Top 20 Aadmi/Insaan Shayari

'zafar' aadmī us ko na jāniyegā vo ho kaisā hī sāhab-e-fahm-o-zakā

jise aish meñ yād-e-ḳhudā na rahī jise taish meñ ḳhauf-e-ḳhudā na rahā

'zafar' aadmi us ko na jaaniyega wo ho kaisa hi sahab-e-fahm-o-zaka

jise aish mein yaad-e-KHuda na rahi jise taish mein KHauf-e-KHuda na raha

mirī zabān ke mausam badalte rahte haiñ

maiñ aadmī huuñ mirā e'tibār mat karnā

meri zaban ke mausam badalte rahte hain

main aadmi hun mera e'tibar mat karna

aadmī bulbula hai paanī kā

kyā bharosā hai zindagānī kā

aadmi bulbula hai pani ka

kya bharosa hai zindagani ka

mat sahl hameñ jaano phirtā hai falak barsoñ

tab ḳhaak ke parde se insān nikalte haiñ

mat sahl hamein jaano phirta hai falak barson

tab KHak ke parde se insan nikalte hain

vaqt rahtā nahīñ kahīñ Tik kar

aadat is kī bhī aadmī sī hai

waqt rahta nahin kahin Tik kar

aadat is ki bhi aadmi si hai

raah meñ baiThā huuñ maiñ tum sañg-e-rah samjho mujhe

aadmī ban jā.ūñgā kuchh Thokareñ khāne ke ba.ad

rah mein baiTha hun main tum sang-e-rah samjho mujhe

aadmi ban jaunga kuchh Thokaren khane ke baad

ai āsmān tere ḳhudā kā nahīñ hai ḳhauf

Darte haiñ ai zamīn tire aadmī se ham

ai aasman tere KHuda ka nahin hai KHauf

Darte hain ai zamin tere aadmi se hum

har aadmī meñ hote haiñ das biis aadmī

jis ko bhī dekhnā ho ka.ī baar dekhnā

har aadmi mein hote hain das bis aadmi

jis ko bhi dekhna ho kai bar dekhna

farishte se baḌh kar hai insān banñā

magar is meñ lagtī hai mehnat ziyāda

farishte se baDh kar hai insan banna

magar is mein lagti hai mehnat ziyaada

bas-ki dushvār hai har kaam kā āsāñ honā

aadmī ko bhī muyassar nahīñ insāñ honā

bas-ki dushwar hai har kaam ka aasan hona

aadmi ko bhi muyassar nahin insan hona

duniyā pe aisā vaqt paḌegā ki ek din

insān kī talāsh meñ insān jā.egā

duniya pe aisa waqt paDega ki ek din

insan ki talash mein insan jaega

yahāñ libās kī qīmat hai aadmī kī nahīñ

mujhe gilās baḌe de sharāb kam kar de

yahan libas ki qimat hai aadmi ki nahin

mujhe gilas baDe de sharab kam kar de

samjhegā aadmī ko vahāñ kaun aadmī

banda jahāñ ḳhudā ko ḳhudā māntā nahīñ

samjhega aadmi ko wahan kaun aadmi

banda jahan KHuda ko KHuda manta nahin

jānvar aadmī farishta ḳhudā

aadmī kī haiñ saikaḌoñ qismeñ

jaanwar aadmi farishta KHuda

aadmi ki hain saikaDon qismen

hazār chehre haiñ maujūd aadmī ġhā.eb

ye kis ḳharābe meñ duniyā ne lā ke chhoḌ diyā

hazar chehre hain maujud aadmi ghaeb

ye kis KHarabe mein duniya ne la ke chhoD diya

jhuuT bolā hai to qaa.em bhī raho us par 'zafar'

aadmī ko sāhab-e-kirdār honā chāhiye

jhuT bola hai to qaem bhi raho us par 'zafar'

aadmi ko sahab-e-kirdar hona chahiye

'mīr' sāhab tum farishta ho to ho

aadmī honā to mushkil hai miyāñ

'mir' sahab tum farishta ho to ho

aadmi hona to mushkil hai miyan

gharoñ pe naam the nāmoñ ke saath ohde the

bahut talāsh kiyā koī aadmī na milā

gharon pe nam the namon ke sath ohde the

bahut talash kiya koi aadmi na mila

ḳhudā se kyā mohabbat kar sakegā

jise nafrat hai us ke aadmī se

KHuda se kya mohabbat kar sakega

jise nafrat hai us ke aadmi se

sab se pur-amn vāqi.a ye hai

aadmī aadmī ko bhuul gayā

sab se pur-amn waqia ye hai

aadmi aadmi ko bhul gaya