DhūñDne meñ bhī maza aatā hai

koī shai rakh ke bhulā dī jaa.e

DhunDne mein bhi maza aata hai

koi shai rakh ke bhula di jae

har vaqt khilte phuul kī jānib takā na kar

murjhā ke pattiyoñ ko bikharte hue bhī dekh

har waqt khilte phul ki jaanib taka na kar

murjha ke pattiyon ko bikharte hue bhi dekh

dhuup ne guzārish kī

ek buuñd bārish kī

dhup ne guzarish ki

ek bund barish ki

kamre meñ maze kī raushnī ho

achchhī sī koī kitāb dekhūñ

kamre mein maze ki raushni ho

achchhi si koi kitab dekhun

maut bhī duur bahut duur kahīñ phirtī hai

kaun ab aa ke asīroñ ko rihā.ī degā

maut bhi dur bahut dur kahin phirti hai

kaun ab aa ke asiron ko rihai dega

gaaḌī aatī hai lekin aatī hī nahīñ

rail kī paTrī dekh ke thak jaatā huuñ maiñ

gaDi aati hai lekin aati hi nahin

rail ki paTri dekh ke thak jata hun main

nazroñ se nāptā hai samundar kī vus.ateñ

sāhil pe ik shaḳhs akelā khaḌā huā

nazron se napta hai samundar ki wusaten

sahil pe ek shaKHs akela khaDa hua

aisā hañgāma na thā jañgal meñ

shahr meñ aa.e to Dar lagtā thā

aisa hangama na tha jangal mein

shahr mein aae to Dar lagta tha

abhī do chaar hī būñdeñ girīñ haiñ

magar mausam nashīlā ho gayā hai

abhi do chaar hi bunden girin hain

magar mausam nashila ho gaya hai

ab na 'ġhālib' se shikāyat hai na shikva 'mīr' kā

ban gayā maiñ bhī nishāna reḳhta ke tiir kā

ab na 'ghaalib' se shikayat hai na shikwa 'mir' ka

ban gaya main bhi nishana reKHta ke tir ka

par tol ke baiThī hai magar uḌtī nahīñ hai

tasvīr se chiḌiyā ko uḌā denā chāhiye

par tol ke baiThi hai magar uDti nahin hai

taswir se chiDiya ko uDa dena chahiye

gavāhī detā vahī merī be-gunāhī kī

vo mar gayā to use ab kahāñ se lā.ūñ maiñ

gawahi deta wahi meri be-gunahi ki

wo mar gaya to use ab kahan se laun main

sāmne dīvār par kuchh daaġh the

ġhaur se dekhā to chehre ho ga.e

samne diwar par kuchh dagh the

ghaur se dekha to chehre ho gae

din bhar bachchoñ ne mil kar patthar pheñke phal toḌe

sāñjh huī to panchhī mil kar rone lage daraḳhtoñ par

din bhar bachchon ne mil kar patthar phenke phal toDe

sanjh hui to panchhi mil kar rone lage daraKHton par

kahāñ bhaTakte phiroge 'alvī'

saḌak se pūchho kidhar ga.ī hai

kahan bhaTakte phiroge 'alwi'

saDak se puchho kidhar gai hai

sardī meñ din sard milā

har mausam bedard milā

sardi mein din sard mila

har mausam bedard mila

bahut ḳhush hue ā.īna dekh kar

yahāñ koī saanī hamārā na thā

bahut KHush hue aaina dekh kar

yahan koi sani hamara na tha

are ye dil aur itnā ḳhālī

koī musībat hī paal rakhiye

are ye dil aur itna KHali

koi musibat hi pal rakhiye

āsmān par jā pahuñchūñ

allāh terā naam likhūñ

aasman par ja pahunchun

allah tera nam likhun

hairān mat ho tairtī machhlī ko dekh kar

paanī meñ raushnī ko utarte hue bhī dekh

hairan mat ho tairti machhli ko dekh kar

pani mein raushni ko utarte hue bhi dekh

raat paḌe ghar jaanā hai

sub.h talak mar jaanā hai

raat paDe ghar jaana hai

subh talak mar jaana hai

office meñ bhī ghar ko khulā paatā huuñ maiñ

Table par sar rakh kar so jaatā huuñ maiñ

office mein bhi ghar ko khula pata hun main

Table par sar rakh kar so jata hun main

marne ke Dar se aur kahāñ tak jiyegā tū

jiine ke din tamām hue intiqāl kar

marne ke Dar se aur kahan tak jiyega tu

jine ke din tamam hue intiqal kar

raat milī tanhā.ī milī aur jaam milā

ghar se nikle to kyā kyā ārām milā

raat mili tanhai mili aur jam mila

ghar se nikle to kya kya aaram mila

'alvī' ne aaj din meñ kahānī sunā.ī thī

shāyad isī vajah se maiñ rasta bhaTak gayā

'alwi' ne aaj din mein kahani sunai thi

shayad isi wajah se main rasta bhaTak gaya

bulā rahā thā koī chīḳh chīḳh kar mujh ko

kueñ meñ jhāñk ke dekhā to maiñ hī andar thā

bula raha tha koi chiKH chiKH kar mujh ko

kuen mein jhank ke dekha to main hi andar tha

dekhā to sab ke sar pe gunāhoñ kā bojh thā

ḳhush the tamām nekiyāñ dariyā meñ Daal kar

dekha to sab ke sar pe gunahon ka bojh tha

KHush the tamam nekiyan dariya mein Dal kar

muñh-zabānī qur.ān paḌhte the

pahle bachche bhī kitne būḌhe the

munh-zabani quran paDhte the

pahle bachche bhi kitne buDhe the

'alvī' ḳhvāhish bhī thī bāñjh

jazba bhī nā-mard milā

'alwi' KHwahish bhi thi banjh

jazba bhi na-mard mila

chhoḌ gayā mujh ko 'alvī'

shāyad vo jaldī meñ thā

chhoD gaya mujh ko 'alwi'

shayad wo jaldi mein tha

'alvī' ye mo.ajiza hai december kī dhuup kā

saare makān shahr ke dho.e hue se haiñ

'alwi' ye moajiza hai december ki dhup ka

sare makan shahr ke dhoe hue se hain

ġham bahut din muft kī khātā rahā

ab use dil se nikālā chāhiye

gham bahut din muft ki khata raha

ab use dil se nikala chahiye

kuchh to is dil ko sazā dī jaa.e

us kī tasvīr haTā dī jaa.e

kuchh to is dil ko saza di jae

us ki taswir haTa di jae

raat kaun aayā thā

kar gayā sahar raushan

raat kaun aaya tha

kar gaya sahar raushan

utaar pheñkūñ badan se phaTī purānī qamīs

badan qamīs se baḌh kar kaTā-phaTā dekhūñ

utar phenkun badan se phaTi purani qamis

badan qamis se baDh kar kaTa-phaTa dekhun

sub.h se khod rahā huuñ ghar ko

ḳhvāb dekhā hai ḳhazāne vaalā

subh se khod raha hun ghar ko

KHwab dekha hai KHazane wala

mutma.in hai vo banā kar duniyā

kaun hotā huuñ maiñ Dhāne vaalā

mutmain hai wo bana kar duniya

kaun hota hun main Dhane wala

maiñ nāhaq din kaaT rahā huuñ

kaun yahāñ sau saal jiyā hai

main nahaq din kaT raha hun

kaun yahan sau sal jiya hai

rakhte ho agar aañkh to bāhar se na dekho

dekho mujhe andar se bahut TuuT chukā huuñ

rakhte ho agar aankh to bahar se na dekho

dekho mujhe andar se bahut TuT chuka hun

achchhe din kab ā.eñge

kyā yuuñ hī mar jā.eñge

achchhe din kab aaenge

kya yun hi mar jaenge

kitnā mushkil hai zindagī karnā

aur na socho to kitnā āsāñ hai

kitna mushkil hai zindagi karna

aur na socho to kitna aasan hai

aur bāzār se kyā le jā.ūñ

pahlī bārish kā mazā le jā.ūñ

aur bazar se kya le jaun

pahli barish ka maza le jaun

ghar meñ kyā aayā ki mujh ko

dīvāroñ ne gher liyā hai

ghar mein kya aaya ki mujh ko

diwaron ne gher liya hai

bichhaḌte vaqt aisā bhī huā hai

kisī kī siskiyāñ achchhī lagī haiñ

bichhaDte waqt aisa bhi hua hai

kisi ki siskiyan achchhi lagi hain

maanā ki tū zahīn bhī hai ḳhūb-rū bhī hai

tujh sā na maiñ huā to bhalā kyā burā huā

mana ki tu zahin bhi hai KHub-ru bhi hai

tujh sa na main hua to bhala kya bura hua

kāñTe kī tarah suukh ke rah jāoge 'alvī'

chhoḌo ye ġhazal-goī ye bīmārī burī hai

kanTe ki tarah sukh ke rah jaoge 'alwi'

chhoDo ye ghazal-goi ye bimari buri hai

thoḌī sardī zarā sā nazla hai

shā.erī kā mizāj patlā hai

thoDi sardi zara sa nazla hai

shaeri ka mizaj patla hai

bikher de mujhe chāroñ taraf ḳhalāoñ meñ

kuchh is tarah se alag kar ki juḌ na pā.ūñ maiñ

bikher de mujhe chaaron taraf KHalaon mein

kuchh is tarah se alag kar ki juD na paun main

kyuuñ sar khapā rahe ho mazāmīñ kī khoj meñ

kar lo jadīd shā.erī lafzoñ ko joḌ kar

kyun sar khapa rahe ho mazamin ki khoj mein

kar lo jadid shaeri lafzon ko joD kar

tuḌā-muḌā hai magar ḳhudā hai

ise to sāhib sambhāl rakhiye

tuDa-muDa hai magar KHuda hai

ise to sahib sambhaal rakhiye