shikva-e-hijr pe sar kaaT ke farmāte haiñ

phir karoge kabhī is muñh se shikāyat merī

shikwa-e-hijr pe sar kaT ke farmate hain

phir karoge kabhi is munh se shikayat meri

tinkoñ se khelte hī rahe āshiyāñ meñ ham

aayā bhī aur gayā bhī zamāna bahār kā

tinkon se khelte hi rahe aashiyan mein hum

aaya bhi aur gaya bhi zamana bahaar ka

jism-e-āzādi meñ phūñkī tū ne majbūrī kī ruuh

ḳhair jo chāhā kiyā ab ye batā ham kyā kareñ

jism-e-azadi mein phunki tu ne majburi ki ruh

KHair jo chaha kiya ab ye bata hum kya karen

tumhīñ kaho ki tumheñ apnā samajh ke kyā paayā

magar yahī ki jo apne the sab parā.e hue

tumhin kaho ki tumhein apna samajh ke kya paya

magar yahi ki jo apne the sab parae hue

duniyā merī balā jaane mahñgī hai yā sastī hai

maut mile to muft na luuñ hastī kī kyā hastī hai

duniya meri bala jaane mahngi hai ya sasti hai

maut mile to muft na lun hasti ki kya hasti hai

maiñ ne 'fānī' Dūbtī dekhī hai nabz-e-kā.enāt

jab mizāj-e-yār kuchh barham nazar aayā mujhe

main ne 'fani' Dubti dekhi hai nabz-e-kaenat

jab mizaj-e-yar kuchh barham nazar aaya mujhe

mujhe bulā ke yahāñ aap chhup gayā koī

vo mehmāñ huuñ jise mezbāñ nahīñ miltā

mujhe bula ke yahan aap chhup gaya koi

wo mehman hun jise mezban nahin milta

yā kahte the kuchh kahte jab us ne kahā kahiye

to chup haiñ ki kyā kahiye khultī hai zabāñ koī

ya kahte the kuchh kahte jab us ne kaha kahiye

to chup hain ki kya kahiye khulti hai zaban koi

kuchh kaTī himmat-e-savāl meñ umr

kuchh umīd-e-javāb meñ guzrī

kuchh kaTi himmat-e-sawal mein umr

kuchh umid-e-jawab mein guzri

dair meñ yā haram meñ guzregī

umr tere hī ġham meñ guzregī

dair mein ya haram mein guzregi

umr tere hi gham mein guzregi

apnī jannat mujhe dikhlā na sakā tū vaa.iz

kūcha-e-yār meñ chal dekh le jannat merī

apni jannat mujhe dikhla na saka tu waiz

kucha-e-yar mein chal dekh le jannat meri

nā-mehrbāniyoñ kā gilā tum se kyā kareñ

ham bhī kuchh apne haal pe ab mehrbāñ nahīñ

na-mehrbaniyon ka gila tum se kya karen

hum bhi kuchh apne haal pe ab mehrban nahin

pathrā ga.ī thī aañkh magar band to na thī

ab ye bhī intizār kī sūrat nahīñ rahī

pathra gai thi aankh magar band to na thi

ab ye bhi intizar ki surat nahin rahi

har musībat kā diyā ek tabassum se javāb

is tarah gardish-e-daurāñ ko rulāyā maiñ ne

har musibat ka diya ek tabassum se jawab

is tarah gardish-e-dauran ko rulaya main ne

ruuh ghabrā.ī huī phirtī hai merī laash par

kyā janāze par mere ḳhat kā javāb aane ko hai

ruh ghabrai hui phirti hai meri lash par

kya janaze par mere KHat ka jawab aane ko hai

dil-e-ābād kā 'fānī' koī mafhūm nahīñ

haañ magar jis meñ koī hasrat-e-barbād rahe

dil-e-abaad ka 'fani' koi mafhum nahin

han magar jis mein koi hasrat-e-barbaad rahe

us ko bhūle to hue ho 'fānī'

kyā karoge vo agar yaad aayā

us ko bhule to hue ho 'fani'

kya karoge wo agar yaad aaya

jis dil-rubā se ham ne āñkheñ laḌā.iyāñ haiñ

āḳhir usī ne ham ko āñkheñ dikhāiyāñ haiñ

jis dil-ruba se hum ne aankhen laDaiyan hain

aaKHir usi ne hum ko aankhen dikhaiyan hain

jī DhūñDhtā hai ghar koī donoñ jahāñ se duur

is aap kī zamīñ se alag āsmāñ se duur

ji DhunDhta hai ghar koi donon jahan se dur

is aap ki zamin se alag aasman se dur

ābādī bhī dekhī hai vīrāne bhī dekhe haiñ

jo ujḌe aur phir na base dil vo nirālī bastī hai

aabaadi bhi dekhi hai virane bhi dekhe hain

jo ujDe aur phir na base dil wo nirali basti hai

kis ko ġham hai jo kare marsiya-ḳhvānī merī

ro rahī hai mire marqad pe javānī merī

kis ko gham hai jo kare marsiya-KHwani meri

ro rahi hai mere marqad pe jawani meri

rone ke bhī ādāb huā karte haiñ 'fānī'

ye us kī galī hai terā ġham-ḳhāna nahīñ hai

rone ke bhi aadab hua karte hain 'fani'

ye us ki gali hai tera gham-KHana nahin hai

ai be-ḳhudī Thahr ki bahut din guzar ga.e

mujh ko ḳhayāl-e-yār kahīñ DhūñDtā na ho

ai be-KHudi Thahr ki bahut din guzar gae

mujh ko KHayal-e-yar kahin DhunDta na ho

maut kā intizār baaqī hai

aap kā intizār thā na rahā

maut ka intizar baqi hai

aap ka intizar tha na raha

apnī hī nigāhoñ kā ye nazzāra kahāñ tak

is marhala-e-sa.ī-e-tamāshā se guzar jā

apni hi nigahon ka ye nazzara kahan tak

is marhala-e-sai-e-tamasha se guzar ja

tark-e-ummīd bas kī baat nahīñ

varna ummīd kab bar aa.ī hai

tark-e-ummid bas ki baat nahin

warna ummid kab bar aai hai

sūr-o-mansūr-o-tūr are tauba

ek hai terī baat kā andāz

sur-o-mansur-o-tur are tauba

ek hai teri baat ka andaz

mujh tak us mahfil meñ phir jām-e-sharāb aane ko hai

umr-e-rafta palTī aatī hai shabāb aane ko hai

mujh tak us mahfil mein phir jam-e-sharab aane ko hai

umr-e-rafta palTi aati hai shabab aane ko hai

vo sub.h-e-īd kā manzar tire tasavvur meñ

vo dil meñ aa ke adā tere muskurāne kī

wo subh-e-id ka manzar tere tasawwur mein

wo dil mein aa ke ada tere muskurane ki

kisī ko kyā mire suud o ziyāñ se

gire kyuuñ barq bach kar āshiyāñ se

kisi ko kya mere sud o ziyan se

gire kyun barq bach kar aashiyan se

zamāna bar-sar-e-āzār thā magar 'fānī'

taḌap ke ham ne bhī taḌpā diyā zamāne ko

zamana bar-sar-e-azar tha magar 'fani'

taDap ke hum ne bhi taDpa diya zamane ko

ruuh arbāb-e-mohabbat kī laraz jaatī hai

tū pashemān na ho apnī jafā yaad na kar

ruh arbab-e-mohabbat ki laraz jati hai

tu pasheman na ho apni jafa yaad na kar

javānī ko bachā sakte to haiñ har daaġh se vaa.iz

magar aisī javānī ko javānī kaun kahtā hai

jawani ko bacha sakte to hain har dagh se waiz

magar aisi jawani ko jawani kaun kahta hai

karam-e-be-hisāb chāhā thā

sitam-e-be-hisāb meñ guzrī

karam-e-be-hisab chaha tha

sitam-e-be-hisab mein guzri

bīmār tire jī se guzar jaa.eñ to achchhā

jiite haiñ na marte haiñ ye mar jaa.eñ to achchhā

bimar tere ji se guzar jaen to achchha

jite hain na marte hain ye mar jaen to achchha

kis ḳharābī se zindagī 'fānī'

is jahān-e-ḳharāb meñ guzrī

kis KHarabi se zindagi 'fani'

is jahan-e-KHarab mein guzri

maujoñ kī siyāsat se māyūs na ho 'fānī'

girdāb kī har tah meñ sāhil nazar aatā hai

maujon ki siyasat se mayus na ho 'fani'

girdab ki har tah mein sahil nazar aata hai

dil kā ujaḌnā sahl sahī basnā sahl nahīñ zālim

bastī basnā khel nahīñ baste baste bastī hai

dil ka ujaDna sahl sahi basna sahl nahin zalim

basti basna khel nahin baste baste basti hai

ab na.e sur se chheḌ parda-e-sāz

maiñ hī thā ek dukh-bharī āvāz

ab nae sur se chheD parda-e-saz

main hi tha ek dukh-bhari aawaz

jalva o dil meñ farq nahīñ jalve ko hī ab dil kahte haiñ

yaanī ishq kī hastī kā āġhāz to hai anjām nahīñ

jalwa o dil mein farq nahin jalwe ko hi ab dil kahte hain

yani ishq ki hasti ka aaghaz to hai anjam nahin

is dard kā ilaaj ajal ke sivā bhī hai

kyuuñ chārasāz tujh ko ummīd-e-shifā bhī hai

is dard ka ilaj ajal ke siwa bhi hai

kyun chaarasaz tujh ko ummid-e-shifa bhi hai

aa ga.ī hai tire bīmār ke muñh par raunaq

jaan kyā jism se niklī koī armāñ niklā

aa gai hai tere bimar ke munh par raunaq

jaan kya jism se nikli koi arman nikla

har nafas umr-e-guzishta kī hai mayyat 'fānī'

zindagī naam hai mar mar ke jiye jaane kā

har nafas umr-e-guzishta ki hai mayyat 'fani'

zindagi nam hai mar mar ke jiye jaane ka

mere junūñ ko zulf ke saa.e se duur rakh

raste meñ chhāñv pā ke musāfir Thahar na jaa.e

mere junun ko zulf ke sae se dur rakh

raste mein chhanw pa ke musafir Thahar na jae

ek aalam ko dekhtā huuñ maiñ

ye tirā dhyān hai mujassam kyā

ek aalam ko dekhta hun main

ye tera dhyan hai mujassam kya

zindagī jabr hai aur jabr ke āsār nahīñ

haa.e is qaid ko zanjīr bhī darkār nahīñ

zindagi jabr hai aur jabr ke aasar nahin

hae is qaid ko zanjir bhi darkar nahin

kisī ke ek ishāre meñ kis ko kyā na milā

bashar ko ziist milī maut ko bahāna milā

kisi ke ek ishaare mein kis ko kya na mila

bashar ko zist mili maut ko bahana mila

jaur ko jaur bhī ab kyā kahiye

ḳhud vo taḌpā ke taḌap jaate haiñ

jaur ko jaur bhi ab kya kahiye

KHud wo taDpa ke taDap jate hain

mar ke TuuTā hai kahīñ silsila-e-qaid-e-hayāt

magar itnā hai ki zanjīr badal jaatī hai

mar ke TuTa hai kahin silsila-e-qaid-e-hayat

magar itna hai ki zanjir badal jati hai

ham haiñ us ke ḳhayāl kī tasvīr

jis kī tasvīr hai ḳhayāl apnā

hum hain us ke KHayal ki taswir

jis ki taswir hai KHayal apna