شکوۂ ہجر پہ سر کاٹ کے فرماتے ہیں

پھر کروگے کبھی اس منہ سے شکایت میری

تنکوں سے کھیلتے ہی رہے آشیاں میں ہم

آیا بھی اور گیا بھی زمانہ بہار کا

جسم آزادی میں پھونکی تو نے مجبوری کی روح

خیر جو چاہا کیا اب یہ بتا ہم کیا کریں

تمہیں کہو کہ تمہیں اپنا سمجھ کے کیا پایا

مگر یہی کہ جو اپنے تھے سب پرائے ہوئے

دنیا میری بلا جانے مہنگی ہے یا سستی ہے

موت ملے تو مفت نہ لوں ہستی کی کیا ہستی ہے

میں نے فانیؔ ڈوبتی دیکھی ہے نبض کائنات

جب مزاج یار کچھ برہم نظر آیا مجھے

مجھے بلا کے یہاں آپ چھپ گیا کوئی

وہ میہماں ہوں جسے میزباں نہیں ملتا

یا کہتے تھے کچھ کہتے جب اس نے کہا کہئے

تو چپ ہیں کہ کیا کہئے کھلتی ہے زباں کوئی

کچھ کٹی ہمت سوال میں عمر

کچھ امید جواب میں گزری

دیر میں یا حرم میں گزرے گی

عمر تیرے ہی غم میں گزرے گی

اپنی جنت مجھے دکھلا نہ سکا تو واعظ

کوچۂ یار میں چل دیکھ لے جنت میری

نا مہربانیوں کا گلا تم سے کیا کریں

ہم بھی کچھ اپنے حال پہ اب مہرباں نہیں

پتھرا گئی تھی آنکھ مگر بند تو نہ تھی

اب یہ بھی انتظار کی صورت نہیں رہی

ہر مصیبت کا دیا ایک تبسم سے جواب

اس طرح گردش دوراں کو رلایا میں نے

روح گھبرائی ہوئی پھرتی ہے میری لاش پر

کیا جنازے پر میرے خط کا جواب آنے کو ہے

دل آباد کا فانیؔ کوئی مفہوم نہیں

ہاں مگر جس میں کوئی حسرت برباد رہے

اس کو بھولے تو ہوئے ہو فانیؔ

کیا کروگے وہ اگر یاد آیا

جس دل ربا سے ہم نے آنکھیں لڑائیاں ہیں

آخر اسی نے ہم کو آنکھیں دکھائیاں ہیں

جی ڈھونڈھتا ہے گھر کوئی دونوں جہاں سے دور

اس آپ کی زمیں سے الگ آسماں سے دور

آبادی بھی دیکھی ہے ویرانے بھی دیکھے ہیں

جو اجڑے اور پھر نہ بسے دل وہ نرالی بستی ہے

کس کو غم ہے جو کرے مرثیہ خوانی میری

رو رہی ہے مرے مرقد پہ جوانی میری

رونے کے بھی آداب ہوا کرتے ہیں فانیؔ

یہ اس کی گلی ہے تیرا غم خانہ نہیں ہے

اے بے خودی ٹھہر کہ بہت دن گزر گئے

مجھ کو خیال یار کہیں ڈھونڈتا نہ ہو

موت کا انتظار باقی ہے

آپ کا انتظار تھا نہ رہا

اپنی ہی نگاہوں کا یہ نظارہ کہاں تک

اس مرحلۂ سعیٔ تماشا سے گزر جا

ترک امید بس کی بات نہیں

ورنہ امید کب بر آئی ہے

صور و منصور و طور ارے توبہ

ایک ہے تیری بات کا انداز

مجھ تک اس محفل میں پھر جام شراب آنے کو ہے

عمر رفتہ پلٹی آتی ہے شباب آنے کو ہے

وہ صبح عید کا منظر ترے تصور میں

وہ دل میں آ کے ادا تیرے مسکرانے کی

کسی کو کیا مرے سود و زیاں سے

گرے کیوں برق بچ کر آشیاں سے

زمانہ بر سر آزار تھا مگر فانیؔ

تڑپ کے ہم نے بھی تڑپا دیا زمانے کو

روح ارباب محبت کی لرز جاتی ہے

تو پشیمان نہ ہو اپنی جفا یاد نہ کر

جوانی کو بچا سکتے تو ہیں ہر داغ سے واعظ

مگر ایسی جوانی کو جوانی کون کہتا ہے

کرم بے حساب چاہا تھا

ستم بے حساب میں گزری

بیمار ترے جی سے گزر جائیں تو اچھا

جیتے ہیں نہ مرتے ہیں یہ مر جائیں تو اچھا

کس خرابی سے زندگی فانیؔ

اس جہان خراب میں گزری

موجوں کی سیاست سے مایوس نہ ہو فانیؔ

گرداب کی ہر تہہ میں ساحل نظر آتا ہے

دل کا اجڑنا سہل سہی بسنا سہل نہیں ظالم

بستی بسنا کھیل نہیں بستے بستے بستی ہے

اب نئے سر سے چھیڑ پردۂ ساز

میں ہی تھا ایک دکھ بھری آواز

جلوہ و دل میں فرق نہیں جلوے کو ہی اب دل کہتے ہیں

یعنی عشق کی ہستی کا آغاز تو ہے انجام نہیں

اس درد کا علاج اجل کے سوا بھی ہے

کیوں چارہ ساز تجھ کو امید شفا بھی ہے

آ گئی ہے ترے بیمار کے منہ پر رونق

جان کیا جسم سے نکلی کوئی ارماں نکلا

ہر نفس عمر گزشتہ کی ہے میت فانیؔ

زندگی نام ہے مر مر کے جئے جانے کا

میرے جنوں کو زلف کے سائے سے دور رکھ

رستے میں چھاؤں پا کے مسافر ٹھہر نہ جائے

ایک عالم کو دیکھتا ہوں میں

یہ ترا دھیان ہے مجسم کیا

زندگی جبر ہے اور جبر کے آثار نہیں

ہائے اس قید کو زنجیر بھی درکار نہیں

کسی کے ایک اشارے میں کس کو کیا نہ ملا

بشر کو زیست ملی موت کو بہانہ ملا

جور کو جور بھی اب کیا کہیے

خود وہ تڑپا کے تڑپ جاتے ہیں

مر کے ٹوٹا ہے کہیں سلسلۂ قید حیات

مگر اتنا ہے کہ زنجیر بدل جاتی ہے

ہم ہیں اس کے خیال کی تصویر

جس کی تصویر ہے خیال اپنا