laraztā hai mirā dil zahmat-e-mehr-e-daraḳhshāñ par

maiñ huuñ vo qatra-e-shabnam ki ho ḳhār-e-bayābāñ par

larazta hai mera dil zahmat-e-mehr-e-daraKHshan par

main hun wo qatra-e-shabnam ki ho KHar-e-bayaban par

phir dekhiye andāz-e-gul-afshānī-e-guftār

rakh de koī paimāna-e-sahbā mere aage

phir dekhiye andaz-e-gul-afshani-e-guftar

rakh de koi paimana-e-sahba mere aage

rau meñ hai raḳhsh-e-umr kahāñ dekhiye thame

ne haath baag par hai na pā hai rikāb meñ

rau mein hai raKHsh-e-umr kahan dekhiye thame

ne hath bag par hai na pa hai rikab mein

ġham agarche jāñ-gusil hai pa kahāñ bacheñ ki dil hai

ġham-e-ishq gar na hotā ġham-e-rozgār hotā

gham agarche jaan-gusil hai pa kahan bachen ki dil hai

gham-e-ishq gar na hota gham-e-rozgar hota

na luTtā din ko to kab raat ko yuuñ be-ḳhabar sotā

rahā khaTkā na chorī kā duā detā huuñ rahzan ko

na luTta din ko to kab raat ko yun be-KHabar sota

raha khaTka na chori ka dua deta hun rahzan ko

apnā nahīñ ye sheva ki ārām se baiTheñ

us dar pe nahīñ baar to ka.abe hī ko ho aa.e

apna nahin ye shewa ki aaram se baiThen

us dar pe nahin bar to kabe hi ko ho aae

gunjā.ish-e-adāvat-e-aġhyār yak taraf

yaañ dil meñ zof se havas-e-yār bhī nahīñ

gunjaish-e-adawat-e-aghyar yak taraf

yan dil mein zof se hawas-e-yar bhi nahin

āshiq huuñ pa māshūq-farebī hai mirā kaam

majnūñ ko burā kahtī hai lailā mire aage

aashiq hun pa mashuq-farebi hai mera kaam

majnun ko bura kahti hai laila mere aage

nikalnā ḳhuld se aadam kā sunte aa.e haiñ lekin

bahut be-ābrū ho kar tire kūche se ham nikle

nikalna KHuld se aadam ka sunte aae hain lekin

bahut be-abru ho kar tere kuche se hum nikle

bār-hā dekhī haiñ un kī ranjisheñ

par kuchh ab ke sargirānī aur hai

bar-ha dekhi hain un ki ranjishen

par kuchh ab ke sargirani aur hai

kis kā surāġh jalva hai hairat ko ai ḳhudā

ā.īna farsh-e-shash-jahat-e-intizār hai

kis ka suragh jalwa hai hairat ko ai KHuda

aaina farsh-e-shash-jahat-e-intizar hai

dil hī to hai siyāsat-e-darbāñ se Dar gayā

maiñ aur jā.ūñ dar se tire bin sadā kiye

dil hi to hai siyasat-e-darban se Dar gaya

main aur jaun dar se tere bin sada kiye

khulegā kis tarah mazmūñ mire maktūb kā yā rab

qasam khaa.ī hai us kāfir ne kāġhaz ke jalāne kī

khulega kis tarah mazmun mere maktub ka ya rab

qasam khai hai us kafir ne kaghaz ke jalane ki

jī DhūñDtā hai phir vahī fursat ki raat din

baiThe raheñ tasavvur-e-jānāñ kiye hue

ji DhunDta hai phir wahi fursat ki raat din

baiThe rahen tasawwur-e-jaanan kiye hue

nākāmi-e-nigāh hai barq-e-nazārā-soz

tū vo nahīñ ki tujh ko tamāshā kare koī

nakaami-e-nigah hai barq-e-nazara-soz

tu wo nahin ki tujh ko tamasha kare koi

rashk kahtā hai ki us kā ġhair se iḳhlās haif

aql kahtī hai ki vo be-mehr kis kā āshnā

rashk kahta hai ki us ka ghair se iKHlas haif

aql kahti hai ki wo be-mehr kis ka aashna

zindagī meñ to vo mahfil se uThā dete the

dekhūñ ab mar ga.e par kaun uThātā hai mujhe

zindagi mein to wo mahfil se uTha dete the

dekhun ab mar gae par kaun uThata hai mujhe

sābit huā hai gardan-e-mīnā pe ḳhūn-e-ḳhalq

larze hai mauj-e-mai tirī raftār dekh kar

sabit hua hai gardan-e-mina pe KHun-e-KHalq

larze hai mauj-e-mai teri raftar dekh kar

chāhiye achchhoñ ko jitnā chāhiye

ye agar chāheñ to phir kyā chāhiye

chahiye achchhon ko jitna chahiye

ye agar chahen to phir kya chahiye

garche hai tarz-e-taġhāful parda-dār-e-rāz-e-ishq

par ham aise kho.e jaate haiñ ki vo pā jaa.e hai

garche hai tarz-e-taghaful parda-dar-e-raaz-e-ishq

par hum aise khoe jate hain ki wo pa jae hai

jaan dī dī huī usī kī thī

haq to yuuñ hai ki haq adā na huā

jaan di di hui usi ki thi

haq to yun hai ki haq ada na hua

kahte haiñ jiite haiñ ummīd pe log

ham ko jiine kī bhī ummīd nahīñ

kahte hain jite hain ummid pe log

hum ko jine ki bhi ummid nahin

tum salāmat raho hazār baras

har baras ke hoñ din pachās hazār

tum salamat raho hazar baras

har baras ke hon din pachas hazar

vafā-dārī ba-shart-e-ustuvārī asl īmāñ hai

mare but-ḳhāne meñ to kaabe meñ gaaḌo birhman ko

wafa-dari ba-shart-e-ustuwari asl iman hai

mare but-KHane mein to kabe mein gaDo birhman ko

hai ab is māmūre meñ qaht-e-ġham-e-ulfat 'asad'

ham ne ye maanā ki dillī meñ raheñ khāveñge kyā

hai ab is mamure mein qaht-e-gham-e-ulfat 'asad'

hum ne ye mana ki dilli mein rahen khawenge kya

ishq par zor nahīñ hai ye vo ātish 'ġhālib'

ki lagā.e na lage aur bujhā.e na bane

ishq par zor nahin hai ye wo aatish 'ghaalib'

ki lagae na lage aur bujhae na bane

aatā hai dāġh-e-hasrat-e-dil kā shumār yaad

mujh se mire gunah kā hisāb ai ḳhudā na maañg

aata hai dagh-e-hasrat-e-dil ka shumar yaad

mujh se mere gunah ka hisab ai KHuda na mang

havas ko hai nashāt-e-kār kyā kyā

na ho marnā to jiine kā mazā kyā

hawas ko hai nashat-e-kar kya kya

na ho marna to jine ka maza kya

jab tavaqqo.a hī uTh ga.ī 'ġhālib'

kyuuñ kisī kā gila kare koī

jab tawaqqoa hi uTh gai 'ghaalib'

kyun kisi ka gila kare koi

rañj se ḳhūgar huā insāñ to miT jaatā hai rañj

mushkileñ mujh par paḌīñ itnī ki āsāñ ho ga.iiñ

ranj se KHugar hua insan to miT jata hai ranj

mushkilen mujh par paDin itni ki aasan ho gain

har ik makān ko hai makīñ se sharaf 'asad'

majnūñ jo mar gayā hai to jañgal udaas hai

har ek makan ko hai makin se sharaf 'asad'

majnun jo mar gaya hai to jangal udas hai

shorīdgī ke haath se hai sar vabāl-e-dosh

sahrā meñ ai ḳhudā koī dīvār bhī nahīñ

shoridgi ke hath se hai sar wabaal-e-dosh

sahra mein ai KHuda koi diwar bhi nahin

bosa kaisā yahī ġhanīmat hai

ki na samjhe vo lazzat-e-dushnām

bosa kaisa yahi ghanimat hai

ki na samjhe wo lazzat-e-dushnam

dost ġham-ḳhvārī meñ merī sa.ī farmāveñge kyā

zaḳhm ke bharte talak nāḳhun na baḌh jāveñge kyā

dost gham-KHwari mein meri sai farmawenge kya

zaKHm ke bharte talak naKHun na baDh jawenge kya

had chāhiye sazā meñ uqūbat ke vāste

āḳhir gunāhgār huuñ kāfar nahīñ huuñ maiñ

had chahiye saza mein uqubat ke waste

aaKHir gunahgar hun kafar nahin hun main

ḳhudā sharmā.e hāthoñ ko ki rakhte haiñ kashākash meñ

kabhī mere garebāñ ko kabhī jānāñ ke dāman ko

KHuda sharmae hathon ko ki rakhte hain kashakash mein

kabhi mere gareban ko kabhi jaanan ke daman ko

taab laa.e hī banegī 'ġhālib'

vāqi.a saḳht hai aur jaan aziiz

tab lae hi banegi 'ghaalib'

waqia saKHt hai aur jaan aziz

koī mere dil se pūchhe tire tīr-e-nīm-kash ko

ye ḳhalish kahāñ se hotī jo jigar ke paar hotā

koi mere dil se puchhe tere tir-e-nim-kash ko

ye KHalish kahan se hoti jo jigar ke par hota

mohabbat thī chaman se lekin ab ye be-dimāġhī hai

ki mauj-e-bū-e-gul se naak meñ aatā hai dam merā

mohabbat thi chaman se lekin ab ye be-dimaghi hai

ki mauj-e-bu-e-gul se nak mein aata hai dam mera

ek hañgāme pe mauqūf hai ghar kī raunaq

nauha-e-ġham hī sahī naġhma-e-shādī na sahī

ek hangame pe mauquf hai ghar ki raunaq

nauha-e-gham hi sahi naghma-e-shadi na sahi

maiñ ne maanā ki kuchh nahīñ 'ġhālib'

muft haath aa.e to burā kyā hai

main ne mana ki kuchh nahin 'ghaalib'

muft hath aae to bura kya hai

āshiqī sabr-talab aur tamannā betāb

dil kā kyā rañg karūñ ḳhūn-e-jigar hote tak

aashiqi sabr-talab aur tamanna betab

dil ka kya rang karun KHun-e-jigar hote tak

har ek baat pe kahte ho tum ki tū kyā hai

tumhīñ kaho ki ye andāz-e-guftugū kyā hai

har ek baat pe kahte ho tum ki tu kya hai

tumhin kaho ki ye andaz-e-guftugu kya hai

mohabbat meñ nahīñ hai farq jiine aur marne kā

usī ko dekh kar jiite haiñ jis kāfir pe dam nikle

mohabbat mein nahin hai farq jine aur marne ka

usi ko dekh kar jite hain jis kafir pe dam nikle

dāġh-e-firāq-e-sohbat-e-shab kī jalī huī

ik sham.a rah ga.ī hai so vo bhī ḳhamosh hai

dagh-e-firaq-e-sohbat-e-shab ki jali hui

ek shama rah gai hai so wo bhi KHamosh hai

mai vo kyuuñ bahut piite bazm-e-ġhair meñ yā rab

aaj hī huā manzūr un ko imtihāñ apnā

mai wo kyun bahut pite bazm-e-ghair mein ya rab

aaj hi hua manzur un ko imtihan apna

vo aa.e ghar meñ hamāre ḳhudā kī qudrat hai

kabhī ham un ko kabhī apne ghar ko dekhte haiñ

wo aae ghar mein hamare KHuda ki qudrat hai

kabhi hum un ko kabhi apne ghar ko dekhte hain

be-ḳhudī be-sabab nahīñ 'ġhālib'

kuchh to hai jis kī parda-dārī hai

be-KHudi be-sabab nahin 'ghaalib'

kuchh to hai jis ki parda-dari hai

dil meñ phir girye ne ik shor uThāyā 'ġhālib'

aah jo qatra na niklā thā so tūfāñ niklā

dil mein phir girye ne ek shor uThaya 'ghaalib'

aah jo qatra na nikla tha so tufan nikla

havas-e-gul ke tasavvur meñ bhī khaTkā na rahā

ajab ārām diyā be-par-o-bālī ne mujhe

hawas-e-gul ke tasawwur mein bhi khaTka na raha

ajab aaram diya be-par-o-baali ne mujhe