Top 20 Khamoshi Shayari

ragoñ meñ zahr-e-ḳhamoshī utarne se zarā pahle

bahut taḌpī koī āvāz marne se zarā pahle

ragon mein zahr-e-KHamoshi utarne se zara pahle

bahut taDpi koi aawaz marne se zara pahle

rañg darkār the ham ko tirī ḳhāmoshī ke

ek āvāz kī tasvīr banānī thī hameñ

rang darkar the hum ko teri KHamoshi ke

ek aawaz ki taswir banani thi hamein

chaTaḳh ke TuuT ga.ī hai to ban ga.ī āvāz

jo mere siine meñ ik roz ḳhāmushī huī thī

chaTaKH ke TuT gai hai to ban gai aawaz

jo mere sine mein ek roz KHamushi hui thi

kitnī lambī ḳhāmoshī se guzrā huuñ

un se kitnā kuchh kahne kī koshish kī

kitni lambi KHamoshi se guzra hun

un se kitna kuchh kahne ki koshish ki

use bechain kar jā.ūñgā maiñ bhī

ḳhamoshī se guzar jā.ūñgā maiñ bhī

use bechain kar jaunga main bhi

KHamoshi se guzar jaunga main bhi

zor qismat pe chal nahīñ saktā

ḳhāmushī iḳhtiyār kartā huuñ

zor qismat pe chal nahin sakta

KHamushi iKHtiyar karta hun

ham ne avval to kabhī us ko pukārā hī nahīñ

aur pukārā to pukārā bhī sadāoñ ke baġhair

hum ne awwal to kabhi us ko pukara hi nahin

aur pukara to pukara bhi sadaon ke baghair

sab hoñge us se apne ta.āruf kī fikr meñ

mujh ko mire sukūt se pahchān jā.egā

sab honge us se apne taaruf ki fikr mein

mujh ko mere sukut se pahchan jaega

mustaqil boltā hī rahtā huuñ

kitnā ḳhāmosh huuñ maiñ andar se

mustaqil bolta hi rahta hun

kitna KHamosh hun main andar se

ham un ko soch meñ gum dekh kar vāpas chale aa.e

vo apne dhyān meñ baiThe hue achchhe lage ham ko

hum un ko soch mein gum dekh kar wapas chale aae

wo apne dhyan mein baiThe hue achchhe lage hum ko

ham laboñ se kah na paa.e un se hāl-e-dil kabhī

aur vo samjhe nahīñ ye ḳhāmushī kyā chiiz hai

hum labon se kah na pae un se haal-e-dil kabhi

aur wo samjhe nahin ye KHamushi kya chiz hai

ek din merī ḳhāmushī ne mujhe

lafz kī oT se ishāra kiyā

ek din meri KHamushi ne mujhe

lafz ki oT se ishaara kiya

ḳhāmushī terī mirī jaan liye letī hai

apnī tasvīr se bāhar tujhe aanā hogā

KHamushi teri meri jaan liye leti hai

apni taswir se bahar tujhe aana hoga

nikāle ga.e is ke ma.anī hazār

ajab chiiz thī ik mirī ḳhāmushī

nikale gae is ke mani hazar

ajab chiz thi ek meri KHamushi

har taraf thī ḳhāmoshī aur aisī ḳhāmoshī

raat apne saa.e se ham bhī Dar ke ro.e the

har taraf thi KHamoshi aur aisi KHamoshi

raat apne sae se hum bhi Dar ke roe the

chup-chāp suntī rahtī hai pahroñ shab-e-firāq

tasvīr-e-yār ko hai mirī guftugū pasand

chup-chap sunti rahti hai pahron shab-e-firaq

taswir-e-yar ko hai meri guftugu pasand

kah rahā hai shor-e-dariyā se samundar kā sukūt

jis kā jitnā zarf hai utnā hī vo ḳhāmosh hai

kah raha hai shor-e-dariya se samundar ka sukut

jis ka jitna zarf hai utna hi wo KHamosh hai

ḳhamoshī se musībat aur bhī sañgīn hotī hai

taḌap ai dil taḌapne se zarā taskīn hotī hai

KHamoshi se musibat aur bhi sangin hoti hai

taDap ai dil taDapne se zara taskin hoti hai

ḳhamosh rahne kī aadat bhī maar detī hai

tumheñ ye zahr to andar se chaaT jā.egā

KHamosh rahne ki aadat bhi mar deti hai

tumhein ye zahr to andar se chaT jaega

asar bhī le rahā huuñ terī chup kā

tujhe qaa.il bhī kartā jā rahā huuñ

asar bhi le raha hun teri chup ka

tujhe qail bhi karta ja raha hun