Sher on Shaam

dalīl-e-tābish-e-īmāñ hai kufr kā ehsās

charāġh shaam se pahle jalā nahīñ karte

dalil-e-tabish-e-iman hai kufr ka ehsas

charagh sham se pahle jala nahin karte

maiñ tamām din kā thakā huā tū tamām shab kā jagā huā

zarā Thahar jā isī moḌ par tere saath shaam guzār luuñ

main tamam din ka thaka hua tu tamam shab ka jaga hua

zara Thahar ja isi moD par tere sath sham guzar lun

bas ek shaam kā har shaam intizār rahā

magar vo shaam kisī shaam bhī nahīñ aa.ī

bas ek sham ka har sham intizar raha

magar wo sham kisi sham bhi nahin aai

na.ī sub.h par nazar hai magar aah ye bhī Dar hai

ye sahar bhī rafta rafta kahīñ shaam tak na pahuñche

nai subh par nazar hai magar aah ye bhi Dar hai

ye sahar bhi rafta rafta kahin sham tak na pahunche

ham duniyā se jab tañg aayā karte haiñ

apne saath ik shaam manāyā karte haiñ

hum duniya se jab tang aaya karte hain

apne sath ek sham manaya karte hain

mujhe har shaam ik sunsān jañgal khīñch letā hai

aur is ke ba.ad phir ḳhūnī balā.eñ raqs kartī haiñ

mujhe har sham ek sunsan jangal khinch leta hai

aur is ke baad phir KHuni balaen raqs karti hain

bas itnī sī baat thī us kī zulf zarā lahrā.ī thī

ḳhauf-zada har shaam kā manzar sahmī sī har raat milī

bas itni si baat thi us ki zulf zara lahrai thi

KHauf-zada har sham ka manzar sahmi si har raat mili

saa.e Dhalne charāg jalne lage

log apne gharoñ ko chalne lage

sae Dhalne charag jalne lage

log apne gharon ko chalne lage

shaam tak sub.h kī nazroñ se utar jaate haiñ

itne samjhautoñ pe jiite haiñ ki mar jaate haiñ

sham tak subh ki nazron se utar jate hain

itne samjhauton pe jite hain ki mar jate hain

asr ke vaqt mere paas na baiTh

mujh pe ik sāñvlī kā saaya hai

asr ke waqt mere pas na baiTh

mujh pe ek sanwli ka saya hai

hotī hai shaam aañkh se aañsū ravāñ hue

ye vaqt qaidiyoñ kī rihā.ī kā vaqt hai

hoti hai sham aankh se aansu rawan hue

ye waqt qaidiyon ki rihai ka waqt hai

tanhā tire mātam meñ nahīñ shām-e-siyah-posh

rahtā hai sadā chaak garebān-e-sahar bhī

tanha tere matam mein nahin sham-e-siyah-posh

rahta hai sada chaak gareban-e-sahar bhi

Dhalegī shaam jahāñ kuchh nazar na aa.egā

phir is ke ba.ad bahut yaad ghar kī aa.egī

Dhalegi sham jahan kuchh nazar na aaega

phir is ke baad bahut yaad ghar ki aaegi

shajar ne pūchhā ki tujh meñ ye kis kī ḳhushbū hai

havā-e-shām-e-alam ne kahā udāsī kī

shajar ne puchha ki tujh mein ye kis ki KHushbu hai

hawa-e-sham-e-alam ne kaha udasi ki

tārīkiyoñ ne ḳhud ko milāyā hai dhuup meñ

saaya jo shaam kā nazar aaya hai dhuup meñ

tarikiyon ne KHud ko milaya hai dhup mein

saya jo sham ka nazar aaya hai dhup mein

na udaas ho na malāl kar kisī baat kā na ḳhayāl kar

ka.ī saal ba.ad mile haiñ ham tere naam aaj kī shaam hai

na udas ho na malal kar kisi baat ka na KHayal kar

kai sal baad mile hain hum tere nam aaj ki sham hai

tum parindoñ se ziyāda to nahīñ ho āzād

shaam hone ko hai ab ghar kī taraf lauT chalo

tum parindon se ziyaada to nahin ho aazad

sham hone ko hai ab ghar ki taraf lauT chalo

sunī añdheroñ kī sugbugāhaT to shaam yādoñ kī kahkashāñ se

chhupe hue māhtāb nikle bujhe hue āftāb nikle

suni andheron ki sugbugahaT to sham yaadon ki kahkashan se

chhupe hue mahtab nikle bujhe hue aaftab nikle

ham bhī ik shaam bahut uljhe hue the ḳhud meñ

ek shaam us ko bhī hālāt ne mohlat nahīñ dī

hum bhi ek sham bahut uljhe hue the KHud mein

ek sham us ko bhi haalat ne mohlat nahin di

us kī āñkhoñ meñ utar jaane ko jī chāhtā hai

shaam hotī hai to ghar jaane ko jī chāhtā hai

us ki aankhon mein utar jaane ko ji chahta hai

sham hoti hai to ghar jaane ko ji chahta hai

vo na aa.egā hameñ ma.alūm thā is shaam bhī

intizār us kā magar kuchh soch kar karte rahe

wo na aaega hamein malum tha is sham bhi

intizar us ka magar kuchh soch kar karte rahe

guzar ga.ī hai magar roz yaad aatī hai

vo ek shaam jise bhūlne kī hasrat hai

guzar gai hai magar roz yaad aati hai

wo ek sham jise bhulne ki hasrat hai

shaam ke tan par sajī jo surma.ī poshāk hai

ham charāġhoñ kī faqat ye raushnī poshāk hai

sham ke tan par saji jo surmai poshak hai

hum charaghon ki faqat ye raushni poshak hai

ghar kī vahshat se laraztā huuñ magar jaane kyuuñ

shaam hotī hai to ghar jaane ko jī chāhtā hai

ghar ki wahshat se larazta hun magar jaane kyun

sham hoti hai to ghar jaane ko ji chahta hai

shaam hone ko hai jalne ko hai sham-e-mahfil

saañs lene kī bhī fursat nahīñ parvāne ko

sham hone ko hai jalne ko hai sham-e-mahfil

sans lene ki bhi fursat nahin parwane ko

kab dhuup chalī shaam Dhalī kis ko ḳhabar hai

ik umr se maiñ apne hī saa.e meñ khaḌā huuñ

kab dhup chali sham Dhali kis ko KHabar hai

ek umr se main apne hi sae mein khaDa hun

kabhī to shaam Dhale apne ghar ga.e hote

kisī kī aañkh meñ rah kar sañvar ga.e hote

kabhi to sham Dhale apne ghar gae hote

kisi ki aankh mein rah kar sanwar gae hote

baiThā huā huuñ lag ke darīche se mahv-e-yās

ye shaam aaj mere barābar udaas hai

baiTha hua hun lag ke dariche se mahw-e-yas

ye sham aaj mere barabar udas hai

tumhāre shahr kā mausam baḌā suhānā lage

maiñ ek shaam churā luuñ agar burā na lage

tumhaare shahr ka mausam baDa suhana lage

main ek sham chura lun agar bura na lage

kabhī to āsmāñ se chāñd utre jaam ho jaa.e

tumhāre naam kī ik ḳhūb-sūrat shaam ho jaa.e

kabhi to aasman se chand utre jam ho jae

tumhaare nam ki ek KHub-surat sham ho jae

shāmeñ kisī ko māñgtī haiñ aaj bhī 'firāq'

go zindagī meñ yuuñ mujhe koī kamī nahīñ

shamen kisi ko mangti hain aaj bhi 'firaq'

go zindagi mein yun mujhe koi kami nahin

shaam hotī hai to lagtā hai koī ruuTh gayā

aur shab us ko manāne meñ guzar jaatī hai

sham hoti hai to lagta hai koi ruTh gaya

aur shab us ko manane mein guzar jati hai

shaam Dhale ye soch ke baiThe ham apnī tasvīr ke paas

saarī ġhazleñ baiThī hoñgī apne apne miir ke paas

sham Dhale ye soch ke baiThe hum apni taswir ke pas

sari ghazlen baiThi hongi apne apne mir ke pas

har ek samt tirī yaad kā dhundalkā hai

tire ḳhayāl kā sūraj utar gayā mujh meñ

har ek samt teri yaad ka dhundalka hai

tere KHayal ka suraj utar gaya mujh mein

shaam hote hī khulī saḌkoñ kī yaad aatī hai

sochtā roz huuñ maiñ ghar se nahīñ niklūñgā

sham hote hi khuli saDkon ki yaad aati hai

sochta roz hun main ghar se nahin niklunga

ab kaun muntazir hai hamāre liye vahāñ

shaam aa ga.ī hai lauT ke ghar jaa.eñ ham to kyā

ab kaun muntazir hai hamare liye wahan

sham aa gai hai lauT ke ghar jaen hum to kya

shaam kī shaam se sargoshī sunī thī ik baar

bas tabhī se tujhe imkān meñ rakkhā huā hai

sham ki sham se sargoshi suni thi ek bar

bas tabhi se tujhe imkan mein rakkha hua hai

ek surūd-e-raushanī nīma-e-shab kā ḳhvāb thā

ek ḳhamosh tīrgī sāneha-āshnā bhī thī

ek surud-e-raushani nima-e-shab ka KHwab tha

ek KHamosh tirgi saneha-ashna bhi thi

ab udaas phirte ho sardiyoñ kī shāmoñ meñ

is tarah to hotā hai is tarah ke kāmoñ meñ

ab udas phirte ho sardiyon ki shamon mein

is tarah to hota hai is tarah ke kaamon mein

yuuñ to har shaam umīdoñ meñ guzar jaatī hai

aaj kuchh baat hai jo shaam pe ronā aayā

yun to har sham umidon mein guzar jati hai

aaj kuchh baat hai jo sham pe rona aaya

kisī parind kī chīḳhoñ ne sang-bārī kī

sukūt-e-shām kā shīsha bikhar gayā mujh meñ

kisi parind ki chiKHon ne sang-bari ki

sukut-e-sham ka shisha bikhar gaya mujh mein

shaam ko aaoge tum achchhā abhī hotī hai shaam

gesuoñ ko khol do sūraj chhupāne ke liye

sham ko aaoge tum achchha abhi hoti hai sham

gesuon ko khol do suraj chhupane ke liye

ham bahut duur nikal aa.e haiñ chalte chalte

ab Thahar jaa.eñ kahīñ shaam ke Dhalte Dhalte

hum bahut dur nikal aae hain chalte chalte

ab Thahar jaen kahin sham ke Dhalte Dhalte

din kisī tarah se kaT jā.egā saḌkoñ pe 'shafaq'

shaam phir aa.egī ham shaam se ghabrā.eñge

din kisi tarah se kaT jaega saDkon pe 'shafaq'

sham phir aaegi hum sham se ghabraenge

shaam bhī thī dhuāñ dhuāñ husn bhī thā udaas udaas

dil ko ka.ī kahāniyāñ yaad sī aa ke rah ga.iiñ

sham bhi thi dhuan dhuan husn bhi tha udas udas

dil ko kai kahaniyan yaad si aa ke rah gain

bhīgī huī ik shaam kī dahlīz pe baiThe

ham dil ke sulagne kā sabab soch rahe haiñ

bhigi hui ek sham ki dahliz pe baiThe

hum dil ke sulagne ka sabab soch rahe hain

hote hī shaam jalne lagā yaad kā alaao

aañsū sunāne dukh kī kahānī nikal paḌe

hote hi sham jalne laga yaad ka alao

aansu sunane dukh ki kahani nikal paDe

ab to chup-chāp shaam aatī hai

pahle chiḌiyoñ ke shor hote the

ab to chup-chap sham aati hai

pahle chiDiyon ke shor hote the

vo kaun thā jo din ke ujāle meñ kho gayā

ye chāñd kis ko DhūñDne niklā hai shaam se

wo kaun tha jo din ke ujale mein kho gaya

ye chand kis ko DhunDne nikla hai sham se

shaam se pahle tirī shaam na hone dūñgā

zindagī maiñ tujhe nākām na hone dūñgā

sham se pahle teri sham na hone dunga

zindagi main tujhe nakaam na hone dunga