māyūsī-e-ma.āl-e-mohabbat na pūchhiye

apnoñ se pesh aa.e haiñ begānagī se ham

mayusi-e-maal-e-mohabbat na puchhiye

apnon se pesh aae hain beganagi se hum

un kā ġham un kā tasavvur un ke shikve ab kahāñ

ab to ye bāteñ bhī ai dil ho ga.iiñ aa.ī ga.ī

un ka gham un ka tasawwur un ke shikwe ab kahan

ab to ye baaten bhi ai dil ho gain aai gai

vafā-shi.ār ka.ī haiñ koī hasīñ bhī to ho

chalo phir aaj usī bevafā kī baat kareñ

wafa-shiar kai hain koi hasin bhi to ho

chalo phir aaj usi bewafa ki baat karen

hamīñ se rañg-e-gulistāñ hamīñ se rañg-e-bahār

hamīñ ko nazm-e-gulistāñ pe iḳhtiyār nahīñ

hamin se rang-e-gulistan hamin se rang-e-bahaar

hamin ko nazm-e-gulistan pe iKHtiyar nahin

tañg aa chuke haiñ kashmakash-e-zindagī se ham

Thukrā na deñ jahāñ ko kahīñ be-dilī se ham

tang aa chuke hain kashmakash-e-zindagi se hum

Thukra na den jahan ko kahin be-dili se hum

har kūcha sho.ala-zār hai har shahr qatl-gāh

yak-jehtī-e-hayāt ke ādāb kyā hue

har kucha shoala-zar hai har shahr qatl-gah

yak-jehti-e-hayat ke aadab kya hue

jurm-e-ulfat pe hameñ log sazā dete haiñ

kaise nādān haiñ sho.aloñ ko havā dete haiñ

jurm-e-ulfat pe hamein log saza dete hain

kaise nadan hain shoalon ko hawa dete hain

tumhāre ahd-e-vafā ko maiñ ahd kyā samjhūñ

mujhe ḳhud apnī mohabbat pe e'tibār nahīñ

tumhaare ahd-e-wafa ko main ahd kya samjhun

mujhe KHud apni mohabbat pe e'tibar nahin

mujrim huuñ maiñ agar to gunahgār tum bhī ho

ai rahbarān-e-qaum ḳhatā-kār tum bhī ho

mujrim hun main agar to gunahgar tum bhi ho

ai rahbaran-e-qaum KHata-kar tum bhi ho

is tarah nigāheñ mat phero, aisā na ho dhaḌkan ruk jaa.e

siine meñ koī patthar to nahīñ ehsās kā mārā, dil hī to hai

is tarah nigahen mat phero, aisa na ho dhaDkan ruk jae

sine mein koi patthar to nahin ehsas ka mara, dil hi to hai

zulm phir zulm hai baḌhtā hai to miT jaatā hai

ḳhuun phir ḳhuun hai Tapkegā to jam jā.egā

zulm phir zulm hai baDhta hai to miT jata hai

KHun phir KHun hai Tapkega to jam jaega

kaun rotā hai kisī aur kī ḳhātir ai dost

sab ko apnī hī kisī baat pe ronā aayā

kaun rota hai kisi aur ki KHatir ai dost

sab ko apni hi kisi baat pe rona aaya

tum husn kī ḳhud ik duniyā ho shāyad ye tumheñ mālūm nahīñ

mahfil meñ tumhāre aane se har chiiz pe nuur aa jaatā hai

tum husn ki KHud ek duniya ho shayad ye tumhein malum nahin

mahfil mein tumhaare aane se har chiz pe nur aa jata hai

jo mil gayā usī ko muqaddar samajh liyā

jo kho gayā maiñ us ko bhulātā chalā gayā

jo mil gaya usi ko muqaddar samajh liya

jo kho gaya main us ko bhulata chala gaya

be piye hī sharāb se nafrat

ye jahālat nahīñ to phir kyā hai

be piye hi sharab se nafrat

ye jahaalat nahin to phir kya hai

aap daulat ke tarāzū meñ diloñ ko tauleñ

ham mohabbat se mohabbat kā sila dete haiñ

aap daulat ke taraazu mein dilon ko taulen

hum mohabbat se mohabbat ka sila dete hain

jang to ḳhud hī ek mas.ala hai

jang kyā mas.aloñ kā hal degī

jang to KHud hi ek masala hai

jang kya masalon ka hal degi

ham ġham-zada haiñ laa.eñ kahāñ se ḳhushī ke giit

deñge vahī jo pā.eñge is zindagī se ham

hum gham-zada hain laen kahan se KHushi ke git

denge wahi jo paenge is zindagi se hum

ye maanā maiñ kisī qābil nahīñ huuñ in nigāhoñ meñ

burā kyā hai agar ye dukh ye hairānī mujhe de do

ye mana main kisi qabil nahin hun in nigahon mein

bura kya hai agar ye dukh ye hairani mujhe de do

mirī nadīm mohabbat kī rif.atoñ se na gir

buland bām-e-haram hī nahīñ kuchh aur bhī hai

meri nadim mohabbat ki rifaton se na gir

buland baam-e-haram hi nahin kuchh aur bhi hai

maanā ki is zamīñ ko na gulzār kar sake

kuchh ḳhaar kam to kar ga.e guzre jidhar se ham

mana ki is zamin ko na gulzar kar sake

kuchh KHar kam to kar gae guzre jidhar se hum

yūñhī dil ne chāhā thā ronā-rulānā

tirī yaad to ban ga.ī ik bahānā

yunhi dil ne chaha tha rona-rulana

teri yaad to ban gai ek bahana

dil ke muāmale meñ natīje kī fikr kyā

aage hai ishq jurm-o-sazā ke maqām se

dil ke muamale mein natije ki fikr kya

aage hai ishq jurm-o-saza ke maqam se

nālāñ huuñ maiñ bedārī-e-ehsās ke hāthoñ

duniyā mire afkār kī duniyā nahīñ hotī

nalan hun main bedari-e-ehsas ke hathon

duniya mere afkar ki duniya nahin hoti

āñkheñ hī milātī haiñ zamāne meñ diloñ ko

anjān haiñ ham tum agar anjān haiñ āñkheñ

aankhen hi milati hain zamane mein dilon ko

anjaan hain hum tum agar anjaan hain aankhen

apnī tabāhiyoñ kā mujhe koī ġham nahīñ

tum ne kisī ke saath mohabbat nibhā to dī

apni tabahiyon ka mujhe koi gham nahin

tum ne kisi ke sath mohabbat nibha to di

tarab-zāroñ pe kyā guzrī sanam-ḳhānoñ pe kyā guzrī

dil-e-zinda mire marhūm armānoñ pe kyā guzrī

tarab-zaron pe kya guzri sanam-KHanon pe kya guzri

dil-e-zinda mere marhum armanon pe kya guzri

bahut ghuTan hai koī sūrat-e-bayāñ nikle

agar sadā na uThe kam se kam fuġhāñ nikle

bahut ghuTan hai koi surat-e-bayan nikle

agar sada na uThe kam se kam fughan nikle

tum ne sirf chāhā hai ham ne chhū ke dekhe haiñ

pairahan ghaTāoñ ke jism barq-pāroñ ke

tum ne sirf chaha hai hum ne chhu ke dekhe hain

pairahan ghaTaon ke jism barq-paron ke

hazār barq gire laakh āñdhiyāñ uTTheñ

vo phuul khil ke raheñge jo khilne vaale haiñ

hazar barq gire lakh aandhiyan uTThen

wo phul khil ke rahenge jo khilne wale hain

añdherī shab meñ bhī tāmīr-e-āshiyāñ na ruke

nahīñ charāġh to kyā barq to chamaktī hai

andheri shab mein bhi tamir-e-ashiyan na ruke

nahin charagh to kya barq to chamakti hai

ab aa.eñ yā na aa.eñ idhar pūchhte chalo

kyā chāhtī hai un kī nazar pūchhte chalo

ab aaen ya na aaen idhar puchhte chalo

kya chahti hai un ki nazar puchhte chalo

abhī na chheḌ mohabbat ke giit ai mutrib

abhī hayāt kā māhaul ḳhush-gavār nahīñ

abhi na chheD mohabbat ke git ai mutrib

abhi hayat ka mahaul KHush-gawar nahin

ham jurm-e-mohabbat kī sazā pā.eñge tanhā

jo tujh se huī ho vo ḳhatā saath liye jā

hum jurm-e-mohabbat ki saza paenge tanha

jo tujh se hui ho wo KHata sath liye ja

are o āsmāñ vaale batā is meñ burā kyā hai

ḳhushī ke chaar jhoñke gar idhar se bhī guzar jaa.eñ

are o aasman wale bata is mein bura kya hai

KHushi ke chaar jhonke gar idhar se bhi guzar jaen

tū mujhe chhoḌ ke Thukrā ke bhī jā saktī hai

tere hāthoñ meñ mire haath haiñ zanjīr nahīñ

tu mujhe chhoD ke Thukra ke bhi ja sakti hai

tere hathon mein mere hath hain zanjir nahin

rañgoñ meñ terā aks Dhalā tū na Dhal sakī

sāñsoñ kī aañch jism kī ḳhushbū na Dhal sakī

rangon mein tera aks Dhala tu na Dhal saki

sanson ki aanch jism ki KHushbu na Dhal saki

udhar bhī ḳhaak uḌī hai idhar bhī ḳhaak uḌī

jahāñ jahāñ se bahāroñ ke kārvāñ nikle

udhar bhi KHak uDi hai idhar bhi KHak uDi

jahan jahan se bahaaron ke karwan nikle

tum mere liye ab koī ilzām na DhūñDo

chāhā thā tumheñ ik yahī ilzām bahut hai

tum mere liye ab koi ilzam na DhunDo

chaha tha tumhein ek yahi ilzam bahut hai

maiñ jise pyaar kā andāz samajh baiThā huuñ

vo tabassum vo takallum tirī aadat hī na ho

main jise pyar ka andaz samajh baiTha hun

wo tabassum wo takallum teri aadat hi na ho

ham amn chāhte haiñ magar zulm ke ḳhilāf

gar jañg lāzmī hai to phir jañg hī sahī

hum amn chahte hain magar zulm ke KHilaf

gar jang lazmi hai to phir jang hi sahi

vo dil jo maiñ ne māñgā thā magar ġhairoñ ne paayā hai

baḌī shai hai agar us kī pashemānī mujhe de do

wo dil jo main ne manga tha magar ghairon ne paya hai

baDi shai hai agar us ki pashemani mujhe de do

bas ab to dāman-e-dil chhoḌ do bekār ummīdo

bahut dukh sah liye maiñ ne bahut din jī liyā maiñ ne

bas ab to daman-e-dil chhoD do bekar ummido

bahut dukh sah liye main ne bahut din ji liya main ne

ḳhuun apnā ho yā parāyā ho

nasl-e-ādam kā ḳhuun hai āḳhir

KHun apna ho ya paraya ho

nasl-e-adam ka KHun hai aaKHir

le de ke apne paas faqat ik nazar to hai

kyuuñ dekheñ zindagī ko kisī kī nazar se ham

le de ke apne pas faqat ek nazar to hai

kyun dekhen zindagi ko kisi ki nazar se hum

ham se agar hai tark-e-ta.alluq to kyā huā

yaaro koī to un kī ḳhabar pūchhte chalo

hum se agar hai tark-e-talluq to kya hua

yaro koi to un ki KHabar puchhte chalo

vaise to tumhīñ ne mujhe barbād kiyā hai

ilzām kisī aur ke sar jaa.e to achchhā

waise to tumhin ne mujhe barbaad kiya hai

ilzam kisi aur ke sar jae to achchha

is tarah zindagī ne diyā hai hamārā saath

jaise koī nibāh rahā ho raqīb se

is tarah zindagi ne diya hai hamara sath

jaise koi nibah raha ho raqib se

miltī hai zindagī meñ mohabbat kabhī kabhī

hotī hai dilbaroñ kī ināyat kabhī kabhī

milti hai zindagi mein mohabbat kabhi kabhi

hoti hai dilbaron ki inayat kabhi kabhi

barbādiyoñ kā sog manānā fuzūl thā

barbādiyoñ kā jashn manātā chalā gayā

barbaadiyon ka sog manana fuzul tha

barbaadiyon ka jashn manata chala gaya