Jashn-e-Azadi

hai mohabbat is vatan se apnī miTTī se hameñ

is liye apnā kareñge jaan-o-tan qurbān ham

miTTī kī mohabbat meñ ham āshufta-saroñ ne

vo qarz utāre haiñ ki vājib bhī nahīñ the

vatan kī pāsbānī jaan-o-īmāñ se bhī afzal hai

maiñ apne mulk kī ḳhātir kafan bhī saath rakhtā huuñ

dil se niklegī na mar kar bhī vatan kī ulfat

merī miTTī se bhī ḳhushbū-e-vafā aa.egī

tan-man miTā.e jaao tum naam-e-qaumiyat par

raah-e-vatan par apnī jāneñ laḌā.e jaao

vatan kī ret zarā eḌiyāñ ragaḌne de

mujhe yaqīñ hai ki paanī yahīñ se niklegā

vatan kī ḳhaak se mar kar bhī ham ko uns baaqī hai

mazā dāmān-e-mādar kā hai is miTTī ke dāman meñ

ḳhuuñ shahīdān-e-vatan kā rang lā kar hī rahā

aaj ye jannat-nishāñ hindostāñ āzād hai

lahū vatan ke shahīdoñ kā rang laayā hai

uchhal rahā hai zamāne meñ naam-e-āzādī

ai ahl-e-vatan shaam-o-sahar jāgte rahnā

aġhyār haiñ āmāda-e-shar jāgte rahnā

diloñ meñ hubb-e-vatan hai agar to ek raho

nikhārnā ye chaman hai agar to ek raho

vatan ke jaañ-nisār haiñ vatan ke kaam ā.eñge

ham is zamīñ ko ek roz āsmāñ banā.eñge

us mulk kī sarhad ko koī chhū nahīñ saktā

jis mulk kī sarhad kī nigahbān haiñ āñkheñ

maz.hab nahīñ sikhātā aapas meñ bair rakhnā

hindī haiñ ham vatan hai hindostāñ hamārā

jannat kī zindagī hai jis kī fazā meñ jiinā

merā vatan vahī hai merā vatan vahī hai

na pūchho ham-safaro mujh se mājrā-e-vatan

vatan hai mujh pe fidā aur maiñ fidā-e-vatan

kārvāñ jin kā luTā raah meñ āzādī kī

qaum kā mulk kā un dard ke māroñ ko salām

vo hindī naujavāñ ya.anī alam-bardār-e-āzādī

vatan kī pāsbāñ vo teġh-e-jauhar-daar-e-āzādī

kyā karishma hai mire jazba-e-āzādī kā

thī jo dīvār kabhī ab hai vo dar kī sūrat