دھوپ نے گزارش کی

ایک بوند بارش کی

روز اچھے نہیں لگتے آنسو

خاص موقعوں پہ مزا دیتے ہیں

اب تو چپ چاپ شام آتی ہے

پہلے چڑیوں کے شور ہوتے تھے

اندھیرا ہے کیسے ترا خط پڑھوں

لفافے میں کچھ روشنی بھیج دے

کبھی آنکھیں کتاب میں گم ہیں

کبھی گم ہے کتاب آنکھوں میں

آج پھر مجھ سے کہا دریا نے

کیا ارادہ ہے بہا لے جاؤں

سردی میں دن سرد ملا

ہر موسم بے درد ملا

کچھ تو اس دل کو سزا دی جائے

اس کی تصویر ہٹا دی جائے

اپنا گھر آنے سے پہلے

اتنی گلیاں کیوں آتی ہیں

مانا کہ تو ذہین بھی ہے خوب رو بھی ہے

تجھ سا نہ میں ہوا تو بھلا کیا برا ہوا

آگ اپنے ہی لگا سکتے ہیں

غیر تو صرف ہوا دیتے ہیں

نظروں سے ناپتا ہے سمندر کی وسعتیں

ساحل پہ اک شخص اکیلا کھڑا ہوا

اچھے دن کب آئیں گے

کیا یوں ہی مر جائیں گے

اس سے ملے زمانہ ہوا لیکن آج بھی

دل سے دعا نکلتی ہے خوش ہو جہاں بھی ہو

اس سے بچھڑتے وقت میں رویا تھا خوب سا

یہ بات یاد آئی تو پہروں ہنسا کیا

ہائے وہ لوگ جو دیکھے بھی نہیں

یاد آئیں تو رلا دیتے ہیں

میں خود کو مرتے ہوئے دیکھ کر بہت خوش ہوں

یہ ڈر بھی ہے کہ مری آنکھ کھل نہ جائے کہیں

اب نہ غالبؔ سے شکایت ہے نہ شکوہ میرؔ کا

بن گیا میں بھی نشانہ ریختہ کے تیر کا

دیکھا نہ ہوگا تو نے مگر انتظار میں

چلتے ہوئے سمے کو ٹھہرتے ہوئے بھی دیکھ

دیکھا تو سب کے سر پہ گناہوں کا بوجھ تھا

خوش تھے تمام نیکیاں دریا میں ڈال کر

موت بھی دور بہت دور کہیں پھرتی ہے

کون اب آ کے اسیروں کو رہائی دے گا

میں اس کے بدن کی مقدس کتاب

نہایت عقیدت سے پڑھتا رہا

کمرے میں مزے کی روشنی ہو

اچھی سی کوئی کتاب دیکھوں

نیا سال دیوار پر ٹانگ دے

پرانے برس کا کلنڈر گرا

رکھتے ہو اگر آنکھ تو باہر سے نہ دیکھو

دیکھو مجھے اندر سے بہت ٹوٹ چکا ہوں

علویؔ یہ معجزہ ہے دسمبر کی دھوپ کا

سارے مکان شہر کے دھوئے ہوئے سے ہیں

وہ جنگلوں میں درختوں پہ کودتے پھرنا

برا بہت تھا مگر آج سے تو بہتر تھا

حیران مت ہو تیرتی مچھلی کو دیکھ کر

پانی میں روشنی کو اترتے ہوئے بھی دیکھ

چھوڑ گیا مجھ کو علویؔ

شاید وہ جلدی میں تھا

ابھی دو چار ہی بوندیں گریں ہیں

مگر موسم نشیلا ہو گیا ہے

اک لڑکا تھا اک لڑکی تھی

آگے اللہ کی مرضی تھی

ان دنوں گھر سے عجب رشتہ تھا

سارے دروازے گلے لگتے تھے

تھوڑی سردی ذرا سا نزلہ ہے

شاعری کا مزاج پتلا ہے

اور بازار سے کیا لے جاؤں

پہلی بارش کا مزا لے جاؤں

گھر میں کیا آیا کہ مجھ کو

دیواروں نے گھیر لیا ہے

چلا جاؤں گا جیسے خود کو تنہا چھوڑ کر علویؔ

میں اپنے آپ کو راتوں میں اٹھ کر دیکھ لیتا ہوں

غم بہت دن مفت کی کھاتا رہا

اب اسے دل سے نکالا چاہیئے

آفس میں بھی گھر کو کھلا پاتا ہوں میں

ٹیبل پر سر رکھ کر سو جاتا ہوں میں

رات پڑے گھر جانا ہے

صبح تلک مر جانا ہے

ارے یہ دل اور اتنا خالی

کوئی مصیبت ہی پال رکھیے

رات ملی تنہائی ملی اور جام ملا

گھر سے نکلے تو کیا کیا آرام ملا

دونوں کے دل میں خوف تھا میدان جنگ میں

دونوں کا خوف فاصلہ تھا درمیان کا

ایسا ہنگامہ نہ تھا جنگل میں

شہر میں آئے تو ڈر لگتا تھا

کھڑکیوں سے جھانکتی ہے روشنی

بتیاں جلتی ہیں گھر گھر رات میں

ہر وقت کھلتے پھول کی جانب تکا نہ کر

مرجھا کے پتیوں کو بکھرتے ہوئے بھی دیکھ

آنکھیں کھولو خواب سمیٹو جاگو بھی

علویؔ پیارے دیکھو سالا دن نکلا

موت نہ آئی تو علویؔ

چھٹی میں گھر جائیں گے

بلا رہا تھا کوئی چیخ چیخ کر مجھ کو

کنویں میں جھانک کے دیکھا تو میں ہی اندر تھا

گاڑی آتی ہے لیکن آتی ہی نہیں

ریل کی پٹری دیکھ کے تھک جاتا ہوں میں

پرندے دور فضاؤں میں کھو گئے علویؔ

اجاڑ اجاڑ درختوں پہ آشیانے تھے