Sher on Ummeed

maiñ ab kisī kī bhī ummīd toḌ saktā huuñ

mujhe kisī pe bhī ab koī e'tibār nahīñ

main ab kisi ki bhi ummid toD sakta hun

mujhe kisi pe bhi ab koi e'tibar nahin

kuchh kaTī himmat-e-savāl meñ umr

kuchh umīd-e-javāb meñ guzrī

kuchh kaTi himmat-e-sawal mein umr

kuchh umid-e-jawab mein guzri

mire junūñ kā natīja zarūr niklegā

isī siyāh samundar se nuur niklegā

mere junun ka natija zarur niklega

isi siyah samundar se nur niklega

tum kahāñ vasl kahāñ vasl kī ummīd kahāñ

dil ke bahkāne ko ik baat banā rakhī hai

tum kahan wasl kahan wasl ki ummid kahan

dil ke bahkane ko ek baat bana rakhi hai

ab tak dil-e-ḳhush-fahm ko tujh se haiñ umīdeñ

ye āḳhirī sham.eñ bhī bujhāne ke liye aa

ab tak dil-e-KHush-fahm ko tujh se hain umiden

ye aaKHiri shamen bhi bujhane ke liye aa

umīd-o-bīm ke mehvar se haT ke dekhte haiñ

zarā sī der ko duniyā se kaT ke dekhte haiñ

umid-o-bim ke mehwar se haT ke dekhte hain

zara si der ko duniya se kaT ke dekhte hain

inqalāb-e-sub.h kī kuchh kam nahīñ ye bhī dalīl

pattharoñ ko de rahe haiñ aa.ine khul kar javāb

inqalab-e-subh ki kuchh kam nahin ye bhi dalil

pattharon ko de rahe hain aaine khul kar jawab

phir mirī aas baḌhā kar mujhe māyūs na kar

hāsil-e-ġham ko ḳhudā-rā ġham-e-hāsil na banā

phir meri aas baDha kar mujhe mayus na kar

hasil-e-gham ko KHuda-ra gham-e-hasil na bana

yuuñ raat ga.e kis ko sadā dete haiñ aksar

vo kaun hamārā thā jo vāpas nahīñ aaya

yun raat gae kis ko sada dete hain aksar

wo kaun hamara tha jo wapas nahin aaya

tark-e-ummīd bas kī baat nahīñ

varna ummīd kab bar aa.ī hai

tark-e-ummid bas ki baat nahin

warna ummid kab bar aai hai

ab raat kī dīvār ko Dhānā hai zarūrī

ye kaam magar mujh se akele nahīñ hogā

ab raat ki diwar ko Dhana hai zaruri

ye kaam magar mujh se akele nahin hoga

kahte haiñ ki ummīd pe jiitā hai zamāna

vo kyā kare jis ko koī ummīd nahīñ ho

kahte hain ki ummid pe jita hai zamana

wo kya kare jis ko koi ummid nahin ho

bas ab to dāman-e-dil chhoḌ do bekār ummīdo

bahut dukh sah liye maiñ ne bahut din jī liyā maiñ ne

bas ab to daman-e-dil chhoD do bekar ummido

bahut dukh sah liye main ne bahut din ji liya main ne

maujoñ kī siyāsat se māyūs na ho 'fānī'

girdāb kī har tah meñ sāhil nazar aatā hai

maujon ki siyasat se mayus na ho 'fani'

girdab ki har tah mein sahil nazar aata hai

tire va.adoñ pe kahāñ tak mirā dil fareb khaa.e

koī aisā kar bahāna mirī aas TuuT jaa.e

tere wadon pe kahan tak mera dil fareb khae

koi aisa kar bahana meri aas TuT jae

kis se ummīd kareñ koī ilāj-e-dil kī

chārāgar bhī to bahut dard kā maarā niklā

kis se ummid karen koi ilaj-e-dil ki

chaaragar bhi to bahut dard ka mara nikla

rakh na aañsū se vasl kī ummīd

khāre paanī se daal galtī nahīñ

rakh na aansu se wasl ki ummid

khaare pani se dal galti nahin

shāḳheñ rahīñ to phuul bhī patte bhī ā.eñge

ye din agar bure haiñ to achchhe bhī ā.eñge

shaKHen rahin to phul bhi patte bhi aaenge

ye din agar bure hain to achchhe bhi aaenge

itnā bhī nā-umīd dil-e-kam-nazar na ho

mumkin nahīñ ki shām-e-alam kī sahar na ho

itna bhi na-umid dil-e-kam-nazar na ho

mumkin nahin ki sham-e-alam ki sahar na ho

nā-umīdī maut se kahtī hai apnā kaam kar

aas kahtī hai Thahar ḳhat kā javāb aane ko hai

na-umidi maut se kahti hai apna kaam kar

aas kahti hai Thahar KHat ka jawab aane ko hai

ham ko un se vafā kī hai ummīd

jo nahīñ jānte vafā kyā hai

hum ko un se wafa ki hai ummid

jo nahin jaante wafa kya hai

mujh ko auroñ se kuchh nahīñ hai kaam

tujh se har dam umīd-vārī hai

mujh ko auron se kuchh nahin hai kaam

tujh se har dam umid-wari hai

bichhaḌ ke tujh se mujhe hai umiid milne kī

sunā hai ruuh ko aanā hai phir badan kī taraf

bichhaD ke tujh se mujhe hai umid milne ki

suna hai ruh ko aana hai phir badan ki taraf

puurī hotī haiñ tasavvur meñ umīdeñ kyā kyā

dil meñ sab kuchh hai magar pesh-e-nazar kuchh bhī nahīñ

puri hoti hain tasawwur mein umiden kya kya

dil mein sab kuchh hai magar pesh-e-nazar kuchh bhi nahin

vo ummīd kyā jis kī ho intihā

vo va.ada nahīñ jo vafā ho gayā

wo ummid kya jis ki ho intiha

wo wada nahin jo wafa ho gaya

yuuñ to har shaam umīdoñ meñ guzar jaatī hai

aaj kuchh baat hai jo shaam pe ronā aayā

yun to har sham umidon mein guzar jati hai

aaj kuchh baat hai jo sham pe rona aaya

na koī va.ada na koī yaqīñ na koī umiid

magar hameñ to tirā intizār karnā thā

na koi wada na koi yaqin na koi umid

magar hamein to tera intizar karna tha

dil nā-umīd to nahīñ nākām hī to hai

lambī hai ġham kī shaam magar shaam hī to hai

dil na-umid to nahin nakaam hi to hai

lambi hai gham ki sham magar sham hi to hai

ummīd to bañdh jaatī taskīn to ho jaatī

va.ada na vafā karte va.ada to kiyā hotā

ummid to bandh jati taskin to ho jati

wada na wafa karte wada to kiya hota

na.ī nasloñ ke hāthoñ meñ bhī tābinda rahegā

maiñ mil jā.ūñgā miTTī meñ qalam zinda rahegā

nai naslon ke hathon mein bhi tabinda rahega

main mil jaunga miTTi mein qalam zinda rahega

khet jal-thal kar diye sailāb ne

mar ga.e armān sab dahqān ke

khet jal-thal kar diye sailab ne

mar gae arman sab dahqan ke

jhūTe va.adoñ par thī apnī zindagī

ab to vo bhī aasrā jaatā rahā

jhuTe wadon par thi apni zindagi

ab to wo bhi aasra jata raha

itne māyūs to hālāt nahīñ

log kis vāste ghabrā.e haiñ

itne mayus to haalat nahin

log kis waste ghabrae hain

aarzū hasrat aur ummīd shikāyat aañsū

ik tirā zikr thā aur biich meñ kyā kyā niklā

aarzu hasrat aur ummid shikayat aansu

ek tera zikr tha aur bich mein kya kya nikla

āsār-e-rihā.ī haiñ ye dil bol rahā hai

sayyād sitamgar mire par khol rahā hai

aasar-e-rihai hain ye dil bol raha hai

sayyaad sitamgar mere par khol raha hai

isī ummīd par to jī rahe haiñ hijr ke maare

kabhī to ruḳh se uTThegī naqāb āhista āhista

isi ummid par to ji rahe hain hijr ke mare

kabhi to ruKH se uTThegi naqab aahista aahista

saaya hai kam khajūr ke ūñche daraḳht kā

ummīd bāñdhiye na baḌe aadmī ke saath

saya hai kam khajur ke unche daraKHt ka

ummid bandhiye na baDe aadmi ke sath

ek charāġh aur ek kitāb aur ek ummīd asāsa

us ke ba.ad to jo kuchh hai vo sab afsāna hai

ek charagh aur ek kitab aur ek ummid asasa

us ke baad to jo kuchh hai wo sab afsana hai

ḳhvāb, ummīd, tamannā.eñ, ta.alluq, rishte

jaan le lete haiñ āḳhir ye sahāre saare

KHwab, ummid, tamannaen, talluq, rishte

jaan le lete hain aaKHir ye sahaare sare

yahī hai zindagī kuchh ḳhvāb chand ummīdeñ

inhīñ khilaunoñ se tum bhī bahal sako to chalo

yahi hai zindagi kuchh KHwab chand ummiden

inhin khilaunon se tum bhi bahal sako to chalo