dhoka ho

ajab nahin ki koi rasta nikal aae

ye bhī ik dhokā thā nairañg-e-tilism-e-aql kā

apnī hastī par bhī hastī kā huā dhokā mujhe

ye bhi ek dhoka tha nairang-e-tilism-e-aql ka

apni hasti par bhi hasti ka hua dhoka mujhe