Top 20 Intizaar Shayari

ik raat vo gayā thā jahāñ baat rok ke

ab tak rukā huā huuñ vahīñ raat rok ke

ek raat wo gaya tha jahan baat rok ke

ab tak ruka hua hun wahin raat rok ke

andāz hū-ba-hū tirī āvāz-e-pā kā thā

dekhā nikal ke ghar se to jhoñkā havā kā thā

andaz hu-ba-hu teri aawaz-e-pa ka tha

dekha nikal ke ghar se to jhonka hawa ka tha

ye aur baat ki un ko yaqīñ nahīñ aayā

pa koī baat to barsoñ meñ ham ne kī yaaro

ye aur baat ki un ko yaqin nahin aaya

pa koi baat to barson mein hum ne ki yaro

kahīñ vo aa ke miTā deñ na intizār kā lutf

kahīñ qubūl na ho jaa.e iltijā merī

kahin wo aa ke miTa den na intizar ka lutf

kahin qubul na ho jae iltija meri

ab in hudūd meñ laayā hai intizār mujhe

vo aa bhī jaa.eñ to aa.e na e'tibār mujhe

ab in hudud mein laya hai intizar mujhe

wo aa bhi jaen to aae na e'tibar mujhe

isī ḳhayāl meñ har shām-e-intizār kaTī

vo aa rahe haiñ vo aa.e vo aa.e jaate haiñ

isi KHayal mein har sham-e-intizar kaTi

wo aa rahe hain wo aae wo aae jate hain

kamāl-e-ishq to dekho vo aa ga.e lekin

vahī hai shauq vahī intizār baaqī hai

kamal-e-ishq to dekho wo aa gae lekin

wahi hai shauq wahi intizar baqi hai

hameñ bhī aaj hī karnā thā intizār us kā

use bhī aaj hī sab vaade bhuul jaane the

hamein bhi aaj hi karna tha intizar us ka

use bhi aaj hi sab wade bhul jaane the

kaun aa.egā yahāñ koī na aayā hogā

merā darvāza havāoñ ne hilāyā hogā

kaun aaega yahan koi na aaya hoga

mera darwaza hawaon ne hilaya hoga

ye na thī hamārī qismat ki visāl-e-yār hotā

agar aur jiite rahte yahī intizār hotā

ye na thi hamari qismat ki visal-e-yar hota

agar aur jite rahte yahi intizar hota

tamām jism ko āñkheñ banā ke raah tako

tamām khel mohabbat meñ intizār kā hai

tamam jism ko aankhen bana ke rah tako

tamam khel mohabbat mein intizar ka hai

ab kaun muntazir hai hamāre liye vahāñ

shaam aa ga.ī hai lauT ke ghar jaa.eñ ham to kyā

ab kaun muntazir hai hamare liye wahan

sham aa gai hai lauT ke ghar jaen hum to kya

tanhā.iyāñ tumhārā pata pūchhtī rahīñ

shab-bhar tumhārī yaad ne sone nahīñ diyā

tanhaiyan tumhaara pata puchhti rahin

shab-bhar tumhaari yaad ne sone nahin diya

na koī va.ada na koī yaqīñ na koī umiid

magar hameñ to tirā intizār karnā thā

na koi wada na koi yaqin na koi umid

magar hamein to tera intizar karna tha

hairāñ huuñ is qadar ki shab-e-vasl bhī mujhe

tū sāmne hai aur tirā intizār hai

hairan hun is qadar ki shab-e-wasl bhi mujhe

tu samne hai aur tera intizar hai

aadhī se ziyāda shab-e-ġham kaaT chukā huuñ

ab bhī agar aa jaao to ye raat baḌī hai

aadhi se ziyaada shab-e-gham kaT chuka hun

ab bhi agar aa jao to ye raat baDi hai

muddat se ḳhvāb meñ bhī nahīñ niiñd kā ḳhayāl

hairat meñ huuñ ye kis kā mujhe intizār hai

muddat se KHwab mein bhi nahin nind ka KHayal

hairat mein hun ye kis ka mujhe intizar hai

hazār rañg-ba-dāmāñ sahī magar duniyā

bas ek silsila-e-etibār hai, kyā hai

hazar rang-ba-daman sahi magar duniya

bas ek silsila-e-etibar hai, kya hai

phir baiThe baiThe vāda-e-vasl us ne kar liyā

phir uTh khaḌā huā vahī rog intizār kā

phir baiThe baiThe wada-e-wasl us ne kar liya

phir uTh khaDa hua wahi rog intizar ka

ab jo patthar hai aadmī thā kabhī

is ko kahte haiñ intizār miyāñ

ab jo patthar hai aadmi tha kabhi

is ko kahte hain intizar miyan