mujh ko mālūm hai merī ḳhātir

kahīñ ik jaal bunā rakkhā hai

mujh ko malum hai meri KHatir

kahin ek jal buna rakkha hai

bichhaḌte vaqt Dhalaktā na gar in āñkhoñ se

is ek ashk kā kyā kyā malāl rah jaatā

bichhaDte waqt Dhalakta na gar in aankhon se

is ek ashk ka kya kya malal rah jata

us ne bārish meñ bhī khiḌkī khol ke dekhā nahīñ

bhīgne vāloñ ko kal kyā kyā pareshānī huī

us ne barish mein bhi khiDki khol ke dekha nahin

bhigne walon ko kal kya kya pareshani hui

aur ab ye chāhtā huuñ koī ġham baTā.e mirā

maiñ apnī miTTī kabhī aap Dhone vaalā thā

aur ab ye chahta hun koi gham baTae mera

main apni miTTi kabhi aap Dhone wala tha

manhūs ek shakl hai jis se nahīñ farār

parchhā.īñ kī tarah se barābar lagī huī

manhus ek shakl hai jis se nahin farar

parchhain ki tarah se barabar lagi hui

kisī bhī vaqt badal saktā hai lamha koī

is qadar ḳhush bhī na ho merī pareshānī par

kisi bhi waqt badal sakta hai lamha koi

is qadar KHush bhi na ho meri pareshani par

na vo hasīn na maiñ ḳhūb-rū magar ik saath

hameñ jo dekh le vo dekhtā hī rah jaa.e

na wo hasin na main KHub-ru magar ek sath

hamein jo dekh le wo dekhta hi rah jae

chāroñ jānib rachī huī hai ashkoñ kī bū-bās

is raste se guzre hoñge qāfile hijrat vaale

chaaron jaanib rachi hui hai ashkon ki bu-bas

is raste se guzre honge qafile hijrat wale

jāntā huuñ mire qissa-go ne

asl qisse ko chhupā rakkhā hai

jaanta hun mere qissa-go ne

asl qisse ko chhupa rakkha hai

din guzarte jā rahe haiñ aur hujūm-e-ḳhush-gumāñ

muntazir baiThā hai aab o ḳhaak se bichhḌā huā

din guzarte ja rahe hain aur hujum-e-KHush-guman

muntazir baiTha hai aab o KHak se bichhDa hua

vo log mere bahut pyaar karne vaale the

guzar ga.e haiñ jo mausam guzarne vaale the

wo log mere bahut pyar karne wale the

guzar gae hain jo mausam guzarne wale the

ye jo laḌtā-jhagaḌtā huuñ sab se

bach rahā huuñ qubūl-e-ām se maiñ

ye jo laDta-jhagaDta hun sab se

bach raha hun qubul-e-am se main

bojh se jhukne lagī shāḳh to jā kar ham ne

āshiyāne ko kisī aur shajar par rakkhā

bojh se jhukne lagi shaKH to ja kar hum ne

aashiyane ko kisi aur shajar par rakkha

ḳhud jise mehnat mashaqqat se banātā huuñ 'jamāl'

chhoḌ detā huuñ vo rasta aam ho jaane ke ba.ad

KHud jise mehnat mashaqqat se banata hun 'jamal'

chhoD deta hun wo rasta aam ho jaane ke baad

sub.h aatā huuñ yahāñ aur shaam ho jaane ke ba.ad

lauT jaatā huuñ maiñ ghar nākām ho jaane ke ba.ad

subh aata hun yahan aur sham ho jaane ke baad

lauT jata hun main ghar nakaam ho jaane ke baad

ham aise be-hunaroñ meñ hai jo salīqa-e-zīst

tire dayār meñ pal-bhar qayām se aayā

hum aise be-hunaron mein hai jo saliqa-e-zist

tere dayar mein pal-bhar qayam se aaya

tamām raat nahāyā thā shahr bārish meñ

vo rañg utar hī ga.e jo utarne vaale the

tamam raat nahaya tha shahr barish mein

wo rang utar hi gae jo utarne wale the

charāġh bujhte chale jā rahe haiñ silsila-vār

maiñ ḳhud ko dekh rahā huuñ fasāna hote hue

charagh bujhte chale ja rahe hain silsila-war

main KHud ko dekh raha hun fasana hote hue

ik aadmī se tark-e-marāsim ke ba.ad ab

kyā us galī se koī guzarnā bhī chhoḌ de

ek aadmi se tark-e-marasim ke baad ab

kya us gali se koi guzarna bhi chhoD de

jo dil ke taaq meñ tū ne charāġh rakkhā thā

na pūchh maiñ ne use kis tarah sitāra kiyā

jo dil ke taq mein tu ne charagh rakkha tha

na puchh main ne use kis tarah sitara kiya

hārne vāloñ ne is ruḳh se bhī sochā hogā

sar kaTānā hai to hathiyār na Daale jaa.eñ

haarne walon ne is ruKH se bhi socha hoga

sar kaTana hai to hathiyar na Dale jaen

tirā firāq to rizq-e-halāl hai mujh ko

ye phal parā.e shajar se utārā thoḌī hai

tera firaq to rizq-e-halal hai mujh ko

ye phal parae shajar se utara thoDi hai

sunte haiñ us ne DhūñD liyā aur koī ghar

ab tak jo aañkh thī tire dar par lagī huī

sunte hain us ne DhunD liya aur koi ghar

ab tak jo aankh thi tere dar par lagi hui

duniyā pasand aane lagī dil ko ab bahut

samjho ki ab ye baaġh bhī murjhāne vaalā hai

duniya pasand aane lagi dil ko ab bahut

samjho ki ab ye bagh bhi murjhane wala hai

ye ġham nahīñ hai ki ham donoñ ek ho na sake

ye rañj hai ki koī darmiyān meñ bhī na thā

ye gham nahin hai ki hum donon ek ho na sake

ye ranj hai ki koi darmiyan mein bhi na tha

ai zamīñ-zād tirī rif.ateñ chhūne ke liye

tujh talak maiñ ka.ī aflāk badal kar aaya

ai zamin-zad teri rifaten chhune ke liye

tujh talak main kai aflak badal kar aaya

tire na aane se dil bhī nahīñ dukhā shāyad

vagarna kyā maiñ sar-e-shām sone vaalā thā

tere na aane se dil bhi nahin dukha shayad

wagarna kya main sar-e-sham sone wala tha

ye kis maqām pe sūjhī tujhe bichhaḌne kī

ki ab to jā ke kahīñ din sañvarne vaale the

ye kis maqam pe sujhi tujhe bichhaDne ki

ki ab to ja ke kahin din sanwarne wale the

qarār dil ko sadā jis ke naam se aayā

vo aayā bhī to kisī aur kaam se aayā

qarar dil ko sada jis ke nam se aaya

wo aaya bhi to kisi aur kaam se aaya

na ranj-e-hijrat thā aur na shauq-e-safar thā dil meñ

sab apne apne gunāh kā bojh Dho rahe the

na ranj-e-hijrat tha aur na shauq-e-safar tha dil mein

sab apne apne gunah ka bojh Dho rahe the

kaun hai is rim-jhim ke pīchhe chhupā huā

ye aañsū saare ke saare kis ke haiñ

kaun hai is rim-jhim ke pichhe chhupa hua

ye aansu sare ke sare kis ke hain

ḳhatm hone ko haiñ ashkoñ ke zaḳhīre bhī 'jamāl'

ro.e kab tak koī is shahr kī vīrānī par

KHatm hone ko hain ashkon ke zaKHire bhi 'jamal'

roe kab tak koi is shahr ki virani par

kisī ke hone na hone ke baare meñ aksar

akele-pan meñ baḌe dhyān jaayā karte haiñ

kisi ke hone na hone ke bare mein aksar

akele-pan mein baDe dhyan jaya karte hain

thakan bahut thī magar sāya-e-shajar meñ 'jamāl'

maiñ baiThtā to mirā ham-safar chalā jaatā

thakan bahut thi magar saya-e-shajar mein 'jamal'

main baiThta to mera ham-safar chala jata

jo āsmāñ kī bulandī ko chhūne vaalā thā

vahī mināra zamīñ par dhaḌām se aayā

jo aasman ki bulandi ko chhune wala tha

wahi minara zamin par dhaDam se aaya

'jamāl' har shahr se hai pyārā vo shahr mujh ko

jahāñ se dekhā thā pahlī baar āsmān maiñ ne

'jamal' har shahr se hai pyara wo shahr mujh ko

jahan se dekha tha pahli bar aasman main ne

ik lahar us kī aañkh meñ hai hausla-shikan

ik rañg us ke chehre pe bahkāne vaalā hai

ek lahar us ki aankh mein hai hausla-shikan

ek rang us ke chehre pe bahkane wala hai

us raste par pīchhe se itnī āvāzeñ aa.iiñ 'jamāl'

ek jagah to ghuum ke rah ga.ī eḌī sīdhe paañv kī

us raste par pichhe se itni aawazen aain 'jamal'

ek jagah to ghum ke rah gai eDi sidhe panw ki

maa.eñ darvāzoñ par haiñ

bārish hone vaalī hai

maen darwazon par hain

barish hone wali hai

mirā kamāl ki maiñ is fazā meñ zinda huuñ

du'ā na milte hue aur havā na hote hue

mera kamal ki main is faza mein zinda hun

du'a na milte hue aur hawa na hote hue

na.e sire se jal uTThī hai phir purānī aag

ajiib lutf tujhe bhūlne meñ aayā hai

nae sire se jal uTThi hai phir purani aag

ajib lutf tujhe bhulne mein aaya hai

kyā kahūñ uubne lagā huuñ 'jamāl'

ek hī jaise sub.h o shaam se maiñ

kya kahun ubne laga hun 'jamal'

ek hi jaise subh o sham se main

yaad rakhnā hī mohabbat meñ nahīñ hai sab kuchh

bhuul jaanā bhī baḌī baat huā kartī hai

yaad rakhna hi mohabbat mein nahin hai sab kuchh

bhul jaana bhi baDi baat hua karti hai

do jīvan tārāj hue tab puurī huī baat

kaisā phuul khilā hai aur kaisī vīrānī meñ

do jiwan taraj hue tab puri hui baat

kaisa phul khila hai aur kaisi virani mein

kuchh aur vus'ateñ darkār haiñ mohabbat ko

visāl-o-hijr pe dār-o-madār mushkil hai

kuchh aur wus'aten darkar hain mohabbat ko

visal-o-hijr pe dar-o-madar mushkil hai

kyā us se mulāqāt kā imkāñ bhī nahīñ ab

kyuuñ in dinoñ mailī tirī poshāk bahut hai

kya us se mulaqat ka imkan bhi nahin ab

kyun in dinon maili teri poshak bahut hai

jo mere zikr par ab qahqahe lagātā hai

bichhaḌte vaqt koī haal dekhtā us kā

jo mere zikr par ab qahqahe lagata hai

bichhaDte waqt koi haal dekhta us ka

ye kaun aane jaane lagā us galī meñ ab

ye kaun merī dāstāñ dohrāne vaalā hai

ye kaun aane jaane laga us gali mein ab

ye kaun meri dastan dohrane wala hai

ye ġham judā hai bahut jald-bāz the ham tum

ye dukh alag hai abhī kā.enāt baaqī hai

ye gham juda hai bahut jald-baz the hum tum

ye dukh alag hai abhi kaenat baqi hai

ik safar meñ koī do baar nahīñ luT saktā

ab dobāra tirī chāhat nahīñ kī jā saktī

ek safar mein koi do bar nahin luT sakta

ab dobara teri chahat nahin ki ja sakti