dil-girafta hī sahī bazm sajā lī jaa.e

yād-e-jānāñ se koī shaam na ḳhālī jaa.e

dil-girafta hi sahi bazm saja li jae

yaad-e-jaanan se koi sham na KHali jae

ye dil kā dard to umroñ kā rog hai pyāre

so jaa.e bhī to pahr do pahr ko jaatā hai

ye dil ka dard to umron ka rog hai pyare

so jae bhi to pahr do pahr ko jata hai

sāmne umr paḌī hai shab-e-tanhā.ī kī

vo mujhe chhoḌ gayā shaam se pahle pahle

samne umr paDi hai shab-e-tanhai ki

wo mujhe chhoD gaya sham se pahle pahle

maiñ bhī palkoñ pe sajā lūñgā lahū kī būñdeñ

tum bhī pā-basta-e-zanjīr-e-hinā ho jaanā

main bhi palkon pe saja lunga lahu ki bunden

tum bhi pa-basta-e-zanjir-e-hina ho jaana

sunā hai us ke badan kī tarāsh aisī hai

ki phuul apnī qabā.eñ katar ke dekhte haiñ

suna hai us ke badan ki tarash aisi hai

ki phul apni qabaen katar ke dekhte hain

ab zamīñ par koī gautam na mohammad na masīh

āsmānoñ se na.e log utāre jaa.eñ

ab zamin par koi gautam na mohammad na masih

aasmanon se nae log utare jaen

aaj ham daar pe khīñche ga.e jin bātoñ par

kyā ajab kal vo zamāne ko nisāboñ meñ mileñ

aaj hum dar pe khinche gae jin baaton par

kya ajab kal wo zamane ko nisabon mein milen

aur 'farāz' chāhiyeñ kitnī mohabbateñ tujhe

maaoñ ne tere naam par bachchoñ kā naam rakh diyā

aur 'faraaz' chahiyen kitni mohabbaten tujhe

maon ne tere nam par bachchon ka nam rakh diya

guftugū achchhī lagī zauq-e-nazar achchhā lagā

muddatoñ ke baad koī ham-safar achchhā lagā

guftugu achchhi lagi zauq-e-nazar achchha laga

muddaton ke baad koi ham-safar achchha laga

silvaTeñ haiñ mire chehre pe to hairat kyuuñ hai

zindagī ne mujhe kuchh tum se ziyāda pahnā

silwaTen hain mere chehre pe to hairat kyun hai

zindagi ne mujhe kuchh tum se ziyaada pahna

lo phir tire laboñ pe usī bevafā kā zikr

ahmad 'farāz' tujh se kahā na bahut huā

lo phir tere labon pe usi bewafa ka zikr

ahmad 'faraaz' tujh se kaha na bahut hua

yaad aa.ī hai to phir TuuT ke yaad aa.ī hai

koī guzrī huī manzil koī bhūlī huī dost

yaad aai hai to phir TuT ke yaad aai hai

koi guzri hui manzil koi bhuli hui dost

is ahd-e-zulm meñ maiñ bhī sharīk huuñ jaise

mirā sukūt mujhe saḳht mujrimāna lagā

is ahd-e-zulm mein main bhi sharik hun jaise

mera sukut mujhe saKHt mujrimana laga

hujūm aisā ki rāheñ nazar nahīñ ātīñ

nasīb aisā ki ab tak to qāfila na huā

hujum aisa ki rahen nazar nahin aatin

nasib aisa ki ab tak to qafila na hua

zindagī par is se baḌh kar tanz kyā hogā 'farāz'

us kā ye kahnā ki tū shā.er hai dīvāna nahīñ

zindagi par is se baDh kar tanz kya hoga 'faraaz'

us ka ye kahna ki tu shaer hai diwana nahin

us ko judā hue bhī zamāna bahut huā

ab kyā kaheñ ye qissa purānā bahut huā

us ko juda hue bhi zamana bahut hua

ab kya kahen ye qissa purana bahut hua

sunā hai us ke shabistāñ se muttasil hai bahisht

makīñ udhar ke bhī jalve idhar ke dekhte haiñ

suna hai us ke shabistan se muttasil hai bahisht

makin udhar ke bhi jalwe idhar ke dekhte hain

bharī bahār meñ ik shāḳh par khilā hai gulāb

ki jaise tū ne hathelī pe gaal rakkhā hai

bhari bahaar mein ek shaKH par khila hai gulab

ki jaise tu ne hatheli pe gal rakkha hai

shahr-vāloñ kī mohabbat kā maiñ qaa.el huuñ magar

maiñ ne jis haath ko chūmā vahī ḳhanjar niklā

shahr-walon ki mohabbat ka main qael hun magar

main ne jis hath ko chuma wahi KHanjar nikla

shā.irī taaza zamānoñ kī hai me.amār 'farāz'

ye bhī ik silsila-e-kun-fayakūñ hai yuuñ hai

shairi taza zamanon ki hai meamar 'faraaz'

ye bhi ek silsila-e-kun-fayakun hai yun hai

is zindagī meñ itnī farāġhat kise nasīb

itnā na yaad aa ki tujhe bhuul jaa.eñ ham

is zindagi mein itni faraghat kise nasib

itna na yaad aa ki tujhe bhul jaen hum

raat kyā so.e ki baaqī umr kī niiñd uḌ ga.ī

ḳhvāb kyā dekhā ki dhaḌkā lag gayā tābīr kā

raat kya soe ki baqi umr ki nind uD gai

KHwab kya dekha ki dhaDka lag gaya tabir ka

raat bhar hañste hue tāroñ ne

un ke aariz bhī bhigo.e hoñge

raat bhar hanste hue taron ne

un ke aariz bhi bhigoe honge

is se baḌh kar koī in.ām-e-hunar kyā hai 'farāz'

apne hī ahd meñ ek shaḳhs fasāna ban jaa.e

is se baDh kar koi inam-e-hunar kya hai 'faraaz'

apne hi ahd mein ek shaKHs fasana ban jae

ab tak dil-e-ḳhush-fahm ko tujh se haiñ umīdeñ

ye āḳhirī sham.eñ bhī bujhāne ke liye aa

ab tak dil-e-KHush-fahm ko tujh se hain umiden

ye aaKHiri shamen bhi bujhane ke liye aa

kitne nādāñ haiñ tire bhūlne vaale ki tujhe

yaad karne ke liye umr paḌī ho jaise

kitne nadan hain tere bhulne wale ki tujhe

yaad karne ke liye umr paDi ho jaise

ruke to gardisheñ us kā tavāf kartī haiñ

chale to us ko zamāne Thahar ke dekhte haiñ

ruke to gardishen us ka tawaf karti hain

chale to us ko zamane Thahar ke dekhte hain

aaj ik aur baras biit gayā us ke baġhair

jis ke hote hue hote the zamāne mere

aaj ek aur baras bit gaya us ke baghair

jis ke hote hue hote the zamane mere

ye shahr mere liye ajnabī na thā lekin

tumhāre saath badaltī ga.iiñ fazā.eñ bhī

ye shahr mere liye ajnabi na tha lekin

tumhaare sath badalti gain fazaen bhi

do ghaḌī us se raho duur to yuuñ lagtā hai

jis tarah sāya-e-dīvār se dīvār judā

do ghaDi us se raho dur to yun lagta hai

jis tarah saya-e-diwar se diwar juda

ham ko achchhā nahīñ lagtā koī hamnām tirā

koī tujh sā ho to phir naam bhī tujh sā rakkhe

hum ko achchha nahin lagta koi hamnam tera

koi tujh sa ho to phir nam bhi tujh sa rakkhe

maiñ raat TuuT ke royā to chain se soyā

ki dil kā zahr mirī chashm-e-tar se niklā thā

main raat TuT ke roya to chain se soya

ki dil ka zahr meri chashm-e-tar se nikla tha

terī bāteñ hī sunāne aa.e

dost bhī dil hī dukhāne aa.e

teri baaten hi sunane aae

dost bhi dil hi dukhane aae

so dekh kar tire ruḳhsār o lab yaqīñ aayā

ki phuul khilte haiñ gulzār ke alāva bhī

so dekh kar tere ruKHsar o lab yaqin aaya

ki phul khilte hain gulzar ke alawa bhi

fazā udaas hai rut muzmahil hai maiñ chup huuñ

jo ho sake to chalā aa kisī kī ḳhātir tū

faza udas hai rut muzmahil hai main chup hun

jo ho sake to chala aa kisi ki KHatir tu

kuchh is tarah se guzārī hai zindagī jaise

tamām umr kisī dūsre ke ghar meñ rahā

kuchh is tarah se guzari hai zindagi jaise

tamam umr kisi dusre ke ghar mein raha

chalā thā zikr zamāne kī bevafā.ī kā

so aa gayā hai tumhārā ḳhayāl vaise hī

chala tha zikr zamane ki bewafai ka

so aa gaya hai tumhaara KHayal waise hi

tere hote hue mahfil meñ jalāte haiñ charāġh

log kyā saada haiñ sūraj ko dikhāte haiñ charāġh

tere hote hue mahfil mein jalate hain charagh

log kya sada hain suraj ko dikhate hain charagh

kyā isī bhuul ko kahte haiñ mohabbat kā zavāl

ab mujhe yaad nahīñ sālgirah bhī terī

kya isi bhul ko kahte hain mohabbat ka zawal

ab mujhe yaad nahin salgirah bhi teri

maiñ kyā karūñ mire qātil na chāhne par bhī

tire liye mire dil se duā nikaltī hai

main kya karun mere qatil na chahne par bhi

tere liye mere dil se dua nikalti hai

mar ga.e pyaas ke maare to uThā abr-e-karam

bujh ga.ī bazm to ab sham.a jalātā kyā hai

mar gae pyas ke mare to uTha abr-e-karam

bujh gai bazm to ab shama jalata kya hai

ye kaun phir se unhīñ rāstoñ meñ chhoḌ gayā

abhī abhī to azāb-e-safar se niklā thā

ye kaun phir se unhin raston mein chhoD gaya

abhi abhi to azab-e-safar se nikla tha

jab bhī zamīr-o-zarf kā saudā ho dosto

qaa.em raho husain ke inkār kī tarah

jab bhi zamir-o-zarf ka sauda ho dosto

qaem raho husain ke inkar ki tarah

is intihā-e-qurb ne dhuñdlā diyā tujhe

kuchh duur ho ki dekh sukūñ terā bāñkpan

is intiha-e-qurb ne dhundla diya tujhe

kuchh dur ho ki dekh sukun tera bankpan

kisī bevafā kī ḳhātir ye junūñ 'farāz' kab tak

jo tumheñ bhulā chukā hai use tum bhī bhuul jaao

kisi bewafa ki KHatir ye junun 'faraaz' kab tak

jo tumhein bhula chuka hai use tum bhi bhul jao

kise ḳhabar vo mohabbat thī yā raqābat thī

bahut se log tujhe dekh kar hamāre hue

kise KHabar wo mohabbat thi ya raqabat thi

bahut se log tujhe dekh kar hamare hue

maiñ ne dekhā hai bahāroñ meñ chaman ko jalte

hai koī ḳhvāb kī tābīr batāne vaalā

main ne dekha hai bahaaron mein chaman ko jalte

hai koi KHwab ki tabir batane wala

sunā hai us ko bhī hai sher o shā.irī se shaġhaf

so ham bhī mojaze apne hunar ke dekhte haiñ

suna hai us ko bhi hai sher o shairi se shaghaf

so hum bhi mojaze apne hunar ke dekhte hain

ranjish hī sahī dil hī dukhāne ke liye aa

aa phir se mujhe chhoḌ ke jaane ke liye aa

ranjish hi sahi dil hi dukhane ke liye aa

aa phir se mujhe chhoD ke jaane ke liye aa

tū itnī dil-zada to na thī ai shab-e-firāq

aa tere rāste meñ sitāre luTā.eñ ham

tu itni dil-zada to na thi ai shab-e-firaq

aa tere raste mein sitare luTaen hum