tum se bichhaḌ kar zinda haiñ

jaan bahut sharminda haiñ

tum se bichhaD kar zinda hain

jaan bahut sharminda hain

ḳhvāb kī tarah bikhar jaane ko jī chāhtā hai

aisī tanhā.ī ki mar jaane ko jī chāhtā hai

KHwab ki tarah bikhar jaane ko ji chahta hai

aisi tanhai ki mar jaane ko ji chahta hai

dil pāgal hai roz na.ī nādānī kartā hai

aag meñ aag milātā hai phir paanī kartā hai

dil pagal hai roz nai nadani karta hai

aag mein aag milata hai phir pani karta hai

duā ko haat uThāte hue laraztā huuñ

kabhī duā nahīñ māñgī thī maañ ke hote hue

dua ko hat uThate hue larazta hun

kabhi dua nahin mangi thi man ke hote hue

ḳhud ko bikharte dekhte haiñ kuchh kar nahīñ paate haiñ

phir bhī log ḳhudāoñ jaisī bāteñ karte haiñ

KHud ko bikharte dekhte hain kuchh kar nahin pate hain

phir bhi log KHudaon jaisi baaten karte hain

mire ḳhudā mujhe itnā to mo'tabar kar de

maiñ jis makān meñ rahtā huuñ us ko ghar kar de

mere KHuda mujhe itna to mo'tabar kar de

main jis makan mein rahta hun us ko ghar kar de

beTiyāñ baap kī āñkhoñ meñ chhupe ḳhvāb ko pahchāntī haiñ

aur koī dūsrā is ḳhvāb ko paḌh le to burā māntī haiñ

beTiyan bap ki aankhon mein chhupe KHwab ko pahchanti hain

aur koi dusra is KHwab ko paDh le to bura manti hain

duā.eñ yaad karā dī ga.ī thiiñ bachpan meñ

so zaḳhm khāte rahe aur duā diye ga.e ham

duaen yaad kara di gai thin bachpan mein

so zaKHm khate rahe aur dua diye gae hum

miTTī kī mohabbat meñ ham āshufta-saroñ ne

vo qarz utāre haiñ ki vājib bhī nahīñ the

miTTi ki mohabbat mein hum aashufta-saron ne

wo qarz utare hain ki wajib bhi nahin the

ek charāġh aur ek kitāb aur ek ummīd asāsa

us ke ba.ad to jo kuchh hai vo sab afsāna hai

ek charagh aur ek kitab aur ek ummid asasa

us ke baad to jo kuchh hai wo sab afsana hai

azaab ye bhī kisī aur par nahīñ aayā

ki ek umr chale aur ghar nahīñ aayā

azab ye bhi kisi aur par nahin aaya

ki ek umr chale aur ghar nahin aaya

vafā kī ḳhair manātā huuñ bevafā.ī meñ bhī

maiñ us kī qaid meñ huuñ qaid se rihā.ī meñ bhī

wafa ki KHair manata hun bewafai mein bhi

main us ki qaid mein hun qaid se rihai mein bhi

raas aane lagī duniyā to kahā dil ne ki jā

ab tujhe dard kī daulat nahīñ milne vaalī

ras aane lagi duniya to kaha dil ne ki ja

ab tujhe dard ki daulat nahin milne wali

zamāna ho gayā ḳhud se mujhe laḌte-jhagaḌte

maiñ apne aap se ab sulh karnā chāhtā huuñ

zamana ho gaya KHud se mujhe laDte-jhagaDte

main apne aap se ab sulh karna chahta hun

samundaroñ ko bhī hairat huī ki Dūbte vaqt

kisī ko ham ne madad ke liye pukārā nahīñ

samundaron ko bhi hairat hui ki Dubte waqt

kisi ko hum ne madad ke liye pukara nahin

ghar kī vahshat se laraztā huuñ magar jaane kyuuñ

shaam hotī hai to ghar jaane ko jī chāhtā hai

ghar ki wahshat se larazta hun magar jaane kyun

sham hoti hai to ghar jaane ko ji chahta hai

vahī firāq kī bāteñ vahī hikāyat-e-vasl

na.ī kitāb kā ek ik varaq purānā thā

wahi firaq ki baaten wahi hikayat-e-wasl

nai kitab ka ek ek waraq purana tha

sitāroñ se bharā ye āsmāñ kaisā lagegā

hamāre ba.ad tum ko ye jahāñ kaisā lagegā

sitaron se bhara ye aasman kaisa lagega

hamare baad tum ko ye jahan kaisa lagega

maiñ zindagī kī duā māñgne lagā huuñ bahut

jo ho sake to duāoñ ko be-asar kar de

main zindagi ki dua mangne laga hun bahut

jo ho sake to duaon ko be-asar kar de

vahī charāġh bujhā jis kī lau qayāmat thī

usī pe zarb paḌī jo shajar purānā thā

wahi charagh bujha jis ki lau qayamat thi

usi pe zarb paDi jo shajar purana tha

koī to phuul khilā.e duā ke lahje meñ

ajab tarah kī ghuTan hai havā ke lahje meñ

koi to phul khilae dua ke lahje mein

ajab tarah ki ghuTan hai hawa ke lahje mein

dil kabhī ḳhvāb ke pīchhe kabhī duniyā kī taraf

ek ne ajr diyā ek ne ujrat nahīñ dī

dil kabhi KHwab ke pichhe kabhi duniya ki taraf

ek ne ajr diya ek ne ujrat nahin di

vo kyā manzil jahāñ se rāste aage nikal jaa.eñ

so ab phir ik safar kā silsila karnā paḌegā

wo kya manzil jahan se raste aage nikal jaen

so ab phir ek safar ka silsila karna paDega

ik ḳhvāb hī to thā jo farāmosh ho gayā

ik yaad hī to thī jo bhulā dī ga.ī to kyā

ek KHwab hi to tha jo faramosh ho gaya

ek yaad hi to thi jo bhula di gai to kya

tamām ḳhāna-ba-doshoñ meñ mushtarak hai ye baat

sab apne apne gharoñ ko palaT ke dekhte haiñ

tamam KHana-ba-doshon mein mushtarak hai ye baat

sab apne apne gharon ko palaT ke dekhte hain

buland hāthoñ meñ zanjīr Daal dete haiñ

ajiib rasm chalī hai duā na māñge koī

buland hathon mein zanjir Dal dete hain

ajib rasm chali hai dua na mange koi

ghar se nikle hue beToñ kā muqaddar ma.alūm

maañ ke qadmoñ meñ bhī jannat nahīñ milne vaalī

ghar se nikle hue beTon ka muqaddar malum

man ke qadmon mein bhi jannat nahin milne wali

kareñ to kis se kareñ nā-rasā.iyoñ kā gila

safar tamām huā ham-safar nahīñ aayā

karen to kis se karen na-rasaiyon ka gila

safar tamam hua ham-safar nahin aaya

payambaroñ se zamīneñ vafā nahīñ kartīñ

ham aise kaun ḳhudā the ki apne ghar rahte

payambaron se zaminen wafa nahin kartin

hum aise kaun KHuda the ki apne ghar rahte

ham apne raftagāñ ko yaad rakhnā chāhte haiñ

diloñ ko dard se ābād rakhnā chāhte haiñ

hum apne raftagan ko yaad rakhna chahte hain

dilon ko dard se aabaad rakhna chahte hain

bahut mushkil zamānoñ meñ bhī ham ahl-e-mohabbat

vafā par ishq kī buniyād rakhnā chāhte haiñ

bahut mushkil zamanon mein bhi hum ahl-e-mohabbat

wafa par ishq ki buniyaad rakhna chahte hain

ham bhī ik shaam bahut uljhe hue the ḳhud meñ

ek shaam us ko bhī hālāt ne mohlat nahīñ dī

hum bhi ek sham bahut uljhe hue the KHud mein

ek sham us ko bhi haalat ne mohlat nahin di

hamīñ meñ rahte haiñ vo log bhī ki jin ke sabab

zamīñ buland huī āsmāñ ke hote hue

hamin mein rahte hain wo log bhi ki jin ke sabab

zamin buland hui aasman ke hote hue

umīd-o-bīm ke mehvar se haT ke dekhte haiñ

zarā sī der ko duniyā se kaT ke dekhte haiñ

umid-o-bim ke mehwar se haT ke dekhte hain

zara si der ko duniya se kaT ke dekhte hain

haamī bhī na the munkir-e-'ġhālib' bhī nahīñ the

ham ahl-e-tazabzub kisī jānib bhī nahīñ the

hami bhi na the munkir-e-'ghaalib' bhi nahin the

hum ahl-e-tazabzub kisi jaanib bhi nahin the

ye bastiyāñ haiñ ki maqtal duā kiye jaa.eñ

duā ke din haiñ musalsal duā kiye jaa.eñ

ye bastiyan hain ki maqtal dua kiye jaen

dua ke din hain musalsal dua kiye jaen

kahīñ kahīñ se kuchh misre ek-ādh ġhazal kuchh sher

is pūñjī par kitnā shor machā saktā thā maiñ

kahin kahin se kuchh misre ek-adh ghazal kuchh sher

is punji par kitna shor macha sakta tha main

dayār-e-nūr meñ tīra-shaboñ kā sāthī ho

koī to ho jo mirī vahshatoñ kā sāthī ho

dayar-e-nur mein tira-shabon ka sathi ho

koi to ho jo meri wahshaton ka sathi ho

javāb aa.e na aa.e savāl uThā to sahī

phir is savāl meñ pahlū na.e savāl ke rakh

jawab aae na aae sawal uTha to sahi

phir is sawal mein pahlu nae sawal ke rakh

ḳhaak meñ daulat-e-pindār-o-anā miltī hai

apnī miTTī se bichhaḌne kī sazā miltī hai

KHak mein daulat-e-pindar-o-ana milti hai

apni miTTi se bichhaDne ki saza milti hai

samajh rahe haiñ magar bolne kā yaarā nahīñ

jo ham se mil ke bichhaḌ jaa.e vo hamārā nahīñ

samajh rahe hain magar bolne ka yara nahin

jo hum se mil ke bichhaD jae wo hamara nahin

huā hai yuuñ bhī ki ik umr apne ghar na ga.e

ye jānte the koī raah dekhtā hogā

hua hai yun bhi ki ek umr apne ghar na gae

ye jaante the koi rah dekhta hoga

vo ham nahīñ the to phir kaun thā sar-e-bāzār

jo kah rahā thā ki biknā hameñ gavārā nahīñ

wo hum nahin the to phir kaun tha sar-e-bazar

jo kah raha tha ki bikna hamein gawara nahin

duniyā badal rahī hai zamāne ke saath saath

ab roz roz dekhne vaalā kahāñ se laa.eñ

duniya badal rahi hai zamane ke sath sath

ab roz roz dekhne wala kahan se laen

mirā ḳhush-ḳhirām balā kā tez-ḳhirām thā

mirī zindagī se chalā gayā to ḳhabar huī

mera KHush-KHiram bala ka tez-KHiram tha

meri zindagi se chala gaya to KHabar hui

ye vaqt kis kī ra.ūnat pe ḳhaak Daal gayā

ye kaun bol rahā thā ḳhudā ke lahje meñ

ye waqt kis ki raunat pe KHak Dal gaya

ye kaun bol raha tha KHuda ke lahje mein

ye mo.ajaza bhī kisī kī duā kā lagtā hai

ye shahr ab bhī usī be-vafā kā lagtā hai

ye moajaza bhi kisi ki dua ka lagta hai

ye shahr ab bhi usi be-wafa ka lagta hai

maiñ chup rahā ki vazāhat se baat baḌh jaatī

hazār sheva-e-husn-e-bayāñ ke hote hue

main chup raha ki wazahat se baat baDh jati

hazar shewa-e-husn-e-bayan ke hote hue

dar-o-dīvār itne ajnabī kyuuñ lag rahe haiñ

ḳhud apne ghar meñ āḳhir itnā Dar kyuuñ lag rahā hai

dar-o-diwar itne ajnabi kyun lag rahe hain

KHud apne ghar mein aaKHir itna Dar kyun lag raha hai

roz ik taaza qasīda na.ī tashbīb ke saath

rizq bar-haq hai ye ḳhidmat nahīñ hogī ham se

roz ek taza qasida nai tashbib ke sath

rizq bar-haq hai ye KHidmat nahin hogi hum se