ai mohabbat tire anjām pe ronā aayā

jaane kyuuñ aaj tire naam pe ronā aayā

ai mohabbat tere anjam pe rona aaya

jaane kyun aaj tere nam pe rona aaya

ab to ḳhushī kā ġham hai na ġham kī ḳhushī mujhe

be-his banā chukī hai bahut zindagī mujhe

ab to KHushi ka gham hai na gham ki KHushi mujhe

be-his bana chuki hai bahut zindagi mujhe

kaise kah duuñ ki mulāqāt nahīñ hotī hai

roz milte haiñ magar baat nahīñ hotī hai

kaise kah dun ki mulaqat nahin hoti hai

roz milte hain magar baat nahin hoti hai

un kā zikr un kī tamannā un kī yaad

vaqt kitnā qīmtī hai aaj kal

un ka zikr un ki tamanna un ki yaad

waqt kitna qimti hai aaj kal

mere ham-nafas mere ham-navā mujhe dost ban ke daġhā na de

maiñ huuñ dard-e-ishq se jāñ-ba-lab mujhe zindagī kī duā na de

mere ham-nafas mere ham-nawa mujhe dost ban ke dagha na de

main hun dard-e-ishq se jaan-ba-lab mujhe zindagi ki dua na de

jaane vaale se mulāqāt na hone paa.ī

dil kī dil meñ hī rahī baat na hone paa.ī

jaane wale se mulaqat na hone pai

dil ki dil mein hi rahi baat na hone pai

yuuñ to har shaam umīdoñ meñ guzar jaatī hai

aaj kuchh baat hai jo shaam pe ronā aayā

yun to har sham umidon mein guzar jati hai

aaj kuchh baat hai jo sham pe rona aaya

kabhī yak-ba-yak tavajjoh kabhī daf.atan taġhāful

mujhe aazmā rahā hai koī ruḳh badal badal kar

kabhi yak-ba-yak tawajjoh kabhi dafatan taghaful

mujhe aazma raha hai koi ruKH badal badal kar

mujhe dost kahne vaale zarā dostī nibhā de

ye mutālba hai haq kā koī iltijā nahīñ hai

mujhe dost kahne wale zara dosti nibha de

ye mutalba hai haq ka koi iltija nahin hai

unheñ apne dil kī ḳhabreñ mire dil se mil rahī haiñ

maiñ jo un se ruuTh jā.ūñ to payām tak na pahuñche

unhen apne dil ki KHabren mere dil se mil rahi hain

main jo un se ruTh jaun to payam tak na pahunche

mujhe to qaid-e-mohabbat aziiz thī lekin

kisī ne mujh ko giraftār kar ke chhoḌ diyā

mujhe to qaid-e-mohabbat aziz thi lekin

kisi ne mujh ko giraftar kar ke chhoD diya

mohabbat hī meñ milte haiñ shikāyat ke maze paiham

mohabbat jitnī baḌhtī hai shikāyat hotī jaatī hai

mohabbat hi mein milte hain shikayat ke maze paiham

mohabbat jitni baDhti hai shikayat hoti jati hai

mujhe chhoḌ de mere haal par tirā kyā bharosa hai chāragar

ye tirī navāzish-e-muḳhtasar merā dard aur baḌhā na de

mujhe chhoD de mere haal par tera kya bharosa hai chaaragar

ye teri nawazish-e-muKHtasar mera dard aur baDha na de

jab huā zikr zamāne meñ mohabbat kā 'shakīl'

mujh ko apne dil-e-nākām pe ronā aayā

jab hua zikr zamane mein mohabbat ka 'shakil'

mujh ko apne dil-e-nakaam pe rona aaya

kāñToñ se guzar jaatā huuñ dāman ko bachā kar

phūloñ kī siyāsat se maiñ begāna nahīñ huuñ

kanTon se guzar jata hun daman ko bacha kar

phulon ki siyasat se main begana nahin hun

chāhiye ḳhud pe yaqīn-e-kāmil

hausla kis kā baḌhātā hai koī

chahiye KHud pe yaqin-e-kaamil

hausla kis ka baDhata hai koi

vo ham se ḳhafā haiñ ham un se ḳhafā haiñ

magar baat karne ko jī chāhtā hai

wo hum se KHafa hain hum un se KHafa hain

magar baat karne ko ji chahta hai

tum phir usī adā se añgḌā.ī le ke hañs do

aa jā.egā palaT kar guzrā huā zamāna

tum phir usi ada se angDai le ke hans do

aa jaega palaT kar guzra hua zamana

ye adā-e-be-niyāzī tujhe bevafā mubārak

magar aisī be-ruḳhī kyā ki salām tak na pahuñche

ye ada-e-be-niyazi tujhe bewafa mubarak

magar aisi be-ruKHi kya ki salam tak na pahunche

tark-e-mai hī samajh ise nāseh

itnī pī hai ki pī nahīñ jaatī

tark-e-mai hi samajh ise naseh

itni pi hai ki pi nahin jati

na.ī sub.h par nazar hai magar aah ye bhī Dar hai

ye sahar bhī rafta rafta kahīñ shaam tak na pahuñche

nai subh par nazar hai magar aah ye bhi Dar hai

ye sahar bhi rafta rafta kahin sham tak na pahunche

vahī kārvāñ vahī rāste vahī zindagī vahī marhale

magar apne apne maqām par kabhī tum nahīñ kabhī ham nahīñ

wahi karwan wahi raste wahi zindagi wahi marhale

magar apne apne maqam par kabhi tum nahin kabhi hum nahin

bhej dī tasvīr apnī un ko ye likh kar 'shakīl'

aap kī marzī hai chāhe jis nazar se dekhiye

bhej di taswir apni un ko ye likh kar 'shakil'

aap ki marzi hai chahe jis nazar se dekhiye

kyā asar thā jazba-e-ḳhāmosh meñ

ḳhud vo khich kar aa ga.e āġhosh meñ

kya asar tha jazba-e-KHamosh mein

KHud wo khich kar aa gae aaghosh mein

maiñ nazar se pī rahā thā to ye dil ne bad-duā dī

tirā haath zindagī bhar kabhī jaam tak na pahuñche

main nazar se pi raha tha to ye dil ne bad-dua di

tera hath zindagi bhar kabhi jam tak na pahunche

koī ai 'shakīl' pūchhe ye junūñ nahīñ to kyā hai

ki usī ke ho ga.e ham jo na ho sakā hamārā

koi ai 'shakil' puchhe ye junun nahin to kya hai

ki usi ke ho gae hum jo na ho saka hamara

kyā hasīñ ḳhvāb mohabbat ne dikhāyā thā hameñ

khul ga.ī aañkh to tābīr pe ronā aayā

kya hasin KHwab mohabbat ne dikhaya tha hamein

khul gai aankh to tabir pe rona aaya

kaafī hai mire dil kī tasallī ko yahī baat

aap aa na sake aap kā paiġhām to aayā

kafi hai mere dil ki tasalli ko yahi baat

aap aa na sake aap ka paigham to aaya

merā azm itnā buland hai ki parā.e sholoñ kā Dar nahīñ

mujhe ḳhauf ātish-e-gul se hai ye kahīñ chaman ko jalā na de

mera azm itna buland hai ki parae sholon ka Dar nahin

mujhe KHauf aatish-e-gul se hai ye kahin chaman ko jala na de

buz-dilī hogī charāġhoñ ko dikhānā āñkheñ

abr chhaT jaa.e to sūraj se milānā āñkheñ

buz-dili hogi charaghon ko dikhana aankhen

abr chhaT jae to suraj se milana aankhen

lamhe udaas udaas fazā.eñ ghuTī ghuTī

duniyā agar yahī hai to duniyā se bach ke chal

lamhe udas udas fazaen ghuTi ghuTi

duniya agar yahi hai to duniya se bach ke chal

kal raat zindagī se mulāqāt ho ga.ī

lab thartharā rahe the magar baat ho ga.ī

kal raat zindagi se mulaqat ho gai

lab tharthara rahe the magar baat ho gai

dil kī barbādiyoñ pe nāzāñ huuñ

fat.h pā kar shikast khaa.ī hai

dil ki barbaadiyon pe nazan hun

fath pa kar shikast khai hai

mirī zindagī pe na muskurā mujhe zindagī kā alam nahīñ

jise tere ġham se ho vāsta vo ḳhizāñ bahār se kam nahīñ

meri zindagi pe na muskura mujhe zindagi ka alam nahin

jise tere gham se ho wasta wo KHizan bahaar se kam nahin

kitnī dil-kash haiñ tirī tasvīr kī ra.anā.iyāñ

lekin ai parda-nashīñ tasvīr phir tasvīr hai

kitni dil-kash hain teri taswir ki ranaiyan

lekin ai parda-nashin taswir phir taswir hai

dil kī taraf 'shakīl' tavajjoh zarūr ho

ye ghar ujaḌ gayā to basāyā na jā.egā

dil ki taraf 'shakil' tawajjoh zarur ho

ye ghar ujaD gaya to basaya na jaega

mushkil thā kuchh to ishq kī baazī ko jītnā

kuchh jītne ke ḳhauf se haare chale ga.e

mushkil tha kuchh to ishq ki bazi ko jitna

kuchh jitne ke KHauf se haare chale gae

mujhe aa gayā yaqīñ sā ki yahī hai merī manzil

sar-e-rāh jab kisī ne mujhe daf.atan pukārā

mujhe aa gaya yaqin sa ki yahi hai meri manzil

sar-e-rah jab kisi ne mujhe dafatan pukara

hameñ jin kī diid kī aas thī vo mile to raah meñ yuuñ mile

maiñ nazar uThā ke taḌap gayā vo nazar uThā ke guzar ga.e

hamein jin ki did ki aas thi wo mile to rah mein yun mile

main nazar uTha ke taDap gaya wo nazar uTha ke guzar gae

tujh se barham huuñ kabhī ḳhud se ḳhafā

kuchh ajab raftār hai tere baġhair

tujh se barham hun kabhi KHud se KHafa

kuchh ajab raftar hai tere baghair

pī shauq se vaa.iz are kyā baat hai Dar kī

dozaḳh tire qabze meñ hai jannat tire ghar kī

pi shauq se waiz are kya baat hai Dar ki

dozaKH tere qabze mein hai jannat tere ghar ki

kis se jā kar māñgiye dard-e-mohabbat kī davā

chāra-gar ab ḳhud hī bechāre nazar aane lage

kis se ja kar mangiye dard-e-mohabbat ki dawa

chaara-gar ab KHud hi bechaare nazar aane lage

vo havā de rahe haiñ dāman kī

haa.e kis vaqt niiñd aa.ī hai

wo hawa de rahe hain daman ki

hae kis waqt nind aai hai

ġham kī duniyā rahe ābād 'shakīl'

muflisī meñ koī jāgīr to hai

gham ki duniya rahe aabaad 'shakil'

muflisi mein koi jagir to hai

be-piye shaiḳh farishta thā magar

pī ke insān huā jaatā hai

be-piye shaiKH farishta tha magar

pi ke insan hua jata hai

ik shahanshāh ne banvā ke hasīñ tāj-mahal

saarī duniyā ko mohabbat kī nishānī dī hai

ek shahanshah ne banwa ke hasin taj-mahal

sari duniya ko mohabbat ki nishani di hai

vo ham se duur hote jā rahe haiñ

bahut maġhrūr hote jā rahe haiñ

wo hum se dur hote ja rahe hain

bahut maghrur hote ja rahe hain

shām-e-ġham karvaT badaltā hī nahīñ

vaqt bhī ḳhuddār hai tere baġhair

sham-e-gham karwaT badalta hi nahin

waqt bhi KHuddar hai tere baghair

rahmatoñ se nibāh meñ guzrī

umr saarī gunāh meñ guzrī

rahmaton se nibah mein guzri

umr sari gunah mein guzri

na paimāne khanakte haiñ na daur-e-jām chaltā hai

na.ī duniyā ke rindoñ meñ ḳhudā kā naam chaltā hai

na paimane khanakte hain na daur-e-jam chalta hai

nai duniya ke rindon mein KHuda ka nam chalta hai