اک رات وہ گیا تھا جہاں بات روک کے

اب تک رکا ہوا ہوں وہیں رات روک کے

یہ بے کنار بدن کون پار کر پایا

بہے چلے گئے سب لوگ اس روانی میں

چاند بھی حیران دریا بھی پریشانی میں ہے

عکس کس کا ہے کہ اتنی روشنی پانی میں ہے

ذہن مسلسل قصے سوچیں ہونٹھ مسلسل ذکر کریں

صبح تلک زندہ رہنا ہے کہیں کہانی کم نہ پڑے

محبت پھول بننے پر لگی تھی

پلٹ کر پھر کلی کر لی ہے میں نے

کسی کلی کسی گل میں کسی چمن میں نہیں

وہ رنگ ہے ہی نہیں جو ترے بدن میں نہیں

اس سے ملنے کے لئے جائے تو کیا جائے کوئی

اس نے دروازے پہ آئینہ لگا رکھا ہے

جو عشق چاہتا ہے وہ ہونا نہیں ہے آج

خود کو بحال کرنا ہے کھونا نہیں ہے آج

بڑا وسیع ہے اس کے جمال کا منظر

وہ آئینے میں تو بس مختصر سا رہتا ہے

مرے سارے بدن پر دوریوں کی خاک بکھری ہے

تمہارے ساتھ مل کر خود کو دھونا چاہتا ہوں میں

جب اس کو دیکھتے رہنے سے تھکنے لگتا ہوں

تو اپنے خواب کی پلکیں جھپکنے لگتا ہوں

اسے خبر تھی کہ ہم وصال اور ہجر اک ساتھ چاہتے ہیں

تو اس نے آدھا اجاڑ رکھا ہے اور آدھا بنا دیا ہے

دنیا سے کہو جو اسے کرنا ہے وہ کر لے

اب دل میں مرے وہ علیٰ الاعلان رہے گا

تمام پیکر بدصورتی ہے مرد کی ذات

مجھے یقیں ہے خدا مرد ہو نہیں سکتا

اس جگہ جا کے وہ بیٹھا ہے بھری محفل میں

اب جہاں میرے اشارے بھی نہیں جا سکتے

مٹی کی یہ دیوار کہیں ٹوٹ نہ جائے

روکو کہ مرے خون کی رفتار بہت ہے

کیا بدن ہے کہ ٹھہرتا ہی نہیں آنکھوں میں

بس یہی دیکھتا رہتا ہوں کہ اب کیا ہوگا

کہاں کا عشق ہوس تک بھی ہو نہیں سکتی

یہی رہے گا جو انداز مجرمانہ مرا

میری اک عمر اور اک عہد کی تاریخ رقم ہے جس پر

کیسے روکوں کہ وہ آنسو مری آنکھوں سے گرا جاتا ہے

شستہ زباں شگفتہ بیاں ہونٹھ گلفشاں

ساری ہیں تجھ میں خوبیاں اردو زبان کی

اے صدف سن تجھے پھر یاد دلا دیتا ہوں

میں نے اک چیز تجھے دی تھی گہر کرنے کو

سر سلامت لیے لوٹ آئے گلی سے اس کی

یار نے ہم کو کوئی ڈھنگ کی خدمت نہیں دی

سب کے جیسی نہ بنا زلف کہ ہم سادہ نگاہ

تیرے دھوکے میں کسی اور کے شانے لگ جائیں

سخت سردی میں ٹھٹھرتی ہے بہت روح مری

جسم یار آ کہ بچاری کو سہارا مل جائے

یہ دھڑکتا ہوا دل اس کے حوالے کر دوں

ایک بھی شخص اگر شہر میں زندہ مل جائے

راستہ پانی مانگتا ہے

اپنے پاؤں کا چھالا مار

اب دیکھتا ہوں میں تو وہ اسباب ہی نہیں

لگتا ہے راستے میں کہیں کھل گیا بدن

ایک بار اس نے بلایا تھا تو مصروف تھا میں

جیتے جی پھر کبھی باری ہی نہیں آئی مری

اے خدا میری رگوں میں دوڑ جا

شاخ دل پر اک ہری پتی نکال

پھر سوچ کے یہ صبر کیا اہل ہوس نے

بس ایک مہینہ ہی تو رمضان رہے گا

میں بچھڑوں کو ملانے جا رہا ہوں

چلو دیوار ڈھانے جا رہا ہوں

بچا کے لائیں کسی بھی یتیم بچے کو

اور اس کے ہاتھ سے تخلیق کائنات کریں

پھر تجھے چھو کے دیکھتا ہوں میں

پھر سے قندیل سی جلائی ہے

یہ تیرا میرا جھگڑا ہے دنیا کو بیچ میں کیوں ڈالیں

گھر کے اندر کی باتوں پر غیروں کو گواہ نہیں کرتے

یہ شہر وہ ہے کہ کوئی خوشی تو کیا دیتا

کسی نے دل بھی دکھایا نہیں بہت دن سے

ترے ہونٹوں کے صحرا میں تری آنکھوں کے جنگل میں

جو اب تک پا چکا ہوں اس کو کھونا چاہتا ہوں میں

وہ چاند کہہ کے گیا تھا کہ آج نکلے گا

تو انتظار میں بیٹھا ہوا ہوں شام سے میں

بن نہ پایا ہیر، رانجھا اب بھی رانجھا ہے بہت

دیکھ وارث شاہ تیری ہیر آدھی رہ گئی

پوری طرح سے اب کے تیار ہو کے نکلے

ہم چارہ گر سے ملنے بیمار ہو کے نکلے

ایک بوسے کے بھی نصیب نہ ہوں

ہونٹھ اتنے بھی اب غریب نہ ہوں

لوگ یوں جاتے نظر آتے ہیں مقتل کی طرف

مسئلے جیسے روانہ ہوں کسی حل کی طرف

اسے بچوں کے ہاتھوں سے اٹھاؤ

یہ دنیا اس قدر بھاری نہیں ہے

تبھی وہیں مجھے اس کی ہنسی سنائی پڑی

میں اس کی یاد میں پلکیں بھگونے والا تھا

میں جب کبھی اس سے پوچھتا ہوں کہ یار مرہم کہاں ہے میرا

تو وقت کہتا ہے مسکرا کر جناب تیار ہو رہا ہے

وہ عقل مند کبھی جوش میں نہیں آتا

گلے تو لگتا ہے آغوش میں نہیں آتا

جنگلوں کو کاٹ کر کیسا غضب ہم نے کیا

شہر جیسا ایک آدم خور پیدا کر لیا

دھوپ بولی کہ میں آبائی وطن ہوں تیرا

میں نے پھر سایۂ دیوار کو زحمت نہیں دی

ہمیں جب اپنا تعارف کرانا پڑتا ہے

نہ جانے کتنے دکھوں کو دبانا پڑتا ہے

آنکھ بھر دیکھ لو یہ ویرانہ

آج کل میں یہ شہر ہوتا ہے

وہ جو اک شور سا برپا ہے عمل ہے میرا

یہ جو تنہائی برستی ہے سزا میری ہے