ranjish hī sahī dil hī dukhāne ke liye aa

aa phir se mujhe chhoḌ ke jaane ke liye aa

ranjish hi sahi dil hi dukhane ke liye aa

aa phir se mujhe chhoD ke jaane ke liye aa

ab ke ham bichhḌe to shāyad kabhī ḳhvāboñ meñ mileñ

jis tarah sūkhe hue phuul kitāboñ meñ mileñ

ab ke hum bichhDe to shayad kabhi KHwabon mein milen

jis tarah sukhe hue phul kitabon mein milen

huā hai tujh se bichhaḌne ke baa'd ye mā'lūm

ki tū nahīñ thā tire saath ek duniyā thī

hua hai tujh se bichhaDne ke ba'd ye ma'lum

ki tu nahin tha tere sath ek duniya thi

kis kis ko batā.eñge judā.ī kā sabab ham

tū mujh se ḳhafā hai to zamāne ke liye aa

kis kis ko bataenge judai ka sabab hum

tu mujh se KHafa hai to zamane ke liye aa

kisī ko ghar se nikalte hī mil ga.ī manzil

koī hamārī tarah umr bhar safar meñ rahā

kisi ko ghar se nikalte hi mil gai manzil

koi hamari tarah umr bhar safar mein raha

tum takalluf ko bhī iḳhlās samajhte ho 'farāz'

dost hotā nahīñ har haath milāne vaalā

tum takalluf ko bhi iKHlas samajhte ho 'faraaz'

dost hota nahin har hath milane wala

dil ko tirī chāhat pe bharosa bhī bahut hai

aur tujh se bichhaḌ jaane kā Dar bhī nahīñ jaatā

dil ko teri chahat pe bharosa bhi bahut hai

aur tujh se bichhaD jaane ka Dar bhi nahin jata

aaj ik aur baras biit gayā us ke baġhair

jis ke hote hue hote the zamāne mere

aaj ek aur baras bit gaya us ke baghair

jis ke hote hue hote the zamane mere

aañkh se duur na ho dil se utar jā.egā

vaqt kā kyā hai guzartā hai guzar jā.egā

aankh se dur na ho dil se utar jaega

waqt ka kya hai guzarta hai guzar jaega

zindagī se yahī gila hai mujhe

tū bahut der se milā hai mujhe

zindagi se yahi gila hai mujhe

tu bahut der se mila hai mujhe

us ko judā hue bhī zamāna bahut huā

ab kyā kaheñ ye qissa purānā bahut huā

us ko juda hue bhi zamana bahut hua

ab kya kahen ye qissa purana bahut hua

is se pahle ki be-vafā ho jaa.eñ

kyuuñ na ai dost ham judā ho jaa.eñ

is se pahle ki be-wafa ho jaen

kyun na ai dost hum juda ho jaen

agar tumhārī anā hī kā hai savāl to phir

chalo maiñ haath baḌhātā huuñ dostī ke liye

agar tumhaari ana hi ka hai sawal to phir

chalo main hath baDhata hun dosti ke liye

ham ko achchhā nahīñ lagtā koī hamnām tirā

koī tujh sā ho to phir naam bhī tujh sā rakkhe

hum ko achchha nahin lagta koi hamnam tera

koi tujh sa ho to phir nam bhi tujh sa rakkhe

aur 'farāz' chāhiyeñ kitnī mohabbateñ tujhe

maaoñ ne tere naam par bachchoñ kā naam rakh diyā

aur 'faraaz' chahiyen kitni mohabbaten tujhe

maon ne tere nam par bachchon ka nam rakh diya

is zindagī meñ itnī farāġhat kise nasīb

itnā na yaad aa ki tujhe bhuul jaa.eñ ham

is zindagi mein itni faraghat kise nasib

itna na yaad aa ki tujhe bhul jaen hum

DhūñD ujḌe hue logoñ meñ vafā ke motī

ye ḳhazāne tujhe mumkin hai ḳharāboñ meñ mileñ

DhunD ujDe hue logon mein wafa ke moti

ye KHazane tujhe mumkin hai KHarabon mein milen

dil bhī pāgal hai ki us shaḳhs se vābasta hai

jo kisī aur kā hone de na apnā rakkhe

dil bhi pagal hai ki us shaKHs se wabasta hai

jo kisi aur ka hone de na apna rakkhe

kuchh is tarah se guzārī hai zindagī jaise

tamām umr kisī dūsre ke ghar meñ rahā

kuchh is tarah se guzari hai zindagi jaise

tamam umr kisi dusre ke ghar mein raha

qurbateñ laakh ḳhūb-sūrat hoñ

dūriyoñ meñ bhī dilkashī hai abhī

qurbaten lakh KHub-surat hon

duriyon mein bhi dilkashi hai abhi

āshiqī meñ 'mīr' jaise ḳhvāb mat dekhā karo

bāvle ho jāoge mahtāb mat dekhā karo

aashiqi mein 'mir' jaise KHwab mat dekha karo

bawle ho jaoge mahtab mat dekha karo

terī bāteñ hī sunāne aa.e

dost bhī dil hī dukhāne aa.e

teri baaten hi sunane aae

dost bhi dil hi dukhane aae

tū mohabbat se koī chaal to chal

haar jaane kā hausla hai mujhe

tu mohabbat se koi chaal to chal

haar jaane ka hausla hai mujhe

bandagī ham ne chhoḌ dī hai 'farāz'

kyā kareñ log jab ḳhudā ho jaa.eñ

bandagi hum ne chhoD di hai 'faraaz'

kya karen log jab KHuda ho jaen

chalā thā zikr zamāne kī bevafā.ī kā

so aa gayā hai tumhārā ḳhayāl vaise hī

chala tha zikr zamane ki bewafai ka

so aa gaya hai tumhaara KHayal waise hi

ab aur kyā kisī se marāsim baḌhā.eñ ham

ye bhī bahut hai tujh ko agar bhuul jaa.eñ ham

ab aur kya kisi se marasim baDhaen hum

ye bhi bahut hai tujh ko agar bhul jaen hum

sunā hai us ke badan kī tarāsh aisī hai

ki phuul apnī qabā.eñ katar ke dekhte haiñ

suna hai us ke badan ki tarash aisi hai

ki phul apni qabaen katar ke dekhte hain

ab tak dil-e-ḳhush-fahm ko tujh se haiñ umīdeñ

ye āḳhirī sham.eñ bhī bujhāne ke liye aa

ab tak dil-e-KHush-fahm ko tujh se hain umiden

ye aaKHiri shamen bhi bujhane ke liye aa

maiñ kyā karūñ mire qātil na chāhne par bhī

tire liye mire dil se duā nikaltī hai

main kya karun mere qatil na chahne par bhi

tere liye mere dil se dua nikalti hai

kitnā āsāñ thā tire hijr meñ marnā jānāñ

phir bhī ik umr lagī jaan se jaate jaate

kitna aasan tha tere hijr mein marna jaanan

phir bhi ek umr lagi jaan se jate jate

is qadar musalsal thiiñ shiddateñ judā.ī kī

aaj pahlī baar us se maiñ ne bevafā.ī kī

is qadar musalsal thin shiddaten judai ki

aaj pahli bar us se main ne bewafai ki

na manziloñ ko na ham rahguzar ko dekhte haiñ

ajab safar hai ki bas ham-safar ko dekhte haiñ

na manzilon ko na hum rahguzar ko dekhte hain

ajab safar hai ki bas ham-safar ko dekhte hain

ab dil kī tamannā hai to ai kaash yahī ho

aañsū kī jagah aañkh se hasrat nikal aa.e

ab dil ki tamanna hai to ai kash yahi ho

aansu ki jagah aankh se hasrat nikal aae

ġham-e-duniyā bhī ġham-e-yār meñ shāmil kar lo

nashsha baḌhtā hai sharābeñ jo sharāboñ meñ mileñ

gham-e-duniya bhi gham-e-yar mein shamil kar lo

nashsha baDhta hai sharaben jo sharabon mein milen

guftugū achchhī lagī zauq-e-nazar achchhā lagā

muddatoñ ke baad koī ham-safar achchhā lagā

guftugu achchhi lagi zauq-e-nazar achchha laga

muddaton ke baad koi ham-safar achchha laga

so dekh kar tire ruḳhsār o lab yaqīñ aayā

ki phuul khilte haiñ gulzār ke alāva bhī

so dekh kar tere ruKHsar o lab yaqin aaya

ki phul khilte hain gulzar ke alawa bhi

na shab o roz hī badle haiñ na haal achchhā hai

kis barhaman ne kahā thā ki ye saal achchhā hai

na shab o roz hi badle hain na haal achchha hai

kis barhaman ne kaha tha ki ye sal achchha hai

ab tire zikr pe ham baat badal dete haiñ

kitnī raġhbat thī tire naam se pahle pahle

ab tere zikr pe hum baat badal dete hain

kitni raghbat thi tere nam se pahle pahle

ye kin nazroñ se tū ne aaj dekhā

ki terā dekhnā dekhā na jaa.e

ye kin nazron se tu ne aaj dekha

ki tera dekhna dekha na jae

ham-safar chāhiye hujūm nahīñ

ik musāfir bhī qāfila hai mujhe

ham-safar chahiye hujum nahin

ek musafir bhi qafila hai mujhe

dost ban kar bhī nahīñ saath nibhāne vaalā

vahī andāz hai zālim kā zamāne vaalā

dost ban kar bhi nahin sath nibhane wala

wahi andaz hai zalim ka zamane wala

mujh se bichhaḌ ke tū bhī to ro.egā umr bhar

ye soch le ki maiñ bhī tirī ḳhvāhishoñ meñ huuñ

mujh se bichhaD ke tu bhi to roega umr bhar

ye soch le ki main bhi teri KHwahishon mein hun

yaad aa.ī hai to phir TuuT ke yaad aa.ī hai

koī guzrī huī manzil koī bhūlī huī dost

yaad aai hai to phir TuT ke yaad aai hai

koi guzri hui manzil koi bhuli hui dost

umr bhar kaun nibhātā hai ta.alluq itnā

ai mirī jaan ke dushman tujhe allāh rakkhe

umr bhar kaun nibhata hai talluq itna

ai meri jaan ke dushman tujhe allah rakkhe

kisī bevafā kī ḳhātir ye junūñ 'farāz' kab tak

jo tumheñ bhulā chukā hai use tum bhī bhuul jaao

kisi bewafa ki KHatir ye junun 'faraaz' kab tak

jo tumhein bhula chuka hai use tum bhi bhul jao

shahr-vāloñ kī mohabbat kā maiñ qaa.el huuñ magar

maiñ ne jis haath ko chūmā vahī ḳhanjar niklā

shahr-walon ki mohabbat ka main qael hun magar

main ne jis hath ko chuma wahi KHanjar nikla

sab ḳhvāhisheñ puurī hoñ 'farāz' aisā nahīñ hai

jaise ka.ī ash.ār mukammal nahīñ hote

sab KHwahishen puri hon 'faraaz' aisa nahin hai

jaise kai ashaar mukammal nahin hote

bharī bahār meñ ik shāḳh par khilā hai gulāb

ki jaise tū ne hathelī pe gaal rakkhā hai

bhari bahaar mein ek shaKH par khila hai gulab

ki jaise tu ne hatheli pe gal rakkha hai

silvaTeñ haiñ mire chehre pe to hairat kyuuñ hai

zindagī ne mujhe kuchh tum se ziyāda pahnā

silwaTen hain mere chehre pe to hairat kyun hai

zindagi ne mujhe kuchh tum se ziyaada pahna

lo phir tire laboñ pe usī bevafā kā zikr

ahmad 'farāz' tujh se kahā na bahut huā

lo phir tere labon pe usi bewafa ka zikr

ahmad 'faraaz' tujh se kaha na bahut hua